Ci Yihofa Misakaretengay to Pipasowal Iso to “Amin”
Misakaretengay ci Yihofa to pidoko ita, “minaˈon a mitengil [ci Yihofa] to sowal” no mita. O nano sowal no sikawdan, o pipahemek a sowal nangra ano mimimiming aca, ihkalay a matengil Ningra. (Malaki 3:16) Patinakoen ko sowal, iraay ko cecay a tilid kinapinaayto misaliyaliyaw pasowal kita, oyaan “amin” hananay a sowal. Tona pasowal haca kita to “amin” sanay a tilid i, tada misakaretengay ci Yihofa. Misamaanay hano misakareteng ci Yihofa sa i, dotoc nengnengen ko tatodong noni tilid, ato samaanay ko Fangcalay Cudad somowal toni tilid.
POLONG A FINAWLAN PASOWALAY TO “AMIN” SANAY
Tatodong no “amin”, o “hatiraayto” sanay, o sowal no Hipray iraay ko “soˈlinay”, o “ˈosi” sanay a tatodong. Nolatek kalasaka dademakan ino holic a demak. Ano miketon to sowal ko tamdaw ikor cisowal to “amin”, paihkalay to soˈlinay ko sowal ningra, makahiyay a mitamorong to teloc a ˈinorong. (Saˈosi 5:22) Ano itiniay i kaˈayaw no tamdaw cingra pasowal to “amin”, ikor o tatooren ningra kora pihayi ningra.—Nihimiya 5:13.
Nengnengen ita ko Limoˈot saka 27 fedengan, somowalay kora sinael to micomodayto ko Israil i Mikiˈokan a Pala, malisopsopay i kalalaˈed no Ipal a lotok ato Kiricim a lotok, mitengil to piˈosi to Rikec. Cowa ka masaˈopo aca cangra mitengil, oha papacaˈofho a pasowal to “Amin!” (Limoˈot 27:15-26) Haratengen hena, masapatekay masaˈofaday faˈinayan fafahiyan ato kaemangay malecad a pacaˈof, hakowa ko nika taˈangay no ngihaˈ nangra! (Yosuwa 8:30-35) Maedeng cowa ko mamatawal nangra kora sowal itiya. Matooray nangra ko mikiˈokan a sowal, sanay ko Fangcalay Cudad: “Yo maˈoripho ci Yosuwa i, mitaˈongho ko Israil [ci Yihofaan]. Ikor no patay ni Yosuwa i, mahaenho ko pitaˈong no Israil [ci Yihofaan] yo maˈoripho ko kakerikeridan nangra, oya pakaˈaraway to nano nidemakan [ni Yihofa] i Israil a finawlan.”—Yosuwa 24:31.
Ci Yis tano “amin” a paihkal to soˈlinay ko sowal ningra, mikiriwiˈay kono mira pakayraan. Cowa ka ilalikor a pasowal, ao ikaˈayaway a pasowal to “amin” (no Amis pihongyak “soˈlinay” sanay), paihkalay to soˈlinay kora sowal ningra. Nolatekay, kinatosaay a pasowal to “amin”, no Amis pihongyak “soˈliˈlin” sanay. (Matay 5:18; Yohani 1:51) Saka pihaen ni Yis oha sapaˈicelaw tora nisowalan ningra nao soˈlinay kimad. Tona mapanilnilay no Kawas ci Yis saka fanekfek cingra a pasowal, palaˈosi to kihcod a mikiˈokan no Kawas.—2 Korinto 1:20; Paˈarawan 3:14.
POLONG A TAMDAW SOMOWAL TO “AMIN!” PAKAHEMEK CI YIHOFAAN CANGRA
Ano pakahemek ko Israil a mitolon ci Yihofaan i, ikor pasowalay to “amin” sanay. (Nihimiya 8:6; ˈOlic 41:13) Maharek mitengil to satolon cangra ikor pasowal to “amin”, paihkalay to micadaay cangra to satolon nora tamdaw. Mapolongay cangra mikihatiya, mitongal to hemek noka pidoko to Kawas. Itini i lintad ni Tafiti, mikakoyan no Lifi a mitamorong ko Katatelekan a Lipa patayra i Yirusalim, misikay to malawlaay a demak. Itiya, pacakatay ci Tafiti to piakoˈid a satolon ci Yihofaan, ora sowal ningra matiliday i saka 1 Rayray 16:8-36. Oya tahatengilay a finawlan tada masemeray ko falocoˈ, telocto i, ‘polong tamdaw “amin” sanay pasowal, halo pakahemek ci Yihofaan’. Pangihaˈ a pacaˈof ko Israil maemin, tataˈang ko lipahak nangra.
