መላእክት ሊረዱህ የሚችሉት እንዴት ነው?

መላእክት ከአምላክ ፈቃድ ጋር በሚስማማ መልኩ ለእውነተኛ የአምላክ አገልጋዮች ጥበቃ ያደረጉባቸው ጊዜያት እንዳሉ መጽሐፍ ቅዱስ ይናገራል። (መዝሙር 34:7) ለምሳሌ ያህል፦

• ይሖዋ በክፋት የተሞሉትን ሰዶምና ገሞራን ባጠፋበት ወቅት ሎጥና ቤተሰቡ ከጥፋቱ መትረፍ እንዲችሉ መላእክት ረድተዋቸዋል።—ዘፍጥረት 19:1, 15-26

• በጥንቷ ባቢሎን የነበሩት ሦስት ዕብራውያን ወጣቶች በእቶን እሳት ውስጥ በተጣሉበት ጊዜ አምላክ “መልአኩን ልኮ አገልጋዮቹን [ታድጓቸዋል]።”—ዳንኤል 3:19-28

• ጻድቅ ሰው የነበረው ዳንኤል በተራቡ አንበሶች ጉድጓድ ውስጥ ተጥሎ አንድ ሌሊት ካሳለፈ በኋላ በአንበሶች ከመበላት የተረፈው እንዴት እንደሆነ ሲናገር “አምላኬ መልአኩን ልኮ የአንበሶቹን አፍ ዘጋ” ብሏል።—ዳንኤል 6:16, 22

መላእክት የጥንቱን የክርስቲያን ጉባኤ ረድተዋል

መላእክት የአምላክ ፈቃድ በሚሆንበት ጊዜ ሁሉ የጥንቱ የክርስቲያን ጉባኤ ለሚያደርጋቸው እንቅስቃሴዎች እርዳታ ሰጥተዋል። ለምሳሌ ያህል፦

• አንድ መልአክ ሐዋርያት ታስረው የነበሩበትን እስር ቤት በሮች ከፍቶ ካስወጣቸው በኋላ በቤተ መቅደስ መስበካቸውን እንዲቀጥሉ ነግሯቸዋል።—የሐዋርያት ሥራ 5:17-21

• አንድ መልአክ ወንጌላዊው ፊልጶስን ከኢየሩሳሌም ወደ ጋዛ ወደሚወስደው የበረሃ መንገድ እንዲሄድ ትእዛዝ ሰጥቶታል፤ ይህን ያደረገው ለአምልኮ ወደ ኢየሩሳሌም ሄዶ በመመለስ ላይ ለነበረ አንድ ኢትዮጵያዊ እንዲሰብክለት ነው።—የሐዋርያት ሥራ 8:26-33

• አምላክ አይሁዳውያን ያልሆኑ ሰዎች ክርስትናን እንዲቀበሉ የሚፈቅድበት ጊዜ ሲደርስ አንድ መልአክ ለሮማዊው መቶ አለቃ ለቆርኔሌዎስ በራእይ ተገልጦለት ሐዋርያው ጴጥሮስን ወደቤቱ እንዲያስጠራ መመሪያ ሰጥቶታል።—የሐዋርያት ሥራ 10:3-5

• ሐዋርያው ጴጥሮስ ታስሮ በነበረበት ወቅት አንድ መልአክ መጥቶ ከእስር ቤት አውጥቶታል።—የሐዋርያት ሥራ 12:1-11

መላእክት አንተን ሊረዱህ የሚችሉት እንዴት ነው?

አምላክ ሰዎችን በተአምራዊ መንገድ ለመርዳት በመላእክት እንደተጠቀመ የሚገልጹ የመጽሐፍ ቅዱስ ዘገባዎች ቢኖሩም በዛሬው ጊዜም ተመሳሳይ ነገር እንደሚያደርግ የሚያሳይ ማስረጃ የለም። ሆኖም ኢየሱስ የእኛን ዘመን አስመልክቶ ሲናገር እንዲህ ብሏል፦ “ይህ የመንግሥቱ ምሥራች ለብሔራት ሁሉ ምሥክር እንዲሆን በመላው ምድር ይሰበካል፤ ከዚያም መጨረሻው ይመጣል።” (ማቴዎስ 24:14) የክርስቶስ ደቀ መዛሙርት ይህን ሥራ የሚሠሩት በመላእክት አመራር ሥር ሆነው እንደሆነ ታውቅ ነበር?

