Saka 10 Folad

O pihakelongan ato sapasifanaˈ ita a Kimad mikitiniay i Fangcalay Cudad. Kawra, kantangay ko pakayraan ita a midoko sanay ko ˈalomanay tamdaw, o sapasifanaˈ ita cowa ka tatodong i harateng nangra, mansa manaˈay mitengil to milasilan ita a lihaf. Samaan ko demak ngaˈ eca ka mahafikod? Pasowalan no tarokos ci Pawlo ko Lomaay a Krisciyang: ‘O sasalakat ko tamdaw tahatengil to lihaf, ngaˈ pakasoˈlin; ira ko patenakay a tamdaw ci Kristoan, ngaˈ pakatengil to lihaf.’ (Loma 10:17) Mansa sapalahadaw kita to pakasoˈlinay falocoˈ, wa misongilaˈ mikingkiw to Fangcalay Cudad, cowa ko pirienang to misafelitay to safalod no Fangcalay Cudad a pisalisinan no kiyokay. Ano samaanto ko pisolot noniya lisin, cowa ko mamalifok no tamdaw ko soˈlinay a epoc. Oha maminanam kita to matatodongay a sifanaˈ patireng to tanektekay pakasoˈlin, kalimlaan mihaen to demak, samanen ‘ano awaay ko pakasoˈlinay falocoˈ no tamdaw i, caay ko papahemek to Kawas.’ (Hipray 11:​1, 6) Cowa ko pakaˈaraw kita to kafahkaˈan a demak, ngaˈ pakasoˈlin to mahelaay no niyah ko soˈlinay kimad. O soˈlinay kimad no Fangcalay Cudad papatanoktok to pakasoˈlin ita, ano misongilaˈ kita a mikingkiw, o sasa no falocoˈ wa malahdawto maemin. w21.05 4-5 fiedac 11-​12 fatac

Adihayay ko masiˈayaway no tarokos ci Pawlo a pasangaray, masetiˈay, mapalitayho, mangata patayen no tao. Toniya tatokian, mikiriwiˈay cingra misaali to sapafeli ni Yihofa a ˈicel. (2 Korinto 11:23-​25) Pakapapotalay a mihai ci Pawlo, milowiday cingra to masofaway a harateng. (Loma 7:​18, 19, 24) Roma i, ‘mapacekay no ceka ko tireng’ sanay ci Pawlo, o adada no tireng alatek, mitokelay ci Pawlo to Kawas padama cingranan mifalah toniya ceka. (2 Korinto 12:​7, 8) Soˈlin adihayay ko masiˈayaway ni Pawlo a pasangaray, kawra paˈicelan ni Yihofa ci Pawlo milaheci to tayal. Haratengen ita o maanan ko malaˈosiay ni Pawlo a demak. Tinakoen, mapalit ci Pawlo i Loma i pasayraay ˈaˈideman no Yutaya fanekfek a mitosil, itiniayho i ˈaˈayaw no tapang paˈading to ngaˈayay lihaf. (Dmak 28:17; Filipi 4:​21, 22) Mitosilan ningra ko mihimaway sofitay ato milisoˈay cingranan a tamdaw. (Dmak 28:30, 31; Filipi 1:​13) Toniya tatokian, itini sakayat no Kawas mitiliday ci Pawlo to pina tikami, oniya tikami cowa ko pakalalok aca to itiyaay a Krisciyang, taˈangayay ko sapadama kitaanan anini. w21.05 21 fiedac 4-5 fatac

O Hongti no Yutaya ci Uciya pakayniay pisatakaraw eca ka makahi mitengil to limoˈot, midemakay to awaay ko fadangalan ningra a demak. Ci Uciya na citanengay ko demak, ano sofitayto a demak, patirengay anca maomahay a demak adihayay ko malaˈosiay, samanen ‘palemedan no Kawas cingra.’ (2 Rayray 26:​3-7, 10) Kawra, ‘macakat a ciˈicel cingra, misatakaraway ko falocoˈ, mifekad to sakapatay.’ Saˈosi ni Yihofa edengan ko saysi ngaˈ ngaˈay patafang to exiw i fangcalay sefi, kawra patelas sanay ci Uciya micomod i fangcalay sefi, haratengay sa mitodoh to exiw. Tada maketeray ci Yihofa, padengaan cingra to lonoˈ a adada. (2 Rayray 26:16-​21) Wa malecad kita ci Uciyaan makefeng i talakal no misatakaraway han? Hayi, ano pakidem ko pinengneng ita to niyah, wa mahaen alatek. Haratengen, o kihcod a inaneng ato tayal i kasakopang ita, sahtoay o sapafeli ni Yihofa. (1 Korinto 4:​7) Ano misatakaraw a malitaˈang kita, cowato ko sasakadademaken ni Yihofa kita. w21.06 16 fiedac 7-8 fatac

Mafanaˈay ci Yis, masadak ko nisawawaan mitosil cowa ka sahto saan ira ko ngaˈayay minaroˈan. Soˈlinay i, i lalomaˈ no makahiay mitengil a tamdaw, hakowaay ko soˈlinay malo nisawawaan, awaay ko pinang ita. Mihaenay, cowa ko ngangaˈay ko nisawawaan pakayni i minaroˈan a mahemek. Mafanaˈ to masemeray ci Yihofa to mihadakan nangra, onini ko soˈlinay a lalangian nangra a mahemek. Padadotoc kita a mitosil, o mamilifok to midaˈocay a ˈorip. Misarocod kita a mikosam ato palahad to sapaloma no soˈlinay kimad no Hongti Kitakit, o ‘midofdofay to fangcalay saocor a mikosam,’ papisakadademak to fangcalay saocor no Kawas i kaˈorip no mita. Mikiˈokay ci Yihofa, ano ira anca awa ko mapadamaay ita a pacekiwan micada to paputisem malo Krisciyang, ano eca ka matoled kita, eca pisawad, o midaˈocay a ˈorip o mamalo minaroˈan no mita.​—Kalatiya 6:​7-9. w21.10 26 fiedac 8-9 fatac

