“Lwiny tie pa Yehova”

Teliri ucaku i oro 1999 kinde ma gavmenti mi France ung’olo palatha ma kathere mbe iwi giramiya ma Bethel mi France unwang’u i kind oro 1993 ku oro 1996. Watero lembene i wang’ udi pido mi France, re ularere ngo. I ng’ey ma pido uloyowa i wang’ otpido moko ma ng’iyo i pido ma udi pido mange ung’olo, gavmenti ucero sente ma kadhu milioni ang’wen ku nusu mi euro (6300000 USD) ma Bethel ugwoko i bank. Genogen mwa ma tokcen ugam udong’ i bang’ Otpido mir Europe ma nyego pi twero pa dhanu. Ento i wang’ nicidho i kesi, Otpido maeno ukwayu nia karacelo kud ungu m’ucungo kaka gavmenti mi France, wakelar wawec i wang’ jaor acel mi Otpidone pi nineno ka nyo waromo yiko lembene i wang’ nicidho i wang’ Otpido.

Wageno nia jadit maeno bidhuro mac i kumwa nia wayii niculo kum sente ma jung’olone moko pi niyiko lembene. Ento wagam wanyang’ kamaleng’ nia ka waculo kadok euro acel, nwang’u waturo cik mir ukungu mi Biblia. Umego ku nyimego gimiyo giramiya pi nikonyo tic mi Ker; etie ngo sente pa gavmenti. (Mat. 22:21) Re asu wayiyo niciweco pi ninyutho woro ni jaor mi Otpido.

Warombo i kusika acel m’i kind kusika ma leng’ mi Otpido. Wec ucaku ber akeca ngo. Saa ma jaor mi Otpido ucaku wec, ecwaku nia kwayu Jumulembe pa Yehova mi France gicul kum palatha moko ma jung’olo i wigi. E wapenje ndhu ndhu kumae: “Nyo ing’eyo de nia gavmenti udaru cero sente mwa ma kadhu milioni ang’wen ku nusu mi euro i bank?”

Unen kamaleng’ nia lembene uton i iye. Kinde m’ungu m’ucungo kaka gavmenti ucwaku nia andha gitimo kumeno, pidoic pare uwilere wang’ acel iwi kesi mwane. Eweco i wigi ku kwinyo ma lee man ekathu the wecne cen. E anyang’ nia Yehova umondo i lembene i ayi ma nwang’u walar waparu de ngo. Wawok kud i kusikane kud anyong’a ma lee, man iwa uwang’ lii i kum kite ma lembene udok uwotho ko.

I nindo 30 mi dwi mir 6, 2011, Otpido mir Europe ma nyego pi twero pa dhanu umaku yub moko pi bero mwa. Ethumo wang’ palatha ma gavmenti uketho i wiwa man eng’olo nia gavmenti udwok sente mwa m’ecero ku faida i wiye. Ng’ol maeno ma pire tek ubegwoko thier ma leng’ i France cil tin. Penji acel kende ma wapenjo m’umbe ninwoyo wang’e, m’ubedo ve kidi m’umondo sok i terwang’ Goliath, udaru lwiny wang’ acel. Pirang’o waloyo? Pilembe “lwiny tie pa Yehova,” tap calu ma Daudi uyero ni Goliath. —1 Sam. 17:45-47.

Waloyo pido wang’ acel eno kende ngo. Nitundo kawoni udi pido ma malu mi ng’om 70 ku mange dupa mi ng’om zoo, ung’olo pido 1225 m’ucwaku Jumulembe pa Yehova i wang’ jai mi judong gamba ku mi jurudini ma weg tego. Aloci mi cik maeno ma wanwang’u ugwoko twero mwa ma dongo, calu ve twero ma piwa ung’eyere ko i wang’ cik nia watie dini ma zoo, twero mi rweyo lembanyong’a kamaleng’, mi kwero nidikiri i seremoni ma cwaku ng’om ma thugijo man mi kwero ciko rimo.

