Jalewic udoko misioner

Anyolara i oro 1951 i Vienne, i ng’om mir Autriche man jufwa ubino i dini mi katholi. Abino jalewic, ento agam ayiyo Mungu man abed arwo wang’ ma pol i bang’e. Kinde m’abino ku oro 9, baba ucaku ponjo Biblia ku Jumulembe pa Yehova, i ng’eye nyanok mama de ucaku dikere kude.

E ndhu ndhu wacaku dikara ku cokiri mi Döbling i adhura mi Vienne. Wabed watimo lembe ma pol karacelo ku jufwa. Wabed wasomo man waponjo Biblia, wacidho i coko man wabed watimo calu bavolonter i coko ma dongo. Niai ma fodi a nyathin, baba upidho mer pa Yehova lee mandha i iya. I andha, baba ubed urwo nia waku nyamira zoo wadok juyab yo. Ento saa maeca abino mbe ku lembakeca maeno.

ACAKU TIC MI SAA CEKE

Alimo batizo i oro 1965 nwang’u atie ku oro 14. Re ebino ira lembe ma tek nicaku thewec ku ng’atu m’ang’eyo ngo i lembanyong’a. Bende, abed anwang’ara nia tija mbe man abed amito nia aradu wada gibed jurimba. Pieno nyanok i ng’ey m’alimo batizo, acaku dikara ku ju m’utie ngo Jumulembe. Kadok nwang’u amaru nidikara kugi de, re pidocwiny para ubed usenda pilembe abed atimo saa ma lee karacelo kugi. Nitimo alokaloka ubino ira lembe ma tek. Dong’ ang’o m’ukonya?

I kind oro maeno, nyamego moko ma nyinge Dorothée ma oro pare 16 utundo i cokiri mwa. Amora m’ebino ko pi tic mi lembanyong’a mi ot kubang’ ot uwang’u iya lii. Oro para ukadhu pare nyanok, re abino mbe kud amora akeca pi tic mi lembanyong’a. Pieno abed aparu kumae: ‘Junyodo para tie Jumulembe pa Yehova, ento Dorothée eni kende re m’etie i lemandha i kind jupagi; bende ebegwoko min m’utie jaratwoyo, re saa ceke eni lembanyong’a!’ Lapor pare ucwala nitimo lee ni Yehova. I ng’eye nyanok, waku Dorothée wacaku timo calu juyab yo; ku kwong’a watimo calu juyab yo ma jukony, i ng’eye ke calu juyab yo ma nja. Amora pare umiyo amora i kuma bende. Ekonya ninwang’u ng’atu ma kwong’a m’acaku ponjo kude Biblia. I ng’ey kare, anwang’u nia edoko ira lembe ma yot nicaku weco ku dhanu ot kubang’ ot, i yo man kaka mange de.

I kind oro ma kwong’a m’acaku iye tic pa jayab yo ma nja, umego moko ma nyinge Heinz mi ng’om mir Autriche utundo i cokiri mwa. Eponjo lemandha i ng’om mi Canada kinde m’ecidh eliewo umin ma tie Jamulembe. Jugam juore i cokiri mwa i adhura mi Vienne calu jayab yo ma segi. Saa m’anene ci agam amare. Ebino kud ava mi bedo misioner, ento an abino mbe ku mito mi timo calu misioner. Pieno ku kwong’a amito ngo eng’ey nia amare. Re i ng’eye, waku Heinz wacaku ng’eyara pi gamiri man wagamara. E wacaku tic pa jayab yo karacelo i ng’om mir Autriche.

LEMBAKECA MI DOKO MISIONER

Heinz ubed uyero ira wang’ ma pol nia ebemito edok misioner. Kadok nwang’u ebed ediya ngo nia adok misioner de, re pi nimiyo amora i kuma, ebed epenja ku penji ma calu ve: “Eni m’awiya mwa de mbe e, nyo wacopo timo ngo lee i tic pa Yehova?” Ento calu m’abino jalewic, lworo doko misioner ubed unega. Andha, abino jayab yo, re paru mi doko misioner unen ira ni lembe ma tek dit. Ento Heinz umedere asu nibeweco iwi lembakeca mi doko misioner. Etielo cwinya bende nia abed adieng’ pi dhanu kakare nibedieng’ pi lewic m’atie ko. Juk pare ukonya lee mandha.

Nok nok, ava mi doko misioner umondo i iya, e wagam wapong’o fom mi somo somo mi Gilead. Ento umego mi komite mi filial gikwayu nia ku kwong’a akeaponj Anglais. I ng’ey oro 3 m’aii niponjo Anglais, walund wazungo nia juorowa i cokiri mi Yugoslavia i adhura mi Salzburg i ng’om mir Autriche. Watimo tic mi lembanyong’a i ng’ombe i dhok mi Serbo-Croate pi oro 7, uketho i iye oro acel i tic mi twodiri. Dhok mi Serbo-Croate ubino tek, re wabino ku ponji mi Biblia dupa.