Kinacecayay, ci Yis ato nisawawaan ikor no mitosil to ˈalomanay tamdaw tada malotayayto, misaaliay to paselaˈan a kitiraan. ˈAlomanay tamdaw mafanaˈ to tatalacowa cangra, mikiˈayaway a tayra mitala. Maˈaraw ni Yis koniya ˈalomanay tamdaw siniˈadaay cangranan, ‘pasifanaˈ cangranan to adihayay a demak.’ Patadoay cingra toniya tamdaw a miharateng, mihapinang to tada marorayay cangra, awaay ko hatokel, mansa ciharateng padama cangranan. Anini mahaenay ko ˈalomanay tamdaw, ano nengnengen hato lipahakay ko kaˈorip nangra, kawra malecaday o moraraway a lopayˈay siri awaay ko padamaay, awaay ko mikayatay a pakaenay. Malecad o sowal no tarokos ci Pawlo, oniya tamdaw ‘awaay ko hatokel, cowa ka fanaˈ to Kawas.’ (Ifiso 2:​12) Maharateng ita koniya tamdaw misaaliay sakafanaˈaw to Kawas, ciharatengay ato siniˈadaay cangranan, sapadamaaw cangranan. Padama kita to tao, o sangaˈayay pakayraan i pasifanaˈ cangranan minanam to Fangcalay Cudad. w21.07 5 fiedac 8 fatac

O malitaˈangay a tamdaw misatakaraway misatekeday. Iraay ko maˈinapay a harateng a tamdaw cowa ko sapilifokaw aca to malecaday no tao a dafong, mitokelayho malahdaw ko iraay a dafong no tao. Ihkalen ko sowal, maˈinap to tao o miˈintehay to tao. Malitaˈangay ato maˈinapay oniya tosa waywayan, malecaday o ponal no dawdaw no hikoki. Soˈlin ngaˈayay maefer ko hikoki, kawra oniya ponal mamisoet to rakat no dawdaw, mamapalakto ko hikoki. Malecaday, o cecay Krisciyang ano malitaˈang, maˈinap to tao, soˈlin ngaˈay mitafo to pihakelongan to cecay liyad, ecato ko tatahacelem cingra. (Taneng 16:18) Ikorto o mamisawad cingra to pihakelongan, midokaˈ to niyah ato tao. Ano caay ka ciharateng kita malitaˈang, haratengen ko limoˈot no tarokos ci Pawlo. Sanay cingra: ‘Ano o mananto a demak aka malalifet, aka malitaˈang, ka pisapoener, minengneng to tao ikakaay to niyah.’​—Filipi 2:3. w21.07 15-​16 fiedac 6-8 fatac

Harateng no romaroma tamdaw, o matatodongay a pihakelongan o ngangaˈay pacaˈof to polong a salicay, mahawpay ko cowa ka sowal no Fangcalay Cudad a salicay. O hatiniay a pilongoc o matatodongay han? Nengnengen ita ko tinakoan ni Pawlo. Palimoˈotay ci Pawlo to salikaka ‘hapinangen a mipalifet ko masamaamaanay a demak,’ kawra mihaiay cingra, adihayayho ko kafokilan ningra a demak. (1 Tisalonika 5:​21) Sanay cingra: ‘Mimingay ko kafanaˈan ita a demak, malecaday o tano fodawan a dadingoan ko sapinengneng ita, o maapohay aca ko maˈaraway.’ (1 Korinto 13:​9, 12) Malecaday ci Pawlo kitaanan cowa ka cipinang to kihcod a demak, kawra cipinangay cingra to pakayniay ci Yihofaan a taˈeneran a sifanaˈ, padamaay konini cingranan pakasoˈlin to soˈlinay a kimad. Sapitongalaw kita tanektek ko pakasoˈlin no niyah, pakasoˈlin to iraay ko soˈlinay a kimad no niyah, o cecay pakayraan i palinien to patirengan ni Yis a taadoan a midoko ato Misawacayay Tamdaw ni Yihofa a taadoan a midoko. w21.10 18-​19 fiedac 2-4 fatac

Matoˈasay salikaka, ano mieminay to toki ko tayal iso nohatini hokira, wa taˈangay ko sapadama to tao. Samaan ko demak ngaˈ madangar konini hani? Ngaˈayay minanam kamo to faelohay a kaˈorip, patireng to faelohay patosokan, misaˈicel midemak to madangaray a demak, eca ka tangoˈol to cowa ko mamadangar a demak. Tada makalimay ci Tafiti patireng to fangcalay sefi ni Yihofa, kawra pasowalan ni Yihofa cingra, oniya patirengay a tayal wa oyaan kaemangay a Solomon ko mamidemak. Micadaan ni Tafiti ko saˈosi ni Yihofa, misarocoday midama to patirengay to fangcalay sefi a tayal. (1 Rayray 17:4; 22:5) Samanen ‘kaemangayho, awaay ko nalifetan’ ni Solomon, o niyah aca ko matatodongay cowa ka saan ko harateng ni Tafiti. (1 Rayray 29:1) Mafanaˈay cingra sakalaˈosi noniya patirengay a tayal, o kalimlaan i o sapalemed ni Yihofa, cowa ko hakowaay ko mihecaan no mikeriday tamdaw, hakowaay ko kadofah no nalifetan. Anini, ˈalomanay matoˈasay salikaka mitodongay ci Tafitian, mafalic ko katayalan kamayan padadotoc misaˈicel matayal, mafanaˈay cangra papalemeden ni Yihofa ko mikotayay cangranan matayal a kaemangay salikaka. w21.09 9 fiedac 4 fatac; 10 fiedac 5, 8 fatac

