Saka 1 Folad

Timoloay ci Yis mirikec to ˈaˈideman no pihakelongan itiya, samanen misamangahay ko waywayan nangra. Tinakoen, sowal ni Yis misaaretengay ko Farisay tamdaw to samaan misawsaw to kamay sanay, kawra cowa ka ciharateng to samaan midimokos to wama wina. (Matay 15:​1-​11) Soˈlin misaˈadaay ko ˈaˈideman no pihakelongan ci Yisan, kamayan timolo ci Yis mihadak to soˈlinay a demak. Mitihedakay ci Yis to mararaway a sasowalen no pihakelongan. Cowa ka pasowal cingra sahtoay o mihaydaan no Kawas ko polong a pihakelongan. Masafelitay, sowal ningra o sakatayra i sakalaˈafo a lalan kakahaday, ˈalomanay ko romakatay toniya lalan, kawra o sakatayra sakaˈorip a lalan kaemingay, mimingay ko pakahelaay tamdaw. (Matay 7:​13, 14) Ihkalay ko sowal ni Yis, roma tamdaw o potal aca ko mangodoay, kawra cowa ko soˈlinay. Patalipaˈelalan ningra ko nisawawaan: ‘Ka piliyas to makaniway a pairasolay. Tayra cangra tamowanan, matiya o cirikoˈay to katol no siri, ˈarawhan o maˈanofay a lokedaw ko lalomaˈ nangra. Pakayni minaroˈan nangra, wa ngaˈay mahapinang namo cangra.’​—Matay 7:​15-​20. w21.05 9 fiedac 7-8 fatac

O faˈinay ni Hana ci Ilkana o Lifi a tamdaw, tada maolahay cingranan, kawra ci Ilkana iraayho ko roma fafahi ci Pinina. Soˈlin ikakaay ko olah ni Ilkana ci Hanaan, kawra “ciwawaay ci Pinina, o caay ka ciwawa ci Hana.” Mansa ci Pinina ‘padadotocay milikaf cingranan, pakasomad cingranan,’ telocto tada marorayay cingra, ‘tatangic sanay, caka komaen.’ Cowa ka somowal ko Fangcalay Cudad to sapicoˈayaw ci Hana ci Pininaan, pasayraay cingra ci Yihofaan pasowal, pakasoˈlin to papadama ci Yihofa cingranan. (1 Samuil 1:​2, 6, 7, 10) Ngaˈay kita mikitini taˈarawan ni Hana mananam ko manan hani? Ano ira ko tamdaw malalifet tisowanan, haratengen, ngaˈay misaˈosi kiso sasamaan pacaˈof, ngaˈay kiso eca ka malalifet cingranan. Hamaan tano tatiihay patikol to tatiihay, ao misaˈicel mararihaday to tao. (Loma 12:17-​21) Mihaen, ano cowa kakahi mifalic ko tao, wa kamayan ira ko rihadayay a falocoˈ iso. w21.07 17 fiedac 13-​14 fatac

O maˈanofay falocoˈ no Iskariyot tamdaw ci Yuta telocto malo kaacekan a mitowakangay a tamdaw, kawra cowa ko mahaenay a tamdaw cingra isalakat. (Luka 6:​13, 16) Ci Yuta citatodongay mikowan to payci, paihkalay konini to tada inanengay cingra, ngaˈayay pakasoˈlinen. Kawra ikor misatapangay a mitakaw to payci ci Yuta, soˈlin kinapinaay matengil ningra ko pirikec ni Yis aka maˈanof, kamayen cowa ka pisikor cingra. (Marko 7:​22, 23; Luka 11:39) ˈAyaw no kinafalah ci Yis caka halafin mifekaday a demak, mahapinangay ko maˈanofay a falocoˈ ni Yuta. Ci Yis aci Marta, Mariya ato pina nisawawaan malacafayay palafang i lomaˈ no malonoˈay a Simonan. Mitahka i, lomowaday ci Mariya, mitaktak i fongoh ni Yis to matekesay a dawdaw, maˈaraw ni Yuta ato roma nisawawaan tada maketeray. Harateng no roma nisawawaan sakadademaken koniya payci padama to manikaway wa ikaka ko kangaˈay saan, kawra o araaw no falocoˈ ni Yuta cowa kalecad. Sowal no Fangcalay Cudad ‘o tohoy cingra’ sanay, sapitakawaw to payci i hako.​—Yohani 12:​2-6; Matay 26:​6-​16; Luka 22:​3-6. w21.06 18 fiedac 12-​13 fatac

Latekay karetengay ko ˈinorong iso, hato mapaekelay cato ka ngaˈay saselaˈ han? Ano mahaenay i, maedeng cipinangay kiso to nafalocoˈan ni Pawlo. Cowa ko cecayay aca kasakopang, o ‘polong a kasakopang ko kacarirawan’ ningra. (2 Korinto 11:23-​28) Wa miemem kiso to halafinay a adada, pasangaray a lipahak han? Harateng ni Pawlo i tireng no niyah hato ‘mapacekay no ceka’ sanay. (2 Korinto 12:​7-​10) Oniya ceka o adada alatek, sapihepolaw ci Pawlo, kawra cowa pakahepol. Pakayni i cecay dangoc matoleday kiso to niyah han? Mahaenay ko harateng ni Pawlo. Padotocay cingra milowid to dangoc no niyah, mansa mihaen ko sowal ningra: ‘Tada marorayay kako!’ (Loma 7:​21-​24) Soˈlin wa miemem to masakenaay a sapalifet ato pasangaray, kamayan ci Pawlo padadotoc midoko ci Yihofaan. O manan ko paˈicelay ci Pawloan mihaen to demak hani? Soˈlin mafanaˈay cingra adihayay ko dangoc no niyah, kawra pakayni sapatefoc iraay ko tanektekay a pakasoˈlin ningra. w21.04 22 fiedac 7-8 fatac

