Pinengnengan to lalakaw no Mitosilay ato Nikaˈorip Rayray no Saˈopo
SAKA 5 FOLAD 6-12 ROMIˈAD
O ODOˈ KO KIMAD NO KAWAS | 2 KORINTO 4-6 FEDENGAN
“Caay ko Mamatoled a Misawad Kami”
(2 Korinto 4:16) Orasaka, caay ko mamatoled kami. Talacowa, manornor ko tireng niyam a sakalasawadan, nikawrira, masafaeloh masafaeloh ko falocoˈ niyam.
w04 8/15 25 fiedac 16-17 fatac
Malotayay kawra Caay ka Matoled
16 Manaokaniw, o sasinanoten ita ko noˈadingoan a sakatanoktok, masaka limlaan koni. Ano ira ko ngaˈayay noka lalaˈed aci Yihofa, soˈlin a maroray ko tireng, cowa ko mamaˈisang to midokoay ci Yihofaan a demak. Ci Yihofa “papaˈicelen Ningra ko marorayay ato masetoˈay a tamdaw.” (Isaya 40:28, 29) Matinakoay ni Pawlo koni sowal to soˈlinay. Saan ko sowal ningra: “Caay ko mamatoled kami. Talacowa, manornor ko tireng niyam a sakalasawadan, nikawrira, masafaeloh masafaeloh ko falocoˈ niyam.”—2 Korinto 4:16.
17 Masafaeloh masafaeloh to ‘romiˈamiˈad’ sanay koni sowal. Tatodong nora oha sakadademaken ita ko sapafeli ni Yihofa a kihcod to romiˈamiˈad o sanay. O cecay fafahiyan salikaka 43 miheca a mala milakowitay to riyar a misakafahay. Madimadiay cingra, soˈlin nolatek malotayay a manornor ko tireng, kawra cowa ka matoled ko falocoˈ, sanay ko sowal ningra: “Pacelemay kako lomowad, mitolon ci Yihofaan, miˈosi to kimad Ningra, ngaˈ misatapang a matayal. Tona mitooran ako to romiˈamiˈad koni nanaman, hato ngaˈayay kako pakaemem tahanini.” Ano micerid kita mitolon, mifowah to falocoˈ ci Yihofaan to romiˈamiˈad, halo misimsim to tadamaanay a capeling ato sakiˈok Ningra i, o papafelien ni Yihofa kita to ˈicel a midama kitanan.
(2 Korinto 4:17) Onini a pasamoay a pades niyam imatini i, o sakatadamaan niyam a tahadaˈoc.
it-1 57-58 fiedac
Miemem
Paifalocoˈen ko hatokel no Krisciyang a mitala to awaay ko patelac a midaˈocay ˈorip, tada o masaka limlaan koni. Soˈlinto maroero tahapatay ko Krisciyang, onini hatokel cowa ko papasokiyaw. (Loma 5:4, 5; 1 Tisalonika 1:3; Paˈarawan 2:10) Ano palalinien to mamalaˈosi a tadamaanay a tokel kora pades, hato cowato ko maan. (Loma 8:18-25) Maamaan a pades soˈlinto caay ka tomeseng kita, kawra ano palalinien to midaˈocay a sakalahekel o ‘kahemaway cecayay aca a liyad’ koranan. (2 Korinto 4:16-18) Ano haratengen to cecayay aca liyad kora sapalifet, mitafo to hatokel no Krisciyang i, cowato ko mamatoled a misawad a madimadi ci Yihofaan.
(2 Korinto 4:18) Caay ko maˈaraway no mata ko niharatengan niyam. O caay ko mamaˈaraw no mata ko niharatengan niyam. Nawhani caay ko hahalafin ko maˈaraway. O mamidaˈoc ko caay ka ˈaraw.
Kadkaden ko Noˈadingoan Odoˈ
(2 Korinto 4:7) Nikawrira, matiya o sera a koreng kami. Ira i tamiyanan konini a tadamaanay a dafong. O kacipinangan konini to nika o nai Kawasay konini a tadamaanay a ˈicel, caay ko nano niyam.
w12 2/1 28-29 fiedac
“Patawaan Nangra ko Pising ni Yihofa”
O Mikayatay Malohemay Malitengay i Congpo, salikaka ci Tafiti Splayen mikimaday, mikitiniay i 2 Korinto 4:7 kora kimad, o manan kora “tadamaanay dafong” hananay nora sinael hani? O maanan saw? O sifanaˈ han? O taneng han? Sowal sa cingra: “Cowa, ora tadamaanay dafong hananay i, oranan ‘pipatalahkal niyam to soˈlinay a kimad a tayal’ sanay ci Pawlo.’” (2 Korinto 4:1, 2, 5) Patalipaˈelalay ko salikaka ci Splayen toya micudaday i Kiliyat, toni lima folad a noka pihatatanam nangra i, o sapisadayaw cangranan milaheci to cecay mikiriwiˈay a mitosilay demak. O sasakaretengen koni ˈinorong.
Mitadtad ko salikaka ci Splayen, ora “sera a koreng” hananay, onini a tireng no mita sanay. Palalinian ningra kora sera a koreng ato tano ekiman misangaˈ a lalosidan. Itini i kalo romiˈad, cowa ka rarid kalasaka dademaken no tamdaw ko ekim a lalosidan, kawra marariday kalasaka dademak to sera a koreng. Ano telien ita ko kalimlaan a dafong itira tora ekim a lalosidan i, wa itira tora lalosidan ko mata no tao a minengneng. ˈArawhan sanay pasowal ko salikaka ci Splayen: “Cowa ko papataynien i tireng namo ko pinengneng no pacekiwan tamdaw. O milakowitay to riyar a misakafahay kamo, o sera a koreng kako han ko niyah a minengneng, mikerid to tamdaw minokay i ci Yihofaan.”
