Bed won tegocwiny calu Zadok

1-2. Zadok ubino ng’a? (1 Lemkei 12:22, 26-28)

KEPAR nyanok: Udul mi jumaco ma kadhu elufu dak adek ku pier ang’wen (340000) gicokiri pi niketho Daudi ni ubimo iwi Israel ceke. Gibeweco, gibewero wer mi pak kud anyong’a man gibeng’iero. Dwandgi ucero ng’om pi nindo adek man ubewinjere kud i kind gudi ma kago kud Hebron. (1 Kei. 12:39) Nwang’u pi jalawobi moko ma nyinge Zadok romo ng’eyere de ngo kud i kind udul dhanu ma dit maeno. Ento Yehova uketho wang’ey nia Zadok de ubino nuti i kindgi. (Som 1 Lemkei 12:22, 26-28.) Zadok ubino ng’a?

² Zadok ubino jalam man ebed etimo karacelo kud Abiathar ma jalam ma dit. Ebino bende janen lembe ma riek lee m’utie ku copo mi nyang’ i yeny pa Mungu. (2 Sam. 15:27) Dhanu gibed gilokiri i bang’e kinde ma gitie ku yeny mi juk mi rieko. Ebino bende won tegocwiny. Wabiweco tap iwi kite pare maeno i thiwiwec maeni.

3. (a) Pirang’o ukwayu jutic pa Yehova gibed weg tegocwiny? (b) Wabiweco iwi lembang’o i thiwiwec maeni?

³ I kajik ceng’ maeni, Sitani ubeii nisagu zoo pi ninyotho yiyoyic ma watie ko i Mungu. (1 Pet. 5:8) Ukwayu wabed weg tegocwiny kara wacir nitundo ma Yehova bikabe ku ng’om pare ma rac. (Zab. 31:24) Pieno re ma i thiwiwec maeni wabiweco iwi yo adek ma wacopo lubo ko lapor mi tegocwiny pa Zadok.

DIK CINGI I KUM KER PA MUNGU

4. Pirang’o dhanu pa Yehova gitie ku yeny mi tegocwiny pi nidiko cing’gi i kum Ker pa Mungu? (Nen bende cal.)

⁴ Wa dhanu pa Yehova, wadiko cingwa i kum Ker pa Mungu ku cwinywa zoo. Ento wang’ ma pol, lembuno kwayu tegocwiny ma lee. (Mat. 6:33) Ku lapor, wabedo ku yeny mi tegocwiny pi nikwo nimakere ku cik mi kurajo pa Yehova man nirweyo lembanyong’a mi Ker pa Mungu i ng’om ma rac maeni. (1 Thes. 2:2) Ekwayu bende tegocwiny ma lee kara kud wamond i lemgamba mi ng’om maeni ma pokiri ubemedere ameda ninyay i iye. (Yoh. 18:36) Dhanu pa Yehova ma dupa gibenwang’iri ku can sente kunoke judaru fwodogi man jutwiyogi pilembe gikwero nimondo i lemgamba kadi i tic mir askari.

5. Pirang’o Zadok ubino ku yeny mi tegocwiny pi nibedo i ng’ete pa Daudi?

⁵ Zadok ucidho i Hebron pi nitimo foc ma jubeketho ko Daudi iwi ker kende ngo. Ecidho bende ku jamlwiny pare m’etie ayika nikiedo. (1 Kei. 12:38) Ebino ayika nilubo tok Daudi i lwiny man nicero ba Juisrael ni judegi migi. Copere nia Zadok ugam ung’eyo ngo lwiny lee, ento ebino won tegocwiny.

6. Daudi uweko lapor ma ber mi tegocwiny ni Zadok nenedi? (Zaburi 138:3)

⁶ Zadok ma jalam udoko won tegocwiny nenedi? Ebed ekwo i kind jumaco ma tek man ma weg tegocwiny. M’umbe jiji, enwang’u ponji nikum lapor migi. Ku lapor, tegocwiny ma Daudi ubed “[utelo ko] wi Israel i lwiny” ucwalu Juisrael ceke nidiko cing’gi kude ku cwinygi zoo. (1 Kei. 11:1, 2) Saa ceke Daudi ubed ukwayu kony i bang’ Yehova pi nivoyo judegi pare. (Zab. 28:7; som Zaburi 138:3.) Zadok unwang’u bende ponji i lapor mi jumaco ma gikwo kugi, ma calu Yehoyada man wode ma jaramony ma nyinge Benaya ku jutela mange 22 mi thepacu ma gibino i ng’ete pa Daudi. (1 Kei. 11:22-25; 12:26-28) Jumaco maeno ceke gikeco ku cwinygi zoo nidiko cing’gi i kum bimobim pa Daudi.