Itiniay saka 1 hahekalan a Krsiciyang, ano pakahemek ci Yihofaan i, pasowalay to “amin”. O romaroma mitiliday to Fangcalay Cudad kalasaka dademakay toni tilid i tikami nangra. (Loma 1:25; 16:27; 1 Pitiro 4:11) Itini i Paˈarawan somowalay to pipaˈdil no coyah ci Yihofaan, pasowal to ‘Amin! Pakahemek ci Yihofaan!’ Sanay. (Paˈarawan 19:1, 4) Isalakatay a Krisciyang itini i saˈopo ikor no pitolon pasowalay cangra to “amin”. (1 Korinto 14:16) Kawra, cowa ko patelas sanay cangra a pasowal to “amin” a tilid.
HANO MISAKARETENG CI YIHOFA TO PIPASOWAL ISO TO “AMIN” HANI
Mafanaˈayto kita to tatodong no “amin” hananay, ato ihacowaay pasowal ko Israil tora “amin”, padama kitanan ikor no satolon pasowal to “amin” hano tada o matatodongay. Itini satolon no niyah pasowal to “amin” kita, paihkalay to mikifalocoˈay kora sowal no mita; ano maharek mitengil to satolon no tao i, ano ifalocoˈay anca i ngoyosay a pasowal to “amin”, paihkalay to mihayay kita tora sowal ningra. Misamaanay hano misakareteng ci Yihofa to nika pasowal ita to “amin” hani?
Pasowal to “amin” mamasarocod ko pidoko no mita. Pasowal kita to “amin” ato waywayan a mitolon milingatay to pidoko ita. Ikor no pitolon no tao mikifalocoˈ kita a pasowal to “amin” i, pairaen ko mangodoay a harateng, misongilaˈ a mitengil tora satolon wa ngaˈ.
Pasowal to “amin” mamakedec ko midokoay to Kawas a tamdaw. O faˈinayan salikaka ano mitolon i kasakopang i, oha mamisongilaˈ a mitengil ko polong a tamdaw. (Dmak 1:14; 12:5) Mapolong kita to romaroma salikaka mikifalocoˈ a pasowal to “amin”, o mamakedec a malacecay kita. Ano ifalocoˈay ha anca ingoyosay pasowal ha, alatek to nika lacecay no mita a pasowal to “amin”, mamitengil ko Kawas to pingitangit no mita.
Pasowal to “amin” ngaˈayay pahemek ci Yihofaan
Pasowal to “amin” papahemek ci Yihofaan. Misinanotay ci Yihofa to masamaamaanay a noka pidoko no mita i Cingranan. (Luka 21:2, 3) Mafanaˈay Cingra to lingad no harateng ato kemod no falocoˈ no mita. Mihaenay haw i, ano caay ka ngaˈay masadak kita, pakaynian i tingwa a mitengil to kamok no saˈopo, pakasoˈlinen ita to matengilay ni Yihofa ko pipasowal ita to “amin”, hanaca mihaen kita mikalacafayay to salikaka i kasakopang a pahemek ci Yihofaan.
Pasowal to “amin” hato awaay ko maanan kawra o masaka limlaan ko tatodong. Sapicalep Mafanaˈ to Fangcalay Cudad a cudad somowalay, pasowal ko sikawdan no Kawas to “amin” hananay, paihkalay to “mikifalocoˈay cangra pasoˈlin, tada mihayay ato faedetay ko falocoˈ a mitokel tora satolon. Nanay pasowal kita to “amin” milifok to hemek ni Yihofa.—ˈOlic 19:14.