(2 Korinto 6:13) Samatiyaen ako o wawa ako ko nika somowal i tamowanan. Samatiyaen ono mako ko namo a misakakahad to falocoˈ to saki takowanan.
w09 11/15 21 fiedac 7 fatac
Padadotocen Misakakahad ko Olah to Salikaka
7 Kita misamaanay saw? Sasamaan “misakakahad to falocoˈ”, patahkal to olah i salikaka hani? O mahecaday ko mihecaan ato mahecaday ko lalengawan a tamdaw, alatek madoloay masasiolah. Itini i halama, o mahecaday ko kangalayan a tamdaw marariday a matateko. Ano hatiraay a caka mararid a micawmaˈ to romaroma salikaka i, iraay ko saali kitaanan a “misakakahad to falocoˈ”. Licayen ita ko niyah: “Cowa ka rarid kako mikapot to cowa ko tadawidang a tamdaw itini i pitosilan ato picawmaˈan han? Itini i kasaˈopoan, cowa ka picawmaˈ to faelohay tamdaw, samanen halafinto ngaˈ malawidang ako han? O polong a tamdaw i kasakopng, ano o faˈinayanto fafahiyanto anca wawato mihamhaman ako cangra han?”
Miˈosi to Sinael
(2 Korinto 4:1-15) O siniˈadaay ko Kawas tamiyanan saka, patoroden Ningra i tamiyanan konini a tayal. Saka, caay ka toled kami. 2 Liyasen niyam ko milimekay a kangodoan a demak. Caay pisaˈfit, caay piˈakong kami to sowal no Kawas. Matapal no Kawas ko pipatalahkal niyam to soˈlinay a demak. Nanay caay ka toloˈ ko falocoˈ no nimanima to pakayniay i tamiyanan saan kami a maˈimer. 3 Ano caay ka hapinang ko nipatenakan niyam a Ngaˈayay a Ratoh i, deng o mamatekop a tamdaw ko caay pakahapinang. 4 Nawhani satoˈmanen no kawakawas nonini a hekal ko falocoˈ nangra saka, caay pasoˈlin cangra to Kawas. Onini i, o sakacaaw pakaˈaraw nangra to nipipatedi no Ngaˈayay a Ratoh i falocoˈ nangra to ˈdil ni Kristo, o todong no faco no Kawas. 5 Caay pasowal kami to pakayniay i tireng niyam. O mipasowalay kami to nika o Tapang ci Yis Kristo. O mamatayal namo kami to saki ci Yisan. 6 “Kalikat i toˈmanay,” yasanay a Kawas ko patediay i falocoˈ ita to sakafanaˈ ita to nika tadamaan Ningra o Kawas. Mahapinang konini i pising ni Yis Kristo. 7 Nikawrira, matiya o sera a koreng kami. Ira i tamiyanan konini a tadamaanay a dafong. O kacipinangan konini to nika o nai Kawasay konini a tadamaanay a ˈicel, caay ko nano niyam. 8 Mapades no masamaamaanay kami. Nikawrira, caay ka rarima kami. Ano awaawa ko pakayraan niyam i, caay ka toled kami. 9 Ano kariˈariˈangen no tao kami i, caay ka awa ko palawinaan niyam. Ano mapalopalo no tao kami a mipolin i, caay ka patay kami. 10 Mararid ko tireng niyam a misiˈayaw to patay a matiya o pisiˈayaw ni Yis to patay. Ta pakayni tonini a mahapinang i tireng niyam ko ˈorip ni Yis. 11 Itini i nika ˈorip niyam i, mararid kami a misiˈayaw to patay pakayni i pipatenak niyam ci Yisan. Onini i, o sapahapinangaw i mamapatay a tireng niyam to ˈorip ni Yis. 12 O heci no nika matini niyam a misiˈayaw to patay i, o sakaciˈorip namo to midaˈocay. 13 O sowal a matilid i Fangcalay Cudad i, “Tona pasoˈlin kako saka, mipatenak kako,” saan. Tona malecad tonini ko pitiˈer no falocoˈ niyam ci Kristoan saka, nano pasoˈlin niyam ko sapipatenak niyam. 14 Mafanaˈ kami, oya palowaday a paˈorip nai patay to Tapang ci Yisan a Kawas ko papalowad tamiyanan a palecad to nika lomowad ni Yis. Ta o kakeriden Ningra kita a patayra i kaˈayaw ni Yis. 15 O sakaciepoc namo ko polong nonini a demak. Ta ˈaloman ˈaloman ko nipalemedan no Kawas a tamdaw. Ta mafanaˈ mafanaˈ cangra a miahowiday to Kawas a pahemek i Cingraan.
SAKA 5 FOLAD 13-19 ROMIˈAD
O ODOˈ KO KIMAD NO KAWAS | 2 KORINTO 7-10 FEDENGAN
“O Mipadangay to Mapadesay Nao Tayal no Mita”
(2 Korinto 8:1-3) Salikakaaw, nanay mafanaˈ kamo to nika masamaan ko demak no Kawas to nano siniˈada Ningra to i Makitoniyaay a kalosaˈopo. 2 Itini i nika pades nangra to masamaamaanay a mapalifet no Kawas cangra. Nikawrira, tadalipahak cangra. Talacowa o pakoyoc cangra, nikawrira, maolah cangra a padahof. 3 Pawacay kako to pikinafalah nangra a pafeli.
w98 11/1 25 fiedac 1 fatac
“O Lipahakay a Pafeli i, o Kaolahan no Kawas”
Salakat, pasowalan ni Pawlo ko Korintoay tamdaw, to misamaanay patireng to ngaˈayay taˈarawan ko Makitoniya tamdaw i padahofay a demak. Sowal sa ci Pawlo: “Itini i nika pades nangra to masamaamaanay a mapalifet no Kawas cangra. Nikawrira, tadalipahak cangra. Talacowa o pakoyoc cangra, nikawrira, maolah cangra a padahof.” Cowa ka coracoren ko Makitoniyaay tamdaw a papipadahof. ˈArawhan i, o “nai falocoˈay nangra ko nipingitangit nangra i tamiyanan to sakangaˈay nangra a mipadang a padahof”, tona o “pakoyoc” ko Makitoniyaay tamdaw, mihaen cangra nai falocoˈ a padahof, tada kalimlaan kora demak nangra.—2 Korinto 8:2-4.
kr 209 fiedac 1 fatac
O Mipadangay to Mapadesay a Tayal
MAEDENG isaka 46 miheca, makedalay ko Yutiya, cangoˈotay ko kakaenen, matekesay ko ˈaca no dafong, awaay ko payci no Yutaya Krisciyang micakay to kakaenen, macahiwayto cangra. Kawra midipotan ni Yihofa cangra, na cowacowaho ka lifet nangra ko matiniay a demak. Samaanay kora demak hani?
