Samaan a Lipahak ko Paro no Lomaˈ Iso?

1. Hano makaketing ko ngangan no mararamoday ngaˈ, lipahak ko paro no lomaˈ?

O ngaˈayay lihaf naitiniay ci Yihofaan, o lipahakay a Kawas Cingra, manonoˈay to kahacecay a paro no lomaˈ ira ko lipahak. (1 Timoti 1:11) Ci Yihofa ko patirengay to raramod. Makaketing ko ngangan no mararamoday ngaˈ, lipahak ko paro no lomaˈ. Mihaen ngaˈ, fanekfeken ko falocoˈ no wama, wina ato wawa. Sasakaretengen no Krisciyang ko holic no hekal, patokien ko ngangan no mararamoday.​—ˈOsien ko Luka 2:1, 4, 5.

Manonoˈay ci Yihofa to masamaanay a raramod hani? Manonoˈay Cingra tahatolas a malacafay ko faˈinay ato fafahi, tahadaˈoc caka malacinowas. Misaaliay Cingra madimadi ko faˈinay to fafahi, madimadi ko fafahi to faˈinay. (Hipray 13:4) ˈIntehay Cingra malasawad ko raramod. (Malaki 2:16) Kawra, ano maˈodang ko cecay nangra, mihaiay ci Yihofa toya cowa ka raraw a tihi palasawad tora raramod, ikor ngaˈay cingra miliyaw a ciraramod.​—ˈOsien ko Matay 19:3-6, 9.

2. O faˈinay ato fafahi sasamaan a macacada cangra?

Misangaˈ ci Yihofa to faˈinayan ato fafahiyan, pala raramod cangranan, hongaˈay a madadama cangra. (Satapangan 2:18) O tawki no paro no lomaˈ ko faˈinay, mankora mamitamorong cingra paririˈ to paro no lomaˈ, halo pakafanaˈ cangranan mafanaˈ to Kawas. Kaolahen ningra ko fafahi, makahi a kinafalah saki fafahi. O faˈinay ato fafahi masasiolaolah cangra, mafanaˈ a makakangodo cangra. Manaokaniw cowa ko malefotay kita, maminanam ko faˈinay ato fafahi masasisodod, hongaˈ lipahak ko raramod.​—ˈOsien ko Ifiso 4:31, 32; 5:22-25, 33; 1 Pitiro 3:7.

3. Ano caka lipahak ko kararamod ngaˈay a sawad han saw?

Soˈlinto tatiih ko kararamod i, aka sapisawadaw, padotocen a maaolah. (1 Korinto 13:4, 5) Cowa ko aawa ko pasangar no raramod, kawra cowa pakalalok ko Fangcalay Cudad masiwatik anca malasawad ko raramod.​—ˈOsien ko 1 Korinto 7:10-13.

4. O wawa a tamdaw, samaanay ko saali no Kawas i tisowanan?

Manonoˈay ci Yihofa mahemek ko kaˈorip no miso, pafeliay to sangaˈayay a sakayat, toha sakahemekaw iso. Manonoˈay Cingra mitoor kiso to sowal no wama wina, mikitira i taneng ato nalifetan nangra a milifok to epoc. (Kolosay 3:20) Tona o misangaˈay Tatapangan ci Yihofa, misaaliay Cingra tisowanan midoedo to sowal Ningra ato sowal no Wawa Ningra, mikitini a milifok to sakalipahak.​—ˈOsien ko Patnakay 11:9–12:1; Matay 19:13-15; 21:15, 16.

5. O wama wina a tamdaw, misamaan kiso padama to wawa milifok to lipahakay hani?

Mamisaˈicel kiso a matayal, ho ira ko kitiraan ato kakaenen, hacaˈedong no wawa. (1 Timoti 5:8) Kawra, ano miharatengay kiso ira ko lipahak no wawa, padamaen cangra maolah to Kawas halo micada to sapasifanaˈ no Kawas. (Ifiso 6:4) Patireng kiso to ngaˈay taˈarawan nangra, paihkal to nika olah iso to Kawas, o mamasemer ko falocoˈ no wawa. Ano doedoen iso ko Fangcalay Cudad a pasifanaˈ to wawa, o wawato i, mamapalahad ko ngaˈayay a waywayan.​—ˈOsien ko Limoˈot 6:4-7; Taneng 22:6.

Misaaliay ko wawa to sapakalalok ato sapahemek iso. O roma sa i, misaaliay cangra to pirikec ato pisalof iso cangranan. Mihaen i, mamadipot cangra, caka raraw ko demak a malahdaw ko hemek nangra. (Taneng 22:15) Nikawrira, aka tada pakidem ko pirikec cangranan.​—ˈOsien ko Kolosay 3:21.

Misawacayay Tamdaw ni Yihofa iraay ko mitolican a cudad, misalalangiay to Fangcalay Cudad a tiliden, mikiriwiˈay saki wama wina ato wawa ko sakapitilid.​—ˈOsien ko ˈOlic 19:7, 11.