7. (a) Wacopo nwang’u ponji i lapor ma kani mi tegocwiny mi rundi ma tin? (b) Inwang’u ponji ma kani i lapor p’umego Nsilu ma juweco pire i video?

⁷ Wanwang’u kero man tegocwiny kinde ma wabeng’iyo i lapor mi ju ma gidiko cing’gi i kum bimobim pa Yehova ku tegocwinygi. Ubimo mwa ma Kristu Yesu ugam ukwero magwei nimondo i lemgamba mi ng’om pa Sitani. (Mat. 4:8-11; Yoh. 6:14, 15) Saa zoo ebed ejengere iwi Yehova pi ninwang’u tego. Watie bende ku lapor mir aradu ma wendgi kwanere ngo mi rundi mwa ma gikwero nimondo i lemgamba kunoke i tic mir askari. Ineno nenedi kan ibed isomo lembe i wigi i kusika mwa mir internet jw.org?a

BED IKONY UMEGO

8. Judong cokiri giromo bedo ku yeny mi tegocwiny i saa ma kani pi nikonyo umego migi?

⁸ Dhanu pa Yehova gimaru nikonyiri i kindgi. (2 Kor. 8:4) Ento saa moko lembuno kwayu tegocwiny ma lee. Ku lapor, i saa pa lwiny judong cokiri mi the dero gisayu ninyang’ ka nyo umego ku nyimego migi gitie ku yeny mi tielocwiny, mi kony, mi Biblia ku girasoma m’ujengere iwi Biblia, ku yeny mi cam, kendi kunoke kabedo. Mer ma gimaru ko rombe cwalugi niketho kwo migi i ariti pi nimiyo igi kony ma gitie ku yenyne. (Yoh. 15:12, 13) I ayi maeno re ma gilubo lapor mi tegocwiny pa Zadok.

9. Calu ma jukoro i 2 Samwel 15:27-29, Daudi ukwayu Zadok utim ang’o? (Nen bende cal.)

⁹ Kwo pa Daudi ubino i ariti saa ma wode ma Absalom ukeco nimayu ker kud i cinge. (2 Sam. 15:12, 13) Ugam ukwayu Daudi uwek Yeruzalem m’umbe galu! Ewacu ni jutic pare kumae: “Wuai waringu, kum ng’atu moko mbe ma biboth kud i cing’ Absalom!” (2 Sam. 15:14) Kinde ma gibeai, Daudi unyang’ nia mito ng’atu moko udong’ i Yeruzalem pi nibenyutho ire plan pa Absalom. Pieno eoro Zadok ku julam mange gidok i Yeruzalem pi nibeoro ire kwenda. (Som 2 Samwel 15:27-29.) Ugam ukwayu gibed ku wang’gi pilembe tic ma Daudi ukwayu gitim ubino tic ma ketho kwo i ariti lee mandha. Kepar pi gin ma Absalom ma ng’atu ma yenyo bero pare gire, ma jacul kwor man m’ucibo won ngi romo timo ka nwang’u enyang’ nia Zadok ku julam mange gibemadhu pii lembe m’ebetimo pi nigwoko Daudi!

10. Zadok ku juwagi gigwoko Daudi nenedi?

¹⁰ Daudi upangu plan moko, man ekwayu Zadok gikud Hucai ma jarimbe mange m’umoko i kume gikonye. (2 Sam. 15:32-37) Nimakere ku plan maeno, ugam ukwayu Hucai utimere ve nia en’i ng’ete pa Absalom man emii ire juk iwi ayi mi kiedo i dhu Daudi; mito ebed juk ma bimiyo kaka ma Daudi uyikere ko bende pi lwiny. Saa ma Absalom uwinjo juk p’Hucai, Hucai ugwelo lembene ni Zadok gikud Abiathar. (2 Sam. 17:8-16) E juario eno ginwang’u kwenda ma gicopo oro ni Daudi. (2 Sam. 17:17) Ku kony pa Yehova, Zadok ku julam wagi gigwoko kwo pa Daudi i kum ariti.—2 Sam. 17:21, 22.

