Saka 12 Folad

Palinian ni Yis ko kalalaˈed no niyah ato nisawawaan to kalalaˈed no pakaenay tamdaw ato lopayˈay siri. (Yohani 10:14) Matatodongay konini a sapatinako, samanen mafanaˈay ko lopayˈay siri to pakaenay tamdaw, mitengilay to sakayat ningra. Miliwko ko cecay tamdaw i, pakaˈaraway to mahaenay a demak, sanay cingra: “Sapisasingaw kami to siri, mitahidang camiraan. Kawra cowa pisikol camira tamiyanan, samanen cowa ka fanaˈ camira to ngihaˈ niyam. Ikor, tayniay ko cecay pakaenay to siri a wawa, kinacecayay cingra miowaw, toor sanayto ko lopayˈay siri cingranan.” O nalifetan nonini a tamdaw papiharatengay kitaanan to nano sowal ni Yis. Pakayni lopayˈay siri ningra, oya nisawawaan ningra, sanay cingra: “O mamitengil camira to ngihaˈ ako.” Kawra itiniayto ci Yis i kakarayan nohatini, sasamaan kita mitengil to ngihaˈ ningra hani? O mamidofdof to sapasifanaˈ ningra, hanaca sakadademaken itini kaˈorip.​—Matay 7:​24, 25. w21.12 16 fiedac 1-2 fatac

Tarokos ci Pawlo na pakidemay ko pipalak to Krisciyang, kawra ikor mahapinangay ningra mararaway ko demak no niyah, makahiay mifalic to waywayan ato capeling no niyah. (1 Timoti 1:​12-​16) Pakayni pitadiˈec to sapadama ni Yihofa, malo ngaˈayayto a pakaenay ci Pawlo, misapoeneray ko falocoˈ iraayho ko mihadidiay ato siniˈadaay a falocoˈ. Cowa ka haharatengsa cingra to dangoc no niyah. Pakasoˈlinay cingra maharekayto ci Yihofa misodod cingranan. (Loma 7:​21-​25) Cowa pisaali ci Pawlo malefot ko midemakan no niyah, ao misaˈicelay misalof to capeling no Krisciyang no niyah, hanaca misapoener a mitadiˈec ci Yihofaan ngaˈay ko pidemak to mitosilay a tayal. (1 Korinto 9:​27; Filipi 4:​13) O cecay tamdaw cowa ko pakayniay i kalefot a manilnil malo malohemay malitengay. O malohemay malitengay mararaway ko demak, kawra makalimay ci Yihofa to malohemay malitengay mihayi to raraw no niyah, hanaca padadotoc palahad to ngaˈayay capeling no Krisciyang. (Ifiso 4:​23, 24) O mamikitini i Fangcalay Cudad ko malohemay malitengay mikinsa to niyah, hanaca makahi a misalof. Ano mihaen, o papadama ci Yihofa cingranan padadotoc a lipahak, malo ngaˈayay a malohemay malitengay.​—Yakop 1:​25. w22.03 29-​30 fiedac 13-​15 fatac

Ano mahapinang ita iraay ko masofaway a pinengneng no niyah to tao, sasamaanto hani? Haharatengen ita, maolah to tao malecad maolah to niyah. (Yakop 2:8) Ngaˈay kita fanekfek mitolon ci Yihofaan, micangacang Cingranan padama kitanan mifalah to masofaway a harateng. Ikor ngaˈay kita talaˈayaw masasowal tora tamdaw. Tinakoen, tahidangen cingra malacafay mitosil anca malacafay komaen. Itini kacipinang ita tonini a tamdaw a tatokian, misaˈicel mitodong to taˈarawan ni Yihofa aci Yis, o ngaˈayay ningra ko nengnengen. Mihaen, o ngangaˈayto kita mitoor to sapasifanaˈ no ngaˈayay pakaenay ci Yis a midemak, ecato piliyaw patelas misawkit to tamdaw. Malecad o lopayˈay siri mitengilay to ngihaˈ no pakaenay tamdaw, o nisawawaan ni Yis mitengilay to ngihaˈ ningra. Ano o “mimingay ˈopo a siri” anca “roma lopayˈay a siri” kita, nanay padadotoc kita mitengil to ngihaˈ no ngaˈayay pakaenay ci Yis.​—Luka 12:32; Yohani 10:11, 14, 16. w21.12 19 fiedac 11 fatac; 21 fiedac 17-​18 fatac

Ikor no mala hongti no Israil ci Rihopoam i, misaaliay ko finawlan cingranan milowan to pairaan no wama ningra ci Solomon karetengay a ˈinorong cangranan. Salakat misalalicayay ci Rihopoam to malohemay malitengay no Israil, milicay cangranan sasamaan pacaˈof, mihaen ko demak ningra tada citanengay. Palimoˈotay ko malohemay malitengay cingranan mihayi to saali no finawlan, ano mihaen o mamicada cingra to sadopo. (1 Hongti 12:​3-7) Kawra cowa ka olah ci Rihopoam tonini a sapaini, mansa milicayay cingra to samanay ko harateng no malacafayay cingranan lomahad a tamdaw. Palimoˈotay cangra ci Rihopoaman mitongal to ˈinorong no finawlan. (1 Hongti 12:​9-​11) Na papasayra ci Yihofaan mitolon a milicay, kawra kaadayayan i, cowa ka pihaen ko demak ningra. O sapaini no widang ko misaka dademakan ningra, telocto pairaay to kaadayayan ningra ato finawlan. Mikitini mananam ita ko maanan hani? Matengilay ita a sapaini cowa ko kaolahan ita alatek, kawra ano mikitiniay i Fangcalay Cudad, oha cacadaen no mita. w22.02 9 fiedac 6 fatac

