SAKA 14 FEDENGAN

Ihkalen ko Kalimlaan

Hipray 8:1

KALIMLAAN: Ano mikimad i, pakacipinangen ko mitengilay to kimad no miso, ihkalen ko kalimlaan, matoor ko patosokan no kimad, mahapinang ko kalaliting no kalimlaan ato lalangian.

HAPAKAYRAAN:

Patireng to patosokan. O manan ko patosokan no kimad iso? Papatongal to sifanaˈ no mitengilay han? Wa mihai ko mitengilay han? Mamikowad to mitengilay han? Doedoen konini patosokan a misaday to kimad, hongaˈ matoor ko patosokan iso.

Haratengen hena: “Pakayni tonini lalangian, samaanay ko piharateng no mitengilay? Iraay ko manan salicay nangra? Hano mihaen cangra miharateng hani?” Tooren ko harateng no mitengilay misaday to kalimlaan, mihaen ngaˈ mahapinang no mitengilay ko kimad iso, wa madolo to cipinang mihai to misowalan iso.
Ihkalen ko lalangian no kimad. Ngaˈayay kiso itini pikimad mitikol misakadademak to milingatay to kalimlaan a sowal, anca tano mahecaday ko tatodong a sowal paihkal to lalangian.
Doloen a ihkal ko masakalimlaan. O masakalimlaan a kimad mamilingat to lalangian, hanaca itini misaˈosian a tatokian songilaˈen a mitadtad. Hamaan ko adihayay a masakalimlaan. Itini pikimad i, hapinangen mitadtad mihacecay ko kalimlaan, ano sasomowal to roma kalimlaan i, pairaen ko hanhan no sowal, patatooren ko kahacecay no kalimlaan.

Satapang no pikimad, siwkayento ko kalimlaan, padama to mitengilay cipinang to lingad no kimad, ˈayaw no mihererek to kimad i, tikolen milomal ko kalimlaan, padama to mitengilay pakaharateng to kalimlaan no kimad.