በአገልግሎት ረገድ ክህሎታችንን ማዳበር—የመጽሔት ደንበኞች ማፍራት

አስፈላጊ የሆነው ለምንድን ነው? መጽሔቶቻችንን ማንበብ የሚያስደስታቸው ብዙ ሰዎች ከእኛ ጋር መጽሐፍ ቅዱስን ማጥናት አይፈልጉም። ይህ የሆነው ሃይማኖታቸውን መለወጥ ስለማይፈልጉ አሊያም ለማጥናት ጊዜ እንደሌላቸው ስለሚሰማቸው ይሆናል። ይሁንና መጽሔቶቻችንን አዘውትረው ማንበባቸው ለአምላክ ቃል ጉጉት እንዲያዳብሩ ሊያደርጋቸው ይችላል። (1 ጴጥ. 2:2) በመጽሔቶቻችን ላይ የወጣ ርዕስ ልባቸውን ሊነካው አሊያም ደግሞ ሁኔታቸው ሊለወጥ ይችላል። ከእነሱ ጋር በቋሚነት አጠር ያለ ውይይት የምናደርግ ከሆነ ከእኛ ጋር መወያየት ከባድ እንዳልሆነ ሊሰማቸው ይችላል፤ እኛም የሚፈልጓቸውንና የሚያሳስቧቸውን ነገሮች እንድናውቅ ይረዳናል። ውሎ አድሮ ደግሞ መጽሐፍ ቅዱስን ማጥናት ሊጀምሩ ይችላሉ።

ይህን ማድረግ የሚቻለው እንዴት ነው?

በየወሩ ጊዜ መድባችሁ በቅርብ የወጣውን መጠበቂያ ግንብ እና ንቁ! መጽሔት ለግለሰቡ ውሰዱለት። በተጨማሪም ባበረከታችሁለት መጽሔት ላይ የሚገኝን አንድ ርዕስ እንዲያነብ ለማነሳሳት አሊያም በወሩ ውስጥ የሚበረከተውን ጽሑፍ ለመስጠት በወሩ መሃል ወደ ግለሰቡ ልትሄዱ ትችላላችሁ። ጥሩ ማስታወሻ ያዙ።—የጥር 2014 የመንግሥት አገልግሎታችን ገጽ 3⁠ን ተመልከት።
ወደ ግለሰቡ ከመሄዳችሁ በፊት ሁልጊዜ ተዘጋጁ። መጽሔቶቹን ለቤቱ ባለቤት ሰጥታችሁት ብቻ ከመሄድ ይልቅ ለመወያየት እንዲሁም ወዳጃዊ ግንኙነት እንዲኖራችሁ ለማድረግ ጥረት አድርጉ፤ ይህ ደግሞ ፍላጎቱን ለማነሳሳት ይረዳችኋል።
የመጽሐፍ ቅዱስ ጥናት ለመጀመር የሚያስችሉ አጋጣሚዎችን ለመጠቀም ንቁ ሁኑ። አንድ የመጽሔት ደንበኛችሁ ስለ አንድ ጉዳይ መጽሐፍ ቅዱስ ምን እንደሚል ቢጠይቃችሁ መልሱ የሚገኝበትን የማጥኛ ጽሑፍ ውሰዱለት፤ ከዚያም አብራችሁ ተወያዩበት። ከመለያየታችሁ በፊት፣ ከጉዳዩ ጋር ተያያዥነት ያለው ሌላ ጥያቄ አንሱ፤ ከዚያም በሚቀጥለው ጊዜ ተወያዩበት። መጽሐፍ ቅዱስን ወይም ከማስጠኛ ጽሑፎቻችን አንዱን በመጠቀም በቋሚነትና ርዕስ በርዕስ መጽሐፍ ቅዱሳዊ ውይይት የምታደርጉ ከሆነ ውይይቱ አጭር ቢሆንም እንኳ ከግለሰቡ ጋር የመጽሐፍ ቅዱስ ጥናት ጀምራችኋል። ለግለሰቡ ምሥራች የተባለውን ብሮሹር ካበረከታችሁለት በኋላ መጽሐፍ ቅዱስን እንዴት እንደምናስጠና በአጭሩ አሳይታችሁታል? መጽሐፍ ቅዱስን መማር የሚኖርብን ለምንድን ነው? እንዲሁም መጽሐፍ ቅዱስን የምናስጠናው እንዴት ነው? የተባሉትን ቪዲዮዎች አሳይታችሁታል? ግለሰቡ መጽሐፍ ቅዱስን ለማጥናት ከዚህ ቀደም ፈቃደኛ ባይሆንም ሁኔታዎች ሊለወጡ ይችላሉ። ታዲያ ጥናት ለማስጀመር እንደገና ብትሞክሩስ?

በዚህ ወር እንዲህ ለማድረግ ሞክሩ፦

የመጽሔት ደንበኛ ሊሆኑ የሚችሉ ሰዎችን ዝርዝር አዘጋጁ። በወሩ የወጡትን መጽሔቶች አበርክቱላቸው፤ እንዲሁም ቀጣዩን እትም እንደምታመጡላቸው ንገሯቸው።