Itini midokoay a pakayraan ira ko ihkalay patosokan ita, wa ira ko araaw, caciepoc ko kaˈorip. Kawra haratengen, patireng kita to patosokan i haratengen ko ˈicel ato pakayraan no niyah, aka minengneng o maanan ko patosokan no tao o manan ko patirengen ita a patosokan, ano mihaen wa madolo masomad matoled ko falocoˈ. (Luka 14:28) Itini taˈangayay a paro no lomaˈ ni Yihofa, o mikiriwiˈay kiso, tada kalimlaan. Misolotan ni Yihofa kiso tayra itihi Ningra, cowa ko pakayniay ikaka ko kangaˈay iso to tao, ao maˈaraway ko soˈliˈlinay a falocoˈ iso, mafanaˈay to o misapoeneray a tamdaw kiso, makahi micada to pisalof Ningra. Ano misarocod kiso midoko Cingranan, o mamasemer Cingra tisowanan. Tanektek mihadidi, tahatolas ko madimadi, paihkalay konini to iraay ko cecay ‘makapahay ngaˈayay a falocoˈ ’ iso. (Luka 8:​15) Mihaenay i, padadotoc patafang to sangaˈayay no niyah ci Yihofaan. Mihaen, wa ngaˈayto kiso ‘pakayni i demak no niyah’ a lipahak.​—Kalatiya 6:4. w21.07 23-24 fiedac 15 fatac; 25 fiedac 20 fatac

Misaaliay kita mihadidi a mitala ci Yihofaan masadafdaf ko pisawkit. Tinakoen, ano mafanaˈ ko malohemay malitengay iraay ko pakidemay ko raraw a tamdaw i kasakopang i, wa mikifalocoˈ a mitolon, micangacang cangra to ‘mikitiniay i Kawas a taneng,’ ho cipinang cangra to pinengneng ni Yihofa toniya demak. (Yakop 3:​17) O patosokan nangra papadama to mararaway a tamdaw misarocod a ‘pasasiyor to raraw no niyah’, misongilaˈ midipot to kasakopang, mihinomho to madokaˈay a tamdaw. (Yakop 5:​19, 20; 2 Korinto 1:​3, 4) Ano misaysay to hatiniay a pasangaray ko malohemay malitengay i, sasalakat cipinang to kihcod a demak, o mamipalak to adihayay toki. Dotoc wa mikifalocoˈ cangra mitolon, mikilim to safalod no Fangcalay Cudad, hanaca misalalangian to Fangcalay Cudad ‘matatodong ko pisalof’ to mararaway a tamdaw. (Yirimiya 30:11 ato roma pihongyak.) Cowa ko mamacaloh a misawkit ko malohemay malitengay, mitoor cangra to sakayat ni Yihofa a misaysay to demak, o papaira to sangaˈayay a minaroˈan. w21.08 11 fiedac 12-​13 fatac

Samanen makedalay ko Israil, ci Naomi ato faˈinay miˈorongay to tatosa faˈinayan wawa malinah tayra i Moap. Itini pacarcar a maroˈ i Moap a tatokian, mapatayay ko faˈinay ni Naomi. O tatosa a faˈinayan wawa ningra mararamodayto, kawra ikor mapatayay. (Rucu 1:​3-5) Padadotocay a pisemsem ato pasofaway a harateng matongal matongalay ko kasomad ni Naomi, tada adadaay ko falocoˈ ningra, hanaca mipadesay ci Yihofa cingranan saan ko harateng. Nengnengen samanay cingra paihkal to nafalocoˈan no niyah: ‘O kamay ni Yihofa mipades i takowanan.’ Sanayho cingra: ‘O nipadesan ni Yihofa kako, o mipasemseman no ciˈicelay a Kawas i takowanan.’ (Rucu 1:​13, 20, 21) Mafanaˈay ci Yihofa ‘o saroero mipasingkiay to citanengay a tamdaw.’ (Patnakay 7:7) Pakaynian ni Yihofa ci Rucuan paihkal to madimadiay a olah ci Naomian. Ciharatengay ci Rucu to nafalocoˈan ni Naomi, makalimay cingra sapadamaaw ci Naomian miliyaw a talifak, mahapinang to padadotocay ci Yihofa kalacafay cingranan. w21.11 9 fiedac 9 fatac; 10 fiedac 10, 13 fatac