Anwang’ara nenedi i lemkesi m’ubino kadhu i Europe ma an ke abino timo i Kabedo ma dit mi Jumulembe pa Yehova i Amerika?

JUNYODO PARA GIBINO KUD AMORA I TIC MI MISIONER

George giku Lucille ma gi junyodo para, ginwang’u diplom mi kalasi mir 12 mi somo mi Gilead. Anyolara i oro 1956, nwang’u gibetimo i Ethiopia. Gicaku nyinga Philip nikum Filipo ma jarwey lembanyong’a mi rundi ma kwong’a. (Tic. 21:8) I oro m’ulubo, gavmenti ukwero tic mwa. Kadok nwang’u abino nyanok de, re abepoyma ber nia juruot fwa ubed utimo thier i amung’. Calu m’abino nyathin, lembene ubed unyang’a lee! Ku lembe ma rac, judong gavmenti uriemowa kud i ng’ombe i oro 1960.

Saa ma juruot fwa gidok i Wichita, i Kansas, i Amerika, junyodo para giwotho ku piny moko ma segi, niwacu amora migi mi tic mi misioner. Gibed gikwo nimakere ku lemandha man giroyo mer mi lembe mi tipo i iya kende ngo, ento bende i nyamira ma dit ma Judy man i umira ma nok ma Leslie. Gin ario ceke ginyoliri i Ethiopia. Alimo batizo ku oro 13. Oro adek i ng’eye, juruot fwa gidok kaka ma yeny ubino lee i iye i Arequipa, i Peru.

I oro 1974 kinde m’abino tap ku oro 18, Bethel mi Peru ung’iya karacelo kud umego mange ang’wen pi nibedo juyab yo ma segi. Ugam ukwayu warwey i therithwar ma fodi jurweyo ngo nyanok de i igi i kind gudi mi Andes mi diere. I therithwar maeno wabed warweyo ni dhanu mi thek mi Quechua man Aymara. Wabed wawotho ku muthukari ma ve ot ma wabed walwong’o nia Avur pilembe ebed enen ve sanduku ma dit. Amaru kan abepoy i kum kite m’abed atiyo ko ku Biblia pi ninyutho ni dhanu ma kuca nia ceng’ini eni Yehova bidaru can, remokum man tho. (Nyu. 21:3, 4) Dhanu ma dupa ujolo rwonglembe mi Ker ma ber.

ADOK I KABEDO MWA MA DIT

Saa m’umego Albert Schroeder m’ubino acel m’i kind umego mi Guriri m’utelowic mi Jumulembe pa Yehova ucidho liewo Peru i oro 1977, ewok ekwaya nia apong’ karathasi mi kwayu pi tic i Bethel mi kabedo mwa ma dit. E apong’o. Nyanok i ng’eye i nindo 17, dwi mir 6, 1977, acaku tic i Bethel mi Brooklyn. Pi oro 4 m’ulubo, atimo i Departema ma ketho leng’o man ma gwoko kum udi.

I dwi mir 6, 1978, arombo kud Elizabeth Avallone i coko ma dit ma diko ng’om ma tung’ tung’ ma jutimo i La Nouvelle-Orléans, i Louisiana. Calu an, en de junyodo pare gitunge i lemandha. Nwang’u edaru timo tic pa jayab yo ma nja udoko oro 4, man ebino kud ava mi timo tic mi saa ceke i kwo pare zoo. Wang’eyara kude cuu man i ng’ey nindo ma nok kende ci wamarara lee mandha. Wagamara i nindo 20, dwi mir 10, 1979, man wacaku timo i Bethel karacelo.