O cecay misapoeneray misamimingay a tamdaw cowa ko haharateng saan to cangoˈotay ko nalifetan no kaemangay, o mamasemer to kangaˈayan nangra, minengneng to kaemangay o hacafay a matayal, cowa ko sakalalifet a tamdaw. Miharateng ko matoˈasay salikaka to kaemangay o sapakaolah ni Yihofa, samanen tiya cato kalecad to saˈayaway ko ˈicel nangra i, makahiay ko kaemangay hanaca iraay ko ˈicel matayal saki kasakopang. Tada miakoˈiday cangra to kaemangay tamdaw! Ci Naomi makahiay micada to sapadama no kaemangay tamdaw hanaca miakoˈiday ko falocoˈ toniya demak, o ngaˈayay taˈarawan cingra toniya pakayraan. Ikor no mapatay ko wawa papinokayan ningra ko kadafo i lomaˈ no wina, padadotocay ci Rucu kalacafay cingranan minokay i Piclihim, makahiayto cingra micada. (Rucu 1:​7, 8, 18) Oniya saˈosi milifokay to taˈangayay sapalemed cangranan tatosa! (Rucu 4:​13-​16) Ano misapoener ko matoˈasay salikaka, wa minanam to ngaˈayay taˈarawan ni Naomi, miakoˈid to sapadama no kaemangay tamdaw cangranan. w21.09 10-​11 fiedac 9-​11 fatac

O kakarayan Wama ita cipinangay to pakayraan no kahacecay tamdaw, mafanaˈay to cowa ka lecad ko midemakan no kahacecay tamdaw. Palalinien iso ko niyah to kafanaˈan iso a tamdaw alatek. Latekay mahapinangay iso ikakaay ko adihay no midemakan no niyah to ˈalomanay tamdaw. Kawra mahapinang iso alatek, pakayni mihecaan, tanoktok no tireng anca ˈinorong no paro no lomaˈ, o midemakan iso cowa ka lecad ko adihay to midemakan no tao. Toniya tatokian aka matoled! (Kalatiya 6:4) Cowa ko mamapawan ci Yihofa to midemakan iso a tayal. Ano paira kiso to matatodongay a araaw no falocoˈ, patafang to sangaˈayay no niyah Cingranan, o mamahemek Cingra. Ihkalay ci Yihofa cipinang to kalim iso sapitongalaw to tayal saki Cingranan, hanaca makalimay Cingra tisowanan pakayni pisarocod a midemak lipahak ato marenec ko falocoˈ. Mafanaˈay kita papadamaen ni Yihofa ko finawlan Ningra miremo to masakenaay a pasangaray, onini paparihaday to falocoˈ ita. (Isaya 41:​9, 10) Ngaˈay midoko ci Yihofaan soˈlinay palipahak kitanan! O ciolahay a Wama Cingra, o kahacecay tamdaw mamikangodo ato pakahemek Cingranan.​—Paˈarawan 4:​11. w22.03 24 fiedac 16 fatac; 25 fiedac 18 fatac

Makalimay kita mitodong ci Yisan, kawra awaay ko pakayraan ita malefot ko midemakan. Toniya tatokian aka matoled kita. (Yakop 3:2) Haratengen, o cecay sito misatapang aca awaay ko pakayraan malecad o singsi ngaˈay ko midemakan, kawra mikitini cingra i kararawan a minanam, misarocod mitodong to singsi, o papadadotoc a macakat. Malecaday, ano misaˈicel kita micekiw to Fangcalay Cudad, misaka dademak to mananamay, hanaca misalof to dangoc no niyah, mihaen mamatongal ko kangaˈay no demak mitodong ci Yisan. (ˈOlic 119:59) Anini ˈalomanay tamdaw no hekal misatekeday ko harateng, kawra cowa ka lecad ko finawlan ni Yihofa. Ci Yis mikifalocoˈay makahi mihadak to niyah matayal saki tamdaw, tada mitemeray to falocoˈ no mita, misetek to falocoˈ pasayra cingranan minanam. (1 Pitiro 2:​21) Misarocod kita mitodong ci Yisan, mikifalocoˈ makahi a padama to tamdaw, o mamilifok to pihayda ni Yihofa, ira ko marenecay ato lipahakay. w22.02 24 fiedac 16 fatac; 25 fiedac 18 fatac

Anini pafeliay ci Yihofa to sakayat i finawlan Ningra, o cecay pakayraan i, pakaynian i Fangcalay Cudad. Ano palaken ita ko toki midotim to sapasifanaˈ ni Yihofa, o ngangaˈay midofdof to sakayat Ningra, hanaca ngaˈay ko pidemak to mitosilay a tayal. (1 Timoti 4:​15, 16) Pakaynianho ni Yihofa i ‘madimadiay citanengay a koli’ pafeli to sakayat i finawlan Ningra. (Matay 24:45) Latekay, cowa ka cipinang kita tonini a sakayat alatek. Tinakoen, macadaay ita ko ihkalay a sakayat miliyas to cecay a pades, kawra cowa ko mamifekad ko hatiniay a pades i kitiraan no niyah saan miharateng. Ano miharateng kita to awaay ko kapo nonini a sakayat, sasamaanto hani? Ngaˈay misimsim to romaroma tinakoan i Fangcalay Cudad. Latekay o macadaay no finawlan no Kawas a sakayat minengneng ko tamdaw hato awaay ko epoc, kawra ikor milidongay to ˈorip nangra.​—Kakitaan 7:7; 8:​10. w22.03 18-​19 fiedac 15-​16 fatac

