Hulda utundo i kum lembakeca pare

KA NWANG’U icidh iliewo cula ma nok mi Sangir Besar i ng’om mir Indonésie oro moko m’ukadhu ang’ec, nwang’u ineno nyimego mwa adek i dhu wat keca. Jung’eyogi lee mandha i culane nikum tic migi mi konyo dhanu ginyang’ i Biblia. Ento i saa maeca, gibed gitimo tic moko m’ukoc bor dit.

Ku kwong’a gibed giloro i dhu pii, gicoko kidi ma dongo, man giidho kugi i dhu wat. Kidine moko ubed ubedo rom ku mupira ma dongo. I ng’eye, gibedo iwi dul man giting’o nyondo kunoke martho pi nigoyo i kidinegi thindho thindho nikadhu tong’ gweno. Ka gidaru, gicoko kidi ma nzirne i baf, giyeyogi, man gidok kugi ka ma gikwo i iye. Tokcenne, gipiko kidine i saki ma dongo ma jutiyo ko pi nibologi i mutukari man niyiko ndaki.

Nyamegone acel nyinge Hulda. Ebed ecopere ire nitimo tije pi saa ma lee nisagu juwagi zoo. Sente m’ebed enwang’une ceke ebed epong’o ko yeny ma kubang’ ceng’ mi juot pare. Ento i ng’ey kare, eketho lembakeca moko mange. Ebino ku yeny mi tablet kara ebed emond i aplikasio JW Library. Hulda unyang’ nia video man jamtic mange ma nwang’ere i aplikasione bikonye nimedo tic pare mi lembanyong’a man nyang’ pare i Biblia.

E pi dwi acel ku nusu, kubang’ kugweno Hulda ubed utimo saa ario mange m’uweko saa ma nja mi tic pare, m’ebegoyo kidi ma romo pong’o ng’ey mutukari acel ma nyanok. Tokcenne, enwang’u sente ma ng’iewo tablet.

Hulda yero kumae: “Kadok nwang’u goyo kidi ubed uola yereyere man ubed unyayu ret i kuma de, re wiya wil ku litho man monjone ceke kinde m’acaku tiyo ku tablet ma nyen maeni pi ninwang’u adwogi ma ber i tic mi lembanyong’a man niyiko coko yot yot nisagu.” Eyero bende nia tabletne ukonye i acaki pa thong’om mi Korona, kum program ceke mi cokiri ubed ukadhu ku yore mi video. Wan bende watie kud anyong’a nia Hulda utundo i kum lembakeca pare.