Nyo ukwayu awek niringo mutukari?

Nyo ibenweng’iri i wang’ lembe ma rom eno? Ka eyo, ang’o ma copo konyi nineno ka nyo ukwayu imediri niringo ku mutukari kunoke ngo?

I ng’om moko ka ju ma giringo ku mutukari wend oro migi utundo i kadhiri moko, gicikiri nitimo ekzame mi yotkum migi i bang’ dokta pi ninwang’u twero mi mediri niringo ku mutukari. Jukristu ma gibekwo i ng’om ma kumeno giworo cik man yub ma gavmenti umaku. (Rum. 13:1) Ento kadok nwang’u ibekwo i theng ng’om ma kani de, telowic unuti ma copo konyi ning’iyo ka nyo asu ukwayu iring mutukari.

NG’II COPO PERI MI RINGO MUTUKARI

Guriri moko ma neno wi lembe mi ju m’utii uwacu nia ukwayu gibed ging’iyiri gigi ma nwang’u gipenjiri ku penji ma e:

• Nyo atie ku peko mi somo alama mi gengi kunoke nineno piny kud uthieno?

• Nyo repkum para uthum ma niwiro wiya pi nineno piny m’i maraya kunoke lukumba udoko teki?

• Nyo etie tek ira niting’o tienda pio pio kud iwi giya man nidwoke iwi breki?

• Nyo abed aringo ku mutukari yoo magwei uketho acero ndaki ni jumange?

• Nyo nindo m’ukadhu eni aboth abotha ku timo aksida kunoke nyo kum mutukari para ubam man ugwarere pilembe agam acorara swa i kind piny?

• Nyo kite m’aringo ko uketho japolisi uwok ung’ola?

• Nyo i kind nindo m’ukadhu eni rip rip ukadhu kuda kinde m’aberingo mutukari?

• Nyo abemaku yath moko ma tie kud adwogi iwi copo para mi ringo mutukari?

• Nyo wedi para kunoke jurimba gidaru yero ira de nia gibedieng’ i kum kite m’aringo ko mutukari?

Tekene idwoko wang’ penji maeno acel kunoke ario nia eyo, saa moko copo kwayu nia itim alokaloka. Icopo nwang’u nia ukwayu ngo dong’ ibed iring mutukari akeca, asagane kud uthieno. Bed ing’iyiri wang’ ma pol pi nineno copo peri mi ringo mutukari. Icopo penjo wedi peri moko kunoke jarimbi ukeuyer iri gin m’ebeparu iwi kite m’iringo ko mutukari. Saa moko nyo icopo nwang’u nia ikeinwang’ ponji iwi kite mi ringo ma ber ku mutukari. Enre tekene idwoko wang’ penji ma pol maeno ku eyo, ecopo bedo ber pi bero peri giri nia iwek niringo mutukari.a

WEK CIK MIR UKUNGU MI BIBLIA UTEL WII

Saa moko ecopo bedo lembe ma tek niyiyo nia dong’ itie ngo jaring mutukari ma ber calu mi wang’e. Niwinjo nia ukwayu iwek niringo mutukari copo timi rac mandha, kunoke icopo maru ngo nia iwec iwi lembene. Dong’ cik mir ukungu ma kani mi Biblia ma copo konyi ning’iyo i lembe peri cuu man nimaku yub mi rieko? Wakeng’iyu i cikne ario.

Bed mol. (Rie. 11:2) Kinde ma wabeteng’ini, wang’wa, ithwa, tego mi kumwa man copo ma tung’ tung’ ma watie ko caku jwik. Ku lapor, dhanu ma pol kinde ma oro migi ubecidho, giweko nituko kit tuko moko pilembe nwang’u ginyang’ nia gicopo nyayu ret yot yot i kumgi. Jucopo timo lembe ma rom eno pi ringo mutukari. Saa moko ng’atini copo nwang’u nia ukwayu ewek niringo mutukari pi bedomoth pare en gire. (Rie. 22:3) Bende, ng’atu ma mol winjo jumange kinde ma gibekoro adieng’a ma gitie ko i wiye.—Nen bende 2 Samwel 21:15-17.

Gwokiri i kum dubo mi rimo. (Poy. 22:8) Ka ng’atini uberingo mutukari i ayi ma cuu ngo, ecopo nyayu ret kunoke enego dhanu anega zoo de. Ng’atu m’ubemedere niringo mutukari ma ke copo pare ujwik, ecopo ketho kwo pare gire ku kwo mi jumange i ariti. Kan etimo aksida moko m’uketho ng’atini utho, nwang’u etie ku dubo mi rimo.

Kud ipar nia kan iweko niringo mutukari piri bibedo tek ungo i jumange man nia gibiwori ngo. Yehova umeri lee pi kite m’itie ko, uketho i iye molo, jwigiri man adieng’a m’itie ko pi bedomoth mi jumange. Eng’olo nia ebipong’o yeny peri man ebijuko cwinyi. (Isa. 46:4) Ebiweki ki ngo. Pieno, kwaye ekonyi kara itii ku rieko man ku juk mi Biblia kinde m’ibeng’iyo ka nyo ubekwayu iwek niringo mutukari kunoke ngo.