Ci Atam nao malefotay a tamdaw, kawra ikor no mararaw cowato ka tahadaˈoc ko ˈorip, macapidayho ko teloteloc ningra. Padetengay ci Atam a mararaw, awaay ko tatodong a sododen. Kawra sasamaan ko teloc ningra hani? O awaay ko raraw nangra. (Loma 5:​12, 14) Citatodongay a patayen ci Atam, kawra o papadamaen ni Yihofa ko teloc ni Atam, paira to tahadaˈocay a ˈorip nangra han? Ikor no mararaw ci Atam, palidlid sanay ci Yihofa patalahkal, wa samaan Cingra milidong to masacaˈolay masaemangay a teloc ni Atam miliyas to raraw ato patay. (Satapangan 3:​15) Pakayni sapatefoc, soˈlin cowa ko malefotay kita ngaˈayayho malawidang ci Yihofaan. Pakayni sapatefoc, kihcod a demak ni Akoma mamalahdaw maemin. (1 Yohani 3:8) Pakayni sapatefoc, mamalaˈosi ko araaw ni Yihofa toniya cikiw. Maraod ko toki, polong no cikiw mamalo lakoing. w21.04 14 fiedac 1 fatac; 19 fiedac 17 fatac

Toya romiˈad, masaˈopoay ko ˈalomanay tamdaw i Yirusalim misalisin. Iraay ko faˈinayan fafahiyan, mikitiniay caka lecad a kitakit, caka lecad a sasowalen aira. Maˈaraway nangra ko cecay kafahkaan a demak: O kalo a Yutaya tamdaw mafanaˈay somowal tono nalacolan a sowal nangra! Kafahkaan nangra o sowal noniya Yutaya tamdaw, ato mifanaˈan no tarokos ci Pitiro cangranan a demak. Matengilay nangra, ano pakasoˈlin a mihakelong ci Yis Kristoan o mamalidong. Oniya lihaf tangongolay ko pitemer to falocoˈ nangra, sanay cangra a milicay: “Maanen niyam ko demak ta ngaˈay saw?” Pacaˈof ci Pitiro: ‘Kamo kahacecay tamdaw ka picada to paputisem.’ (Dmak 2:​37, 38) Dotoc mifekaday a demak, tada mikowaday to tamdaw. Toya romiˈad, maedeng 3,000 ko micadaay to paputisem a tamdaw malo nisawawaan ni Kristo. Mihaenay, o padamaay to tamdaw malo Krisciyang a tayal misatapangayto, hanaca tahaniniay a padadotoc, onini ko patorodan ni Yis to nisawawaan a kalimlaan a ˈinorong. w21.06 2 fiedac 1-2 fatac

Itini kitiraan ita a kilac, pasangaray makilim ko pacekiwan. Itini kilacay a tamdaw cowa ka olah to lihaf ita, misafelitayho kitaanan, sasamaan kita mitafo to tawlikay a waywayan hani? Haratengen, masasifoday ko lekakawa anini, mafalicay ko pakayraan no ˈalomanay tamdaw. Salakat cowa ka olah to soˈlinay kimad a tamdaw, ikor mahapinangay to misaaliay ko niyah to nofalocoˈan alatek. (Matay 5:3) Roma tamdaw caay kakahi micada to cudad i salakat, kawra ikor makahiay malacafay kitaanan minanam to Fangcalay Cudad. Roma i mafanaˈay kita, o tawki no papanayen ci Yihofa. (Matay 9:​38) O tokel Ningra kitaanan o papadotoc paloma ato micefos, o Cingra ko papalahad. Awaayho ko pacekiwan ita alatek, kawra ci Yihofa wa pakayni mihadakan ita a ˈicel, ao cowa ko hakowaay ko minaroˈan a palifon kitaanan. Mafanaˈ tonini, tada mihinomay kitaanan! w21.07 6 fiedac 14 fatac

Pafelian ni Yihofa ko tamdaw to sakahofoc a inaneng, ato pasifanaˈ to wawa maolah ato midoko Cingranan. Soˈlin adihayay ko sapalemed ni Yihofa to coyoh, kawra cowa pafeli cangranan to sakahofoc a inaneng, edengan o tamdaw ko pafelian Ningra. O wama wina haharatengen konini, misalimla toniya mikiriwiˈay a sapatelong. Paikenan ni Yihofa i wama ato wina ko wawa, o wama ato wina wa ‘mitoor to araaw ni Yihofa a mirikec a palimoˈot cangranan, palahad cangranan,’ o kalimlaan a ˈinorong konini. (Ifiso 6:4; Limoˈot 6:​5-7) Sapadamaaw to wama wina, o likakawa no Kawas adihayay ko misadayan mikitiniay i Fangcalay Cudad a lalosidan, tinakoen mitepangan cudad, ika, radiw ato wangcan no mita. Mahapinangay, ci Yihofa aci Yis maolahay to wawa. (Luka 18:15-​17) Ano tooren no wama wina ko sakayat ni Yihofa ato misarocod a midimokos to wawa, o mamahemek ci Yihofa. Mihaen ko demak no wama wina, pairaay to toki no wawa malo paro no lomaˈ ni Yihofa, tahadaˈoc materek i paro no lomaˈ Ningra! w21.08 5 fiedac 9 fatac