Misamacay kita midemak to aniniay a tayal, o tatodong i cowa ko mamikilim kita to toki misaadihay to tayal saki Yihofaan han? Cowa ka hatira. Wa patireng kita to patosokan, mihaen ngaˈ padadotoc macakat, malo sangaˈayay a mitosilay ato sangaˈayay a singsi no Fangcalay Cudad, patado to salikaka midemak to adihayay a demak. Haharatengen, misaˈicel padama to tao eca ka pisaareteng to niyah, mihaen o citanengay ato misamimingay a pakayraan. Mihaen ko demak ita, wa ngaˈay malaˈosi ko patosokan. (Taneng 11:2; Dmak 20:​35) Wa ngaˈay kiso patireng to manan a patosokan hani? Cangacangen ci Yihofa padama tisowanan mihapinang o maanan a demak ko mamadangar iso nohatini. (Taneng 16:3) Ngaˈay kiso patireng to patosokan malo padamaay misakafahay anca miceriday misakafahay, matayal i Pitil, mirienang to patirengay a tayal han? Wa ngaˈay minanam tano roma sowal a mitosil, anca malinah tayra roma ko sowal a kilac matayal. w21.08 23 fiedac 14-​15 fatac

Maolahay ci Yihofa to madimadiay a olah. (Hosiya 6:6) Pakayniay i pairasolay ci Mikaan pasowal kitaanan ‘maolah to madimadiay a olah.’ (Mika 6:8 ato roma pihongyak.) Kawra sapidemakaw tonini, isalakatho kita cipinang tonini a capeling. O maanan ko madimadiay a olah? Itini Faelohay Hekal Mihongyakan Fangcalay Cudad, “madimadiay a olah” mataˈlifay ko 200 a masadak. Mikitini “Sapitadtad a Sowal” no Faelohay Hekal Mihongyakan Fangcalay Cudad, mitoroˈan a madimadiay a olah o “pakayniay mikiˈokan a sowal, o moecelay, madimadiay cowa ka piliyas a olah, o mitoroˈan i o olah no Kawas i tamdaw, kawra maˈaraway i kalalaˈed no tamdaw.” Paihkal to madimadiay a olah o saˈakawangay taˈarawan ci Yihofa. Masemeray ci Tafiti a pasowal: ‘Yihofaaw, tahiraay i kakarayan ko madimadiay a olah Iso . . . Kawasaw, tada kalimlaan ko madimadiay a olah Iso!’ (ˈOlic 36:​5, 7) Malecaday kita ci Tafitian misalimla to madimadiay a olah no Kawas han? w21.11 2 fiedac 1-2 fatac; 3 fiedac 4 fatac

Itini taˈangayay paro no lomaˈ ni Yihofa iraay ko cima hani? Salakat i ci Yis, ‘itini masangaˈay a maamaan, o salakatay sangaˈen cingra.’ (Kolosay 1:​15) Roma i, oniya taˈangayay paro no lomaˈ iraayho ko ˈalomanay coyoh. (ˈOlic 103:20) Itiniho i fafekang no sera ci Yis pasowalay to tamdaw, ngaˈayay cangra pangangan ci Yihofaan to Wama. Sanay ko sowal ni Yis to nisawawaan: ‘Wa minokay kako tayra ci Wamaan ako, o Wama namo.’ (Yohani 20:17) Patafang kita to tireng ci Yihofaan ato micada to paputisem ikor, micomodayto toniya ciolahay a taˈangayay lomaˈ. (Marko 10:29, 30) O kakarayan Wama ci Yihofa matomesay to olah, mitokelay ci Yis malecad kita cingranan, o madaˈmaˈay a Wama ci Yihofa han ko pinengneng, cowa ko misatakaraway a Kawas. Satapang no taˈarawan a satolon ni Yis sanay: ‘I kakarayan a Wama niyam.’ Na ngangaˈay ci Yis pasifanaˈ kitanan pangangan ci Yihofaan to ‘Malefotay ko ˈIcel’ ‘Misangaˈay a Tapang’ ‘midaˈocay a Hongti,’ o sapangangan to saaroˈan ni Yihofa i Fangcalay Cudad konini. (Satapangan 49:25; Isaya 40:28; 1 Timoti 1:​17) Kawra cowa pihaen ko demak ni Yis, pasifanaˈay cingra kitanan damsay a pangangan ci Yihofaan to Wama. w21.09 20 fiedac 1, 3 fatac

Kinapinaay ci Yihofa miocor to pairasolay mirikec ci Manasian, kawra malecaday cingra ci Ahapan ˈatekakay ko falocoˈ. Saikor, ‘papiloodan ni Yihofa ko sofitay no Asiriya to Yutaya kitakit. Tano sarokawit ko Asiriya tamdaw a milepel ci Manasi, tano tosa fodawan a kadang mipalit cingranan, miˈorong cingranan patayra i Papilon.’ Ano nengnengen, itini ci Manasi i kapalitan no Papilon misatapangay misimsim to raraw no niyah. ‘Itini cingra i ˈaˈayaw no Kawas no lalitengan tada misapoeneray ko falocoˈ.’ Cowa ka hatini aca, ‘padadotocay pasayra i Kawas mitolon’ cingra, ‘micangacang to Kawas ningra a misodod.’ (2 Rayray 33:10-​12) Mahapinangay ni Yihofa soˈlinay mafalic ko falocoˈ ni Manasi. O satolon ningra mitemeray ci Yihofaan, orato pacaˈofan ni Yihofa ko pitolon ningra, misodod cingranan, hanaca miliyaw pala hongti cingranan. Misarocoday ci Manasi misawacay to soˈliˈlinay pasasiyor ko niyah, misongilaˈ mifalic to waywayan no niyah. w21.10 4 fiedac 10-​11 fatac

