Saka 6 Folad

O wina ni Samuil ci Hana Na misiˈayaway to pasangaray remoen a sapalifet. Pina:ayto miheca caka ngaˈay cingra a ciwawa. (1 Samuil 1:2) Harateng nolitengan Israil tamdaw, eca ka ciwawa ko fafahiyan o cowa pilifok to sapalemed no Kawas sanay. Mihaenay hato mangodoay ci Hana. (Satapangan 30:​1, 2) Mangalefay, o roma fafahi no faˈinay ni Hana ci Pinina, adihayay ko mihofocan a wawa. Sapilifokaw to olah no faˈinay, milalikafay ci Pinina cingraanan, pakasomad cingraanan. Salakat, pasangaray ci Hana misiˈayaw toniya sapalifet, ‘misemsemay ko falocoˈ’ ningra, tatangic sanay caka komaen. (1 Samuil 1:​7, 10) Ikorto, samanay ci Hana milifok to sahinom hani? Mitolonay ci Hana ci Yihofaan, mihadak to nafalocoˈan a sowal. Ikor, pasowalan ningra ko pakayraan no niyah i taˈangayay saysi ci Ilian. Hananay ni Ili pasowal cingra: ‘Pinokayto kiso, nanay rihaday kiso, nanay palaˈosien no Kawas ko micangacangan iso.’ Telocto, ‘minokayayto ci Hana komaen, cowato ka somad ko pising.’ (1 Samuil 1:​17, 18) O satolon padamaay ci Hanaan patikol a rihaday ko falocoˈ. w20.02 21 fiedac 4-5 fatac

Cato ka halafin papalaˈafoento ni Yihofa ko hekal ni Satan, edeng o matatodongay ko waywayan a tamdaw ko mamalidong. (Dmak 13:48) Adihayay ko mipalakan ita a toki ato ˈicel mitosil to kafahalan a tamdaw, malecaday makalimay kita malacafay ko paro no lomaˈ kitaanan midoko ci Yihofaan. O sidaˈitay a Wama ita ci Yihofa ‘cowa ka kahi malaˈafo ko cecay tamdaw,’ mitokelay pasasiyor ko cecacecay a tamdaw. (2 Pitiro 3:9) Ano milasil kita to sakalidong a lihaf i, sinanoten matatodongay ko pakayraan hokira. Ano mitosil kita to kafahalan a tamdaw i madaˈmaˈay ko sowal, kawra ano misawacay to paro no lomaˈ i patodicek sanay ko sasowalen, cowa piharateng to nafalocoˈan nangra. Cowa ka ngaˈay ko pakayraan iso a misawacay to paro no lomaˈ isalakat alatek, nanay ngaˈay ko pidemak isalakat. Ano padama to paro no lomaˈ i, ngaˈayay sinanoten ita ko mihadakan no sinael anini a limoˈot. Ano caka dofdofen ita koniya limoˈot, wa kaetih ko kalalaˈed ita to paro no lomaˈ, wa pasangar padama cangranan micada to soˈlinay kimad. w19.08 14-15 fiedac 3-5 fatac

Pakayni ci Yisan, mikitini i Fangcalay Cudad mananamay iso ko maanan hani? O saaroˈan ni Yis midoedoay ci Yihofaan. Makahiay cingra kinafalah to ˈorip malo sapatefoc, tano waywayan kita a paihkal to pakasoˈlinay to sapatefoc, wa masodod ko raraw, ngaˈay mala widang no Kawas kita, milifok to midaˈocay a ˈorip. (Yohani 3:​16) O taˈangayay saysi no mita ci Yis, padamaay kitaanan pakayni i sapatefoc milifok to epoc, ngaˈay ko kalalaˈed aci Yihofaan. (Hipray 4:​15; 7:​24, 25) O hongti no Hongti Kitakit ci Yis, wa patalahekal cingra to fangcalay ngangan ni Yihofa, papalahdaw to kihcod tatiihay a tamdaw ato demak, ngaˈay kita itini i Lakoing tahadaˈoc lipahak a maˈorip. (Matay 6:​9, 10; Paˈarawan 11:15) O makapahay a taˈarawan cingra. Misarocoday cingra midemak to araaw ni Yihofa, patirengay to ngaˈayay a taˈarawan no mita. (Yohani 4:​34) Pakasoˈlin kiso to pakayniay ci Yisan a kimad i Fangcalay Cudad, wa matongal ko olah ci Yisan, ciharateng malecad cingranan misarocod a midemak to araaw no Kawas. w20.03 10 fiedac 12-13 fatac

ˈAyaw no kinafalah ci Yis to ˈorip padadotocay mitolon to Kawas. Tinakoen, patireng ci Yis to Lafi no Tapang, ˈayaw no komaen to epang ato epah i mitolonay cingra. (1 Korinto 11:23-​25) Maharek ci Yis ato tarokos komaen to lafi no Pitaˈlifan a Lisin, ˈayaw no miliyas malacafayay a mitolon. (Yohani 17:​1-​26) Toya dadaya, malacafay ci Yis to nisawawaan tayra i Olif a Lotok, kinapinaay a mitolon. (Matay 26:36-​39, 42, 44) ˈAyaw no maketon ko selaˈ ni Yis i, mitolonayho to Kawas. (Luka 23:46) ˈAyaw no kinafalah ci Yis to ˈorip, kihcod mifekaday demak toya romiˈad i, pakaynian i satolon pasowal ci Yihofaan. Padadotocay ci Yis mitolon, mitiˈer ci Yihofaan, mansa ngaˈay miemem to sapalifet. O tarokos saan cowa ka padadotoc a mitolon, ira sato ko sapalifet, awaayto ko timolo a misiˈayaw. (Matay 26:40, 41, 43, 45, 56) Haenen ita ci Yisan ‘padadotoc a mitolonˈ ngaˈ, madimadi i sapalifet. w19.04 9 fiedac 4-5 fatac