Harateng no roma tamdaw, pakasoˈlin to Kawas o pakasoˈlinay to awaay ko wacay a demak. Kawra sanay ko sowal no Fangcalay Cudad, cowa ko soˈlinay a pakasoˈlinay falocoˈ konini. Sowal no sinael, o pakasoˈlinay falocoˈ ‘o ihkalay wacay no cowa kaˈaraw a demak.’ Soˈlin pakasoˈlin kita ci Yihofaan, ci Yisan ato Hongti Kitakit i kakarayan o cowa kaˈaraw, kawra o pakasoˈlin ita misalalangiay to mamalaˈosi a wacay. (Hipray 11:3) Cecay salikaka mikingkiway to pinaˈorip a kakakosiya, sanay cingra: “O pihakelongan no Misawacayay Tamdaw ni Yihofa cowa ko patelasay, matatodongay to kakako.” Saan kita miharateng alatek: Ano iraay ko mamalaˈosi a wacay misawacay to o Kawas ko Misangaˈay to maamaan, hano caka pakasoˈlin ko ˈalomanay tamdaw hani? Cecay lalangian i cowa pikilim cangra to wacay. Ci Ropote o Misawacayay Tamdaw ni Yihofa, sanay cingra: “Cowa pasifanaˈ ko picudadan to misangaˈan sanay a sowal, mansa awaay ko Misangaˈay a Tatapangan saan kako miharateng. 22 ko mihecaan ako itiyaay a mafanaˈ to matatodongay ko sowal no Fangcalay Cudad, iraay ko ciˈicelay a wacay, misawacay to o Kawas ko misangaˈay to maamaan.” w21.08 15 fiedac 4-5 fatac

Micekiw kita to Fangcalay Cudad, anca mitengil to sowal no salikaka malifokay nangra ko maanan sapalemed, wa ngaˈay mahapinang soˈlinay ko kangaˈay ni Yihofa. Kawra o ‘mamilifet’ a mihapinang kita, ngaˈ mafanaˈ to hakowaay ko kangaˈay ni Yihofa. Tinakoen, makalimay kita mirienang to cecay mieminay to toki a tayal, sakalaˈosiaw noniya patosokan, o kakantangen ko kaˈorip ita. Mafanaˈay kita na somowalay ci Yis, ano salakat a micangacang to Hongti Kitakit, o papafeli ci Yihofa to misaalian ita a kihcod, kawra cowaho ka tahalifet kita tonini alatek. (Matay 6:​33) Nikawrira, ano paihkal kita to pakasoˈlinay falocoˈ, milowan to tayal ato mapalakay payci, misamacay mitosil, telocto o mamatinako ko pidimokos ni Yihofa, itiya wa soˈliˈlinto a malifet ita ko kangaˈay Ningra. w21.08 26 fiedac 2 fatac

Anini iraay ko malecaday a demak han? Iraay. ˈAlomanay ˈaˈideman no pihakelongan mitokelay to cihafayay, cifadangalay, ˈakawangay ko picudadan a tamdaw mirienang to kiyokay nangra. Harateng nangra, soˈlin caka tatodong to palinian no Fangcalay Cudad ko waywayan nangra ngaˈayto sanay. Roma i, soˈlin fanekfekay ko finawlan ni Yihofa a midoko to Kawas, makapahay ko waywayan, kawra misakahmaway ko ˈaˈideman no pihakelongan cangranan, samanen awaay ko saaroˈan nangra toniya hekal. Na somowalay ci Pawlo, o mipiliˈan no Kawas a tamdaw oya ‘misakahmawan no tao.’ (1 Korinto 1:​26-​29) Kawra itini pinengneng ni Yihofa, o polong madimadiay midoko Cingranan a tamdaw sahtoay o kalimlaan. Samaan ko demak ita ngaˈ eca ka maorat no pinengneng no hekal a tamdaw? (Matay 11:25, 26) Misakahmaway ko hekal tamdaw to finawlan no Kawas, aka a mafiyor no harateng nangra kita. Kafanaˈ, o misapoeneray aca a tamdaw ko patorodan ni Yihofa to demak Ningra. (ˈOlic 138:6) Ngaˈayay haratengen ita, pakaynian ni Yihofa i awaay ko taneng, ato sifanaˈ hananay no hekal a tamdaw, palaˈosi to adihayay kasapaan a demak. w21.05 8 fiedac 1 fatac; 9 fiedac 5-6 fatac

O tarokos ci Pawlo tada miakoˈiday to salikaka, cowa ka pakayni a misatakaraw cingra ecato kakahi micada to sapadama no salikaka. (Filipi 2:​19-​22) O matoˈasay salikaka, ngaˈay kamo tano adihayay pakayraan paihkal to piakoˈid to kaemangay tamdaw. Ano talaˈayaw cangra micada tisowanan, padama tisowanan micakay to dafong anca roma demakan, akoˈiden cangra, cadaen ko sapadama nangra, oniya sapadama o olah ni Yihofa tisowanan han ko pinengneng. Wa pakayni a mala ngaˈayay widang kamo alatek. Roma i, saˈicelen padama ko kaemangay tamdaw miingid ci Yihofaan, pasowalen cangra maˈaraw iso ko pisaˈicel nangra matayal i kasakopang tada mahemekay, ngaˈayho kiso paladaˈ cangranan to nalifetan iso i nokaˈorip. Mihaen ko demak iso o ‘paihkalay to miakoˈiday falocoˈ,’ miakoˈid ci Yihofaan misolot to kaemangay tamdaw tayni kasakopang.​—Kolosay 3:​15; Yohani 6:​44; 1 Tisalonika 5:​18. w21.09 12 fiedac 12-​13 fatac