Mamalinah ci Priskilaan aci Akuil, miliyas to kananaman a kitiraan, miliyawho itini faelohay a pala misatapang to misangaˈay to kopang a singdi. Ikor no malinah cangra i Korinto i, malacafayay to tarokos ci Pawloan a matayal, pakalalok to itiraay a salikaka. Ikor, malinahayho cangra tayra misaaliay to mitosilay a pala matayal. (Dmak 18:18-​21; Loma 16:​3-5) ˈIfowaay ko kaˈorip nangra, tada lipahakay! Anini, ngaˈay kita mitodong ci Priskilaan aci Akuilaan i salakat micangacang to Hongti Kitakit no Kawas. Itini makakaolahho malalengo to patosokan no kaˈorip no niyah. Malalengo tatosa sasamaan misaˈicel malaˈosi toniya patosokan matayal saki Yihofaan, wa adihay ko toki maˈaraw to misaka dademakay ko fangcalay saocor ni Yihofa i kaˈorip nangra.​—Patnakay 4:​12. w21.11 17 fiedac 11-​12 fatac

Kangodoen ko wama wina onini a limoˈot tada kalimlaan, songilaˈen ita midofdof. Haratengen, maharek ci Yihofa pasowal to ‘ka makorac kamo, samanen ci Yihofa Kako o Kawas namo o makoracay’ ikor, tangsolay somowal to limoˈot i Lifi 19:3. (Lifi 19:2) Sapidofdofaw to sapalimoˈot ni Yihofa, ngaˈay kita miharateng: “Itini pikangodo to wama wina a pakayraan samanay ko demak ako?” Ano cangoˈotay ko demak no niyah saan kiso miharateng, sasaˈicelen a misalof. Soˈlin caka ngaˈay mifalic to isaˈayaway, kawra ngaˈay kiso misetek to falocoˈ, anini misatapang adihay ko midemakan saki wama wina. Ngaˈay kiso mipalak to adihayay toki malacafay cangranan alatek, itini nodafongan anca i nofalocoˈan padama cangranan, ngaˈayho padama cangranan padadotoc miingid ato midoko ci Yihofaan. Mihaen ko demak iso, o midofdofay to sapalimoˈot no Lifi 19:3. w21.12 4-5 fiedac 10-​12 fatac

Na pakidemay ko raraw ni Tafiti, tinakoen maˈaˈodangay cingra aci Patsipa, mipatayayho to faˈinay ningra. (2 Samuil 11:​2-4, 14, 15, 24) Telocto madokaˈay ko niyah, pakarorayayho to fafahi ato paro no lomaˈ no niyah. (2 Samuil 12:10, 11) Kinacecayay, cowa pisarocod ci Tafiti mitadiˈec ci Yihofaan, haratengay sanay misaˈosi to sofitay no Israil tamdaw. O waywayan ningra mikayatay to pitefad ni Yihofa to lifong, telocto pitoay emang ko mapatayay a Israil tamdaw. (2 Samuil 24:​1-4, 10-​15) Awaay ko tatodong ni Tafiti milifok to sasodod ni Yihofa wa saan kiso miharateng han? Kawra cowa pihaen ci Yihofa miharateng. Maˈaraway ningra ko madimadi ni Tafiti i hakelong no kaˈorip, hanaca makahiay mikifalocoˈ pasasiyor. Mihaenay, soˈlin pakidemay ko raraw ni Tafiti, kamayan sododen ni Yihofa cingra. Mafanaˈay ci Yihofa tada maolahay ci Tafiti Cingranan, makalimayho midemak to matatodongay a demak. O minengnengan ni Yihofa o kangaˈayan no mita, tada miakoˈiday kita Cingranan!​—1 Hongti 9:4; 1 Rayray 29:10, 17. w21.12 19 fiedac 11-​13 fatac

Tada siniˈadaay ci Yis to masamoˈay ko tireng a tamdaw. Kinacecayay, mitahidangay cingra to tamdaw pasowal to paputisemay a Yohani to nano demak ningra, saan: ‘Pakaˈaraw ko mapohaway, romakat ko mapiˈiway, maadah ko ciadadaay to fanges, pakatengil ko madoˈengay, patikol maˈorip ko mapatayay.’ Maˈaraw no ˈalomanay tamdaw ko kafahkaan a demak ni Yis pakahemekay to Kawas. (Luka 7:​20-​22) Sapitodongaw kita ci Yisan, mihaenay tatano sidaˈitay, patado miharateng, mihadidi micada to masamoˈay ko tireng a tamdaw. Soˈlin cowa pafeli ci Yihofa kitaanan to kafahkaˈan a ˈicel miadah to tamdaw, kawra wa ngaˈay kita pasowal to tamdaw to pakayniay faelohay hekal a ngaˈayay lihaf, padama to mapohaway tamdaw ato cowa pakaˈaraw to tedi no soˈlinay kimad a tamdaw cipinang, noikor polong a tamdaw papatikol a tanektek ko tireng, aira ko ngaˈayay kalawidang ci Yihofaan. (Luka 4:​18) Matengil no ˈalomanay tamdaw konini a ngaˈayay lihaf, mikifalocoˈay a pakahemek to Kawas. w21.12 9 fiedac 5 fatac