Ci Yihofa tada ˈintehay to miangangay! Sanay ko sowal ni Yihofa to Israil tamdaw: ‘Ilalomaˈ namo, aka fahekolen i namal ko wawa, aka paˈedaway, pahantangay, ato mingitangit to kalowikoy to hanoikor, ato miˈedaw, anca piˈekak to tao, mingitangit to kalowikoy, ato miˈedaw tono ikoran, aka pilicay to mapatayay. Ano mihaen ko demak namo, kaˈintehan ni Yihofa.’ (Limoˈot 18:​10-​12) Soˈlin cowa ko mamidofdof ko Krisciyang to sapafeli ni Yihofa to Israil a sarikec, kawra mafanaˈay kita, cowa ka falic ko pinengneng ni Yihofa to miangangay a demak. Patalipaˈelalay ci Yihofa kitanan miliyas to miangangay, samanen mafanaˈay Cingra o sakariˈang ni Satan to tamdaw a pakayraan konini. Misaka dademakan ni Satan ko miangangay miowing to masakenaay mangah, o cecay i mapatay ko tamdaw tayraay roma hekal padotoc a materek sanay. (Patnakay 9:5) Misaka dademakanho ni Satan ko miangangay paˈangi to tamdaw a miliyas ci Yihofaan. O araaw ningra ho mitiˈer ko miangangay tamdaw to tatiihay coyoh a eca ko ci Yihofa ko tiˈeren sanay. w19.04 21 fiedac 5-6 fatac

O mikaˈodangay to kaemangay a tamdaw pairaay to taˈangayay a pidokaˈ to wawa. Misaˈfitay cangra milipalaw to wawa, palahdaw to rihaday no falocoˈ no wawa. Sasongilaˈen ita midipot ko wawa, sasayaren ato padamaen koya madokaˈay a tamdaw. (1 Tisalonika 5:​14) Ano ira ko miˈodangay to kaemangay i kasakopang, wa mipalak to ngangan no kasakopang. (Matay 5:​16; 1 Pitiro 2:​12) O midemakay to hatiniay a raraw a tamdaw mipalakay to ngangan no kasakopang, ano eca ka pasasiyor cangra, cowa ko mamihai kita materek cangra i kasakopang. Ano ira ko salikaka midemakay to miˈodangay to kaemangay a demak, o misafelitay to holic no hekal konini. (Nengnengen ko Dmak 25:8.) Soˈlin awaay ko fadangalan no malohemay malitengay a misayfang, kawra cowa ko papaˈading cangranan, o papaikenen ko mikowanay a misayfang to mikaˈodangay to kaemangay a tamdaw. w19.05 9 fiedac 4-7 fatac

Ci Yihofa o Satadamaanay a Singsi ita, ngaˈay padama kitanan misiˈayaw to maamaan a pasangar. (Isaya 30:20, 21) O Kimad Ningra mikayatay kitanan, “ta masongilaˈ a mapatala ko mamatayal no Kawas ta maedeng cangra a midemak to masamaamaanay a ngaˈayay a demak.” (2 Timoti 3:​17) Miowingay ko tamdaw to ‘taneng no hekalˈ, kawra ano tooren ita ko Fangcalay Cudad a maˈorip i, mikikakaay ko nika citaneng i cangranan. (ˈOlic 119:97-​100) O taneng no hekal pakalalokay to tamdaw papisalo to coos no falocoˈ, mankora pasangaray kita micoˈay, madoloayto matiya o hekal a tamdaw ko demak. Orasaka patalipaˈelalay ko Fangcalay Cudad kitanan: ‘ka Pinaˈon kamo, hoeca ka tano tatoˈasan a nanaman, tano haratengan a fanaˈ a masaˈfit kamo.’ (Kolosay 2:8) Matiya to sapairasol no Fancalay Cudad, itini salikoray romiˈad, o tamdaw ikakaay ko ‘olah to lawla.’ (2 Timoti 3:⁠4) O roma i, icowacowa iraay ko AIDS (Aycepin) ato hatiniay a midengaay a adada. O tatiihay a teloc ihkalay a misawacay, tada mafolaay ko taneng no hekal.​—2 Pitiro 2:​19. w19.05 21 fiedac 1-2 fatac; 22 fiedac 4-5 fatac