Tada maolahay ci Yihofa to salikaka ita, kawra pasangaray kita paihkal to olah i cangranan saan ko harateng alatek. Samanen, mikitiniay i cowa kalecad a serangawan ato lalengawan kita, mararaway maemin, pakesemay anca pakatoleday to tao. Kawra, wa ngaˈay kita misarocod patongal to olah i taˈangayay a lomaˈ no Krisciyang ita, o pakayraan i minanam to pakayraan ni Yihofa a maolah to salikaka ita. (Ifiso 5:​1, 2; 1 Yohani 4:​19) O matomesay to damsayay a tamdaw iraay ko siniˈadaay a falocoˈ, mihalakaay a padama ato mihinom to tao. O pakayraan ni Yis micada to tamdaw paihkalay to damsayay ni Yihofa. (Yohani 5:​19) Kinacecayay, maˈaraw ni Yis ko taˈangayay ˈopo tamdaw, ‘siniˈadaay cangranan, samanen maroeroay no tamdaw cangra, awaay ko pitiˈeran, malecad o awaay ko pakaenay a lopayˈay siri.’ (Matay 9:​36) Cowa ko kasiniˈada aca ni Yis to tao, soˈlinay a midemak padama cangranan. Miadahan ningra ko adadaay tamdaw, hanaca padama to ‘marorayay, karetengay ko ˈinorong a tamdaw’ sinoway ko harateng.​—Matay 11:28-​30; 14:14. w21.09 22 fiedac 10-​11 fatac

Ci Yihofa iraay ko olah, mansa siniˈadaay to tamdaw. Sowal ni Pawlo, ‘matomesay ko siniˈadaay’ no Kawas. Ngaˈay kita mikitini fafekangay ato laenoay a lalakaw mihapinang, sowal itini o siniˈadaay ko Kawas to cowa ka lefot a tamdaw, paira to tokel nangra tayra i kakarayan maˈorip. (Ifiso 2:​4-7) Kawra ci Yihofa cowa ko manilnilay aca no fangcalay saocor ko paihkalan to siniˈada. O mitiliday to ˈOlic ci Tafiti sanay: ‘Sidaˈitay ci Yihofa to tamdamdaw, o kihcod midemakan Ningra patalahkalay to siniˈadaay Cingra.’ (ˈOlic 145:9) Maolahay ci Yihofa to tamdamdaw, mansa ano iraay ko lalangian, papaihkal Cingra to siniˈadaay i tamdaw. ˈAyaw no tayni i fafekang no sera ci Yis halafinay kalacafay ci Yihofaan i kakarayan maˈorip, mansa ikakaay to romaroma tamdaw a cipinang to hakowaay ko siniˈada ni Yihofa. (Taneng 8:​30, 31) Maˈaraway ningra kinapinaay ci Yihofa paihkal to siniˈadaay i mararaway a tamdaw. (ˈOlic 78:37-​42) Mansa pasifanaˈ cingra to tamdaw i, miceriday misaˈicel toniya makapahay capeling no kakarayan Wama. w21.10 8-9 fiedac 4-5 fatac

Tano malecaday o kakeleng a ngihaˈ ci Yihofa mikitini i kakarayan pacaˈof, mikiˈokay to papaˈodingar Cingra to ngangan no Niyah. Itini fafekang no sera mitosil ci Yis i, misaˈicelay paˈdil to fangcalay ngangan no kakarayan Wama. (Yohani 17:26) Mihaenay miharateng ko soˈlinay Krisciyang, ngaˈay misaka dademak to fangcalay ngangan no Kawas hanaca padama to tao mafanaˈ toniya ngangan, o kalikoan konini. Itini saka 1 hahekalan, caho ka halafin ko katomireng no kasakopang no Krisciyang i, midimokosay ci Yihofa to ˈalafang a tamdaw, ‘mikitini lalomaˈ nangra mipiliˈ to cecay ˈopo malo finawlan Ningra.’ (Dmak 15:14) Miharateng koniya Krisciyang, ngaˈay misaka dademak to ngangan no Kawas ato pasifanaˈ to tamdaw mafanaˈ toniya ngangan, o kalikoan a demak. Itini pitosilan ato mitilid to Fangcalay Cudad i, miceriday cangra misaka dademak to ngangan no Kawas, misawacay to soˈliˈlinay o finawlan no Kawas cangra. (Dmak 2:​14, 21) Anini malecaday, o Misawacayay Tamdaw ni Yihofa o itiniay ilaeno no ngangan ni Yihofa a finawlan. w21.10 20-​21 fiedac 8-​10 fatac

O midaˈocay ko madimadiay a olah no Kawas. Itini ˈOlic 136 fedengan kina 26 mitadtad tonini. Saka 1 sinael sanay: ‘Miakoˈid ci Yihofaan, nawhani o ngaˈayay Cingra; o midaˈocay ko madimadiay a olah Ningra.’ (ˈOlic 136:1) Dotoc, mikitini saka 2 sinael tangasa saka 26 sinael, misaliyaliyaway maˈosi ita ‘samanen midaˈocay ko madimadiay a olah Ningra’ sanay a sowal. Ci Yihofa tano masakenakenaay a pakayraan paihkal to midaˈocay a madimadiay a olah i sikawdan Ningra, tada mitemeray kitanan konini! ‘Samanen midaˈocay ko madimadiay a olah Ningra’ oniya sowal papakasoˈlin kita, o olah ni Yihofa i sikawdan Ningra cowa ko mamafalic. Cowa ko raranikay ci Yihofa misawad to sikawdan Ningra, tada dihkoay ko falocoˈ ita! Papadotoc Cingra maolah to midokoay Cingranan a tamdaw, kalacafay i tatihi nangra, mangalef itini pisemseman nangra a tatokian. Cowa ko mamiliyas ci Yihofa kitaanan, mafanaˈ tonini matomesay ko lipahak ato ˈicel no mita, ngaˈay misiˈayaw to masakenakenaay a pasangaray, padadotoc romakat i saka tayra midaˈocay ˈorip a lalan.​—ˈOlic 31:7. w21.11 4 fiedac 9-​10 fatac