I oro 1979, umego m’ubetelo wi tic mi filial gikwayu nia wakecidh i ng’om mi Bulgaria pi nindo moko. Calu ma nwang’u jukwero tic mwa mi lembanyong’a i ng’ombe, gikwayuwa wayer nia wabecidho pi niyom ayoma. Giyero nia kud wabed warwey ngbeng’ ngbeng’, ento wating’ girasoma moko nyanok ni nyimego 5 ma gikwo i Sofia, ma tie adhura ma dit mi Bulgaria. Lworo ubino nega, ento Yehova ukonya i tic maeno m’unyayu anyong’a i iya. Tegocwiny man anyong’a mi nyimego maeno ma gibino i ariti ma nwang’u jucopo twiyo kogi atwiya, uketho an de anwang’u tegocwiny mi timo gin moko ci ma dilo pa Yehova ukwayu nia atim.

I saa ma rom eno, wapong’o fom pi somo mi Gilead man jugam juyiyo. Wabino paru nia wabicisomo somone i États-Unis i dhok mir Anglais. Ento i dwi mir 11 mi oro 1981, dilo ugam utimo bende somo mi Gilead i Allemagne. Pieno, wasomo somone i dhok mir Allemand m’ubino dhok m’anyang’ i iye yot yot mandha. Dong’ i ng’eye jubiorowa kani?

TIC MI MISIONER I NG’OM MA LWINY N’I IYE

Juorowa i Kenya! Ento biro mi filial mi Kenya ukwayuwa ka nyo wacopo bedo ayika nicitimo i ng’om m’i ng’ete, niwacu i Uganda. Nwang’u oro 10 udaru kadhu ma jadit mir askari ma nyinge Idi Amin ugam umaku ker mir Uganda. I oro m’ulubo, bimobim pare mir adici uketho dhanu milioni dupa utho man ginwang’iri ku peko. I ng’eye, i oro 1979 gavmenti mir Uganda ugam upodho kendo. I andha, acopo yero nia awinjara ma rac nicidho i ng’om ma lwiny n’i iye. Ento somo mi Gilead ular uyikowa nigeno Yehova. E wagam wayiyo nicidho.

Lembe ubino tek ma rac i Uganda. Gavmenti ugam ubino mbe ku copo mi miyo pii, mac mi kura man piny mange ma pigi tek. Telefon de ubed utiyo ngo. Dhanu ubed unegiri i kindgi, gibed gikwalu piny, asagane diewor. Pieno ka piny unyutho, dhanu ceke bedo i ot ma nwang’u cwinygi ung’abere man nwang’u giberwo nia timba ng’atu moko kud ubin ukwal piny migi man uneggi. Re kadok kud i kind peko maeno zoo de, umego gimediri asu nimaru Yehova!

I oro 1982, waku Heinz wagam watundo i Kampala ma tie adhura ma dit mir Uganda. I kind dwi 5 ma kwong’a, wabedo i pacu pa Sam giku Christina Waiswa karacelo kud awiya migi 5 man jupagi 4. Wang’ ma pol umego Waiswa giku min ot pare ku juruot migi gibed gicamu wang’ acel kubang’ ceng’. Re kadok kumeno de gijolowa, man eno ubino iwa jol ma yawe mbe. I kind nindo ma watimo i bang’gi eno, wanwang’u ponji lee m’ukonyowa i tic mwa mi misioner. Ku lapor, waponjo kite mi jom ku pii ma nyanok man i ng’eye nitiyo kude pi nilwoko soroni. I oro 1983, wanwang’u ot mwa giwa i Kampala i kabedo m’utie cuu i kadhiri moko.

Wabino kud anyong’a lee i tic mi lembanyong’a. Abepoy nia i dwi acel kende ci, wamiyo girasoma ma kadhu 4 000! Ento lembe ma ber nisagu zoo ubino nineno kite ma dhanu ubejolo ko lemandha. Giworo Mungu man gimito giwec iwi lembe mi Biblia. Waku Heinz, kubang’ ceng’ wabed watelo wi ponji mi Biblia 10 nicidho 15. Man wanwang’u ponji dupa i bang’gi. Ku lapor, wabed wafoyo pidoic ma ber ma gibino ko kadok nwang’u ubed ukwayu nia pi nibino i coko kubang’ yenga giwoth ku tiendgi; re gibed giwagiri ngo, ento saa ceke gibino kud anyong’a.