Milipalaway ci Satan to Israil tamdaw, malecad o ˈalafang tamdaw micangacang to kawas patefad to ˈorad hongaˈ kadofah ko mipanayan. Telocto, o cangoˈotay ko pakasoˈlin ci Yihofaan a Israil tamdaw misatapangayto malecad o ˈalafang tamdaw a misalisin midoko ci Paalan. Miowingayho ci Satan to Israil misalo to malafoay a coos no tireng. O ˈalafang tamdaw tano kaacekan maˈodangay a lisin ko sapidoko to kawas nangra, mahawpay ko maˈaˈodang to tasalamaan a faˈinayan ato fafahiyan. Pakihater hananay ko tongsinlien ato romaroma maˈodangay waywayan, tada matenakay itira. (Limoˈot 23:​17, 18; 1 Hongti 14:24) Pakasoˈlinay ko ˈalafang tamdaw, o hatiniay a lisin o papahafay ko kawas to sera. Makayhiday noniya kaacekan a lisin ko ˈalomanay Israil tamdaw, misatapangto midoko to makaniway kawas. w19.06 2 fiedac 3 fatac; 4 fiedac 7-8 fatac

ˈAlomanay matayalay i Pitil ato mieminay to toki misakafah a tamdaw manilnilay tayra i faelohay katayalan. Pakayra cangranan, miliyas to kaolahan a katayalan cowa ko madoloay. O manan ko papadama cangranan mananam to kafalic hani? Pakayni sapiingidaw ci Yihofaan, wa miˈosi kita to Fangcalay Cudad to romiˈamiˈad hanaca midotim to maˈosiay a lalakaw. Roma i, malacafay to faelohay kasakopang fanekfek a mitosil. Soˈlin cato ka lecad to salakatay a adihay ko midemakan, ano padadotoc a madimadi matayal, cowa ko mamapawan ko Kawas kitaanan. Ka padadotoc a kantang ko kaˈorip. Aka Pakayni cariraw no hekal a misawad midoko ci Yihofaan. (Matay 13:22) Wa miroero kitaanan ko cowa pidoko to Kawas anca ngaˈayay ko harateng a salawina, miowing kitanan micangacang to sadipot no payci i hekal ni Satan, aka a makayhid. (1 Yohani 2:​15-​17) Tadiˈecen ita ci Yihofa, samanen mikiˈokay Cingra mamidimokos kitaanan, patanektek to pakasoˈlinay falocoˈ ita, rihaday ko falocoˈ, awa ko kacangoˈotan.​—Hipray 4:​16; 13:​5, 6. w19.08 20 fiedac 4 fatac; 21-​22 fiedac 7-8 fatac

Tahasiˈayaway kiso to taˈangayay saroero han? Mafanaˈ to cipinangay ci Yihofa to nafalocoˈan ita, coko taˈangayay ko sasayar kitanan han? Mafanaˈay Cingra to tolas no ˈicel ita, cipinangayho to harateng ato nafalocoˈan ita. (ˈOlic 103:14; 139:​3, 4) Mitadiˈec kita ci Yihofaan, oha papadama Cingra kitanan miremo to saroero. O saroero mifasaway to harateng, matoleday ko falocoˈ. Ano iraay ko mahaenay harateng iso, tadiˈecen ci Yihofa, o papadamaen Ningra kiso. Wa samaan Cingra padama tisowanan hani? Tokel ni Yihofa tisowanan fanaˈen Cingra to calemcem no falocoˈ iso, o papacaˈofen Ningra kiso. (ˈOlic 5:3; 1 Pitiro 5:7) Mihaenay, ka padadotoc a mitolon, fanaˈen ci Yihofa to pasangaray iso. Soˈlin cowa ko mamisiˈayaw Cingra a pasowal tisowanan, kawra o papakaynien Ningra i Fangcalay Cudad ato likakawa ningra a pacaˈof to satolon iso. Micekiw kiso to maˈoningay i Fangcalay Cudad, mamalifok ko sahinom, ira ko hatokel no ikor. Roma i, wa pakalalok ko salikaka tisowanan.​—Loma 15:4; Hipray 10:24, 25. w19.06 16 fiedac 7-8 fatac

Ano tahacada to sapalak i, mitolon kiso ci Yihofaan i, haemin a mihadak, o kihcod katalawan ka calemceman a demak pasowal han ko ciolahay a Wama. (Radiw no Mararomay 2:​19) Ano mararid kiso mifowah to harateng i Kawas, wa matongal ko piingid iso Cingranan. (Loma 8:​38, 39) Pakasoˈlin to mamalaˈosi maemin ko sapalemed no Hongti Kitakit no Kawas. (Saˈosi 23:19) Ano cangoˈotay ko pakasoˈlin iso to sakiˈok no Kawas, wa madoloto a mapacekid ni Satan ato mihakelongay ciraan a tamdaw. (Taneng 24:10; Hipray 2:​15) Tongalen ko kacipinang to pakayniay i Hongti Kitakit no Kawas a sakiˈok, mafanaˈ to hano mamalaˈosi koniya sakiˈok. Mihaen kiso mamilifok to maanan a epoc hani? Nengnengen ita ko nalifetan no salikaka ci Cong Ce-Tan. Pakayni i pihakelongan na mapalitay cingra to 7 miheca, toya tatokian hano ngaˈay cingra mitafo to madimadi hani? Sanay cingra: “Cipinangay kako to Hongti Kitakit no Kawas, o soˈlinay koniya Hongti Kitakit, awaay ko mimimiming a sasa, mansa tanektek ko pakasoˈlin ako, cowa ko mamangiyangi.” Ano tanektek ko pakasoˈlin iso to sakiˈok no Kawas, cowa ko mamakokiˈ.​—Taneng 3:25, 26. w19.07 2 fiedac 1 fatac; 3 fiedac 6-7 fatac