Matomesay ko pakasoˈlin ni Yis a somowal to aniniay a sinael. Mafanaˈay ci Yis itiniay i kamay ni Yihofa ko hatokel no niyah, hanaca pakasoˈlinay to cowa ko mamapawan ko kakarayan a Wama cingranan. Mikitini sowal ni Yis mananamay ita ko maanan? Patoroden ko ˈorip no niyah i kamay ni Yihofa. Oha ‘misarocod a mitadiˈec ci Yihofaan’ kita ngaˈ, makahi a mihaen to demak. (Taneng 3:5) Nengnengen ko taˈarawan no 15 ko mihecaan faˈinayan salikaka ci Ciyawsoya. Ciadadaay to ekang cingra, kawra manaˈayay cingra micada to misafelitay to Rikec no Kawas a sapiadah. Tiya mamapatay cingra pasowalay to wina: “Ina, wa dipoten ni Yihofa kako . . . pakasoˈlinay kako, papatikolen ni Yihofa paˈorip kako, samanen cipinangay Cingra takowanan, mafanaˈay to soˈlinay maolah kako Cingranan.” Kita kahacecay tamdaw licayen ko niyah: “O pakasoˈlinay falocoˈ ano misiˈayaw to sakapatay a sapalifet, wa patoroden ako ko ˈorip no niyah i kamay ni Yihofa, pakasoˈlin to mamaharateng Ningra kako han?” w21.04 12-​13 fiedac 15-​16 fatac

O finawlan ni Yihofa pakayniay i mitosilay a tayal milifok to ˈicel. Ano samaanto ko harateng no tamdaw, paladaˈ kita i tamdaw to kimad no Fangcalay Cudad tada kahemekan, matomesay to ˈicel. O roma salikaka pasangaray ko pakayraan no niyah saan miharateng, cowa ka adihay ko toki mitosil. Ano mahaenay ko harateng iso, haratengen ano maˈaraw ni Yihofa ko pisarocod iso a dademak o mamahemek. Soˈlin tatiih ko tireng ita caka ngaˈay masadak, mafanaˈay ci Yihofa makalimay kita mirienang to mitosilay, hanaca masemeray to hatiniay a harateng ita. Ngaˈayay pairaen Ningra ko toki ita pasayra i ising kankoho ato misimaway kitanan a misawacay. Ano palalinien ita ko mamademak anini to mademakay i salakat, o mamatoled ko falocoˈ alatek. Kawra ano mahapinang ita samanay ci Yihofa padama kitaanan anini, wa irato ko ˈicel lipahak a misiˈayaw to masakenaay a sapalifet. Cowa kafanaˈ kita, o mikosaman ita a sapaloma no soˈlinay kimad wa itini falocoˈ no nima a malengaw.​—Patnakay 11:6. w21.05 24-​25 fiedac 14-​17 fatac

Ci Tafiti na makefengay i talakal no maˈanofay. Pafelian ni Yihofa ci Tafiti to hafay, saaroˈan, padamaanho cingra pakalowid a milood. Na mikifalocoˈay a miakoˈid cingra a pasowal, o sapalemed no Kawas cingranan ‘caayto ka emin misaˈosi.’ (ˈOlic 40:5) Kawra kinacecayay, mapawanay cingra to adihayay ko sapafeli ni Yihofa cingranan. Soˈlin adihayayto ko fafahi ni Tafiti itiya, iraayho ko kalim no falocoˈ to fafahi no tao, mihai lomahad i falocoˈ ko mararaway a coos. O kaolahan ningra a fafahiyan ci Patsipa, o faˈinay ni Patsipa o Hiti a tamdaw ci Uriya. Maˈaˈodangay ci Tafiti ci Patsipaan, hato mapoyapoyay, misafacoayho mipatay ci Uriyaan. (2 Samuil 11:​2-​15) Samanay ko harateng ni Tafiti hani? Cowa pakaˈaraw ci Yihofa to midemakan ningra sanay miharateng han? Oniya madimadiay ci Yihofaan a tamdaw, pakayni kaˈanof to cecay liyad ka adayayan ko teloc. Kao ngaˈayay mihaiay cingra to raraw, soˈliˈlin a pasasiyor. Ngaˈay milifok to sasodod ni Yihofa, tada mitemeray to falocoˈ ningra!​—2 Samuil 12:​7-​13. w21.06 17 fiedac 10 fatac

Pakayni pisikay to pacekiway, cangoˈotay ko pakasoˈlin ita to ˈicel no niyah alatek. Miharateng kita misaaliay to adihayay sifanaˈ anca inaneng, ngaˈ ngaˈay pasifanaˈ to tao to Fangcalay Cudad. Ano mahaenay ko harateng iso, haratengen ko laenoay tolo a demak. Saka 1, miharateng ci Yihofa wa pakadangar kiso. Saka 2, iraay ko fadangalan no kakarayan ato sera a Yisan patoroday tisowanan. (Matay 28:18) Saka 3, ngaˈayay kiso micangacang to sapadama. Mitadiˈecay ci Yis to sapadama ni Yihofa, mansa mafanaˈ to o maanan ko hasowal. Micangacang kiso to sapadama ni Yihofa, wa ngaˈay pasifanaˈ to tao. (Yohani 8:​28; 12:49) Roma i, ngaˈayay tahidangen iso ko kantok no kapot, misakafahay anca kadofahay ko nalifetan a mitosilay, padama tisowanan patireng ato misikay to pacekiway. Wa ngaˈay kiso mirienang to pisikay nangra to pacekiway, mikitini a minanam mitongal to pakasoˈlin to niyah. w21.07 6 fiedac 12 fatac