11. Icopo lubo lapor mi tegocwiny pa Zadok nenedi kinde m’ibekonyo umego ku nyimego peri?

¹¹ Tek jukwayu nia imii kony ni umego ku nyimego peri i saa mi peko, icopo lubo lapor mi tegocwiny pa Zadok nenedi? (1) Wor telowic. I saa ma kumeno, pire bedo tek lee mandha nigwoko bedo i acel. Pieno, wor telowic m’uai kud i Bethel mwu. (Ebr. 13:17) Ukwayu judong cokiri gibed gipoy wigi thiri thiri i kum yub m’umakere iwi ayi mi yikiri pi peko ma wok rek man bende i kum telowic ma dilo mwa uwodho iwi gin m’ukwayu jutim kinde ma peko ma wok rek udhingo tundo. (1 Kor. 14:33, 40) (2) Cwinyi bed tek, re bed ku weng’i. (Rie. 22:3) Lar inyang’ cuu i lembe m’imito timo. Kud iroyiri i ariti mananu. (3) Jengiri iwi Yehova. Kud iwil nia Yehova dieng’ lee mandha pi bedomoth peri man mir umego ku nyimego peri. Ecopo konyi kara imii kony ni umego ku nyimego peri m’umbe ariti.

12-13. Lembe m’umego Viktor giku Vitalii gikadhu kud i iye ubemiyo iri ponji ma kani? (Nen bende cal.)

¹² Wakewec iwi umego Viktor giku Vitalii ma gitimo karacelo pi nipoko cam ku pii ni juyic wagi i ng’om mir Ukraine. Viktor ukoro kumae: “Wabed wasayu cam i kaka ceke. Wang’ ma pol jubed jukilo atum i ng’etwa. Umego acel ugam umiyo cam m’i depo (store) pare. Giramiya maeno ukonyo jurwey ma dupa ninwang’u piny ma gitie ku yenyne pi nimediri nikwo pi kare moko. Kinde ma wabepangu camne i muthukari mwa, nying atum moko upodho i metre 20 kumeni niai ku kaka ma wabino i iye. Akwayu Yehova cing’ nica duu umii ira tegocwiny m’abino ku yenyne kara amedara nikonyo jurwey.”

¹³ Umego Vitalii ke ukoro kumae: “Wabino ku yeny mi tegocwiny lee mandha. Woth para ma kwong’a uting’o saa 12. Arwo i bang’ Yehova niai m’acaku wothne cil m’atundo.” Vitalii ubino ng’atu ma cwinye tek, ento ebino bende ku wang’e. Emedo kumae: “Amedara nikwayu Yehova umii ira rieko ku jwigiri. Abed awotho kende kende i yo ma jutela giyiyo. Nineno ku wang’a kite m’umego ku nyimego gitimo ko tic karacelo utielo yiyoyic para lee mandha. Gibed giyiko odayo, gijoko cam man gipange i muthukari. Gibed gimiyo iwa bende cam ku kabedo ma wacopo yom i iye i saa pa woth.”

MEDIRI NIGWOKO BEDOLENG’ PERI NI YEHOVA

14. Waromo winjara nenedi kinde ma ng’atu moko ma wamaru uweko Yehova?

¹⁴ Acel m’i kind amulaic ma tek nisagu zoo utie kinde ma wedi mwa kunoke jarimbwa moko ma ceng’ini uweko Yehova. (Zab. 78:40; Rie. 24:10) Tek kindwa utie ceng’ini mandha ku ng’atune, ebedo iwa tek magwei niciro. Tek idaru nweng’iri ku peko ma lith maeno, lapor mi gwoko bedoleng’ pa Zadok romo ketho inwang’u tego.