Caka halafin noikor mamifekad ko adihayay demak, tinakoen mamalaˈafo ko mararaway pihakelongan, o Makok a Kok mamifekad to saˈodis, mamifekad ko Armakiton. Maharateng konini a demak, calemcemay kiso han? Saan kiso miharateng alatek: ‘Ano mifekad konini katalawan a demak i, wa ngaˈay kako mitafo to madimadi i Kawas han?’ Ano iraay ko mahaenay a cariraw iso, haratengen ko sinael anini tataˈangay ko sapadama, sanay ko sowal ni Yis to nisawawaan: ‘Pakasoˈlinen ko Kawas, pakasoˈlinho takowanan.’ (Yohani 14:1) O tanektekay a pakasoˈlin papadama kitanan timolo misiˈayaw to sapalifet noikor. Paˈicel kita to pakasoˈlin no niyah anini, ngangaˈayto misaday misiˈayaw to sapalifet noikor. Mamahapinang no mita o pakasoˈlin no niyah iraay ko papaˈicelen hokira. Ano maremo ita ko cecay sapalifet, matongalay ko tanektek no pakasoˈlin, mihaen o tatimoloto kita misiˈayaw to noikoran. w21.11 20 fiedac 1-2 fatac

Tarokos ci Pawlo pakalalokay ci Timotian misongilaˈ milaheci to mitosilay a ˈinorong, oniya sowal pasayniay kitaanan o polong a Krisciyang a misowal. (2 Timoti 4:5) Kawra mihaen to demak cowa ko madoloay nolatekay. Tinakoen itini roma kilac, makecengay ko mitosilay tayal ita, anca masongilaˈay a makeceng. ˈAlomanay salikaka misiˈayaway to masakenaay a pasangaray, patoleday paˈisang cangranan alatek. Tinakoen, roma tamdaw koˈedaway ko toki maomah paririˈ to paro no lomaˈ, makalimay cangra mitongal to mitosilay tayal, kawra maroray to cecay lipay i, awaayto ko ˈicel. Roma tamdaw halafinay adada anca matoˈasayto malonay ko tireng, cato ka ngaˈay masadak, citolasay ko midemakan. Roma tamdaw cangoˈotay ko pakasoˈlin to niyah, awaay ko kapo no niyah saan. Ano samaanto ko pakayraan ita, wa ngaˈay ci Yihofa pafeli to ˈicel kitaanan miremo to pasangaray, ho ngaˈay kita itini madangaray no ˈicel no niyah padotoc a matayal saki Cingranan. w21.05 20 fiedac 1-3 fatac

Nolatekay o roma tamdaw pacieciay kitanan midemak to cowa ka tatodong to Krisciyang a demak alatek. Itini toniya pakayraan, o mamipiliˈ kita. O Lifi 19:19 mahawpay ko cecay a safalod, sanay: “Aka ka cirikoˈ kamo to masasiromaay ko keliw a rikoˈ.” Onini a rikec ngaˈay pafafidaˈ to Israil tamdaw ato taliyokay a ˈalafang a tamdaw. Manaokaniw anini cowa pisafelit kita to tamdaw micaˈedong to masasiromaay ko keliw a rikoˈ, tinakoen pacacamolen ko palomaan a takomod ato misangaˈan no tamdaw a keliw a rikoˈ. Kawra o pihakelongan ato waywayan no tao misafelitay to safalod no Fangcalay Cudad, cowa ka ciharateng kita malecad cangranan. Manaokaniw, maolahay kita to paro no lomaˈ, ciharatengayho to itatihiay a tamdaw. Malo finawlan ni Yihofa, makahiay kita eca ka malecad to ˈalomanay tamdaw. Ano makalimay kita malo makoracay a tamdaw, mamisaˈicel mihaen ko demak.​—2 Korinto 6:​14-​16; 1 Pitiro 4:​3, 4. w21.12 5 fiedac 14 fatac; 6 fiedac 16 fatac

Sakaˈorip a lalan ngaˈayay mahela. Sowal ni Yis: ‘Micerid kamo mitoor to sowal ako a midemak, o soˈlinayto a nisawawaan ako, o mamafanaˈ kamo to soˈlinay kimad, papasalaten no soˈlinay kimad kamo.’ (Yohani 8:​31, 32) O mahaenay ko pakayraan iso. Cowa ka maˈalol no tapelik, ao misaˈicelay mikilim to soˈlinay kimad. Misarocod kiso minanam to Kimad no Kawas, cipinangay to saali Ningra to tamdaw, hanaca misaˈicel midofdof to sapasifanaˈ ni Yis. Mananamay iso makalimay ci Yihofa mifalah kita to kimad no mararaway pihakelongan, ecato pisalisin to milingatay to lisin no mararaway pihakelongan. Mananamayho iso, sapitooraw to saali ni Yihofa, ecato pidemak to kapiliˈan Ningra a demak, pairaay to sapalifet. (Matay 10:34-​36) Sapifalicaw cowa ko madoloay alatek, kawra cowa ka pisawad kiso, samanen maolahay kiso to kakarayan a Wama ci Yihofaan. Mihaen kiso a misaˈicel, maedeng o mamaliko ci Yihofa tisowanan!​—Taneng 27:11. w21.12 22 fiedac 3 fatac; 23 fiedac 5 fatac