Mangataayto malaˈafo konini a hekal. Nohatini ikakaay to salakatay ko sapitongalaw ita to pakasoˈlin, o sangaˈayay ko pakayraan ni Yihofa a dademak. Misamanay hani? Samanen itini taˈangayay padiing a tatokian, o macadaay ita a sakayat kafahkaan nengnengen, cowa ka tada matatodong. Kawra, cowa ko kacisasaan a tatokian itiya! Cowa ko papasowal ci Yihofa kitaanan, pakaynien Ningra i mikeriday a salikaka mihadak ko sakayat alatek. Cowa ka ngaˈay kita cisasa tonini a sakayat, miharateng: “Soˈlinay o mikitiniay ci Yihofaan konini a sakayat han? Anca o harateng aca no mikeriday a salikaka hokira?” Itini tonini kalimlaan a tatokian, o pakasoˈlin ita ci Yihofaan ato likakawa Ningra o papakaremo to sapalifet, o tahapinangan i samanay ko pinengneng ita to mihadakan no likakawa a sakayat anini ko piˈarawan. Nohatini ano pakasoˈlin kita to mikeriday a salikaka, makahi a midoedo to sakayat nangra, itini i taˈangayay padiing a tatokian o mamihaen ko demak ita. w22.02 6 fiedac 15 fatac

Itini pipadama ni Yihofa ci Kitiyonan, mikeriday cingra to 300 tamdaw mipadik to ˈada, tada kasemeran ko malaˈosiay a pilood. Kawra, cowa pakahemek ko Ifraim a finacadan ci Kitiyonan, malacongisay cingranan, samanen cowa pitahidang ci Kitiyon cangranan malacafay milood. (Kakitaan 8:1) Mihadakay ci Kitiyon to cecay tinakoan, mitadtad to pipalemed ni Yihofa cangranan, telocto mafasaway ko keter nangra. (Kakitaan 8:​3) Pakayni sapiˈadingaw to rihadayay kalalaˈed no finawlan no Kawas, tada misapoeneray ko falocoˈ ni Kitiyon, cowa paifalocoˈen ko raraw nangra. Mikitini tatiihay a tinakoan no finacadan no Ifraim mananam ita, o sasaaretengen ita o paˈodingar ci Yihofaan, cowa ko niyah. O tawki no lomaˈ ato malohemay malitengay no kasakopang wa ngaˈay mikitini ci Kitiyonan minanam, ano cowa pakahemek ko demak ita to tao, o mamisarocod kita mikitini pinengneng no tao a minengneng to demak. Roma i, ngaˈayho pakahemek to ngaˈayay a demak nangra. Misaaliay konini to misapoeneray. Kawra haratengen, o rihadayay malacecay ikakaay to papisingan no tekedan a kalimlaan. w21.07 16-​17 fiedac 10-​12 fatac

Ci Yihofa palecaden to tireng Ningra misangaˈ to tamdaw. Samanen palecadan kita to tireng no Kawas a sangaˈen, mansa ngaˈay palahad to adihayay kasemeran a capeling ni Yihofa, tinakoen o siniˈadaay falocoˈ, olah, madimadiay ato moecelay. (ˈOlic 86:15; 145:17) Ano palahad kita toniya capeling i, wa paˈodingar ci Yihofaan, paihkalho tada miakoˈiday kita Cingranan. (1 Pitiro 1:​14-​16) Misarocod kita pakahemek to kakarayan a Wama, o lalipahak a marenec ko niyah. Wa ngaˈay kita mitodong ci Yihofaan, malo kaolahan Ningra a wawa, samanen palecadan Ningra to tireng no Niyah a misangaˈ kitaanan. Patadoay ci Yihofa kitaanan misaday to mikiriwiˈay a lomaˈ. Itini ˈayaw no misangaˈ ci Yihofa to sakacecay tamdaw i, maharekayto Cingra misaday toniya cikiw. (Yopu 38:​4-6; Yirimiya 10:12) Samanen patadoay ci Yihofa miharateng ato hinapaladaˈay, misangaˈay to adihayay makapahay a dafong i cikiw, o kaˈorip ita matomesay ko lipahak. (ˈOlic 104:14, 15, 24) Pakayni misangaˈan a kihcod no Niyah marenecay ko falocoˈ Ningra.​—Satapangan 1:​10, 12, 31. w21.08 3 fiedac 5-6 fatac

Mitosil ato pasifanaˈ to tamdaw o kalimlaan a ˈinorong no Krisciyang. (Matay 28:19, 20; Loma 10:14) Makalimay kiso matongal ko kangaˈay noniya demak han? Ngaˈayay kiso misongilaˈ micekiw to Sarocoden Miasip ato Pasifanaˈ, hanaca patireng to patosokan misaka dademak to minanaman. Aka mapawan, iraay ko cecay kalimlaan a patosokan o mamalaˈosi no kahacecay tamdaw, palahad to kaolahan no Kawas a capeling. (Kolosay 3:​12; 2 Pitiro 1:​5-8) Kita maemin makalimay sapitongalaw to demak ci Yihofaan, o roma patosokan cowa ko mamalaˈosi nohatini alatek, kawra itini faelohay hekal wa awato ko kihcod a saconged. Kawra, nohatini wa ngaˈay kita mimetmet to kahacecay a toki matayal saki Yihofaan, mihaen o ngangaˈay malowan ko matoleday a harateng, hanaca matongal matongal ko lipahak. O kalimlaan i, wa ngaˈay kita paˈdil to ‘lipahakay a Kawas’ ci Yihofaan. (1 Timoti 1:​11) Nanay o kahacecay tamdaw wa ngaˈay kita mahela ko lipahak i katayalan nohatini. w21.08 24-25 fiedac 18-​20 fatac