Padama to tamdaw malo Krisciyang, hano o masaka limlaan hani? Samanen edengan malo Krisciyang ko tamdaw ngaˈ, ngaˈay mala widang no Kawas. Roma i, oya mikotoday ci Yisan a tamdaw, coko lipahak aca ko ˈorip, salikor mamalifok ko tahadaˈocay a ˈorip. (Yohani 14:6; 17:3) Taˈakayay ko ˈinorong ita, kawra, coko inaneng no niyah ko sapilahci toniya tayal, sowal no tarokos ci Pawlo, cingra ato kalacafayay cingranan a matayal sahtoay o ‘kapot no Kawasˈ. (1 Korinto 3:9) Paikenan ni Yihofa aci Yis ko cowa ka lefot a tamdaw toniya kalimlaan a tayal, tada kalikoanto no mita! Padama to tamdaw malo Krisciyang wa palipahak kitaanan. Ano sapadamaaw to tamdaw malo Krisciyang i, i salakat ‘kilimenˈ ita ko makalimay sakafanaˈaw ci Yihofaan a tamdaw. Misawacay kita to malitemohay a tamdaw ngaˈ, o soˈlinay a Misawacayay Tamdaw ni Yihofa. Dofdofen ita ko limoˈot ni Yis a mitosil, misawacay to o soˈlinay a Krisciyang ko niyah. w19.07 15 fiedac 3-5 fatac

ˈAlomanay Asia tamdaw maolahay to taneng no Fangcalay Cudad. Itini i Niwyok, mitosilan no salikaka ko somowalay tono Kowaping a tamdaw, sanay cingra: “Salakatanho ako ciharateng cingra, misongilaˈ mitengil to sowal nangra. Ano caho ka halafin tayni i Padaka, licayen ako: ‘Mananamayto kiso itini han? Mahelaayto ko katayalan han? Ngaˈayay ko itiniay tamdaw tisowanan han?ˈ” Latekay, mihaen a ciharateng ko salikaka, iraayto ko toki milengo to taneng no Fangcalay Cudad. Sanayho cingra a milicay: “Sasamaan malakangaˈay to tao samanay ko miso harateng hani? Paˈarawen ako kiso to cecay sowal no Fangcalay Cudad, ngaˈay han? Sanay itini: ‘ˈAyaw no malecad o nifowahan a nanom ko kacacoli, ˈayaw no mifekad ko cacoli miliyasto.’ Harateng iso matatodongay koniya sowal han?” (Taneng 17:14) Tano hatiniay a pakayraan ko pitosil ita, wa mahapinang ko kalim no cilomaˈay a minanam to Fangcalay Cudad. w19.07 23 fiedac 13 fatac

Ano manilnilay ko salikaka tayni i kasakopang iso i, o mamisarocod kiso a cipinang to nafalocoˈan nangra. Alatek iraay ko adada nangra ato salawina nangra, hanaca masomaday to kapatay no paro no lomaˈ alatek. Pakayni ecato kaˈaraw ko ngaˈayay a widang hato mararomay cangra alatek. O hatiniay a demak, misaaliay to toki ngaˈ mamasayar. Ano kalacafayen iso a mitosil cangra i, paˈarawen cangra to ngaˈayay a taˈarawan iso, ano mihaen wa kaliki cangra mananam i faelohay kitiraan. Cecay fafahiyan salikaka na halafinay matayal i roma kitakit, sanay cingra: “Salakat misikayay kako to pacekiwan to romiˈamiˈad, kawra itini faelohay pala, pasangaray paˈaraw i tamdaw to Fangcalay Cudad ato ika. Miakoˈiday kako to itiniay salikaka mitahidang takowanan mirienang to pilisoˈ ato pipacekiw nangra, tawlikayto ko harateng ako. Minanamayto kako sasamaan i faelohay kilac masasowal to tamdaw. Oniya demak padamaay takowanan miliyaw a lipahak.” w19.08 22 fiedac 10 fatac; 24 fiedac 13-14 fatac

Mahecad ci Iuotia aci Sintiki, latekay haharateng sanay kita to dangoc no salikaka, hato pasangaray maolah cangranan. Kawra kahacecay tamdaw sahto mamararaw, ano nanengneng sa kita to raraw no tao, o olah ita wa mafasaw mafasawto. Tinakoen, o cecay salikaka matawalay miasik to kasaˈopoan, mamaketer kita alatek. Ano misatapang kita misaˈosi to raraw ningra, mamatongal ko ngolaw ita, pasangarayto kita maolah cingraanan. Mihaenay i, ano malifaay iso ko hatiniay a demak, haratengen: Maˈaraway ni Yihofa ko raraw iso, ato raraw no salikaka, kawra kamayanay Cingra a maolah tisowanan ato salikaka. Mihaenay todongen ita ci Yihofa a palahad to olah, kilimen ko kangaˈayan no salikaka. Ano mihaen kita a maolah to salikaka i, mamakelec ko kalalaˈed ita ato salikaka.​—Filipi 2:​1, 2. w19.08 9-10 fiedac 7-8 fatac