O ngaˈayay a taˈarawan ci Mosi, ikor no mararaw cingra makahiay micada to sasalof. Kinacecayay, samaanen tada maketeray ci Mosi cowa panokay to ˈdil ci Yihofaan, telocto misaˈosiay ci Yihofa eca ka pacomod ci Mosian i mikiˈokan Ningra to sapafeli to Israil tamdaw a pala. (Saˈosi 20:​1-​13) Tada matoleday ci Mosi, mansa micangacang ci Yihofaan miliyaw miharateng tonini a misaˈosian. Kawra pasowalan ni Yihofa cingra: ‘Akato piliyaw pasowal Takowanan tonini a demak.’ (Limoˈot 3:​23-​27) Samaanayto ko harateng ni Mosi hani? Cowa ka keter cingra, mikifalocoˈay a micada to saˈosi ni Yihofa, hato padadotocay ci Yihofa misaka dademak cingranan mikerid to Israil tamdaw. (Limoˈot 4:1) Itini picada to sapalimoˈot, ci Mosi soˈlinay patireng to ngaˈayay taˈarawan no mita. Mikifalocoˈay cingra micada to sapalimoˈot, soˈlin cowa pilifok to misaalian no niyah a sapalemed, kawra padadotocay madimadi matayal saki ci Yihofaan. Pasayra kita i madimadiay a Yopu aci Mosian a minanam, wa adihay ko malifokay a haepoc. (Taneng 4:​11-​13) ˈAlomanay salikaka soˈlinay mihaen to demak. w22.02 11 fiedac 9-​10 fatac

Kongyen 32 miheca kasienawan, ngaˈayay widang ni Yis ci Lacarus adadaay mapatayay, tatosaay fafahiyan salikaka ningra ci Marta aci Mariya tada adadaay ko falocoˈ a tomangic. (Yohani 11:​3, 14) Tada maolahay ci Yis to paro no lomaˈ nangra. Matengil ni Marta ko sowal tayniay to ci Yis, comikayay a militemoh cingranan, sowal sa: ‘Tapangaw, ano narikayay kiso a tahini i, cowa ko mamapatay ko salikaka ako.’ (Yohani 11:21, 32-​33) Wa ngaˈay haratengen iso itiya hakowaay ko kasomad ni Marta han? Maˈaraw ci Marta aci Mariya pakayni i patay no salikaka tada adadaay ko falocoˈ, maedeng tada masomaday ci Yis. Ano iraay ko mapatayay a salawina iso, cipinangay ci Yihofa to nafalocoˈan iso. Ci Yis ko ‘misongilaˈay a patalahkal to pinangan no Kawas.’ (Hipray 1:3) Mihaenay o noka cilosaˈ ni Yis a demak pahapinangay kitaanan, ano mapatay ko salawina ita i, samaanay ko harateng ni Yihofa. (Yohani 14:9) Ano malahdaway ko salawina iso, papakasoˈlin kiso, mafanaˈay ci Yihofa hakowaay ko adada no falocoˈ iso, patadoayho tisowanan a masomad. O roma i, makalimay Cingra misayar to adada no falocoˈ iso.​—ˈOlic 34:18; 147:3. w22.01 15 fiedac 5-7 fatac

Tongalen iso ko toki masasowal ci Yihofaan, mitengil to sowal Ningra, ato miharateng to milingatay Cingranan a demak, mamalifok ko adihayay a epoc. Saka 1, inaneng ko misaˈosian iso. Sowal no Fangcalay Cudad: ‘Kalacafay to citanengay a tamdaw i, o cacitaneng.’ (Taneng 13:20) Saka 2, mamalo sangaˈayay a singsi no Fangcalay Cudad kiso. Ano misikay kita to pacekiwan i, o cecay kalimlaan a patosokan o papadama to pacekiwan miingid ci Yihofaan. Ano micerid kita masasowal ci Yihofaan, matongal ko olah Cingranan, matongal ko kafanaˈ to sasamaan padama to pacekiwan palahad to olah ci Yihofaan. Mihaenay ko demak ni Yis. Ano milengo cingra ci Yihofaan i, matinakoay no nisawawaan, o matomesay ko olah ato damsayay a Wama ci Yihofa, mihaenay matongalay ko tangongol no olah nangra ci Yihofaan. (Yohani 17:25, 26) Saka 3, mamatongal ko tanektek no pakasoˈlin iso. Ano mitolon kiso micangacang to Kawas pafeli to sakayat, sahinom ato sadama ikor, maˈaraw to samaanay Cingra pacaˈof tisowanan, mamatongal ko tanektek no pakasoˈlin iso i Cingranan.​—1 Yohani 5:​15. w22.01 30 fiedac 15-​17 fatac

