Ajigo tak de ngo niponjo lembe

Anyolara i oro 1927 i nyathin adhura moko ma ceng’ini ku Chicago, i Illinois, i États-Unis. Baba giku Mama gibino kud awiya abic: Jetha, Don, an, Karl man Joy. Wan ceke wagam wakeco nitimo ni Yehova ku ng’eyong’ec mwa ceke. Jetha ucidho i kalasi mir arionde mi Gilead i oro 1943. Don, Karl man Joy gicidho i Bethel mi Brooklyn, i New York; Don ucidho i oro 1944, Karl i oro 1947 man Joy i oro 1951. Lapor migi ma ber, man bende mi junyodo para, umiyo amora i kuma.

JURUOT MWA UPONJO LEMANDHA

Baba giku Mama gibino jusom Biblia m’umaru Mungu man giroyo merne i iwa wan awiya bende. Ento Baba ucaku woro ngo kanisa niai m’ebedo jaaskari i Europe i saa mi lwiny ma kwong’a mi ng’om zoo. Anyong’a unego Mama lee nia edwogo ma kwo i pacu, man eyero ire kumae: “Karl, wacidh i kanisa calu ma naka.” Baba udwoko nia, “Abiterowu, ento abiwok mondo ngo i ot.” Mama penje kumae: “Pirang’o?” Edwoko kumae: “I saa mi lwiny, judong dini mi kanisa ma rom ma re gibino i kambi ma tung’ tung’ gibed gimiyo mugisa iwi juaskari man iwi atum migi! Nyo Mungu ubino i ng’ete ario ceke?”

I ng’eye kinde ma Mama ubino i kanisa, Jumulembe pa Yehova ario gibino yo fwa. Gimiyo ni Baba buku ario mi ponjo Biblia ma julwong’o Lumière, m’ukoro i buku mi Lembanyutha. Lembene unyang’u Baba man eyiyo bukune. Saa ma Mama uneno bukune, ecaku somogi. E nindo acel eneno atwong’a moko i karathasi mi lembang’eya mi the dero m’ubelwong’o dhanu ceke ma gimaru nia gicidh giponj Biblia ku buku Lumière. E eng’iyo nicidho. Saa m’etundo, mego moko m’utii re m’uyabu dhugola. Mama umaku bukune acel i cinge; epenjo kumae: “Wubeponjo buku ma e keni?” Megone dwoko nia, “Eyo, mondi yani.” I yenga m’ulubo, Mama ucoko wan awiya ceke ecidho kudwa, man i ng’eye wabed wacidho nja.

I saa mi cokone acel, jatel wi program ukwaya nia asom Zaburi 144:15, m’uwacu nia ju ma giworo Yehova gitie jumutoro. Giragora maeno unyang’a lee, ku giragora ario mange ma e: 1 Timoteo 1:11 m’uwacu nia Yehova tie “Mungu ma jamutoro,” man Juefeso 5:1 m’ubekwayuwa nia ‘wakwany koth Mungu.’ E anyang’ nia acopo nwang’u anyong’a i tic pa Jacwic para man acopo foye pi rwom maeno m’emiyo ira. Lembe ario maeno re m’umaku kabedo ma kwong’a i kwo para.

Cokiri ma ceng’ini kudwa ubino i kilometre 32 i Chicago. Kadok kumeno de, wabed wacidho i coko, man ng’eyong’ec para iwi Biblia umedere. Abepoy nia ceng’ acel jatel wi program ukwayu Jetha ucul jibu. Saa m’abewinje, aparu kumae: ‘Ang’eyo gin m’ebeyero ca zoo. Nwang’u an de aromo ting’o cinga pi nimiyo jibu.’ E acaku yikara man nimiyo jibu ku wec ma para gira. M’usagu zoo, adongo i thenge mi tipo, karacelo kud awiya fwa mange de. E alimo batizo i oro 1941.

APONJO LEMBE IWI YEHOVA I COKO MA DONGO

Abepoy asagane i kum coko ma dit ma watimo i oro 1942 i Cleveland, i Ohio. Jugam judiko kabedo mange ma kadhu 50 mir États-Unis ku yore mi telefon. Juruot fwa ubedo i hema karacelo ku juruot mange ceng’ini ku kaka ma cokone ubino kadhu i iye. Lwiny mir ario mi ng’om zoo ubino kadhu, man jai ubino medere ameda i kum Jumulembe pa Yehova. Uthieno aneno ungu moko mir umego gibetheno muthukari migi ma majgi m’i wang’e ubecaru bor. Gin ceke gimoko nia mito kubang’ muthukariman ng’atu acel ubed i iye pi kur mi diewor. Tek ng’wic yakini moko ung’wi, ugam ukwayu umego giliel mac ma yor i wang’e pi nicaru wang’ junyay yakini man gidii agwara. E jumange bicoro pi nikonyogi. E aparu kumae: ‘Dhanu pa Yehova giyikiri cuu pi lembe ceke ma romo wok!’ E cwinya doko tek, anindo tup, man yakini de ubino mbe.