O paro no lomaˈ iso ano iraay ko Misawacayay Tamdaw ni Yihofa, kaemangho kiso mafanaˈayto ci Yihofaan alatek, mafanaˈay to Cingra ko Misangaˈay to maamaan, iraay ko adihayay makapahay a capeling, noikor o papalakoing to polong a cikiw. (Satapangan 1:1; Dmak 17:24-​27) Kawra, cowa pakasoˈlin ko ˈalomanay a tamdaw to iraay ko Kawas, cowaho pakasoˈlin to o Cingra ko Misangaˈay to maamaan. Harateng nangra fahal sanay ira ko ˈorip, dotocto palidlid sanay ko kantangay a pinaˈorip malo pasangaray a pinaˈorip. O mahaenay ko harateng a tamdaw micadaay to ˈakawangay picudadan, harateng nangra misawacayay ko kakaku to mararaway ko Fangcalay Cudad, oyaan aca malonayay, awaay ko taneng poeneray ko picudadan a tamdaw, ngaˈ pakasoˈlinay to iraay ko Misangaˈay a Tatapangan. Ano hakowato ko halafin ita malo Misawacayay Tamdaw ni Yihofa, wa padadotoc mitongal to pakasoˈlin no niyah, ngaˈ caay ka maorat no ‘pakatamdaway a harateng ato awaay ko epoc a sasowalen.’​—Kolosay 2:8. w21.08 14 fiedac 1-3 fatac

Ci Apil, Nowa, Apraham, Yopu ato romaroma madimadiay a tamdaw sahtoay o mikangodoay ato maolahay ci Yihofaan. Midofdofay cangra ato mitadiˈecay ci Yihofaan, hanaca patoˈayaay Cingranan. Mahapinangay to patafangay cangra to sangaˈayay no niyah Cingranan, hanaca mihaydaay Cingra to pidoko nangra. Ikor pafelian ni Yihofa to Rikec ni Mosi ko teloteloc ni Apraham. Onini a Rikec mahawpay ko adihayay ihkalay a sakayat, mitadtad to samaan ko pidoko ngaˈ ngaˈay milifok to pihayda ni Yihofa. Patikol maˈorip ci Yis ikor, cowato pisaali ci Yihofa to tamdaw midofdof to Rikec ni Mosi. (Loma 10:4) O Krisciyang mamidofdof to faelohay a rikec, oya rikec ni Kristo. (Kalatiya 6:2) Sasamaan cangra midofdof tonini a rikec hani? Cowa ko paciecian a midofdof to adihayay a rikec, ao minanam to taˈarawan ni Yis hanaca mitengil midofdof to sapasifanaˈ ningra. Anini mahecaday, o Krisciyang mamisarocod mihakelong to taˈarawan ni Kristo, mihaen cangra wa ngaˈay pakahemek ci Yihofaan, ngangaˈayho ‘parihaday’ to niyah.​—Matay 11:29. w22.03 20-​21 fiedac 4-5 fatac

Tada makahiay ci Yihofa mitengil to sowal no wawa Ningra. Itini fafekang no sera ci Yis miceriday mitolon, misongilaˈan ni Yihofa mitengil. (Luka 5:​16) ˈAyaw no misaˈosi ci Yis to kalimlaan a satolon matengilay Ningra, tinakoen itiya mamipiliˈ to 12 a tarokos. (Luka 6:​12, 13) Itini pasangaray a pakayraan a satolon ni Yis matengilay ni Yihofa. Tinakoan, ˈayaw no pacakayen ni Yuta ci Yis micangacangay to kakarayan Wama padama cingranan miremo to mamasiˈayaw pakidemay a sapalifet, itiya soˈlinay tengilen ni Yihofa ko satolon ni Yis, miocoray to cecay coyoh mitongal to ˈicel ningra. (Luka 22:41-​44) Anini makahiay ci Yihofa mitengil to satolon ita, hanaca itini matatodongay a tatokian tano matatodongay a pakayraan pacaˈof kitaanan. (ˈOlic 116:​1, 2) Itiniay i Intiya fafahiyan salikaka tahatinakoay tonini, iraay ko pakidemay nofalocoˈan a pasangaray ningra, pakayni tonini padadotocay cingra micangacang to sapadama ni Yihofa. Sanay cingra: “O kamok no JW Tilifi i 2019 miheca 5 folad milengoay to sasamaan miremo to macariraway a pasangaray, matatodongay o misaalian ako konini, soˈlinay a pacaˈof ci Yihofa to satolon ako!” w21.09 21-​22 fiedac 6-7 fatac

Ngaˈay maharateng iso ko saka 1 hahekalan a Yutiya Krisciyang mamifalah to kihcod, misatapang to faelohay a kaˈorip hakowaay ko pasangar han? Misaaliay cangra to tanektekay a pakasoˈlin, hoeca ka cisasa to mamidimokos ci Yihofa to sakaˈorip nangra. Kawra, itini tonini a demak milifokay cangra to sapadama. Itini ˈayaw no miˈalikot ko sofitay no Loma to Yirusalim to lima miheca, mihadakay ci Pawlo to kalimlaan sapaini i Hipray a Krisciyang, sanay cingra: “Aka kao maˈanofay to payso ko demak namo, maedeng kako tonini a iraay a dafong ako han ko falocoˈ. Na somowalay ko Kawas: ‘Caay pifalah Kako tisowanan, caay piliyas Kako tisowanan.’ Mihaenay, ngaˈay timolo kita a somowal: ‘Ira ci Yihofa padama takowanan, caay ko mamatalaw kako. Ngaˈay ko tamdaw misamaan takowanan saw?’ ” (Hipray 13:​5, 6) O midofdofay to limoˈot ni Pawlo a Krisciyang, maedeng madoloay kantang ko kaˈorip i faelohay kitiraan, samanen pakasoˈlinay cangra o papafeli ci Yihofa to kihcod sakaˈorip nangra. w22.01 4 fiedac 7, 9 fatac