I oro 1985 man 1986, lwiny mange 2 ugam utuk i Uganda. Wang’ ma pol wabed waneno awiya m’ubielo atum ma dongo. Jubed jutiyo kugi calu juaskari man gibed gikuro gengi ma dhanu wotho i iye. Saa maeca, wabed warwo pi nibedo ku wang’wa man pi ninwang’u kwiyocwiny mir adunde kinde ma wabesayu dhanu ma romo jolo lemandha. Yehova udwoko wang’ rwo mwa. Ka warombo ku ng’atu moko m’ujolo lembanyong’a mi Ker, wiwa wil wang’ acel pi lworo mwa.

Wabed wamaru bende nirweyo ni dhanu mi ng’om mange ma gikwo i Uganda. Ku lapor, warombo ku Murat giku min ot pare Dilbar Ibatullin, giai kud i Tatarstan (Russie centrale). Murat ubino dokter. Gin ario zoo gigam gilimo batizo man asu gibetimo ni Yehova ku bedopwe. I ng’eye, agam abino ku anyong’a nirombo ku Tatjana Vileyska ma tie dhaku moko m’uai kud i ng’om mir Ukraine. Saa maeno nwang’u cwinye tur man ebino mito enegere cen. I ng’eye Tatjana ulimo batizo man edok i Ukraine man edog ekonyo i tic mi loko girasoma mwa ma tung’ tung’ i dhok mir Ukraine.a

PEKO MANGE

I oro 1991 kinde ma waku Heinz wacidho i yom i Autriche, umego mi komite mi filial mi ng’ombe gikiewo iwa nia jubeorowa i tic mange ma nyen i ng’om mi Bulgaria. I ng’ey ma bimobim mi Koministe upodho i Ulaya ma yo nyangu, tic mi Jumulembe pa Yehova ugam uyiyere i wang’ cik i ng’om mi Bulgaria. Calu m’alar ayero i wang’e, waku Heinz wamondo ku girasoma moko i amung’ i ng’om maeno ma jugam jukwero tic mwa i iye. Ento kawoni juorowa nia dong’ wacidh warwey kuca.

Juyero iwa nia dong’ wabidok ungo i Uganda. Pieno, wadok ungo pi nicicoko piny mi ot mwa kunoke niciko jurimbwa, wacidho wang’ acel i Bethel mir Allemagne, man wamaku mutukari pi nicidho i Bulgaria. Juwok juorowa i ungu mi cokiri moko m’utie ku jurwey 20 i adhura mi Sofia.

Wanwang’ara ku peko mange dupa i Bulgaria. Mi kwong’o, wang’eyo ngo dhok. M’umedo maeno, girasoma m’ubino nuti i dhok mi Bulgaria ubino kende kende La vérité qui conduit à la vie éternelle man Recueil d’histoires biblique. Ebino iwa lembe ma tek nicaku ponjo Biblia ku dhanu. Kadok kud i kind peko maeno zoo de, ungu mwa ma nyanok ma weg amora umedere asu. Saa ma dini mi Orthodox uneno lembuno, gicaku nyayu ragedo i kumwa.

I oro 1994, juwodho nying’ Jumulembe kud i kind dini ma cik uyiyo man jukwero dini migine. Jugam jutwiyo umego moko bende. Jucaku mewo vupo ma dongo i wiwa, ma juyero ko nia Jumulembe pa Yehova ginego ngo kende kende awiya migi ento bende gicwalu jumange de ginegiri. Waku Heinz wanwang’u nia etie lembe ma tek dit nirweyo lembanyong’a. Wang’ ma pol wabed warombo ku dhanu ma kwiny ma gikok i wiwa, gilwong’o bapolisi i kumwa man gidhenyo piny i kumwa. Ebino bende lembe ma tek ninwang’u girasoma i ng’ombe man nipangu ot ma waromo betimo coko i igi. Bapolisi ugam ulalu bende Coko mwa moko ma dit acel mir adhura. Nwang’u fodi lembe ma kumeno utimowa ngo. Lembuno ukoc lee dit ku mir Uganda, kum dhanu ma kuca gimaru migi niponjo Biblia! Dong’ ang’o m’ukonyowa ninyego ku peko maeno?

Wabed wanwang’u anyong’a nidikara kud umego ku nyimego ma kuca. Gibino kud anyong’a ninwang’u lemandha man gibed gifoyo kony ma wamiyo igi. Gin zoo gibed gibedo karacelo man gikonyiri i kindgi. Ponji ma wanwang’u utie nia waromo bedo kud anyong’a i tic moko ci, tek ndhu wamedara nimaru dhanu.