Wagam wamer lee kud umego ku nyimego mi cokiri mwa ma kwong’a mi dhok mir Espagnol i Brooklyn. I kind oro ma dupa m’ulubo, wabedo i cokiri mange adek m’umego m’i igi umaruwa lee man umiyo amora i kumwa nia wamedara ku tic mi Bethel. Wabefoyogi lee pi kony migi, man wabefoyo jurimbwa ku wedi mwa ma gibed gikonyowa ku gwoko junyodo mwa saa ma gitii.

ACAKU DIKARA I ANYEGO MI CIK

I dwi mi 1, 1982, iya uwang’ lii saa ma judwoka i Departema ma neno lembe pa cik i Bethel. Oro 3 i ng’eye, jukwaya nia acidh asom lembe pa cik pi nidoko avoka. Ebedo lembe mi zungo niponjo nia bedagonya ma tin dhanu ma dupa gitie ko i Amerika man i ng’om zoo, utie nikum aloci mi cik ma Jumulembe pa Yehova ginwang’u. Jubed juweco lee dit pir aloci maenogi i saa mi ponji.

I oro 1986 saa m’abino ku oro 30, jung’iya nibedo janen wi Departema ma neno lembe pa cik. Anyong’a unega lee, re calu m’abino aradu, cwinya de ubino pido pilembe ebino tic ma tek man nwang’u fodi ang’eyo ngo lembe lee i wiye.

Anwang’u diplom mi bedo avoka i oro 1988. Ento ku lembe ma rac, agam anyang’ ungo ku kite ma lembene ubedo ko ku matoke ma rac iwi thenge para mi tipo. Ponjiri ma malu copo nyolo pidoic mir abediwang’e i ng’atini man dhuro mac i the pidoic ma nia nibedo ku ng’eyong’ec ma segi iwi lembe moko ketho isagu jumange ma ging’eyo ngo lembene. Ku lembe ma ber, Elizabeth ulara. Ekonya nidok i ng’iyo para mi thenge mi tipo m’abino ko i wang’ nidok i somo. Lembene uting’o ira saa ma lee. Re nok nok, acaku doko tek kendo i thenge mi tipo. Aromo yero nia i kwo, lembe ma pire tek nisagu utie ngo nibedo ku ng’eyong’ec ma segi iwi lembe moko. Kwo mandha ujengere iwi bedo ku winjiri ma ceng’ini ku Yehova man mer ma thuc ma wamaru ko en man dhanu pare.

NICERO BANG’ LEMBANYONG’A MAN NIKETHO PIRE UNG’EYERE I WANG’ CIK

I ng’ey m’adaru ponjiri mi cik, aketho wiya zoo i kum pangu lembe m’uneno cik i Bethel man cero bang’ tic mi Ker i wang’ cik. Ebino lembe mir anyong’a man bende ma tek lee pilembe alokaloka man mediri ubino timere pio pio mandha i dilo mwa. Ku lapor, i wang’e wabed wakwayu sente i bang’ dhanu pi girasoma mwa. Ento niai i oro 1991, jukwayu nia Departema ma neno lembe pa cik utel wi yub ma jumaku pi niwodho telowic iwi ayi ma jucopo jigo ko lembene. E niai eca, Jumulembe pa Yehova gicaku miyo girasoma mananu ni dhanu. Yub maeno udwoko tic yot i Bethel kud i therithwar zoo, man nitundo tin de ebegwoko tic mwa i kum palatha ma kathere mbe. Jumoko gigam giparu nia alokaloka maeno bidaru sente mwa man binyotho tic mi lembanyong’a. Elund ekelo adwogi m’ukoc. Wend dhanu m’ubino timo ni Yehova niai i oro 1990 umedere ma kadhu wang’ ario, man tin dhanu gicopo nwang’u cam mi tipo ma bodho kwo m’umbe cul. Aneno ku wang’a nia utie nikum tego ma Yehova miyo man nikum telowic m’emiyo nikadhu kud i bang’ jamiru mandha re m’uketho alokaloka maeno ku mange dupa ma dilo mwa ukelo uwotho ma ber.—Ai 15:2; Mat. 24:45.