Milengo to matomesay ko siniˈadaay a tamdaw, wa maharateng ita ko cecay tamdaw o sidaˈit, fanekfekay, iraay ko siniˈadaay a falocoˈ hanaca maolahay padama to tamdaw. Maharatengay ita koya misowalan ni Yis ngaˈayay a Samariya tamdaw alatek. Oniya Samariya tamdaw paihkal to siniˈadaay a falocoˈ i Yutaya tamdaw, itini i lalan maˈaraw konini a Yutaya tamdaw sakapatayaw sanay a masetiˈ no mariˈangay tamdaw, ‘tada siniˈadaay cingranan,’ cowa ko paˈorip aca cingranan, milimasmasayho to tamdaw midimokos cingranan. (Luka 10:29-​37) Oniya tawcikel papadama kitanan mihapinang to o manan ko siniˈadaay. Siniˈadaay o ciolahay a waywayan, o makapahay a capeling ni Yihofa, to romiˈamiˈad Cingra tano masakenaay a pakayraan paihkal to siniˈadaay i kitaanan. O roma siniˈadaay to tamdaw a pakayraan, ano iraay ko lalangian o ngangaˈay sododen ko mararaway a tamdaw, ci Yihofa mihaenay micada kitaanan. Sowal no mitiliday to ˈOlic: “Caay pidoedo Cingra to lalayapen ita a mitefoc i titaanan.” (ˈOlic 103:10) Kawra latekay o pakidemay a pakayraan ko sapirikec ni Yihofa to mararaway a tamdaw. w21.10 8 fiedac 1-2 fatac

Edengan pasayraay ci Yihofa i sikawdan Ningra, oya mikiriwiˈay ngaˈayay ko kalalaˈed Cingranan a tamdaw, paihkal to madimadiay a olah. Ngaˈay kita mikitini i sowal ni Tafiti ato pairasolay ci Taniilan a mahapinang konini. Sanay ci Tafiti: ‘Nanay mararid Kiso paihkal to madimadiay a olah i mafanaˈay Tisowanan a tamdaw.’ Sanayho cingra: ‘Tahadaˈoc ci Yihofa tano madimadiay a olah micada to mikangodoay Cingranan a tamdaw.’ Sanay ci Taniil: ‘Yihofaaw, o tadamaanay a Kawas Kiso, . . . tano madimadiay a olah micada to maolahay Tisowanan, midofdofay to limoˈot Iso a tamdaw.’ (ˈOlic 36:10; 103:17; Taniil 9:4) Oniya sinael mitadtaday, paihkalay ci Yihofa to madimadiay a olah i sikawdan Ningra, samanen mafanaˈay cangra Cingranan, mikangodoay Cingranan, maolahay Cingranan ato midofdofay to limoˈot Ningra. Edengan pasayraay ci Yihofa i finawlan Ningra, oya mitooray to matatodongay a pakayraan midoko Cingranan a tamdaw, paihkal to madimadiay a olah. ˈAyaw no misatapang kita midoko ci Yihofaan i, paihkalan ni Yihofa i polong a tamdaw a olah malifokayto ita ko epoc. (ˈOlic 104:14) Ikor no malo finawlan Ningra kita, paihkalayho Cingra to madimadiay a olah i kitanan. w21.11 4 fiedac 8-9 fatac

Ano samaanto ko piroero no tamdaw kitaanan, misetek kita to falocoˈ mitoor to limoˈot ni Yis a midemak. Anini, ˈalomanay tamdaw maolahay mitengil to idahiyay mikimad a ˈaˈideman no pihakelongan, pakidem ko pipatakaraw cangranan, pala samiyay a midoko cangranan. ˈAlomanay tamdaw tayraay i kiyokay noniya ˈaˈideman, micakay to cudad nangra, pakiyaho to adihayay payci pafeli cangranan anca midama to lekakawa nangra. O roma tamdaw pakasoˈlinay to sowal no ˈaˈideman malo soˈlinay kimad. Maˈaraw nangra koniya ˈaˈideman i, hato pakaˈarawayto ci Yisan a mahemek. Kawra soˈliˈlinay midoko ci Yihofaan a tamdaw caay ka pihakelong to romaroma tamdaw, soˈlin mikangodoay kita toniya mikeriday a tamdaw, kawra mamitoor to sapalimoˈot ni Yis midemak, sanay cingra: ‘Sahtoay o salikaka kamo.’ (Matay 23:​8-​10) O cecay tamdaw o ˈaˈideman no pihakelongan anca o ˈaˈideman no mirikecay, caay pala samiyay saan kita a mitaˈong cangranan, cowa ko mamidama to sasowalen ningra. Masafelitay, cowa ko noniya hekal kita, itini mirikecay mitafo to misatenokay a saaroˈan. Itini toniya pakayraan, caay ka lecad kita to adihayay kasakapot no Kristokiyo.​—Yohani 18:36. w21.10 20 fiedac 6-7 fatac