(2 Korinto 8:4) Nai falocoˈay nangra ko nipingitangit nangra i tamiyanan to sakangaˈay nangra a mipadang a padahof to finawlan no Kawas itira i Yutaya.
kr 209-210 fiedac 4-6 fatac
O Mipadangay to Mapadesay a Tayal
4 Itini i 2 Korinto somowalay ci Pawlo, tosaay a makakadep ko tayal no Krisciyang. Oniniya tikami soˈliˈlin o saki mapasimalay a Krisciyang ko sapitilid, kawra ora sowal ningra masaka limlaan to “roma lopayˈay a siri”. (Yohani 10:16) Saka cecay i, ‘sakalaliˈay no Kawas ato tamdaw’, oyaan mitosilay ato pasifanaˈay to tamdaw a malo Krisciyang a tayal. (2 Korinto 5:18-20; 1 Timoti 2:3-6) Saka tosa i, o mipadangay to salikaka. Mikiriwiˈay o ‘mipadangay to mapadesay a tayal’ sanay ci Pawlo. (2 Korinto 8:4) Ora sowal to ‘sakalaliˈay no Kawas ato tamdaw a tayal’, ato ‘padahofay a tayal’ sa i, ono Krisiya sowal tora “tayal” hananay, o di·a·ko·niˈa sanay, mafanaˈ toninian hano masaka limlaan hani?
5 Tano ninian mahecaday a Krisiya sowal mitoroˈ ci Pawlo toni tosa a tayal, oha sapitadtadaw oni padahofay tayal o dadademaken i kasakopang o sanay. Isaˈayaw pasowalay ci Pawlo: “Caay ka lecad ko tayal no tamdaw to saki Tapang. Nikawrira, oyanan a Tapang ko patosokan nangra a matayal. Adihay ko kasasiroma no fanaˈ no tamdaw a matayal . . . O sakaira nonini a maemin i, o nano tayal noyananto a fangcalay [saocor].” (1 Korinto 12:4-6, 11) Paihkalay ci Pawlo, o midemakan no kasakopang a maamaan tayal sahetoay o ‘midokoay to Kawas’ a demak. (Loma 12:1, 6-8) Mankora, oha mamipalak to toki a ‘padahof to fangcalay finawlan no Kawas’!—Loma 15:25, 26.
6 Padamaan ni Pawlo ko Korintoay Krisciyang mafanaˈ to misamaanay hano o tayal nangra ko padahofay a demak, hanaca o midokoay to Kawas a demak. Padahof to Krisciyang a salikaka, samanen tona o ‘midoedoay to ngaˈayay a ratoh ni Kristo.’ (2 Korinto 9:13) Makalimay cangra midofdof to sapalimoˈot ni Kristo, mansa milayaˈay to kamay i salikaka a mipadang cangranan. Somowal ci Pawlo, o ngaˈayay demak no Krisciyang to salikaka nao sapafeli no Kawas a “tadamaanay a siniˈada.” (2 Korinto 9:14; 1 Pitiro 4:10) Pakayni to pipadang to mapadesay salikaka, mahawpay ko mipadahofay cangranan, o Mikecolay 1976/6/1 sanay ko sowal: “Awaay ko sasa, ci Yihofa Kawas ato kanonoˈan a wawa ci Yis Kristo misalimlaay to matiniay a tayal.” Hay, o mipadangay to mapadesay a tayal o noka pidoko ita to Kawas a cecay masaka limlaan a demak.—Loma 12:1, 7; 2 Korinto 8:7; Hipray 13:16.
(2 Korinto 9:7) Orasaka, kao nihapinangan no falocoˈ no kahacecacecay ko sapasadak. Aka kao nisaˈidiˈidian, aka kao nipaciecian a falocoˈ ko sapasadak. Nawhani o lipahakay a pafeli i, o kaolahan no Kawas.
kr 196 fiedac 10 fatac
Naicowaay ko Payci to Saki Hongti Kitakit a Tayal
10 Salakat, nai falocoˈay a padahof kita samanen maolahay kita ci Yihofaan, “palipahakay Cingraan ko demak ita.” (1 Yohani 3:22) Maolahay ci Yihofa to nai falocoˈay a padahof. Nengnengen ita ko sowal ni Pawlo. (ˈOsien ko 2 Korinto 9:7.) O soˈlinay Krisciyang cowa ko ngangaˈay pacieci to niyah anca mapacieci no tao a padahof. “Kao nihapinangan no falocoˈ no kahacecacecay ko sapasadak” nangra, tatodong nora sowal oha mamisinanot to iraay ko ˈinorong ningra padahof, hanaca misinanot to hahakowa ko sapadahof ningra. O kaolahan ni Yihofa ko matiniay a tamdaw, samanen “o lipahakay a pafeli i, o kaolahan no Kawas.” O roma mihongyakan sanay ko sowal “mahemekay ko Kawas to maolahay padahof a tamdaw.”