Maolahay ci Yihofa to misapoeneray ko falocoˈ a tamdaw. Edengan o soˈlinay misapoeneray ko falocoˈ a tamdaw, wa ira ko ngaˈayay a kalalaˈed aci Yihofa, oya malitaˈangay a tamdaw, cowa ka piingid ci Yihofa cangranan. Mitokelay kita pakahemek ci Yihofaan, ato micada to kanonoˈ Ningra. Mihaenay i, maminanam kita to sasamaan palahad to misapoeneray a capeling. O tatodong no misapoeneray a falocoˈ, cowa ko malitaˈangay. Mikitini i Fangcalay Cudad mananamay ita, oya misapoeneray a tamdaw mihayay to ikakaay ko saaroˈan ni Yihofa tono niyah, ikakaay ko midemakan no tao tono niyah. Mansa cowa ko hamamalitaˈang kita. (Filipi 2:​3, 4) O roma tamdaw hato misapoeneray nengnengen, maomoyay ko pinangan nangra alatek, anca pakayni i serangawan ato kalomahadan nangra, mapasifanaˈ to kakangodoen ko tao, ˈarawhan, i falocoˈ nangra ikakaay ko niyah to tao saan miharateng. Ano mahaenay i, o malitaˈangay a falocoˈ nangra mamahadak noikor.​—Luka 6:45. w19.09 2 fiedac 1, 3-4 fatac

‘Ngaˈayay lihaf no tatapangan ci Yisˈ mahawpay ko kihecod a sapasifanaˈ ni Yis a Kimad. Midofdof kita toniya ngaˈayay lihaf, wa misaˈicel a misaka dademak i kaˈorip to sapasifanaˈ ni Yis, isalakat a micangacang to Hongti Kitakit, mitoor to palinian no Kawas a maˈorip, milasil to Hongti Kitakit no Kawas. (Matay 6:​33; 24:14) Roma i, aretengay ko ˈinorong no salikaka ni Kristo, midofdof kita to ngaˈayay lihaf ni Yis, mamisaˈicel a midama cangranan. (Matay 25:31-​40) Cato ka halafin wa milifok to sapadiˈo no salikaka ni Kristo ko ‘Roma lopayˈay siri.ˈ (Yohani 10:16) Wa samaan koniya demak mifekad hani? ˈAyaw no mifekad ko Armakiton, itiniayho i fafekang no sera a ‘mimingay ˈopo a siriˈ wa patikolen maˈorip cangra tayra i kakarayan malo cowa ko mamapatay a ˈadingo a tireng, itiya 144,000 a wawa no Kawas wa mikapot to kakarayan sofitay, palaˈafo to Kok, midipot to ‘taˈangayay ˈopo tamdaw.ˈ (Paˈarawan 2:​26, 27; 7:​9, 10) ‘Taˈangayay ˈopo tamdawˈ ngaˈay midama to itiniayho i fafekang no sera a salikaka ni Kristo, tada kalikoanto! w19.09 12-13 fiedac 16-18 fatac

Midemak to patorodan ni Yis a tayal, hano sasinoway ko falocoˈ ita hani? Samanen iraay ko sangaˈayay a kantok no mita. O kasapaan a kantok ci Yihofa, masemeray Cingra to tayal ita, cowa ko mariˈangay a tawki. (Hipray 6:​10) Pafeliay Cingra kitaanan to ˈicel, ho ngaˈay kita mitamorong to ˈinorong no niyah. (2 Korinto 4:7; Kalatiya 6:5) Patirengay ko Hongti ita ci Yis Kristo to taˈarawan, pasifanaˈ kitaanan sasamaan micada to tao. (Yohani 13:15) O pakaenay kitaanan a malohemay malitengay, misaˈicelay a mitodong to ‘kasapaan a pakaenayˈ a Yisan. (Hipray 13:20; 1 Pitiro 5:2) Misarocoday cangra sidaˈit a midimokos ato pakalalok kitaanan, timoloayho a midipot kitaanan. Iraay ko sangaˈayay a widang no mita. Cowa kalecad to hekal a tamdaw, adihayay ko ciolahay a widang no mita, ciepocay ko nikaˈorip. Haratengen hena, makapahay ko waywayan no salikaka ita, cowa ka misaidahi. Adihayay ko inaneng nangra, kawra misapoeneray ko falocoˈ, ikakaay ko tao toniyah sanay miharateng. Minengneng cangra kitaanan cowa ko kalacafay aca matayal, o widang sanay a minengneng. Tada maolahay cangra kitaanan, makahiay pakayni kitaanan a kinafalah to ˈorip. Malacafay cangranan a matayal tada kalikoanto! w19.09 20 fiedac 1 fatac; 23 fiedac 12-​14 fatac