O sapasifanaˈ ni Yakop misalalangiay to Fangcalay Cudad. Misaka dademakan ningra ko Kimad no Kawas, padama to tamdaw mihapinang o papalifonen ni Yihofa ko malecaday ci Yopuan madimadiay Cingranan a tamdaw. Misaka dademakan ni Yakop ko kantangay a sowal ato masieroday a pakayraan mitadtad tonini a kimad, mansa o mitengilay to sapasifanaˈ ningra a tamdaw cowa pisamacay ko harateng i tireng ningra, ao itiniay i tireng ni Yihofa. Mananamay ita: Kantangen ko sowal, misalalangi to Fangcalay Cudad a pasifanaˈ. O patosokan ita cowa ko papiharateng to tao adihayay ko sifanaˈ ita, ao padama cangranan mihapinang tangongolay ko taneng ni Yihofa, hanaca tada ciharatengay cangranan. (Loma 11:33) Sakalaˈosiaw nonini a patosokan, o sapasifanaˈ ita o mamisalalangi to Fangcalay Cudad. Tinakoen, aka pasowal to pacekiwan ano kita cingra o sasamaan ko pidemak, ao sakadademaken ko tinakoan no Fangcalay Cudad, padama cingranan mihapinang to harateng ato nafalocoˈan ni Yihofa. Ano mihaen, misaka dademak ko pacekiwan to mananamay cowa ko sapakahemekaw kitaanan, ao pakayniay sapakahemekaw ci Yihofaan. w22.01 11 fiedac 9-​10 fatac

Coko pisaali aca no Kawas kitaanan aka midokaˈ to tao, palimoˈotayho kitanan ‘kaolah to tao malecad o kaolah to niyah.’ Ano sapakahemekaw kita to Kawas, o mamihaen ko pidemak. Mitadtaday ci Yis to kalimlaan no Lifi 19:18. Kinacecayay, o cecay Farisay a tamdaw milicayay cingranan: ‘Itini sarikec o maanan a limoˈot ko sataˈangayay hani?’ Sanay ci Yis, ‘sataˈangayay, sakalimlaan a limoˈot’ i, ‘eminen ko falocoˈ, eminen ko harateng, tano polong no ˈorip a maolah ci Yihofaan,’ ikor misaka dademakay cingra to Lifi 19:18 a sinael, sanay: ‘Saka tosa malecaday, kaolah to tao malecad o kaolah to niyah.’ (Matay 22:35-​40) Paihkal to olah i tamdaw adihayay ko pakayraan, cecay pakayraan i mitooray to limoˈot no Lifi 19:18 a midemak. Sanay ko sinael: ‘Aka miˈodis, aka ˈinteh ko falocoˈ to tao.’ w21.12 10-​11 fiedac 11-​13 fatac

Layaˈ sanay ci Yis to kamay misolot ci Pitiroan. Sasinanoten i, tiya misamocek ci Pitiro ci Yisan i, ngaˈayay cingra romakat i taˈangayay ko tapelik a riyar. Kawra maˈaraw ningra ko faliyos i, cisasaay makokiˈay ko falocoˈ, telocto misatapangay a matakeng. (Matay 14:​24-​31) Mikitini ci Pitiroan ngaˈay mananam ita ko maanan hani? Tiya maepod cingra i tamina i, maedeng caay ka harateng pakayni kaciˈangi no niyah a matakeng. Harateng ningra na raromakat tayra ci Yisan, kawra cowa ka padotoc minengneng ci Yisan, ao misatapangay calemcem to faliyos. Anini, misaaliay kita to pakasoˈlinay falocoˈ ngaˈ ngaˈay misiˈayaw to masakenaay sapalifet, malecad ci Pitiroan ira ko pakasoˈlinay falocoˈ ngaˈ ngaˈay romakat i fafekang no nanom. Ano mapawan kita ci Yihofaan ato sakiˈok Ningra, o mamisatapang a ‘matakeng,’ matahepo no cariraw. Ano o mananto ko malifaay ita a ‘faliyos’ i kaˈorip, haharatengen iraay ko ˈicel ni Yihofa padama kitaanan. w21.12 17-​18 fiedac 6-7 fatac

Mitolon, micekiw ato midotim sahtoay o kalimlaan a demak midoko. Tada maolahay ci Yihofa kitaanan, ano mitolon kita o masasowalay Cingranan. O pipowaran no taneng Cingra, ano micekiw kita i, o minanamay to pakayniay Cingranan a sifanaˈ. (Taneng 2:​1-5) Ano midotim kita i, mamisongilaˈ miharateng to kasemeran a capeling Ningra, ato kasapaan a araaw Ningra i kahacecay a tamdaw ato polong a tamdaw. Midemak kita tonini a demak, o misongilaˈayto misaka dademak to toki. Mihaenay, samaan ko demak ita ngaˈay i citolasay a tatokian milifok to taˈangayay a epoc hani? Mamipiliˈ to awaay ko adeses a kitiraan. Nengnengen ko taˈarawan ni Yis. ˈAyaw no misatapang midemak to mitosilay a tayal i, cecayay cingra itini kohkoh to 40 romiˈad. (Luka 4:​1, 2) Itini i awaay ko adeses a kitiraan, pasayraay ci Yihofaan mitolon cingra, hanaca micalepay misimsim to araaw no kakarayan Wama cingranan. Mihaen to demak maedeng padamaay cingranan misaday misiˈayaw to aira a sapalifet. w22.01 27-​28 fiedac 7-8 fatac