15. Pirang’o Zadok ubino ku yeny mi tegocwiny kara emedere nigwoko bedoleng’ pare ni Yehova? (1 Ubimo 1:5-8)

¹⁵ Zadok umedere nigwoko bedoleng’ pare ni Yehova kinde ma jawodhe ma ceng’ini m’Abiathar ung’iyo niweko Yehova. Lembe maeno utimere i ajiki mi bimobim pa Daudi. Saa ma Daudi utii man edhingo tho, wode m’Adoniya umito emak ker ma ke Yehova ular ung’olo nia ker bidong’ ni Suleman. (1 Kei. 22:9, 10) Abiathar ung’iyo nikonyo Adoniya. (Som 1 Ubimo 1:5-8.) I ayi maeno, ejai ungo kende kende ni Daudi, ento bende ni Yehova. Kepar kite ma lembuno unyayu ko can i Zadok man uturo ko cwinye! Gikud Abiathar gibedo julam pi oro ma romo pier ang’wen. (2 Sam. 8:17) Gibed gineno wi “Sanduku pa Mungu mandha” karacelo. (2 Sam. 15:29) I acaki, gin ario zoo gidiko cing’gi i kum bimobim pa Daudi man i kum lembe mange dupa.—2 Sam. 19:11-14.

16. Copere ang’o m’ukonyo Zadok kara emedere nigwoko bedoleng’ pare ni Yehova?

¹⁶ Ng’iyong’ic p’Abiathar ucero ngo Zadok ku gwoko bedoleng’ pare ni Yehova. Daudi ubino mbe ku jiji nyanok de iwi Zadok. Kinde ma lembe m’Adoniya upangu nitimo uwok kamaleng’, Daudi ung’iyo Zadok, Nathan man Benaya kara giwir Suleman ni ubimo. (1 Ub. 1:32-34) M’umbe jiji, Zadok unwang’u tego man tielocwiny lee mandha i lapor mi weg bedopwe ma calu Nathan ku jumange ma gibino i ng’ete pa Daudi. (1 Ub. 1:38, 39) E kinde ma Suleman udoko ubimo, “eketho Zadok ni jalam kakar Abiathar.”—1 Ub. 2:35.

17. Icopo lubo lapor pa Zadok nenedi kinde ma ng’atu moko m’imaru uweko Yehova?

¹⁷ Wacopo lubo lapor pa Zadok nenedi? Tek ng’atu moko m’imaru ung’iyo niweko Yehova, nyuth ni Yehova nia in’i ng’ete pare. (Yoc. 24:15) Ebimiyo iri kero ku tegocwiny m’itie ku yenyne. Dong’ rwo i bang’e man mediri nibedo ceng’ini ku jurimbi m’umare. Yehova neno gwoko bedoleng’ peri ni gin ma pire tek man ebimiyo iri sukulia pire.—2 Sam. 22:26.

18. Lembe ma Marco giku Sidse gikadhu kud i iye ubemiyo iri ponji ma kani?

¹⁸ Wakewec iwi lapor p’umego Marco giku Sidse ma min ot pare. Jumanyir migi ario m’udongo giweko lemandha. Marco ukoro kumae: “Niai cing’ m’awiya peri unyoliri ci, imarugi lee mandha. Itimo gin ceke m’icopo pi nigwokogi i kum ariti. Pieno ka ging’iyo niweko Yehova, lembene nyayu can lee akeca i cwinyi.” Emedo kumae: “Ento Yehova ubino kudwa. Ebed eketho nia kan a ng’ic, nwang’u min ot para tek, ka en re m’e ng’ic, nwang’u an a tek.” Sidse umedo kumae: “Nwang’u ecicopere ngo iwa niciro ka nwang’u Yehova umiyo ngo iwa tego ma wabino ku yenyne. Abino ku can lee i iya man aredho kosa mi lembe m’utimere zoo i wiya, pieno akoro kite m’abewinjara ko ni Yehova. Nyanok i ng’eye, nyamego moko m’agam aneno ngo pi oro ma dupa ubino i bang’a, eketho cinge i goka, eneno wang’a atira man eyero ira kumae: ‘Sidse, poy nia eno tie ngo kosa peri!’ Ku kony pa Yehova, aii nigwoko anyong’a para i tic pare.”

19. Itie ku lembakeca mi timo ang’o?

¹⁹ Yehova ubemito nia jutic pare ceke gibed weg tegocwiny calu Zadok. (2 Tim. 1:7) Re ebemito ngo nia wajengara iwi tego mwa giwa. Ento ebemito wajengara i wiye. Pieno kinde m’ibenweng’iri i lembe moko m’ubekwayu tegocwiny, lokiri i bang’e. Cwinyi bed tek nia ebiketho ibed won tegocwiny calu Zadok!—1 Pet. 5:10.