O limoˈot ni Pawlo misowalay to ‘romiˈad ni Yihofa.’ (1 Tisalonika 5:​1-6) Oniya tatokian mikitini picada no ‘Taˈangayay Papilonˈ to saˈodis, tahira kahererekan no Armakiton a tatokian ko mitoroˈan. (Paˈarawan 16:14, 16; 17:5) O sapalimoˈot ni Pawlo mifanaˈay kitaanan sasamaan talaˈayaw a misaday pakayni i ‘romiˈad ni Yihofa. ‘Caay ka ngaˈay a matiya o tao kita a padotoc a mafotiˈ. O nika palal ita a masinanot ko ngaˈay.ˈ O maanan ko sasinanoten ita hani? Tinakoen, wa mitafo kita to misatenokay, cowa ko mamirienang to mirikecay a demak, ho eca ko ‘noni hekalˈ kita. (Yohani 15:19) Mafanaˈay kita, dengan o Hongti Kitakit no Kawas ko papaira to dipayalay a hekal. Papadamaho kita to tao cipinang to pairasolay ko Fangcalay Cudad to mamifekad ko maanan a demak noikor. Wa itini ˈayaw no misatapang ko taˈangayay padiing mipiliˈto ko tamdaw a midoko ci Yihofaan ngaˈ, ano eca i, wa maosoyto. Mihaenay, o mitosilay a demak tada macalohayto! w19.10 8 fiedac 3 fatac; 9 fiedac 5-6 fatac

Maharek mitilid toniya maloloday cudad, samanen macongeday ci Yirimiya coka ngaˈay tayra i fangcalay sefi, mansa paiken hananay ci Paruk tayra miˈosi toya cudad. (Yirimiya 36:​5, 6) Misiˈayaway ci Paruk to katalawan tayra i potal no fangcalay sefi, miˈosi to lalakaw no cudad patengil to ˈalomanay, patadoay ci Yirimiya cingranan a maliko. (Yirimiya 36:​8-​10) Matengil no ˈaˈideman no Yutaya koniya demak i, papiˈosiay ci Parukan patengil cangranan to lihaf noniya cudad. (Yirimiya 36:14,15) Maharek cangra mitengil i, misaˈosiay patengil to Hongti ci Yihoyakiman. Matengil ni Yihoyakim ko lalakaw no cudad tada maketeray, todohan ningra koya cudad, palimoˈot to tamdaw milepel ci Yirimiyaan aci Parukan. Pafeliayho ci Yirimiya to roma cudad papiliyawen ci Parukan mitilid to lihaf ni Yihofa, ‘o nano sowal ni Yirimiya mitilidan ni Paruk i fafekang, oya mitodohan no Hongti no Yutaya ci Yihoyakim a cudad.—⁠Yirimiya 36:26-​28, 32. w19.11 3-4 fiedac 4-6 fatac

Sapalaˈosiaw to araaw no Niyah, o maananto a demak malaˈosiay ni Yihofa a maemin. Tinakoen, ngaˈayay a malo tadamaanay a singsi ci Yihofa, malo misayaray a Wama, malo milasilay to ngaˈayay lihaf a Kawas. (Isaya 48:17; 2 Korinto 7:6; Kalatiya 3:8) Roma i, sakadademakanho Ningra ko tamdaw palaˈosi to araaw Ningra. (Matay 24:14; 28:19, 20; 2 Korinto 1:​3, 4) Wa pafeli ci Yihofa kitaanan to taneng ato ˈicel, ho ngaˈay malaˈosi ita ko araaw Ningra, o harateng no roma mikingkiway tamdaw, o tatodong no ngangan ni Yihofa konini sanay. Ciharatengay kita ngaˈay sakadademaken ni Yihofa, kawra o roma tamdaw alatek pakayni i mihecaan, inaneng anca pakayraan noniyah, cisasaay to ngaˈay malaˈosi koniya patosokan hokira, sanay miharateng. O roma tamdaw i, madengayto ko katayal ako ci Yihofaan hamaanto misaˈicel a midemak, saan cangra. w19.10 20 fiedac 1-2 fatac

Pakadafongay a harateng wa mipalak to pakasoˈlinay falocoˈ ita, ecato ka pisamacay matayal saki Yihofaan. Sowal no tarokos ci Pawlo: ‘O mala sofitayay a tamdaw cowa ko mamaafad no misasingdiay a demak, o sapilifokaw to pihayda no mitahidangay cingranan a tamdaw.’ (2 Timoti 2:4) Nolitengan a sofitay i Loma, cowa pidemak to roma a tayal. O pahecaden ita ko tadamaanay a sofitay, misamacay to kalimlaan a patosokan, hamamilifok to pihayda no Tapang ita ci Yihofa aci Yis. Palalinien to pihayda Nangra, awaay ko kapo no mihadakan ni Satan, mansa, saˈosien ita adihayay ko toki ato ˈicel ita matayal saki Yihofaan, songilaˈen a mikinsa ko taˈangayay sapatada ato sapafeli no Kawas a polong sapilood a rikoˈ. Sowal no tarokos ci Pawlo ‘ciharatengay saka cihafayaw a tamdawˈ wa ‘mararaw ko lalan, miliyas to pihakelongan,’ mihaenay aka a misawad a talipaˈelal.​—1 Timoti 6:​9,10. w19.11 17 fiedac 12, 14-15 fatac

