Penji mi jusom
Tic mi rweyo lembanyong’a bijik awene?
Yesu uyero nia “lembanyong’a maeni mi Ker jubirweyo i ng’om zoo ni lembatuca ni thek ceke, e ajiki bilund wok.” (Mat. 24:14) Wec mi dhu Jugiriki telos ma juloko nia “ajiki” i giragora maeni man bende i verse mir 6 kud 13, nyutho ajiki ma tokcen mi ng’om pa Sitani i Armagedon. (Nyu. 16:14, 16) Pieno, wabimedara nirweyo lembanyong’a nitundo i ajiki maeno ma tokcen. Eno uwilo ayi ma walar wanyang’ ko i wang’e.
I wang’e, walar wanyang’ nia wabijigo nirweyo lembanyong’a kinde ma masendi ma dit bicaku ku nyoth mi Babeli ma dit. (Nyu. 17:3, 5, 15, 16) Wagam wayiyo nia eno bibedo ajiki mi “oro mi bero pa Yehova.” (Isa. 61:2) Wabed waparu bende nia dhanu ma biboth kud i masendi ma dit gibinyutho ngbeng’ nia giwodhiri ni Yehova ma fodi masendi ma dit ucaku ngo. Wabed waporogi ku Juyahudi ma giboth kud i nyoth mi Yeruzalem i oro 607 W.N.Y. Jular juketho ayi i kum dhanu maeno i wang’e pi kwo, pilembe gitimo ni Yehova man gidagu timo ma reco. (Eze. 5:11; 9:4) Ento ayi ma waporo kogi eno urombo ngo ku lembe ma Yesu uyero i Matayo 24:14, m’unyutho nia dhanu bibedo ku kaka mi jolo lembanyong’a nitundo bir i dhug ajiki ma tokcen, niwacu i dhug Armagedon.
Ayi ma wanyang’ ko kawoni i Matayo 24:14 uwilo bende ayi ma wanyang’ ko i rwonglembe ma calu lungu pei ma juweco pire i Lembanyutha 16:21. I ng’ey ng’iyo i giragora ario maeno cuu mandha, ubenwang’ere nia giragoraneman ubemedo dhu wadi. Pirang’o wayero kumeno? Dwokowang’e ubenwang’ere i kite ma dhanu ubejolo ko rwonglembe mi Ker. Jakwenda Paulo ukiewo nia ni “ju ma biboth,” rwonglembene utie lembanyong’a, niwacu “ng’wic kwo.” Ento ni judegi pa Mungu, etie “ng’wic tho.” (2 Kor. 2:15, 16) Judegi pa Mungu gidagu rwonglembe mi Ker pilembe ebenyutho kamaleng’ nia ng’om migi utie ng’om ma rac, ma Sitani re m’ubebimo wiye, man m’uciko wiye i bang’ nyoth.—Yoh. 7:7; 1 Yoh. 2:17; 5:19.
Poy bende nia lungu pei mi laporne bibedo “dit ma yerere ngo.” Eno ubenyutho nia i saa mi masendi ma dit, tic mi lembanyong’a romo doko kwiny magwei, niwacu jubiketho nying Yehova bing’eyere nisagu m’i wang’e. (Eze. 39:7) I saa maeno, i ng’ey ma junyotho Babeli ma dit, nyo jumoko bijolo rwonglembene calu ve piny ma ng’wice ng’ar? Eno tie lembe ma copere. Saa moko nyo gibipoy kunoke gibinyang’ nia pi oro ma dupa, Jumulembe pa Yehova gibed gitwong’o pir ajiki mi dini mi ndra.
Lembuno urombo ku lembe m’ugam utimere i Misiri ma con, ndhu ndhu i ng’ey goco apar. I ng’ey ma Yehova “[ukelo] pokolembe iwi mungu ceke mi Misiri,” “udul dhanu ma lee” ma gi Juisrael ungo gilubo tok dhanu pa Yehova. (Ai 12:12, 37, 38) Copere juwirok eno ging’iyo nilubo tok dhanu pa Yehova, i ng’ey ma gineno lembe ceke ma Musa uyero pi goco apar m’utimere.
Ng’atu moko ci ma bilokere i bang’ Yehova i ng’ey nyoth mi Babeli ma dit bibedo ku rwom mi konyo umego pa Kristu ma bibedo nuti saa nica iwi ng’om. (Mat. 25:34-36, 40) I andha re, kaka maeno ma jung’ol ko nia gitie rombe bijik kare ma nok i wang’ Armagedon, kinde ma dong Jukristu ma juwiro binwang’u sukulia migi i polo.
Eno uwilo ayi ma walar wanyang’ ko i wang’e, man ebenyutho pi mer ma dit pa Yehova man kisa pare. Eyo, “ebeyenyo ngo nia ng’atu moko acel de unyothere, enre ebeyenyo dhanu ceke gilok cwinygi.”—2 Pet. 3:9.