Palimoˈotay ci Yihofa kitaanan misalof to mararaway harateng ato nanaman, samanen tada maolahay Cingra kitaanan, makalimay lipahak ko kaˈorip no mita. (Isaya 48:17, 18) Mafanaˈay Cingra ano midoedo ko tamdaw to mararaway a coos, cowa ko niyah aca ko madokaˈay, midokaˈayho to tatihiay ningra a tamdaw, o papakasomad konini to falocoˈ ni Yihofa.Satapang aca, maˈaraw no paro no lomaˈ ato widang ko pisaˈicel ita a mifalic to capeling no niyah, o mamalikaf alatek. (1 Pitiro 4:​3, 4) Saan cangra pasowal alatek: “Iraay ko fadangalan iso haratengay saan midemak, aka pitengil to sowal no tao.” Kawra, o cowa kakahi micada to palinian ni Yihofa a tamdaw awaay ko pasalat, o mafaloday no mikowanan ni Satan a hekal. (Loma 12:​1, 2) Soˈlinay i, kita o kahacecay tamdaw misiˈayaway to cecay papiliˈen: Papadotoc micaˈedong to katelangan a capeling, midoedo to mararaway harateng, mafalod no mikowanan ni Satan a hekal, anca papifalicen ci Yihofa kitaanan, padama kitaanan malo sangaˈayay no niyah.​—Isaya 64:8. w22.03 3 fiedac 6-7 fatac

Misongilaˈ kita midotim to Fangcalay Cudad, wa matatodong ko pinengneng to pakayraan no niyah. Nengnengen samanay ko Fangcalay Cudad padama to cecay mapatayay ko ramod a fafahiyan salikaka miremo to kasomad. Painiay ko cecay malohemay malitengay cingranan misongilaˈ micekiw ato midotim to lalakaw no Yopu. Salakat, maasip ningra ko mararaway harateng ni Yopu i, tangsolay milikaf ko falocoˈ ci Yopuan saan: “Yopuaw, aka masofaw ko harateng iso!” Ikor mahapinangay ningra, o harateng no niyah malecaday ci Yopuan. Micekiw to Fangcalay Cudad padamaay cingranan misalof to harateng, pafeli to ˈicel cingranan miremo to somad mapatay ko ramod. Pakaynianho ni Yihofa i salikaka pafeli to ˈicel kitaanan. Sowal ni Pawlo, makalimay cingra masasoˈaraw to roma Krisciyang, mihaen ngaˈayayto cangra masasipakalalok.​—Loma 1:​11, 12. w21.05 22 fiedac 10-11 fatac; 24 fiedac 12 fatac

O nolitengan a Israil tamdaw mamidofdof to ilaenoay a sapalimoˈot: ‘Cecay a mihecaan kinatolo, . . . o polong a faˈinayan iso tatayra i mipiliˈan no Kawas iso ci Yihofa a kitiraan midoko Cingranan.’ (Limoˈot 16:16) Tora tatokian, o lomaˈ nangra ato papanayen awaay ko midipotay a tamdaw, kawra mikiˈokay ci Yihofa cangranan sanay: ‘Ano tayra kiso i kaˈayaw no Kawas iso ci Yihofaan to cecay a mihecaan to kinatolo a tatokian i, aawa ko miˈafasay to sera iso a tamdaw.’ (Kasadakan 34:24) O madimadiay midoko ci Yihofaan a Israil tamdaw pakayni pisarocod a mitadiˈec to Kawas, mansa to mihecahecaan tatayra i pisalisinan to lisin ni Yihofa. Mihaen ko demak nangra milifokay to taˈangayay a epoc, tinakoen matongalay ko kafanaˈ nangra to Rikec no Kawas, ira ko toki midotim to kangaˈay ni Yihofa, ngaˈayho malacafay to roma maolahay ci Yihofaan a tamdaw masasipakalalok. Misaˈicel kita mirienang to saˈopo no Krisciyang, wa ngaˈay milifok to malecaday a epoc. Haratengen hena, ano itini ˈayaw no mirienang to saˈopo misaday kita to kamotoˈay hanaca ciepocay a sapacaˈof, wa hakowa ko kalipahak ni Yihofa aki! w22.03 22 fiedac 9 fatac

Pahatatanamay ci Yihofa ci Yisan malo ngaˈayay a Taˈangayay Saysi noikor. Matinakoay ni Yis, itini pakidemay a sapalifet midofdof to Kawas cowa ko madoloay. ‘Cilosaˈay a miowaw’ ci Yis itiya, misaliyaliyaw mitolon to sadama no Kawas, tada taˈangayay ko macadaay a saroero. Na marorayay ci Yis, madeng cipinangay to saali ita, ano micada kita to sapalifet ngaˈay pafeli to sadama kitaanan. Siniˈadaay ko falocoˈ ni Yis, ‘ngaˈay siniˈada to kalonay ita,’ tada aakoˈiden ita ci Yihofa minilnil cingranan malo Taˈangayay Saysi ita! (Hipray 2:​17; 4:​14-​16; 5:​7-​10) Mihai ci Yihofa misemsem ci Yis i, sapacaˈofaw to cecay kalimlaan a lacongis: Itini pakidemay sapalifet wa ira ko tamdaw ngaˈay mitafo to madimadi ci Yihofaan han? Awaay sanay ci Satan. Sowal ningra midoko ko tamdaw to Kawas mikitiniay misatekeday araaw sanay, cowa ko soˈlinay maolah ci Yihofaan sanay. (Yopu 1:​9-​11; 2:​4, 5) Tahiraay i patay a madimadi ci Yis, misawacay to makaniway ko sowal ni Satan. w21.04 17 fiedac 7-8 fatac