Kadkaden ko Noˈadingoan Odoˈ
(2 Korinto 9:15) Tona caayto ko mamaemin a sowalen ko sapafeli no Kawas saka, o aahowiden ita Cingra!
w16.01 12 fiedac 2 fatac
“Caayto ko Mamaemin a Sowalen ko Sapafeli no Kawas”, Onini ko Micikerohay Kitanan
2 Mafanaˈay ci Pawlo, tona kinafalahay ci Yis to malefotay ˈorip ningra, o mamalaˈosi maemin ko mikiˈokan no Kawas. (ˈOsien ko 2 Korinto 1:20.) Mipakaynian ni Yihofa ci Yisan a noka ngaˈay ato madimadiay a olah i, mahawpay itira tora “caay ko mamaemin a sowalen a sapafeli” Ningra kitanan. O matiniay a sapafeli tada kasapaan, awaay ko pakayraan no tamdaw tano sowal a patahkal. 2016 miheca a piharatengan to patay ni Yis a saˈopo, o atini i ka toloan folad saka 23 romiˈad a misikay. Ano misaday kita mirienang toni saˈopo i, haratengen koni sapafeli no Kawas. O matiniay a mikiriwiˈay a sapafeli samaanay mifiyor kitanan hani? O mamicikeroh kitanan a macakat i maanan a demakan hani?
(2 Korinto 10:17) “O mangalayay a paseneng a tamdaw i, kao demak no Tapang [ci Yihofa] ko papasenengen,” saan.
g99 7/8 20-21 fiedac
O Ngangaˈay Malikoen ko Krisciyang han?
Itini no Krisciyang a Krisiya Fangcalay Cudad, ora “malikoay, kalitaˈangan, pasenengay” hananay a Krisiya sowal iraay ko ngaˈayay ato tatiihay a tatodong. Sowal sa ci Pawlo, “o kalitaˈangan ita ko pitala to sapilecadaw ita to pinangan no Kawas.” O roma i, “O mangalayay a paseneng a tamdaw i, kao demak no Tapang ko papasenengen,” sanay. (Loma 5:2; 2 Korinto 10:17) Tatodong ni Pawlo, o mamalikoen kita to nika ci Yihofa ko Kawas ita; o mahaenay harateng o papaseneng kita to makapahay ngangan Ningra.
Miˈosi to Sinael
(2 Korinto 7:1-12) Kaolahan ako a salikaka, tona ira i titaanan ko matiniay a niketonan no Kawas a sowal saka, liyasaw ita ko paacekay to tireng ato [ˈorip] ita a demak a mikorac to tireng. Kao nano ngodo to Kawas ko sapisongilaˈ ita a mikorac. 2 Kahalamham kamo i tamiyanan a mipatala. Awaay ko tatiihay a demak niyam i cimacimaan. Awaay ko nikariˈangan niyam, awaay ko nisafanaˈan niyam a tamdaw. 3 O sakasomowal ako tonini i, caay ko pitoroˈ ako to raraw namo. Mato sowal ako iˈayaw, Wata: ko nika olah ako i tamowanan. Ano nika ˈoripto, ano nika patayto ita i, mararid kita a malakapot han ako kamo kiyami. 4 Tanektek ko pipasoˈlin ako i tamowanan. Saka, o kalataˈangan ako kamo. Saka, mahinom ko falocoˈ ako. Ano mapadepades kako to masamaamaanay i, tataˈang ko lipahak ako. 5 Natahira kami i Makitoniya i, awaay ko karihadayan niyam. Mapades kami to masamaamaanay. Ira ko kacaculi niyam ato tao. Ira ko talaw no falocoˈ niyam. 6 Nikawrira, o mihinomay a Kawas to matoleday a tamdaw i, hinomen Ningra kami pakayni i nika ira ni Titus. 7 Caay ko nika ira ni Titus a cecay. Pasowal cingra to pakayniay i nipipaˈicel namo i cingraan. O sakahinom niyam konini. Maparatoh ningra kami to nika ˈilol namo takowanan ato nika rarom namo to pakayniay i tamiyanan ato nika lalok namo a paˈading takowanan. Saka, matongal matongal ko nika hinom ako. 8 Talacowa mapakararom ako kamo pakayni i nipipatilid ako iˈayaw, nikawrira, caay ka kesem kako tonini. Yo mahapinang ako ko nika rarom namo to pinapina a romiˈad pakayni toya nipipatilid ako i, makesem kako itiya. 9 Nikawrira, lipahakto kako imatini. Onini a lipahak ako i, caay ko nano nikararoman namo. O nika rarom namo a mifalic to falocoˈ ko sakalipahak ako. Mapakatayal no Kawas konini a rarom namo to sakaciepoc namo. Caay ko mikariˈangay kami i tamowanan. 10 Nawhani o matatodongay i nafalocoˈan no Kawas a rarom i, caay ko kakeseman, o mifalicay to falocoˈ a paˈorip konini. Nikawrira, o sakapatay ko kalo rarom no tamdaw. 11 Haratengen ko demak no Kawas a pakatayal to nika rarom namo. Pakayni tonini ko sakalalok namo a pahapinang to nika awa no raraw namo. Wata: ko nika keter namo. Macekok, miharateng, malalok kamo a mitefoc to ciraraway. Saka, mahapinang ko nika awa ko tatoroˈen a raraw namo to pakayniay toya fangafang. 12 Orasaka, o pipatilid ako iˈayaw i tamowanan i, caay ko pipaˈayaw ako toya tatiihay ko demak a tamdaw. Caay ko pipaˈayaw ako toya makariˈangay a tamdaw. O sapahapinangaw ako i kaˈayaw no Kawas to nika lalok namo to saki tamiyanan.