Wang’ ma pol wanwang’u aloci mi cik, ungo pilembe ya watie ku baavoka ma riek, ento timo ma ber mi dhanu pa Yehova re ma cwalu jupoklembe ku judongo pa gavmenti mange ning’olo lembe pi bero mwa. Aneno lembe maeno i oro 1998 kinde m’umego adek m’i kind umego mi Guriri m’utelowic ku mon migi gicidho i coko ma dongo ma segi ma jutimo i Cuba. Yoo migi man woro migi uketho judongo pa gavmenti giyiyo andhandha nia wadikara ngo i lemgamba.

Ento kan ecopere ngo niyiko lembe ku mer, ‘wacero bang’ lembanyong’a, man waketho pire ung’eyere i wang’ cik.’ (Filip. 1:7) Ku lapor, pi oro ma dupa judongo pa gavmenti mir Europe man mi Korea ma yo piny giyiyo ngo twero mwa mi kwero timo tic mir askari. Eno uketho umego mwa ma romo 18000 mir Europe man ma kadhu 19000 mi Korea ma yo piny gibedo i kol pilembe gikwero nidikiri i tic mir askari pi yiyoyic migi.

Tokcenne i nindo 7, dwi mir 7, 2011, Otpido mir Europe ma nyego pi twero pa dhanu upoko lembe i kind Bayatyan kud Armenia. Eng’olo nia jubed jumii tic mange ni ju m’ukwero tic mir askari pi yiyoyic migi i Europe zoo. I ng’eye, Otpido ma malu mi Korea ma yo piny ma ng’iyo i pend cik de ung’olo lembe ma rom eno i nindo 28, dwi mir 6, 2018. Nwang’u ecicopere ngo ninwang’u aloci ario maeno ceke ka nwang’u aradu mwa moko gikwero yiyoyic migi.

Umego ma gibetelo wiwa man departema ma neno lembe pa cik i Bethel mi ng’om zoo gibetimo tic m’umbe yom pi nicero bang’ tic mi Ker. Etie iwa rwom ma lee nicungo kakar umego ku nyimego mwa ma gibenwang’iri i wang’ jai pa gavmenti. Dok waloy kesi kunoke ngo, pido mwa bedo ni lembatuca ni jutela ku jubim, man ni dhanu mi thek ceke. (Mat. 10:18) Jupoklembe, juor pa gavmenti, odi lembang’eya man dhanu ceke ging’iyo i giragora ma waroyo i karathasi man i wec ma wabecero ko bang’wa. E kumeno, dhanu m’adundegi tie ayika ging’eyo Jumulembe pa Yehova man ukungu mi yiyoyic migi. Jumoko m’i kindgi udoko kadok juyic wadwa.

AFOYI YEHOVA!

I kind oro 40 m’ukadhu abedo ku rwom mi tiyo iwi lembe pa cik karacelo ku Bethel m’i wang’ ng’om zoo, man mi cungo i wang’ udi pido ma dongo man judongo dupa. Amaru lee mandha umego ma watimo kugi i Departema ma neno lembe pa cik i kabedo mwa ma dit man ma timo i departema ma neno lembe pa cik i wang’ ng’om zoo. Anwang’u mugisa lee dit i kwo para!

Elizabeth ukonya ku mer man ku gwoko bedoleng’ i kind oro 45 ceke m’ukadhu, dok ebed i saa ma ber kunoke i saa ma rac. Amare mi tuko ngo pi lembuno pilembe etimo kumeno kadok kinde m’ebenyego ku twoyo ma jwigo kero mi kume.

Waneno ku wang’wa nia wanwang’u ngo kero kadi aloci ku copo mwa giwa. Ento calu ma Daudi uyero, “Yehova en e tego ni dhanu pare.” (Zab. 28:8) Andhandha, “lwiny tie pa Yehova.”