Oro ma dupa i ng’eye, saa m’aparu pi coko ma dit maeca anyang’ nia adieng’acwiny kadi lworo ubino mbe nyanok de i mama. Egam eketho genogen pare zoo iwi Yehova man iwi dilo pare. Abiwil ki ngo ku lapor pare ma ber.

Nyanok i wang’ coko ma ditne, Mama ukiewo nyinge pi nibedo jayab yo ma nja. Pieno ekiewo i ayi ma segi paru mi korolembe m’uweco pi tic mi saa ceke. Saa ma wabedok, eyero kumae: “Amito amedara ku tic pa jayab yo, ento ebicopere ngo ira nitimo tije man nigwoko ot mwa.” E epenjo ka nyo wacopo konye. Wayiyo, pieno emiyo kusika acel kunoke ario ma ng’atuman m’i kindwa bibelwoko i wang’ cam mi kugweno. I ng’ey ma wacidho i somo, eneno nia piny m’i ot ceke upangere ma ber kan ewok i lembanyong’a. Ebino dhaku ma tic upong’ i wang’e, re ewenjo tak de ngo awiya pare. Ka wacidho i pacu pi nicamu kunoke ka wadok kud i somo, wanwang’e kwa i pacu. Nindo moko, wawok kude i tic mi lembanyong’a i ng’ey somo. Eno ukonyowa ninyang’ i tic pa jayab yo.

ACAKI MI TIC MI SAA CEKE

Acaku tic pa jayab yo ku oro 16. Kadok nwang’u fodi Baba ubino ngo Jamulembe de, re ebed efoyo ku tic parane. Uthieno moko ayero ire nia aii kwe, re anwang’u ngo ng’atu m’ubemito eponj Biblia. I ng’ey m’aling’ nyanok, apenje kumae: “Nyo icopo maru aponj kudi Biblia?” Enyamu i lembe pi kare moko, man edwoko kumae: “Abeneno ngo gin ma copo cera.” E kumeno, japonj Biblia para ma kwong’a ubino baba. Ebino rwom mi tuko ngo!

Waponjo buku “La vérité vous affranchira.” Kinde ma wabemedara ku ponji, anyang’ nia Baba ubino konya ning’eyo ayi mi ponjo Biblia man mi ponje ni jumange. Ku lapor, uthieno moko i ng’ey ma wasomo udukuwec moko, eyero kumae: “Abeneno gin ma buku uyero. Re ing’eyo nenedi nia bukune ubeyero lemandha?” Nwang’u ayiko ngo dwokowang’ penji maeno, e ayero kumae: “Acopo dwoko ngo wang’ penji maeno kawoni, re abidwoko wang’e saa ma wabeponjo macen.” E atimo de kumeno. Anwang’u giragora m’ucwaku paru ma wabino weco i wiye. Niai eca, acaku yikara cuu pi ponji mwa, man aponjo nitimo sayusac. Eno ukonya nidongo i thenge mi tipo, man baba bende. Ecaku tiyo ku gin m’ebeponjo man elimo batizo i oro 1952.

AMEDARA NINWANG’U PONJI I BETHEL

Aweko pacu saa m’abino ku oro 17. Jethaa udoko misioner, man Don ke ucidho i Bethel. Gin ario ceke gigam gimaru tic migi, man lembene umiyo amora i kuma bende. Pieno apong’o karathasi mi cidho i Bethel ku mi kwayu pi Somo mi Gilead, man aweko lembene i cing’ Yehova. E julwong’a i Bethel i oro 1946.

Pi oro ma dupa, atimo tic ma tung’ tung’ i Bethel, e kumeno aponjo lembe ma nyen de lee. I kind oro 75 m’atimo i Bethel, aponjo ayi mi wodho buku iwi karathasi man mi timo kwan. Aponjo bende ayi mi ng’iewo piny m’ubemondo i Bethel man mi oro piny m’ubecidho kaka mange. Ento m’usagu zoo, amaru lee mandha ponji mi thenge mi tipo ma wanwang’u nja i Bethel i saa mi thier mi kugweno man mi korolembe mange.