O cecay malohemay malitengay anca o matenesay faˈinayan salikaka patodicek sanay pasowal, iraay ko maanan a sasalofen ita. Maedeng o maolahay ko tao kitaanan, mansa pafeli kitanan to mikitiniay i Fangcalay Cudad a sapalimoˈot. Mihaenay mamakahi kita mitengil to sapalimoˈot, hanaca soˈlin a misaka dademak. Ano iraay ko tamdaw patodicek saan palimoˈot kitaanan, pasangar kita micada alatek, o pakararaway wa saan miharateng. Hano mahaen hani? Soˈlin kita o kahacecay tamdaw mafanaˈay to cowa ka lefot ko niyah, kawra ano patodicek sa ko tao mitoroˈ to tatiihay ko demak ita, pasangaray kita micada. (Patnakay 7:9) Tonini a tatokian, o papaˈading kita to niyah alatek, cisasa to nafalocoˈan no tao, anca mapiliˈ to pakayraan ningra mihadak to sapalimoˈot, hanaca misatapang mikilim to dangoc no tao, saan miharateng: ‘Hano ira ko tatodong ningra palimoˈot takowanan hani? Ano cingrato cowa kangaˈay ko demak i!’ O sapalimoˈot ningra cowa ka tatodong to niyah saan kita miharateng, cowato ko mamisikol kita alatek, anca milicay to roma tamdaw, makalim mitengil to kaolahan no niyah a sowal. w22.02 8-9 fiedac 2-4 fatac

Itini faelohay hekal, tatahalifa kita to pasangaray pakayraan alatek, palifet to pakasoˈlin ita ci Yihofaan. Haratengen ko tinakoan no Israil tamdaw. Miliyas cangra to kala koli i Icip caka halafin, o roma tamdaw caka tahakaen ko kakaenen no Icip misatapangay ngaliwngiw, mapiliˈay to sapafeli ni Yihofa a mana. (Saˈosi 11:​4-6; 21:5) Mahererek ko taˈangayay padiing, wa ira ko mahaenay a pasangaray no mita han? Sapatikolaw mikorac pala lakoing to cikiw hakowaay ko hademak, cowa ka fanaˈ kita. Salakat adihayay ko hatayal alatek, wa ira ko cowa kadepocan a demak alatek, o papakayni ko kangaliwngiw ita to sapafeli ato limasmas ni Yihofa han? Ngaˈayay pakasoˈlinen ko cecay demak: Nohatini ano miakoˈiday kita to kihcod sapafeli ato limasmas ni Yihofa, noikor o mamiakoˈid ci Yihofaan. w22.02 7 fiedac 18-​19 fatac

Itini Cikariya 8:​23 a sapairasol, ‘o cecay Yutaya tamdaw’ ato ‘kamo’ o mitoroˈan sahtoay o maˈoripayho tonini a hekal manilnilay no fangcalay saocor a Krisciyang. (Loma 2:​28, 29) ‘I lalomaˈ no cowa ka lecad ko sowal a kitakit’ a ‘moetepay tamdaw’ o roma lopayˈay siri ko mitoroˈan. ‘Mikelecay mikoramet to rikoˈ no cecay Yutaya tamdaw’ cangra, sakonini a sowal i, o mamadimadi cangra midama to manilnilay no fangcalay saocor a Krisciyang, malacafay tonini ˈopo a tamdaw midoko ci Yihofaan. Malecaday to sapairasol no Icikil 37:15-​19, 24, 25. Palaˈosianto ni Yihofa konini a sapairasol, mikelec a palacafay to manilnilay no fangcalay saocor a Krisciyang ato roma lopaˈay siri. Itini sapairasol masowalay ko tosa cokor, ‘no Yuta a cokor’ mitaypiyaway to manilnilay no fangcalay saocor a Krisciyang (O hongti no Israil mikitiniay i ngasaw no Yutaya masadak), o ‘no Ifraim a cokor’ mitaypiyaway to roma lopayˈay siri. Palacafayan ni Yihofa a miteli konini a tosa cokor malo ‘cecayay a cokor,’ tatodong i, o papalacecayen Ningra a mikelec ko manilnilay no fangcalay saocor a Krisciyang ato roma lopayˈay siri, malacafay a matayal saki cecay Hongti ci Yis Kristoan.​—Yohani 10:16. w22.01 22 fiedac 9-​10 fatac

Sowal ni Yis paladaˈ ko roma tamdaw i, makalimay mafanaˈ ko ˈalomanay tamdaw. Soˈliˈlin o ngaˈayay ko midemakan nangra, kawra cowa ko papakahemek ci Yihofaan. (Matay 6:​2-4) O soˈlinay a ngaˈayay mikitiniay cowa pisateked a midemak to matatodongay a demak. Ngaˈayay licayen ita ko niyah: “Cowa ko kafanaˈ aca ako to o maanan ko matatodongay, hanaca misaˈicelay a midemak han? Midemak kako to ngaˈayay o maanan ko araaw no falocoˈ hani?” Misaka dademakan no Kawas ko fangcalay saocor palaˈosi to araaw Ningra, mihaenay ano adihay ko mihadakan ita a ˈicel, patalahkal to masakenaay makapahay a capeling, mamatongal ko adihay a sapadama no fangcalay saocor kitaanan. (Satapangan 1:2) Mahapinangay, kalimlaan ko waywayan. Sowal no tarokos ci Yakop: ‘Awa ko waywayan no pakasoˈlinay falocoˈ malecaday o mapatayay.’ (Yakop 2:​26) O romaroma a capeling no minaroˈan no fangcalay saocor malecaday. Ano patalahkal kita tonini a capeling i, paihkalay koni iraay ko sapadama no fangcalay saocor no Kawas i tireng no mita. w22.03 11-​12 fiedac 14-​16 fatac