O pacekiwan wa misaka dademak to mananamay a sifanaˈ ngaˈ ngaˈay micada to paputisem. Na masowalay ni Yis i sapatinako ko cecay ‘citanengay tamdaw’ tangongol ko mikorkoran a sera, itini fafekang no ˈongcoy patireng to lomaˈ. Misaka dademak ko pacekiwan to mananamay, malecaday oniya ‘citanengay tamdaw.’ (Matay 7:​24, 25; Luka 6:​47, 48) Padamaen ko pacekiwan makahi mifalic. (Marko 10:17-22) Mafanaˈay ci Yis, pasangaray ko cihafayay tamdaw mifalah to kihcod a dafong. (Marko 10:23) Kawra, kamayan papipacakayen ni Yis ko cecay cihafayay a tamdaw to kihcod dafong, mifalic to pakayraan a maˈorip. Misamanay hani? Samanen maolahay ci Yis cingranan. Latekay, cowaho ka harek ko pacekiwan a misaday saan kita miharateng, hato eca ka kaliki pakalalok cingranan a mifalic. (Kolosay 3:​9, 10) Kawra, ano kahenay kiso milengo toniya demak, wa kahenay ko pacekiwan a talaˈayaw mihawang. Mihaen ko demak iso, o paihkalay soˈlinay a ciharateng cingranan.​—ˈOlic 141:5; Taneng 27:17 w21.06 3 fiedac 3, 5 fatac

Milengoan ni Pitiro o pisemsem ato pihadidi ni Yis a ngaˈayay taˈarawan. Kawra, wa ngaˈay kita itini roma pakayraan a minanam ci Yisan. (1 Pitiro 2:​18-​25) Soˈlinay i, itini hakelong no kaˈorip ni Yis o nano sowal, nano demak ningra, oha ngangaˈay nanamen ita. Nikawrira, cowa ko malefotay kita soˈlinay ngaˈay mitodong to taˈarawan ni Yis han? Ngaˈayay. Haratengen, palimoˈotay ci Pitiro kitaanan ‘mikedec mikotod’ to pasaripaˈan ni Yis, cowa ko mamalefot a mikotod to pasaripaˈan ningra. Mihaenay ko sowal no tarokos ci Yohani, ‘samanay ko waywayan ni Kristo,’ mamihaen ko waywayan ita malo tamdaw. Soˈlin cowa ko malefotay kita, kawra ano misarocod kita, misongilaˈ minanam ci Yisan, o mitooray to limoˈot ni Yohani a midemak. (1 Yohani 2:6 ato roma pihongyak.) Mikotod to pasaripaˈan ni Yis wa padama kitaanan matongal ko piingid ci Yihofaan. Misamanay? Itini kaˈorip sahtoay o kahemekan ni Yihofa ko midemakan ni Yis, patirengay to ngaˈayay taˈarawan ita. (Yohani 8:​29) Mihaenay, mikotod kita to pasaripaˈan ni Yis, o papakahemek ci Yihofaan. Ngaˈay pakasoˈlin kita, wa ingiden no kakarayan Wama ko misaˈicelay miingid Cingranan a tamdaw.​—Yakop 4:8. w21.04 3 fiedac 4-6 fatac

Misinanotay ci Yihofa to kangaˈayan ita, maˈaraway ko mahimeday a ˈicel ita, misolotayho kitanan miingid Cingranan. Ano madimadi kita Cingranan, wa tahadaˈoc Cingra maolah kitaanan! (Yohani 6:​44) Ano pakasoˈlinay kita to maolahay ci Yihofa kitaanan, midamaay kitaanan, soˈlin pasangar ko kaˈorip, wa misarocod kita a midoko Cingranan. Kawra ano cisasa kita to olah no Kawas, wa ‘mimingto ko ˈicel’ no mita. (Taneng 24:10) Ano matoled kita, cowa ka ciharateng ko Kawas kitanan saan miharateng, wa pasangarto miconged to saˈodis ni Satan. (Ifiso 6:​16) Anini o roma madimadiay Krisciyang samanen iraay ko cisasaay harateng, telocto mafasaway ko pakasoˈlinay falocoˈ. Ano misatapang kita cisasa to olah no Kawas kitanan, wa samaan ko demak hani? Wa tangsolen ita mifalah ko mahaenay a harateng! Wa cangacangen ci Yihofa pafeli to rihaday, “midipot” to “falocoˈ ato ponoˈ” ita, palahdaw to cisasaay harateng. (ˈOlic 139:23; Filipi 4:​6, 7) Aka mapawan, cowa ko kiso aca ko misiˈayaway to mahaenay pakayraan a tamdaw. w21.04 20 fiedac 1 fatac; 21 fiedac 4-6 fatac

Samanay kiso malo Misawacayay Tamdaw ni Yihofa hani? Salakat, matengilay iso ko “ngaˈayay lihaf,” mikitiniay i wama wina, cafay matayal, cafay micudad a matengil alatek, anca iraay ko tamdaw tayra i lomaˈ iso mitosil pasowal tisowanan alatek. (Marko 13:10) Ikor, iraay ko tamdaw mipalakay to adihayay a toki ato ˈicel pasifanaˈ tisowanan to Fangcalay Cudad. Itini pinanaman a tatokian i, matongalay ko olah iso ci Yihofaan, mahapinangho maolahay ci Yihofa tisowanan. Ci Yihofa ko misolotay tisowanan mafanaˈ to soˈlinay kimad, mansa malo nisawawaan ni Kristo kiso, iraay ko tokel tahadaˈoc maˈorip. (Yohani 6:​44) Papipadamaan ni Yihofa ko madimadiay a sikawdan Ningra tisowanan mafanaˈ to soˈlinay kimad, malo sikawdan Ningra kiso, maedeng tada miakoˈiday kiso Cingranan. Nohatini, ano mafanaˈayto kita to soˈlinay kimad, wa irato ko tatodong padama to tao romakat i sakatayra i midaˈocay ˈorip a lalan. Mananamayto kita pakalomaˈ a mitosil alatek, kawra mitahidang to tao minanam to Fangcalay Cudad ato misikay to pacekiway, cowato ko madoloay saan miharateng. w21.07 2 fiedac 1-2 fatac