SAKA 5 FOLAD 20-26 ROMIˈAD
O ODOˈ KO KIMAD NO KAWAS | 2 KORINTO 11-13 FEDENGAN
“O ‘Cecay a Ceka i Tireng’ ni Pawlo”
(2 Korinto 12:7) Tona tadamaan ko nipipaˈaraw no Kawas i takowanan saka, mapafeli Ningra kako to cecay a ceka i tireng ako to sakacaaw pisatakaraw ako. O niocoran ni Satan a cecay coyoh ningra konini a micocok i takowanan to sakacaaw pisatakaraw ako.
w08 6/15 3-4 fiedac
Yo Tadanca Kako i, Ciˈicel Kako
O romaroma madimadiay sikawdan ni Yihofa na mingitangitay papiala to kaˈesaman a “ceka i tireng” nangra. Tarokos ci Pawlo kina toloay a mingitangit to Kawas a palahedaw toni sapalifet. Ano o mananto kora sapalifet, mahecaday o ceka a maˈesamen ci Pawlo a miˈafas to hemek ningra i tayal ni Yihofa. Miemem ci Pawlo toni ceka, mahecaday to padadotocay a micocok i cingranan. Pacaˈof ci Yihofa: “Maedengto ko siniˈada Ako i tisowanan. Nawhani itiya i nika tadanca iso a masongilaˈ ko ˈicel Ako,” saan. O hahadidien ni Pawlo kora, saanto cingra a pasowal: “Yo tadanca kako i, ciˈicel kako.” (2 Korinto 12:7-10) O manan ko tatodong nora sowal ningra hani?
(2 Korinto 12:8, 9) Kinatoloto kako a milongoc i Tapang [Yihofa] to sapialaaw Ningra tonini a ceka nai tireng ako. 9 Nikawrira, pacaˈof sa ko Tapang [Yihofa], “Maedengto ko siniˈada Ako i tisowanan. Nawhani itiya i nika tadanca iso a masongilaˈ ko ˈicel Ako,” saan. Orasaka, salipahak sa kako a paseneng to nika tadanca ako. Ta pakayni tonini a mahapinang ako ko ˈicel ni Kristo a midipot i takowanan.
w06 12/15 24 fiedac 17-18 fatac
Pafelian ni Yihofa to “Fangcalay Saocor ko Mingitangitay Tamdaw”
17 Pacaˈofan no Kawas ko satolon ni Pawlo, sowal sa: “Maedengto ko siniˈada Ako i tisowanan. Nawhani itiya i nika tadanca iso a masongilaˈ ko ˈicel Ako,” saan. Mankora sato pasowal ci Pawlo: “Orasaka, salipahak sa kako a paseneng to nika tadanca ako. Ta pakayni tonini a mahapinang ako ko ˈicel ni Kristo a midipot i takowanan.” (2 Korinto 12:9; ˈOlic 147:5) Matinakoay ni Pawlo ko pakaynian no Kawas ci Kristoan a sadipot, matiraay o pakopangan a mitahepo i cingranan. Anini, tano mahecaday a pakayraan ci Yihofa pacaˈof to pitolon ita. Midipotay Cingra to sikawdan no Niyah, hato o mipatirengay to pakopangan, mitaker to fali ato ˈorad.
18 Manaokaniw, ira ko pakopangan caayto ko mamaˈorad mamafali cowa ka saan. Kawra ira ko pakopangan papaˈading to sakacaaw ka maˈopic. Mahecaday, o “ˈicel ni Kristo” mamidipot kitanan, kawra caayto ko mamapalifet kita, caayto ko mamakalisanga no pades cowa ka saan. Nikawrira, o “ˈicel ni Kristo” o mamidipot to noˈadingoan ita, ho caka mapalak no tatiihay demak noni hekal, anca mapadik noni mikowanay to hekal a Satanan. (Paˈarawan 7:9, 15, 16) Alatek tahasiˈayaway kiso to co:wa ka “piliyas” tisowanan a sapalifet. Soˈliˈlin hatira, pakasoˈlinen to mafanaˈay ci Yihofa to nika pisaˈicel iso, halo pacaˈof to ‘pingitangit no miso’. (Isaya 30:19; 2 Korinto 1:3, 4) Sanay ko sowal ni Pawlo: “O matinakoay namo a pilifet i, o nano matinakoayto no ˈalomanay a tamdaw. O soˈlinay a tatiˈeren ko Kawas. Caay palitemoh Cingra tamowanan to caay ko mamahadidi namo a salifet. Ano malitemoh namo ko salifet i, paˈicelen Ningra kamo a papihadidi. Patalaen Ningra ko kasadakan namo a lalan.”—1 Korinto 10:13; Filipi 4:6, 7.
(2 Korinto 12:10) Orasaka, lipahak kako to nika tadanca ako, to nipipakangodo no tao takowanan, to nika roray, to nipikariˈang no tao i takowanan ato nika pades ako pakayni i pitoor ako ci Kristoan. Nawhani yo tadanca kako i, ci ˈicel kako.
“Paˈicelen Ningra ko Marorayay a Tamdaw”
8 ˈOsien ko Isaya 40:30. Wa mihayi kita, ano hakowato ko ˈicel ita, ano tiˈeren ko ˈicel no niyah, cowa ko mamalaˈosi ko kihcod a demak. Tinakoen ko tarokos ci Pawlo, adihayay ko mademakay ningra, kawra iraay ko tolas no ˈicel ningra. Tiya fanaˈen ningra ko Kawas to nai falocoˈay a harateng i, sanay ko caˈof no Kawas cingranan: “Nawhani itiya i nika tadanca iso a masongilaˈ ko ˈicel Ako.” Cipinangay ci Pawlo tonini, mansa, mihaen ko sowal: “Nawhani yo tadanca kako i, ciˈicel kako.” (2 Korinto 12:7-10) O maanan ko tatodong noniya sowal ni Pawlo hani?
9 Cipinangay ci Pawlo, ano awa ko sadama no Kawas to niyahan i, citolasay ko mamademak. Itini ka tadancaan ni Pawlo, patongalay to ˈicel ko fangcalay saocor, padama ci Pawloan milaheci to adihayay a demak, oniniyan cowa ko nano ˈicel ni Pawlo ko sakalaˈosi. Anini, ano milifok kita to sadama ni Yihofa, wa ngaˈay ira ko taˈangayay a ˈicel!
