በርካታ ንጹሐን ሰዎች ሕይወታቸውን አጥተዋል!

ሕፃኗ ኖኤል፣ ሥዕል መሣል የምትወድ አፍቃሪ ልጅ ነበረች። አንድ የበጋ ምሽት ላይ በቤታቸው ጓሮ ስትጫወት ተደናቅፋ መዋኛ ገንዳ ውስጥ በመውደቋ ሰጥማ ሞተች። ኖኤል፣ ከሁለት ሳምንት በኋላ አራት ዓመት ይሞላት ነበር።

ሻርሎት፣ ዳንዬል፣ ኦሊቪያ፣ ጆዜፊን . . . እነዚህ ልጆች፣ በከኔቲከት፣ ዩናይትድ ስቴትስ በሚገኝ አንድ ትምህርት ቤት ውስጥ ታኅሣሥ 14 ቀን 2012 በጥይት ከተገደሉት 26 ሰለባዎች መካከል ጥቂቶቹ ናቸው፤ በዚህ ወቅት፣ ከስድስት እስከ ሰባት ዓመት ባለው ዕድሜ ውስጥ የሚገኙ 20 ሕፃናት ተገድለዋል። በቀብር ሥነ ሥርዓቱ ላይ ፕሬዚዳንት ኦባማ፣ የሟቾቹን ሕፃናት ስም ከጠሩ በኋላ “እነዚህ አሳዛኝ ክስተቶች መቆም አለባቸው” በማለት ለተሰበሰቡት ሐዘንተኞች ተናገሩ።

የ18 ዓመቷ ባኖ እና ቤተሰቧ በ1998 ከኢራቅ ወደ ኖርዌይ በመሄድ በዚያ መኖር ጀመሩ። የባኖ ጓደኞች፣ “የፀሐይ ጮራ” በሚል የቁልምጫ ስም ይጠሯት ነበር። የሚያሳዝነው ግን ባኖ፣ ሐምሌ 22 ቀን 2011 አንድ ጽንፈኛ የሆነ ሰው የ77 ሰዎችን ሕይወት በማጥፋት የፈጸመው የዓመፅ ድርጊት ሰለባ ሆነች፤ ይህ ሰው “ይቅርታ መጠየቅ የምፈልገው ተጨማሪ ሰዎች መግደል ባለመቻሌ ነው” በማለት በጉራ ተናግሯል።