O padotocay makorac a Krisciyang cowa ko mamisaareteng minengneng to kahacecay tamdaw anca romaroma demak ikaka to Kawas a kalimlaan. Roma i, malo Misawacayay Tamdaw ni Yihofa, mamisetek kita to falocoˈ eca ka pidemak to pakangodoay anca pakaditay to fangcalay ngangan no Kawas a demak. (Lifi 19:12; Isaya 57:15) O Israil tamdaw ano mihayi to o Kawas nangra ci Yihofa i, o mamidofdof to rikec Ningra. Sowal no Lifi 18:4: ‘Ka pidoedo kamo to limoˈot Ako, midofdof to rikec Ako, mitoor a midemak. Ci Yihofa Kako o Kawas namo.’ O Lifi 19 fedengan mahawpay ko pina ‘rikec,’ tinakoen 5-8, 21, 22 sinael milengoay to milingatay to patoˈayaay a limasmas, ano patoˈaya ko Israil tamdaw i, cowa ka ngaˈay pakadit to fangcalay dafong ni Yihofa. Midotim to safalod nonini a sinael, padamaay kitanan makalim mitoor to misowalan no Hipray 13:15, tano mihaydaan ni Yihofa a pakayraan, tano sapakahemek a sapatoˈaya patafang Cingranan. w21.12 5-6 fiedac 14-​15 fatac

O kaemangay a mararamoday ngaˈayay pasayra i kadofahay ko nalifetan a mararamoday minanam. Oniya mararamoday mafanaˈayto mitadiˈec ci Yihofaan, o roma pinaayto polo miheca miemin to toki misakafah. Ano miliyaway kiso misimsim to patosokan no niyah, ngaˈayay mitengil to sapaini nangra, o mitadiˈecay ci Yihofaan a pakayraan konini. (Taneng 22:​17, 19) Haratengen, o raramod mikitiniay ci Yihofaan a sapatelong. (Matay 19:​5, 6) Makalimay Cingra milayap ko mararamoday tonini a sapatelong. O kaemangay a mararamoday, mamisongilaˈ miharateng to pakayraan namo maˈorip. Misarocoday kamo misawacay to tada misalimlaay ko niyah minengneng to kihcod sapafeli ni Yihofa tamowanan hokira? Ka pasayra ci Yihofaan mitolon, micekiw to Fangcalay Cudad, mikilim to matatodongay tamowanan a safalod no Fangcalay Cudad, dotoc mitoor to sapafeli ni Yihofa a sakayat midemak. Kamo mararamoday malacafay misarocod matayal saki Yihofaan, o lalipahak a marenec ko kaˈorip! w21.11 18 fiedac 16 fatac; 19 fiedac 18 fatac

Matatodongay ko pinengneng ni Yakop to niyah. Pangangan ci Yakop to romaroma Krisciyang i ‘o kanonoˈan a salikaka’ sanay, cowa ka piharateng cingra o lalengawan no paro no lomaˈ ato katayalan no niyah ikakaay to tao. (Yakop 1:​16, 19; 2:5) Roma pakayraan i, caay ka ciharateng cingra o malefotay cingra saan ko pinengneng no tao. Mananamay ita: Haratengen ciraraway ko kahacecay tamdaw. Pacekiway a singsi cowa kangaˈay miharateng to ikakaay ko kangaˈay no niyah to pacekiwan. Misamaanay hani? Ano papiharatengen ita ko pacekiwan to cowa ko mamararaw kita, o mamatoled ko pacekiwan alatek, miharateng to niyah tahadaˈocto cowa ko mamatoor ko saali no Kawas saan. Kawra ano mihayi ko pacekiway a singsi pasangaray ko niyah nolatekay misaka dademak to safalod no Fangcalay Cudad, hanaca pasowal to pacekiwan samaanay ko niyah mitadiˈec to sapadama ni Yihofa a misalof, o ngangaˈayto padama to pacekiwan mihapinang o ngangaˈay cingra malo sikawdan no Kawas. w22.01 11-​12 fiedac 13-​14 fatac

O harateng ita mangalef ko nika hecad ci Yisan, o waywayan wa mangalef ko nika hecad cingranan, ano mihaen o capeling ita wa matongal ko kalecad cingranan. (Hipray 1:3) Saan kita miharateng alatek: “O malefotay ci Yis, ano tahadaˈocto cato ka lecad kako cingranan.” Ano iraay ko mahaenay a harateng iso, haratengen ko ilaenoay pina a demak. Saka 1, o mitooran ni Yihofa aci Yis ko tatirengan a misangaˈ kiso, mihaenay o ngangaˈay kiso mipiliˈ a mitodong Cangranan, hanaca o mamadangar iso. Soˈlin cowa ko mamalefot ko midemakan iso, kawra, itini cecay palinian o mamalecad kiso Cangranan. (Satapangan 1:​26) Saka 2, o fangcalay saocor no Kawas o sataˈangayay a ˈicel itini i dohaw. Ira ko sapadama nonini a ˈicel, o mamalaˈosi ita ko cowa ko mamadangar no niyah a demak. Saka 3, cowa pisaali ci Yihofa tisowanan anini malefot ko paihkal to masakenakenaay a capeling no minaroˈan no fangcalay saocor. Tada sidaˈitay ko kakarayan a Wama ita, itini i lakoing pairaen Ningra ko 1,000 miheca a toki no tamdaw palidlid sa a malefot. (Paˈarawan 20:​1-3) O saali ni Yihofa kitaanan anini edeng misarocod kita mitadiˈec Cingranan, hanaca misaˈicel a midemak. w22.03 9 fiedac 5-6 fatac