የራእይ መጽሐፍ፣ መላእክት በምድር ዙሪያ ያሉ ሰዎች ስለ ይሖዋ አምላክና እሱ ለሰው ዘር ስላለው ዓላማ እንዲማሩ ለመርዳት በትጋት እንደሚሠሩ ይገልጻል። ሐዋርያው ዮሐንስ እንዲህ በማለት ጽፏል፦ “ሌላም መልአክ በሰማይ መካከል ሲበር አየሁ፤ እሱም በምድር ላይ ለሚኖር ብሔር፣ ነገድ፣ ቋንቋና ሕዝብ ሁሉ የሚያበስረው የዘላለም ምሥራች ይዞ ነበር። እሱም በታላቅ ድምፅ ‘አምላክን ፍሩ፤ ክብርም ስጡት፤ ምክንያቱም የሚፈርድበት ሰዓት ደርሷል፤ በመሆኑም ሰማይን፣ ምድርን፣ ባሕርንና የውኃ ምንጮችን የሠራውን አምልኩ’ አለ።” (ራእይ 14:6, 7) በዛሬው ጊዜ መላእክት ለዓለም አቀፉ የስብከት ሥራ ድጋፍ እንደሚሰጡ የሚያሳዩ በርካታ ተሞክሮዎች አሉ። አንድ ኃጢአተኛ እንኳ ንስሐ ገብቶ ወደ ይሖዋ ሲመለስ “በአምላክ መላእክት ዘንድ ደስታ ይሆናል።”—ሉቃስ 15:10

የስብከቱ ሥራ ከተጠናቀቀ በኋላስ? የነገሥታት ንጉሥ የሆነው ኢየሱስ ክርስቶስ “ሁሉን ቻይ በሆነው አምላክ ታላቅ ቀን [በሚካሄደው] ጦርነት” ማለትም በአርማጌዶን ሲዋጋ በሰማይ ያሉት የመላእክት “ሠራዊቶች” አብረውት ይዋጋሉ። (ራእይ 16:14-16፤ 19:14-16) ጌታ ኢየሱስ “ስለ ጌታችን ኢየሱስ ለሚገልጸው ምሥራች በማይታዘዙት ላይ የበቀል እርምጃ” በሚወስድበት ጊዜ ኃያላን መላእክት የመለኮታዊ ፍርድ አስፈጻሚዎች ሆነው ያገለግላሉ።—2 ተሰሎንቄ 1:7, 8

ስለሆነም መላእክት በግለሰብ ደረጃ እንደሚያስቡልህ እርግጠኛ ሁን። መላእክት አምላክን ለማገልገል የሚፈልጉ ሰዎች ደህንነት በጣም ያሳስባቸዋል፤ በመሆኑም አምላክ በምድር ላይ ያሉ ታማኝ አገልጋዮቹን ለማበርታትና ለመጠበቅ በተደጋጋሚ በመላእክት ተጠቅሟል።—ዕብራውያን 1:14

እንግዲያው እያንዳንዳችን ወሳኝ ምርጫ ቀርቦልናል። በዓለም ዙሪያ እየታወጀ ያለውን ምሥራች ለመስማትና ለመታዘዝ ፈቃደኞች ነን? በአካባቢህ የሚኖሩት የይሖዋ ምሥክሮች የአምላክ ኃያላን መላእክት ከሚሰጡት ፍቅራዊ እርዳታ መጠቀም የምትችልበትን መንገድ በማሳየት ረገድ አንተን ለመርዳት ፈቃደኞች ናቸው።