Aponjo bende lembe lee i bang’ Karl m’umira m’ulubo ng’eya m’umondo i Bethel i oro 1947. Ebed eponjo Biblia man ebed eponje ni jumange cuu mandha. Saa moko akwayu kony i bang’e kinde ma jumiyo ira korolembe. Akoro ire nia anwang’u paru dupa re coko dhoggi ubevoya. Elero wiya ku penji acel ma e: “Joel, thiwi ponji perine tie ang’o?” E anyang’ ndhu i gin m’emito yero; ukwayu atii kende kende ku paru m’urombo ku thiwiwecne man awek mange cen. Awil tak de ngo ku ponji maeno.

Pi nibedo kud anyong’a i Bethel, ukwayu wabed warwey lembanyong’a lee, man eno copo ketho wanwang’ara ku lembe ma tielo cwiny. Lembene acel m’abepoy pire ma ber utimere i Bronx i New York City ku dhug uthieno moko. Wakud umego moko wacidh waliewo dhaku moko m’ular uyiyo Otkur ma Wiw man Cew! Wakorara ire, man wayero kumae: “Uthieno ma tin wabekonyo dhanu giponj lembe ma gierojo niai kud i Biblia.” Edwoko kumae: “Tek utie pi Biblia re wumondi.” Wasomo man waweco iwi giragora dupa m’uweco pi Ker pa Mungu man pi ng’om ma nyen m’ubebino. Waneno nia lembene unyang’e lee mandha, kum elwong’o jurimbe dupa de gibin gidikiri kudwa i yenga m’ulubo. I ng’eye en ku won ot pare gidoko jutic pa Yehova ma weg bedopwe.

APONJO LEMBE I BANG’ JADHOGA MI GAMIRI

I ng’ey m’asayu jadhoga mi gamiri pi oro ma romo 10 kan abin arombo ku min ot para. Ang’o m’ukonya ninwang’u dhaku m’uromo kuda? Arwo pi penji ma e: ‘Abemito atim ang’o i ng’ey gamiri para?’

I ng’ey coko ma dit ma jutimo i Yankee Stadium i oro 1953, arombo ku nyamego moko ma nyinge Mary Aniol. Giku Jetha gisomo kalasi mir arionde mi Gilead. Mary ubino jawodh nyamira ma Jetha i tic mi misioner. Ekoro ira pi tic pare mi misioner i Caraïbes ku yaw yaw mandha man pi ponji mi Biblia m’etelo wigi pi oro ma dupa. Kinde ma wabeng’eyara i kindwa, wanyang’ nia wabino ku lembakeca ma rom i thenge mi tipo. Mer m’i kindwa umedere nidongo, e wagamara i dwi mir 4, 1955. Pi oro ma dupa, Mary unyutho nia andha etie giramiya m’uai i bang’ Yehova man ebedo ira ni lapor ma ber. Ebed etimo tic ceke ma jumiye kud anyong’a. Ebed etimo tic ku tego, ebed edieng’ pi jumange i andha, man saa ceke ebed eketho tic mi Ker i kabedo ma kwong’a. (Mat. 6:33) Watimo i tic mi twodiri pi oro adek, man i oro 1958, julwong’owa i Bethel.

Aponjo lembe lee i bang’ Mary. Ku lapor, i acaki mi gamiri mwa wamaku yub mi besomo Biblia karacelo, man wabed wasomo verse 15 wang’ acel. I ng’ey ma ng’atu acel usomo, wang’iyo i giragoranegi man waweco iwi kite ma wacopo tiyo ko kugi i kwo mwa. Wang’ ma pol Mary ubed unyutho ira ponji m’enwang’u i Gilead kunoke i tic mi misioner. Wec maeno uyabu wiya man ukonya nililo wang’ korolembe para man ning’eyo ayi mi konyo nyimego.—Rie. 25:11.

Nyaramara para Mary utho i oro 2013. Atie lee dit kud ava mi nene kendo i ng’om ma nyen! Man pi kawoni, akeco nia abimedara niponjo lembe man nigeno Yehova kud adundena ceke. (Rie. 3:5, 6) Anwang’u jukocwiny man anyong’a kan abeparu pi gin ma dhanu pa Yehova gibitimo i ng’om ma nyen. M’umbe jiji, eno biketho i iye bende niponjo lembe ma nyen i bang’ Japonji mwa ma dit man i wiye! Foyofoc para yor i bang’ Yehova copo jik ungo pi ponji ceke m’emiyo ira nitundo kawoni man pir ayi ceke m’enyutho ko ira bero ma yawe mbe.