O mamirienang kita to masakenakenaay midokoay a demak, mamisaˈicelho mikangaˈay to tamdaw. Kawra, mikiriwiˈay ci Pitiro pakalalok to Krisciyang midemak to cecay kalimlaan a tayal. Itini iˈayaw no palimoˈot cingra to Krisciyang makorac i polong a demak i, salakatay somowal: ‘Ka talifak ko harateng namo, misaday a midemak.’ (1 Pitiro 1:​13) O maanan a demak hani? Sanay ci Pitiro, iraay ko tokel tayra i kakarayan a Krisciyang o mamilasil to makapahay a capeling no Kawas. (1 Pitiro 2:9) Soˈlinay i, polong a Krisciyang anini iraay ko tatodong mirienang tonini a kalimlaan, o papaira to haepoc no tamdaw a tayal. Malo makoracay a finawlan ni Yihofa kita, ngaˈay micerid fanekfek a mirienang to mitosilay pasifanaˈay to tamdaw a tayal, tada masakalikoanto! (Marko 13:10) Ano misaˈicel kita mihaen to demak, o ngangaˈay misawacay to maolahay ko niyah to Kawas, maolahayho to tao, hanaca misaˈicelay makorac i polong no demak. w21.12 13 fiedac 18 fatac

Tawlikay ko pinengneng no tarokos ci Pawlo to salikaka. Mafanaˈay cingra mararaw ko cecay tamdaw, mitaypiyaway to tatiihay konini a tamdaw cowa ka saan. Tada maolahay cingra to salikaka, o ngaˈayay nangra ko misinanotan. Ano mararaw ko salikaka i, pakasoˈlinay ci Pawlo makahiay cangra midemak to matatodongay a demak, edengan misaaliay cangra to sapadama. Nengnengen samaanay ko picada ni Pawlo to itiniay i Filipi a kasakopang tatosaay fafahiyan salikaka Yuotia aci Sintiki. (Filipi 4:​1-3) Onini tatosaay fafahiyan salikaka iraay ko lacongis, telocto marawraway ko kalalaˈed nangra. Cowa ka pakidem ko pilikaf ni Pawlo cangranan, anca ira ko masofaway a pinengneng cangranan, ao misamacayay to makapahay a capeling nangra. Mafanaˈay ci Pawlo noniya tatosaay fafahiyan salikaka halafinayto madimadi midoko ci Yihofaan, mihaenay tada maolahay ci Yihofa cangranan. Iraay ko tawlikay noka pinengneng ni Pawlo cangranan, mansa makahi pakalalok cangranan misaysay to lacongis nangra. O mahaenay a waywayan padamaay ci Pawloan padadotoc lipahak, hanaca ira ko ngaˈayay kalalaˈed to salikaka itini i Filipi a kasakopang. w22.03 30 fiedac 16-​18 fatac

Papafeli ci Yihofa to rihaday wa parihaday to falocoˈ ita, ihkal ko maharatengay. Na iraay ko mahaenay a matinakoay ni Los, sanay cingra: “Marariday kako matoˈol, o hatiniay nafalocoˈan cowato ka olah ci Yihofa takowanan sanay ko harateng. Toniya tatokian, tangsolay kako pasowal to nafalocoˈan ako Cingranan. O satolon soˈlinay padama takowanan miˈimer to harateng no niyah.” O nalifetan ni Los paihkalay, o satolon ngaˈay padama kitaanan milifok to rihadayay. (Filipi 4:​6, 7) Mafanaˈay kita, ano malahdaw ko salawina ita i, mamidama ci Yihofa aci Yis kitaanan. Tada siniˈadaay ci Yihofa aci Yis to tamdaw, mihaenay papairaen ita ko siniˈadaay a falocoˈ misaˈicel mitosil pasifanaˈ to tamdaw. Siniˈadaay ci Yihofa aci Yis to kalonay ita, hanaca o papadama kitaanan padadotoc a mihadidi, mafanaˈ tonini a soˈlinay kimad tada parihadayay to falocoˈ ita. Halamhamay kita to pisongilaˈan ni Yihofa palaˈosi to sakiˈok no Niyah, itiya o sasisiten Ningra ko ‘kahacecay a losaˈ ’ no mita.​—Paˈarawan 21:4. w22.01 15 fiedac 7 fatac; 19 fiedac 19-​20 fatac

Sowal ni Yis iraay ko tosa fawahan o tatayra i tosa cowa ka lecad a lalan, o cecay i o “kakahaday” a lalan, o cecay i o “kaemingay” a lalan, awaayto ko saka tolo a lalan. (Matay 7:​14) Wa itini kita toniya tosa a lalan mipiliˈ, oniya pipiliˈ tada kalimlaan, samanen ano matatodong ko mipiliˈan, ngangaˈay kita milifok to midaˈocay a ˈorip. O “kakahaday” a lalan madoloay a rakaten, mansa maolahay ko ˈalomanay. Kaadayayan i, ˈalomanay tamdaw mipiliˈay tonini a lalan mihakelong to ˈalomanay a romakat, kawra cowa ka fanaˈ to malipalaway ni Satan cangra. ˈArawhan o saka patay a lalan konini. (1 Korinto 6:​9, 10; 1 Yohani 5:​19) Masafelitay, o roma a lalan i “kaemingay.” Sowal ni Yis pakahelaay tonini a lalan a tamdaw cowa ka ˈaloman, misamaanay hani? Sinanoten, i dotoc a sinael patalipaˈelalay ci Yis to nisawawaan miliyas to makaniway a pairasolay.​—Matay 7:​15. w21.12 22-​23 fiedac 3-5 fatac