Kadkaden ko Noˈadingoan Odoˈ
(2 Korinto 12:2-4) Mafanaˈ kako to cecay a mitooray ci Kristoan a tamdaw. Iˈayaw no sepat ko safaw a mihecaan a makakoy cingra a mapatayra i safafaeday a kakarayan. (Halo tireng ningra a makakoy hakiya? Maliyas ningra ko tireng ningra hakiya? Caay ka fanaˈ kako. O Kawas ko mafanaˈay.) 3 Miliyaw kako a pasowal. Mafanaˈ kako to nika kakoy noya tamdaw a mapatayra i kalipahakan. (Halo tireng ningra a makakoy hakiya? Maliyas ningra ko tireng ningra hakiya? Caay ka fanaˈ kako. O Kawas ko mafanaˈay.) 4 Matengil ningra ko caay ko sasowalen no tamdaw ato caay ko papatalahkalen a patengil i tamdaw a sowal.
Salicay No Miˈosiay Tamdaw
Saka 2 Korinto 12:2 a “saka tolo tingloh a kakarayan”, o Hongti Kitakit ni Misiya alatek. Oya nisowalan ni Pitiro i saka 2 Pitiro 3:13 a “faelohay kakarayan”, o ci Yis Kristo ato 144,000 dama hongti ko makakapotay.
Somowal ci Pawlo to “saka tolo tingloh a kakarayan” i, tano “saka tolo tingloh” a tilid a misaˈicelay pasowal to, mikikakaay ko kangaˈay no Misiya Hongti Kitakit to kihecod a mirikecay.
Itini i mapolosi ci Pawlo “macadaay tayra i Lakoing”, oniya “Lakoing” alatek o mitoroˈan i faelohay hekal a: (1) Lakoing i sera, (2) ikakaay a noˈadingoan a Lakoing, ato (3) i kakarayanay a ‘Lakoing no Kawas’.
(2 Korinto 13:12) Kao fangcalay a kahahangot ko sakalalitemoh namo a malalicalicay.
it-2 31-32 fiedac
Kahahangot
‘Fangcalay Kahahangot.’ Itini salakatay Krisciyang lalomaˈ no salikaka tano ‘fangcalay kahahangot’ a masasihamham cangra. (Loma 16:16; 1 Korinto 16:20; 2 Korinto 13:12; 1Tisalonika 5:26) Anca tano ‘olah a mahahangot’ ko mako faˈinayan ato faˈinayan, mako fafahiyan ato fafahiyan. (1 Pitiro 5:14) O mahaenay pinangan no salakatay Krisciyang malecaday to nolitengan a Hipray tamdaw a mahahangot a masasihamham. Cowa ka ihekal a mifanaˈ ko Fangcalay Cudad to matiniay ‘fangcalay a kahahangot’ anca tano ‘olah a mahahangot’ a pakayraan, kawra patahkalay koni to nika makakaolah ato nika kelec a malacecay no Krisciyang.—Yohani 13:34, 35.
Miˈosi to Sinael
(2 Korinto 11:1-15) Hato maapaay ko nika somowal ako i, maedeng a samaanen, hadidi hanho. 2 Nawhani, o nano olah no Kawas ko sakalimla ako i tamowanan. Matiya o nipatapanganto ako a makoracay a limecedan kamo to malofafahi no cecay a faˈinayan ci Kristo. 3 Nikawrira, o katalawan ako i, o nika saˈfit namo a matiya o nipisaˈfit no ˈoner ci Ifaan. Ta maˈoning ko falocoˈ namo. Misawad kamo to soˈlinay a makoracay a falocoˈ to saki ci Kristoan. 4 Nawhani, yo ira a tayra i tamowanan ko patenakay a tamdaw to caay ko nipatenakan niyam a roma a Yis hananay i, lipahak kamo a milayap. O romasato, yo ira ko roma a kawas ato caay ko nipatenakan niyam a ratoh i, hai sa kamo a milayap tonini. 5 Awaay ko kaisafaan ako to maan aca toya tadamaanay hananay namo a tarokos saan ko harateng ako. 6 Ano caacaay ko makimaday kako i, awaay ko kaisafaan no fanaˈ ako. Mapahapinangto niyam i tamowanan i masamaamaanay a demak niyam konini. 7 Yo mipatenak kako to ngaˈayay a ratoh no Kawas i tamowanan i, mangalay kako a mipalatamdamdaw i tamowanan saka, sapoeneren ako ko tireng a caay pilayap to lifon. Onini a demak ako i, o raraw ako hakiya? 8 Yo matayal kako i tamowanan i, mipadang ko romaroma a saˈopo no mitooray a pafeli to sakaˈorip ako. Mato mitakaway kako i cangraan to malosapadama ako i tamowanan. 9 Yo cangoˈot kako to sakaˈorip itira i tamowanan i, caay pakaroray kako i cimacimaan namo. Nawhani maedengto ko pipadang no nai Makitoniyaay a salikaka to sakaˈorip ako. Caay pakaroray kako to maan aca i tamowanan itiya. Iikor nonini caay ko papakaroray kako i tamowanan. 10 O iraay i takowanan a sowal ni Kristo ko sapahapinang ako to nika soˈlin no sowal ako i tamowanan. Caay ko mamalasawad konini a nipasenengan ako itini i Akaya a pala. 11 O sakasaan ako i, caay ka olah kako i tamowanan, caay ko nika saan ako. Mafanaˈto ko Kawas to nika olah ako tamowanan. 12 O paparariden ako ko tayal ako to ha:tiniay. Ta mapalasawad ko nipipaseneng noya sapalecadananay i tamiyanan to tayal a pasenengay a tarokos hananay. 13 O matiniay a tamdaw i, o pacefaay a tarokos, o misaˈfitay to tamdaw a matayalay, o misamatiyatiyaay o tarokos ni Kristo cangra. 14 Caay ko kafahkaˈan konini! Halo ci Satan a misamatiyatiya o paˈdilay a coyoh! 15 Orasaka, ano misamatiyatiya o matayalay no Kawas ko kararem ni Satan i, caay ko kafahkaˈan. O paherekan nangra i, mapatatodong toya nidemakan nangra.
