ጦርነት እና ግጭት ሊቆም ያልቻለው ለምንድን ነው?

ኃጢአት

አምላክ የመጀመሪያዎቹን ወላጆቻችንን አዳምንና ሔዋንን የፈጠራቸው በራሱ መልክ ነው። (ዘፍጥረት 1:27) በመሆኑም ሰላምንና ፍቅርን ጨምሮ የአምላክን ባሕርያት የማንጸባረቅ ተፈጥሯዊ ችሎታ ነበራቸው። (1 ቆሮንቶስ 14:33፤ 1 ዮሐንስ 4:8) ሆኖም አዳምና ሔዋን አምላክን ሳይታዘዙ ቀሩ፤ እንዲሁም ኃጢአት ሠሩ። በዚህም የተነሳ ሁላችንም ኃጢአትንና ሞትን ወርሰናል። (ሮም 5:12) በዘር የወረስነው ኃጢአት አስተሳሰባችንም ሆነ ድርጊታችን ወደ ዓመፅ ያዘነበለ እንዲሆን አድርጓል።—ዘፍጥረት 6:5፤ ማርቆስ 7:21, 22

የዓለም መንግሥታት

አምላክ ሲፈጥረን ራሳችንን በራሳችን የማስተዳደር ችሎታ አልሰጠንም። መጽሐፍ ቅዱስ “[ሰው] አካሄዱን እንኳ በራሱ አቃንቶ መምራት አይችልም” ይላል። (ኤርምያስ 10:23) በዚህም የተነሳ የዓለም መንግሥታት ጦርነትንና ዓመፅን ሙሉ በሙሉ ማስቀረት አይችሉም።

ሰይጣንና አጋንንቱ

መጽሐፍ ቅዱስ ‘መላው ዓለም በክፉው ቁጥጥር ሥር እንደሆነ’ ይናገራል። (1 ዮሐንስ 5:19) “ክፉው” የተባለው ሰይጣን ዲያብሎስ ነው፤ እሱ ነፍሰ ገዳይ ነው። (ዮሐንስ 8:44) ከጦርነትና ከዓመፅ በስተ ጀርባ ያሉት ዋነኛ ጠንሳሾች ሰይጣንና ሌሎች ክፉ መንፈሳዊ ፍጥረታት ናቸው።—ራእይ 12:9, 12