Milasil ko hekal tamdaw ‘dipayalayto,’ dotoc wa irato ko ‘romiˈad ni Yihofa.’ (1 Tisalonika 5:​1-6) Masowalay i 1 Tisalonika 5:2 a ‘romiˈad ni Yihofa’ o ‘taˈangayay padiingˈ ko mitoroˈan. (Paˈarawan 7:​14) Samaan a mafanaˈ kita to hahacowa misatapang ko taˈangayay padiing hani? Sowal no Fangcalay Cudad, wa ira ko mikiriwiˈay a salasil, mahapinang ita to mamifekadto ko taˈangayay padiing. Oniya ‘dipayalaytoˈ a salasil, hano mihaen ko ˈaˈideman a milasil hani? Awaay ko pinang. O ˈaˈideman no pihakelongan wa pahecad a milasil hokira? Mahaen alatek. Oniya salasil mikitiniay i mangah no tatiihay coyoh. O palafoay a mangah koni, o makaniway a rihaday konini, soˈlinay i, mangataayto ko taˈangayay a padiing. ‘Fahal sanay a laˈafo, wa mifekad i tireng nangra, malecad o mamahofoc a fafahiyan.’ Wa samaan ko sikawdan ni Yihofa itiya hani? Soˈlin fahal saan mifekad ko taˈangayay padiing, kawra maharekayto cangra a misaday. w19.09 9 fiedac 7-8 fatac

Ano mamisaˈosi i, ihkalen ko patosokan. Ano ihkalen ko patosokan iso, wa madolo a malaheci ko demak. Tinakoen, alatek misaˈosiay kiso mararid miˈosi to Fangcalay Cudad ikaka to isaˈayaway, kawra ano awaay ko ihkalay a dadoedoen a rayray, wa pasangar a milaheci to patosokan. O cecay kasakopang a kasacefang no malohemay malitengay, misaˈosiay mararid a milisoˈ to salikaka, kawra ikor i, cowa kalaˈosi koya misaˈosian a demak. Ano sapilaheciaw to patosokan, o malohemay malitengay a tamdaw ngaˈay licayen ko niyah: “Masaˈosiay to ita o cima ko lalisoˈen a salikaka han? Misaˈosiay to kita hahacowa milisoˈ cangranan han?” Patatodongen ko patosokan ita. Adihayay ko lalahecien ita a demak, kawra o toki, ˈicel ato dafong ita iraay ko tolas, mihenay i, patatodongen ko ˈicel. O misaˈosian iso a patosokan ano mataˈelifay ko ˈicel iso i, ngaˈay salofen ko misaˈosian iso. w19.11 29 fiedac 11-12 fatac

Itini Isaya 65:21-​23 paˈayaway to sasamaan ko kaˈorip no tamdaw i fafekang no sera noikor. Sowal no sinael adihayay ko hademak no tamdaw i Lakoing, wa dademak to ciepocay misaloay to falocoˈ a tayal. Mahererek ko Pikowan ni Kristo to Comaˈol Miheca, ngaˈay pakasoˈlin kita ‘mamatedal ko maˈoripay, cowato ka mahaen o koli mapalit no mamanahol a tireng, wa milifok to ciˈdilay a pasalat no wawa no Kawas.’ (Loma 8:​21) Iti:yaho, padamaan ni Yihofa ko Israil tamdaw matatodong ko pinengneng to tayal ato pahanhanay, itini Pikowan ni Kristo to Comaˈol Miheca, o papadamaen no Kawas ko finawlan Ningra mihaen ko demak. Edeng midoko ko tamdaw to Kawas ngaˈ lipahak ko kaˈorip, mihaenay i, itini Lakoing o mamilimasmas ko tamdaw to toki mirienang to midokoay to Kawas a demak. Ngaˈay pakasoˈlin kita itini Pikowan ni Kristo to Comaˈol Miheca, o lalipahak ko tamdamdaw, samanen o mamidoko kita maemin to Kawas, ira ko misaloay to falocoˈ a tayal. w19.12 12 fiedac 15 fatac; 13 fiedac 17-18 fatac

Wa saliyaliyawen no wama wina a pasifanaˈ ko wawa, miceridho kalacafay to wawa. Latekay, karorayan a misaliyaliyaw patalipaˈelal to wawa, kawraan o sangaˈayay a pakayraan konini a padama to wawa, cipinang ato misaka dademak to safalod no Fangcalay Cudad. O cacipinang ko wama wina to wawa. Patinakoan no ˈOlic 127 fedengan ko wawa to panaˈ. (ˈOlic 127:​4) Malecad o panaˈ cowa kalecalecad, o kahacecay a wawa iraay ko mikiriwiˈay. Mihaenay, haharatengen no wama wina ko sapasifanaˈ a lalakaw. Itiniay i Israil kitakit, cecay mararamoday padamaay to tatosa a wawa malo maolahay to Kawas a tamdaw, malengo ko pakayraan a pasifanaˈ i, sanay ko sowal: “Palicinowasan niyam ko wawa a milengo to Fangcalay Cudad.” Manaokaniw cowa kalecad ko pakayraan no kahacecay a paro no lomaˈ, o tawki no lomaˈ wa misaˈosi to sasamaan malalengo to wawa to Fangcalay Cudad. w19.12 26-27 fiedac 18-20 fatac