SAKA 5 FOLAD 27–6 FOLAD 2 ROMIˈAD
O ODOˈ KO KIMAD NO KAWAS | KALATIYA 1-3 FEDENGAN
“Siˈayaw Han Ako Cingra a Mirikec”
(Kalatiya 2:11-13) Nikawrira, yo tayra i Antiok ci Pitiro i, ira ko mararaway a demak ningra. Saka, siˈayaw han ako cingra a mikaketer. 12 Nawhani yo awaho ko nai ci Yakopananay a papinapina a tamdaw i, mikapot ci Pitiro to roma a finacadan a mitahka. Nikawrira, yo irato cangra i, matalaw ci Pitiro toya pacieciay a papidoedo to roma a finacadan to kerit a lisin a Yutaya a tamdaw saka, siikor sato cingra toya roma a finacadan a micidek. 13 Saka, kapot sa i ci Pitiroan ko ˈalomanay a Yutaya a tamdaw a mapawpaw ko falocoˈ. Saka, halo ci Parnapas a makayhid nangra.
w17.04 27 fiedac 16 fatac
Malecaday Kiso ci Yihofaan Ira ko Moecelay Falocoˈ Han?
16 ˈOsien ko Kalatiya 2:11-14. Tona matalaway to tamdaw ci Pitiro saka mararaw ko demak ningra. (Taneng 29:25) Soˈlina mafanaˈay cingra to samaanay ko pinengneng ni Yihofa to cowa ko Yutaya tamdaw a Krisciyang, kawra tangasa a ira ko nai Yirusalimay a Yutaya Krisciyang, matalaw saca ci Pitiro toya micadaay to kerit a tamdaw. Tiya saka 49 miheca a kayki i Yirusalim, iraay itira ci Pawlo, saka siˈayaw han ningra a mikaketer ci Pitiro to nika pisamangah ningra. (Dmak 15:12; Kalatiya 2:13) Oya ˈalafang a Krisciyang maˈaraw ci Pitiro mihaen to demak, sasamaanto cangra hani? O mamapolin cangra han? O mamalahedaw ni Pitiro ko kalimlaan a ˈinorong to noka mararaw ko demak han?
(Kalatiya 2:14) Maˈaraw ako ko nika eca ka tatodong no demak nangra a mitoor to Ngaˈayay a Ratoh saka, pasowal hanto ako ci Pitiro i kaˈayaw no ˈalomanay, “Talacowa o Yutaya a tamdaw kiso, ano misano romaay a finacadan ko demak iso i, nawiro paciecien iso ko roma a finacadan a papisano Yutaya a tamdaw ko demak saw?” han ako.
w13 3/15 5 fiedac 12 fatac
Oya Maolahay ci Yihofaan a Tamdaw, “Awaay ko Maan Aca a Mamipolin i Cangraan”
12 Tona matalaway to tamdaw, mapolinay ci Pitiro, mararaw ko demak, kawra ikor kamayanay madimadi ci Yihofaan aci Yisan. Patinakoen, na itiniay i kaˈayaw no ˈalomanay a mihakeno ci Yisan, cowa kina cecay aca, kina toloay. (Luka 22:54-62) O roma i, cowa ka sadafdaf a minengneng to polong a Krisciyang, mihaen ko demak ningra, malecaday to cowa ka hatira o micadaay to kerit ko kangaˈay no ˈalafang a Krisciyang hato sanay. ˈArawhan, mahapinangay ni Pawlo, ilalomaˈ no kasakopng cowa ko ngangaˈay ira ko misakakinihay, tada mararaway ko pakayraan ni Pitiro. saka siˈayaw han ningra ci Pitiro a misalof, ho caka todongen no romaroma salikaka cingra. (Kalatiya 2:11-14) Pakayni tonini mangolaway ci Pitiro, hato sawad sanayto to milefoday to saka tahadaˈocaw a ˈorip han? Cowa. Sinanotan ningra ko saparikec ni Pawlo, misalof to raraw, padadotoc a talaˈayaw tahira i tolas.
Kadkaden ko Noˈadingoan Odoˈ
(Kalatiya 2:20) Saka, caayto kao kako ko maˈoripay. Ci Kristo ko maˈoripay i falocoˈ ako. O nika ˈorip ako anini i, o nano pitiˈer ako toya maolahay takowanan a kinafalah to tireng to saki takowanan a Wawa no Kawas.
w14 9/15 16 fiedac 20-21 fatac
Madimadi a Midoko to Kawas Soˈliˈlin “Ira ko Adihayay a Pades”
20 Ano tahasiˈayw to cowa ka hapinang a noka piˈodis no tao i, wa samaanto hani? Sasamaan kita miremo to masofaway a harateng hani? O cecay ciepocay pakayraan i, simsimen miharateng ko sapatefoc ni Kristo. Mihaenay to demak ci Pawlo, nolatekay masomaday ko falocoˈ ningra, kawra mafanaˈay cingra o saki mararaway tamdaw ko saka patay ni Kristo, ao cowa ko saki malefotay a tamdaw. Mafanaˈay ci Pawlo to nika o mararaway tamdaw ko niyah, sato saan ko sowal ningra: “O nika ˈorip ako anini i, o nano pitiˈer ako toya maolahay takowanan a kinafalah to tireng to saki takowanan a Wawa no Kawas.” (Kalatiya 2:20) Hay, pakasoˈlinay ci Pawlo to sapatefoc ni Kristo, mahapinangay ningra to caciepoc ko niyah naitini toni sapatefoc.