Ento i ng’ey kare, lembe udog uyikere. Judog jukiewo nying’ dilo mwa i cik i oro 1998, man wacaku nwang’u girasoma ma tung’ tung’ i dhok mi Bulgaria. I ng’eye i oro 2004, juthiero udi ma nyen mi Bethel mi ng’ombe ni Mungu. Tin eni cokiri tie 57 i Bulgaria, ku jurwey 2 953. Oro m’ukadhu, dhanu m’ubino i Poy pi tho pa Yesu wendgi ubino 6 475. Kadok ku kwong’a nyimego 5 kende re m’ubino i adhura mi Sofia, re kawoni watie ku cokiri 9! Andhandha waneno nia ‘ng’atu ma nok udoko elufu.’—Isa. 60:22.

WANYEGO KU TWOYO MA TUNG’ TUNG’

Atwoyo kit twoyo ma tung’ tung’. Pi oro ma dupa, abino ku twoyo ma dongo, man twoyone umulo wiya de. Jutimo ekzame man junwang’u nia atie ku twoyo ma tek, e juora i India i bang’ dokter moko m’utimo operasio pi saa 12 pi niwodho twoyone. Saa ma kuma ugony kud i Bethel mi India, wagam wadok i tic mwa i Bulgaria.

I saa ma rom eno Heinz de ucaku twoyo twoyo moko ma segi. Ebino ire lembe ma tek niwotho, niweco, man niyiko kume. Calu ma twoyone ubino medere, an re m’acaku timo ire lembe zoo. Saa moko abed anwang’u nia aol magwei man lworo ubed unega nia acopo romo ngo nimedara nigwoke. Ento umego moko m’aradu ma nyinge Bobi ubed ubin ugame pi nirweyo kude. Lewic ubed unego ngo Bobi pi lembe ma dhanu copo paru pir ayi ma Heinz ubeweco ko kunoke kite ma wotho ubejai ko ire. Wang’ ma pol abed ageno umego Bobi ka copo mi konyo Heinz ujai ira. Kadok nwang’u waku Heinz wang’iyo nia kud wabed kud awiya i ng’om maeni de, re Yehova umiyo iwa umego Bobi calu wodwa!—Marko 10:29, 30.

Heinz ubino bende ku twoyo mi kanser. Ku lembe mi can, won ot para mir amara utho i oro 2015. I ng’ey tho pare anwang’ara adong’ kenda; ebino lembe ma yiyere ngo ira nia dong’ embe. Ento i wiya kwe pare fodi ve ekwo asu! (Luka 20:38) Wang’ ma pol, abed apoy pi wec pare ma ber man juk pare ma mit kubang’ ceng’. Atie ku foyofoc ma lee dit pi tic ma watimo ku bedopwe pi oro ma dupa karacelo.

ABEFOYO YEHOVA PI GWOK PARE

Ma jiji mbe, Yehova ukonya i amulaic para ceke. Ekonya avoyo lewic para man adoko misioner m’umaru dhanu. (2 Tim. 1:7) Abefoyo Yehova, pilembe kawoni waku nyamira ma nok zoo wan’i tic mi saa ceke. Tin eni giku won ot pare gibetimo tic calu juliew mi twodiri i Serbia i Ulaya. Rwo pa baba m’alar aweco pire ca zoo Yehova udwoko wang’gi!

Ponji para mi Biblia umiyo ira kwiyocwiny mir adunde. Calu Yesu, i saa mi peko arwo ku ‘cwinya ceke.’ (Luka 22:44) Yo acel ma Yehova udwoko ko wang’ rwo para utie nikadhu kud i mer man bero ma jurimba mi cokiri para mi Nadezhda i adhura mi Sofia gitimo ira. Gibed gilwong’a wanambu kugi man wang’ ma pol ginyutho nia gimara, man eno nyayu anyong’a lee i iya.

Wang’ ma pol abed aparu pi genogen mi cer. Kud i wang’ lela, abed aneno i paru para kite ma junyodo para gibino leng’ ko i saa ma gibenyomo. Aneno nyamira m’ubetedo cam ma mit. Aneno bende Heinz m’ucungo i ng’et kana pare. Paru lembe maeno miyo ira anyong’a man ekonya nimedara niciro man ecwala nidwoko foyofoc lee ni Yehova.

Kan abeparu pi kwo para man abeneno lembe ma bitimere i nindo m’ubino, ayiyo ku cwinya zoo wec ma Daudi uyero i Zaburi 27:13, 14 m’uwacu kumae: “Ka nwang’u ayiyo ngo nia abineno bero pa Yehova i ng’om mi ju ma kwo, nwang’u eni ani kani? Gen Yehova, cwinyi bed tek man bed tek. Eyo, gen Yehova.”