O mitolonay cowa ko edengan a pakayraan patanektek to kalawidang ita aci Yihofaan, micekiw to Fangcalay Cudad ato mirienang to saˈopo no kasakopang wa ngaˈay padama kitanan miingid Cingranan. Sasamaan kita misaka dademak to picekiwan ato masaˈopo a toki hani? Ngaˈay licayen ko niyah: ‘Itini micekiw ato masaˈopo o maanan a demakan kahnayay mikalisanga to falocoˈ ako hani?’ O soci iso anca roma tingnaw a lalosidan macadaay ko tingwa, tikami anca lihaf hokira? Ano micekiw ato mirienang to saˈopo i, mahapinang to makalisangaay ko falocoˈ no niyah, cangacangen ci Yihofa padama kitaanan. Pasangaray kita misamacay ko harateng mirienang to midokoay a demak, kawra tonini a tatokian tada kalimlaan misamacay to harateng, mansa mamicangacang kita ci Yihofaan pafeli kitanan to rihaday, o hatiniay a rihaday mamidipot to falocoˈ ato ponoˈ ita.​—Filipi 4:​6, 7. w22.01 29-​30 fiedac 12-​14 fatac

O Hongti ci Uciya minaˈay mitengil to limoˈot, o haratengay sanay micomod i fangcalay sefi, edengan o saysi ko ngangaˈay micomod tora kitiraan, itira a paexiw. Pasowalan no saysi ni Yihofa cingra: ‘Uciya, caay ka citodong kiso a paexiw ci Yihofaan! Edengan o saysi ko ngaˈayay mipaexiw.’ Samaanay ko harateng ni Uciya hani? Itiya ano misapoeneray cingra mitengil to sapalimoˈot, tangsol a miliyas to fangcalay sefi, o sasododen ni Yihofa cingra alatek. Kawra, ‘mangolaway’ ci Uciya. Hano eca ka kakahi cingra mitengil to sapalimoˈot hani? Harateng ningra o Hongti kako sanay, sapidemakaw to maanan haratengay saan midemak. Kawra cowa ka haen ko harateng ni Yihofa. Mitaˈlifay to fadangalan ko demak ni Uciya, telocto misayfangan no Kawas cingra, palonoˈan cingra, ‘tahira i patay caay ka adah.’ (2 Rayray 26:​16-​21) Mikitini i tinakoan ni Uciya mananamay ita, ano cimato kita o mamitengil to mikitiniay i Fangcalay Cudad a sapalimoˈot, ano eca i, wa malahdaw ko pihayda ni Yihofa. w22.02 9 fiedac 7 fatac

Cecay tamdaw mafalod no ‘katelangan a capeling,’ o harateng ato waywayan ningra o mamidoedo to mararaway a demak. (Kolosay 3:9) Alatek misatekeday, ranikayay maketer, misatakaraway, awaay ko miakoˈiday falocoˈ. Alatek maolahay minengneng to maˈodangay a lalakaw ato kaacekan mariˈangay a ika. Manaokaniw, iraay ko ngaˈayay capeling ningra, ano mararaw ko sowal ato demak i, makesemay ko falocoˈ alatek, kawra awaay ko ˈicel ningra mifalic to harateng ato waywayan no niyah. (Kalatiya 5:​19-​21; 2 Timoti 3:​2-5) Sahtoay cowa ko malefotay kita, awaay ko pakayraan misongilaˈ a mifalah to kihcod mararaway a harateng ato coos no falocoˈ. Latekay mararaway ko sowal, mararaway ko demak, telocto tada makesemay ko falocoˈ ita. (Yirimiya 17:9; Yakop 3:2) Kawra ikor no falahen ita ko katelangan a capeling i, cowato ko mamidoedo to mararaway harateng a midemak. Cowato ko mamafalod no katelangan a capeling kita, cowato kalecad to salakatay a tamdaw.​—Isaya 55:7. w22.03 3 fiedac 4-5 fatac

O makapahay a capeling no salikaka ko na nengnengen no malohemay malitengay. Soˈlin cowa ko malefotay ko kahacecay a tamdaw, kawra i tireng no kahacecay tamdaw iraay ko kasemeran ita a ngaˈayay. Manaokaniw, latekay misaaliay ko malohemay malitengay to papalimoˈot to cecay faˈinayan salikaka anca fafahiyan salikaka. Kawra malecad to tarokos ci Pawloan, o mamihadak ko malohemay malitengay to ˈicel, cowa ko tatiihay aca a demak no tao anca somowalay to maanan a tatiihay a sowal ko nengnengen, ao mamisinanot to hakowaay ko kaolah nonini a tamdaw ci Yihofaan, hakowaay ko pisaˈicel midoko Cingranan, pakasoˈlinho to mamalingad ko kangaˈay no demak ningra noikor. Ira ko tawlikay a pinengneng no malohemay malitengay to salikaka, o papaira to damsayay no kasakopang, ngaˈay matinako no kahacecay tamdaw to kaciharateng ato olah. Haratengen, cowa pisaali ci Yihofa malefot kamo, ao makalimay madimadi kamo. (1 Korinto 4:2) Ngaˈay pakasoˈlin kamo, misalimlaay ci Yihofa to nano demak namo Cingranan. Ci Yihofa ‘cowa ko mamapawan to nano demak namo ato paihkalan namo a olah pakayni i ngangan Ningra, o katayal namo isalakat i fangcalay finawlan, nohatini padadotocayho matayal saki cangranan.’​—Hipray 6:​10. w22.03 31 fiedac 19, 21 fatac