Ano misiˈayaw kita to pasangaray i, o mamiakoˈid to sapadama no tao. O wama ni Ruyan mapatayay i latiih, sanay cingra: “Ano taˈangayay ko semsem iso i, awaayto ko pakayraan a midemak to kalo a demak. Kawra ano ira ko padamaay a tamdaw, soˈlin o mimingay a demak, taˈangayay ko sahinom.” O mihadakan ita a sadama soˈlin cowa ka samaan, wa ngaˈay mihinom to tao. Saka 1 hahekalan a marko, maedeng ˈifowaay cingra. Kawra kamayan mihadak cingra to toki a mihinom ci Pawloan, hanaca rihadayay ko falocoˈ ni Pawlo misaali to sapadama ningra. O cecay fafahiyan salikaka ci Ancila, mipatayan no tao ko fofo ningra. Mihinomay ko roma salikaka cingraanan, tada miakoˈiday cingra. Sanay: “Ano talaˈayaw ko widang a mihadak to sapadama, eca ka masawi, wa ngaˈayto kako a misaali to sapadama nangra.” Mihaenay lalicayen ita ko niyah: “Itini pinengneng no tao, o makahiay a mihadak to sapadama ato sahinom a tamdaw kako han?” w20.01 11-12 fiedac 14-16 fatac

O manilnilay no fangcalay saocor a Krisciyang ano cowa pidofdof to palinian ni Yihofa a maˈorip, ‘cowato ka tatodongˈ komaen to epang ato epah i Piharatengan a Saˈopo. (Hipray 6:​4-6; 10:26-​29) Mafanaˈay cangra, ano sapilifokaw to halifon no kakarayan, oha mamadimadi tahatolas ngaˈ ngaˈay. (Filipi 3:​13-​16) O fangcalay saocor padamaay to tamdaw misapoener to falocoˈ, cowa ko mamisatakaraw. (Ifiso 4:​1-3; Kolosay 3:​10, 12) Mihaenay, o manilnilay no fangcalay saocor no Kawas a tamdaw, cowa ko caciharateng to mikikakaay ko niyah to tao. Mafanaˈay cangra cowa ka ikaka ko adihay a macadaay no niyah a fangcalay saocor, cowa ko caciharateng to mikikakaay to tao ko kacipinang no niyah to Fangcalay Cudad. Roma i, o manilnilay a tamdaw cowa ko papasowal cangra to tao: “Haratengen ako i, o minilnilan no fangcalay saocor no Kawas kiso, oha kakomaen kiso to epang ato epah i Piharatengan a Saˈopo.” Wa misapoener cangra a mihai, dengan ci Yihofa ko cifadangalay a misaˈosi to cima ko tatayra i kakarayan. w20.01 27-28 fiedac 4-5 fatac

Makalimay ci Yihofa miingid kita Cingraanan, mararid a masasowal Cingraanan. Pakalalokay Cingra kitaanan ‘padadotocen a mitolon.’ (Loma 12:12) Wa tengilen Ningra ko satolon ita, cowa ko pakayni ka ˈifowa anca marorayay a caka pitengil. Kitato i, tengilen ita ko sowal no kakarayan a Wama, miˈosi to Fangcalay Cudad ato mitepangan a cudad, itini i saˈopo i, songilaˈen a mitengil. Sapadadotocaw kita miingid ci Yihofaan, micerid masasowal Cingranan. Mitokelay ci Yihofa mifowah kita to nafalocoˈan i satolon. (ˈOlic 62:8) Mihaenay, licayen ko niyah: “O pitolon ako ono nanaman aca, malecad o milinaˈan i kato ko sowal, anca matomesay ko olah, malecad o mitilidan a tikami han?” Maedeng tangongolay ko olah iso ci Yihofaan, ciharateng to sakakelecaw ko kalalaˈed Cingraanan, mansa micerid a masasowal Cingraanan, pasowal to harateng no niyah ato kahemekan anca kasomadan a demak. Ano ira ko maanan a saali iso i, ngaˈayay rihaday ko falocoˈ micangacang to kakarayan a Wama. w20.02 9 fiedac 4-5 fatac

Palimoˈotan ni Yihofa ko malohemay malitengay misongilaˈ a midimokos to finawlan Ningra, karetengay ko ˈinorong no malohemay malitengay. Wa ngaˈay cangra mikitini picada ni Nihimiya to finawlan a minanam. Malo ˈaˈideman no Yutaya, taˈangayay ko fadangalan ni Nihimiya. (Nihimiya 1:​11; 2:​7, 8; 5:​14) Kawra, adihayay ko masiˈayaway ningra a pasangaray. Tinakoen, maˈaraw ningra ko pikasimaan no finawlan misaka dademak to dafong no fangcalay sefi, cowa pikangdo to pidokoan ci Yihofaan a kitiraan. Cowa ka hatini aca, cowa pitoor ko finawlan to Rikec pafeli to dafong no Lifi tamdaw, cowa pidofdof to saˈosi no Paselaˈan a Romiˈad, o roma tamdaw ci fafahiyay to cowa pidoko to Kawas a tamdaw. Oniniya demak o sasaysayen ni Nihimiya a pasangaray. (Nihimiya 13:​4-​30) Cowa ka patelas misaka dademak to fadangalan ci Nihimiya, patireng to saˈosi a papidofdof to finawlan, ao mitolonay a milongoc to sakayat ni Yihofa, pasifanaˈ cangranan mafanaˈ to Rikec ni Yihofa. (Nihimiya 1:​4-​10; 13:​1-3) Misapoeneray ci Nihimiya a kalacafay to finawlan a matayal, midama cangranan miliyaw patireng to lowil no Yirusalim.​—Nihimiya 4:​15. w19.09 15-16 fiedac 9-10 fatac