21 Mahecaday, o sapatefoc ni Kristo o naitiniay ci Yihofaan a sidaˈitay a sapafeli tisowanan. Mafanaˈ toninian taˈangayay ko sapadama tisowanan. Hay, ora masofaway a harateng iso wa tangsol a malahedaw cowa ka saan. O romaroma no mita alatek o hahalafin a misiˈayaw to matiniay a cowa ka hapinang a noka piˈodis, tangasa kairaan no faelohay hekal. Kawra aka mapawan: Deng ano caka pisawad kita to moecelay lalan, ngaˈ mamilifok to halifon. O Hongti Kitakit no Kawas papaira to dipayal no polong no hekal, patatikol a malefotto ko ˈorip no polong madimadiay a sikawdan, nohatini ikakaayto ko nika ngata toni taˈangayay a romiˈad! Mankora, soˈlinto adihay ko pades ita, seteken ko falocoˈ a misaˈicel a micomod i Hongti Kitakit no Kawas.
(Kalatiya 3:1) Aya: kamo o maapaay a Kalatiya a tamdaw! Cima ko pamoraraway tamowanan saw? Mapahapinangto i tamowanan ko nika pacek ni Yis Kristo i [pisemseman a tektek].
it-1 707 fiedac
Kalatiya Cudad
Itini i tikami pasowal ci Pawlo, “kamo o maapaay a Kalatiya a tamdaw” sa i, ora nisowalan ningra cowa koya itiniay i kakaˈamisan no Kalatiya a Kawlo a tamdaw. (Kalatiya 3:1) ˈArawhan o pirikec aca ni Pawlo to papinapina i lalomaˈ no kasakopang, patalipaˈelal cangranan aka tengilen ko mararaway sowal noya midoedoay to Rikec ni Mosi a Yutaya a tamdaw. Moraraway cangra miwacay, tona midoedoay to Rikec ni Mosi kami saka o moecelay tamdaw sanay, ao cowa ko nika pakasoˈlin to faelohay a kataterek ni Kristo a malo moecelay tamdaw. (2:15–3:14; 4:9, 10) Ano pakaynien i ˈaˈirangan ko sowal, o “itiniay i Kalatiya a kasakopang” (1:2) iraay ko Yutaya tamdaw, iraay ko cowa ko Yutaya a tamdaw; o cowa ko Yutaya a tamdaw mahawpay koya micadaay to kerit a mitooray tamdaw, ato cowa picada to kerit a ˈalafang tamdaw, ilalomaˈ nangra alatek iraay ko teloteloc no Keletik tamdaw. (Dmak 13:14, 43; 16:1; Kalatiya 5:2) Tona o Kalatiya hananay kora kamaroˈan nangra a pala, hato o Kalatiya tamdaw hanto ni Pawlo cangra maemin. Ora nisowalan ningra naoya kakatimolan no Kalatiya kilac a Krisciyang, o kafanaˈan ningra a tamdaw, cowa koya i kakaˈamisay tamdaw, samanen cowaho ka tayratayra cingra itira.
Miˈosi to Sinael
(Kalatiya 2:11-21) Nikawrira, yo tayra i Antiok ci Pitiro i, ira ko mararaway a demak ningra. Saka, siˈayaw han ako cingra a mikaketer. 12 Nawhani yo awaho ko nai ci Yakopananay a papinapina a tamdaw i, mikapot ci Pitiro to roma a finacadan a mitahka. Nikawrira, yo irato cangra i, matalaw ci Pitiro toya pacieciay a papidoedo to roma a finacadan to kerit a lisin a Yutaya a tamdaw saka, siikor sato cingra toya roma a finacadan a micidek. 13 Saka, kapot sa i ci Pitiroan ko ˈalomanay a Yutaya a tamdaw a mapawpaw ko falocoˈ. Saka, halo ci Parnapas a makayhid nangra. 14 Maˈaraw ako ko nika eca ka tatodong no demak nangra a mitoor to ngaˈayay a ratoh saka, pasowal hanto ako ci Pitiro i kaˈayaw no ˈalomanay, “Talacowa o Yutaya a tamdaw kiso, ano misano romaay a finacadan ko demak iso i, nawiro paciecien iso ko roma a finacadan a papisano Yutaya a tamdaw ko demak saw?” han ako. 15 Soˈlinayto, nahofocen o Yutayataya aca a tamdaw kita. Caay ko ciraraway hananay a roma a finacadan kita. 16 Nikawrira, mafanaˈ kita, caay ko nano pidoedo to Rikec ko sakangaˈay no tamdaw a malayap no Kawas. Deng o nano pitiˈer ci Yis Kristoan, saan kita. Saka, mitiˈer kita i ci Yis Kristoan. Onini i, o nano pitiˈer ita i ci Kristoan ko sakangaˈay ita a malayap no Kawas o sanay ita. Caay ko nano pidoedo to Rikec. Nawhani awaay ko cecacecay aca a malayapay no Kawas a tamdaw to nano pidoedo to Rikec. 17 Nanay, pakaynien ako i nika lacecay ako aci Kristo ko sakangaˈay ako a malayap no Kawas ano saan kita o Yutaya a tamdaw i, itiya a mahapinang ko nika o malecaday kita ato roma a finacadan a ciraraw. Ano hatira i, o mipadangay aca ci Kristo to sakaciraraw no tamdaw haw? Caay! 18 Nawhani ano miliyaw kako a palowad to mipelengan ako iˈayaw a Rikec i, o pahapinangay kako to nika o mararaway kako. 19 Ano pakayniay i Rikec i, o mapatayayto kako. O Rikec ko sakapatay ako. Saka, mangaˈay kako a midoedo to nafalocoˈan no Kawas a maˈorip. O mapakapotayto kako ci Kristoan a mapacek i [pisemseman a tektek] ningra. 20 Saka, caayto kao kako ko maˈoripay. Ci Kristo ko maˈoripay i falocoˈ ako. O nika ˈorip ako anini i, o nano pitiˈer ako toya maolahay takowanan a kinafalah to tireng to saki takowanan a Wawa no Kawas. 21 Caay ko mamiepec kako to siniˈada no Kawas. Nawhani ano nano pidoedo to Rikec ko sakangaˈay no tamdaw a malayap no Kawas i, awaay ko epoc to nika patay ni Kristo.