Pinengnengan to Lalakaw no Mitosilay ato Nikaˈorip Rayray no Saˈopo
© 2025 Watch Tower Bible and Tract Society of Pennsylvania
SAKA 5 FOLAD 5-11 ROMIˈAD
O ODOˈ KO KIMAD NO KAWAS TANENG 12
O Malalokay a Tamdaw Mamilifok to Sapalifon
w16.06-CH 30 fiedac 6 fatac
O Epoc no Kahemekan no Kawas a Capeling Ikakaay ko Nika Masakalimlaan to Odoˈ
Pakayni i Krisciyang mipaririˈ to paro no lomaˈ cowa ko madoloay, kawra cowa ka kahi cangra tano misamangahay kalikiay a pakayraan sakacihafayaw, nawhani misasoˈlinay a malalok cangra a matayal. Cowa ka pisamangah cangra, misawacayay to misalimlaay to kahemekan no Kawas a capeling ikakaay to maamaan a hafay.—Taneng 12:24; Ifiso 4:28.
w15-CH 2/1 5 fiedac 3-5 fatac
Samaan i Tayal a Milifok to Raheker
Oya salikoray a salicay o sasongilaˈen a misaharaterateng, samanen maˈaraw iso o midemakan no niyah tada ciepocay to roma tamdaw i, saraheker sato ko falocoˈ. Sanay ko sowal ni Yis: ‘O paladaˈay ikakaay to micadaay ko nika hemek.’ (Dmak 20:35) Oha mamisaˈicel kita a dademak, matayal saki tao ato tawki, oha ngangaˈayho padama to paro no lomaˈ ato romaroma cisaaliay a tamdaw.
Paro no lomaˈ ita. O tawki no paro no lomaˈ kiemelay matayal pakayni i paro no lomaˈ, tosaay ko epoc to paro no lomaˈ. Saka cecay, mirenecay cingra to saali no paro no lomaˈ pakayni i rikoˈ, kakaenen, pikilomaˈan, sakaromakat a paliding, mihaen cingra i, o milahciay to sapatorod no Kawas i cingranan a ˈinorong, ‘midimokos to paro no lomaˈ.’ (1 Timoti 5:8) Saka tosa, malalok a matayal ko tawki no paro no lomaˈ i, o ngangaˈayto pasifanaˈ to paro no lomaˈ malalok a matayal tada masakalimlaan a demak. Oya masowalay i fafekang a lalakaw salikaka ci Saen, saan ko sowal ningra: “O wama ako o ngaˈayay a taˈarawan ako. Malalokay a misasayho cingra, tohati:niay misakaretengay cingra to tayal ningra, tano kamayay cingra misangaˈ to ciepocay i tamdaw a lalosidan. Mikitira i taˈarawan ningra mananamay ako o mahaenay a tayal tada o ciepocay.”
Romaroma cisaaliay to papadangen a tamdaw. O tarokos ci Pawlo palimoˈotay to Krisciyang ‘ka malalok dademak to matatodongay, ho ngaˈay ira ko sapaladaˈ to manikaway a tamdaw,’ sanay. (Ifiso 4:28) Manaokaniw, misaˈicel kita a dademak ho ngaˈay paririˈ to paro no lomaˈ, ngangaˈayho ira ko ˈicel iso padama to tao, itini pipaladaˈ milifok to taˈangayay a hemek.— Taneng 3:27.
Odoˈ no Sinael
ijwyp-CH saka 95 fedengan 10-11 fatac
Iraay ko ˈIcel Ako Pakaremo to Saroero Han?
● Pairaen ko matatodongay noka pinengneng. Folfolen kora demak a minengneng, soˈlinay a pakidem kora demak han? Alatek cowa ka tada pakidem to nika piharateng iso tora demak. Sowal no Fangcalay Cudad: “Ano maketer ko maapaay a tamdaw i, tangsol sa a patalahkal to keter ningra, nikawrira, terep sa a mihadidi to pisamsam no tao ko citangalay a tamdaw.” (Taneng 12:16) Mihaenay haw i, aka pakidem ko pinengneng to demak.
“Itini picudadan i, o cafay ako micudad pakayni to mimingay a demak pakinaliay ko sowal, palosiyangan nangra i widawidangan, miyakayakanto no widang konini a demak, telocto i, cowato ka rihaday ko falocoˈ nangra minengneng to mimingay a demak no niyah.”—Ciyawanni.
SAKA 5 FOLAD 12-18 ROMIˈAD
O ODOˈ KO KIMAD NO KAWAS TANENG 13
Aka Maorat no ‘Dawdaw no Tatiihay Tamdaw’
it-1-CH 350 fiedac 2-3 fatac
Dawdaw
O Sapatinako a Sowal. O dawdaw i, o sapatinako to sapalikat to i kaˈayaway a lalan no tamdaw. O Taneng a cudad tano dawdawan a mipatinako, palalinian ko moecelay a tamdaw ato tatiihay a tamdaw, sowal sa: “Matiya o matediay a malikatay a dawdaw ko moecelay a tamdaw, nikawrira, matiya o mapadengay a dawdaw ko tatiihay a tamdaw.” (Taneng 13:9) O matediay a malikatay a dawdaw no moecelay a tamdaw cowa ko mamapadeng, malikat malikatay. ˈArawhan, o dawdaw no tatiihay a tamdaw hato malikatay, kawra papadengen no Kawas, mapolinto i toˈeman cangra. O miˈekakay a mapoˈi to wama wina a tamdaw, mamahaen ko teloc nangra.—Taneng 20:20.
Roma i, mapadeng ko dawdaw, mahecaday to awaayto ko hanoikor a hatokel nora tamdaw. Sowal no Taneng: ‘Awaay ko hanoikor a hatokel no tatiihay tamdaw, o dawdaw no tatiihay tamdaw salikor mamapadeng.’—Taneng 24:20.
w12-CH 7/15 12 fiedac 3 fatac
Eminen ko Falocoˈ Mihodop Toya Pafeliay to Pasalat a Kawas
3 Tona ciˈicelay ci Satan mikayhid toya tatosaay malefotay tamdaw ato ˈalomanay coyoh minaˈay to pikowan no Kawas, iraay ko ˈicel ningra mikayhid kitanan mahaen ko demak. Anini, o sapikayhid ni Satan malecadayto. Pakidemay ko saali no Kawas sanay cingra papiharateng kitanan, miˈafas to hemek no mita. (1 Yohani 5:3) Matenakay ko hatiniay a harateng no tamdaw, ano macerid kita micawmaˈ cangranan i, mamadolo a mafiyor. O cecay 24 mihecaan a fafahiyan salikaka sanay ko sowal: “O tatiihay cawmaˈ taˈakayay ko pifiyor i takowanan, samanen matalaway kako caka lecad to roma kapah tamdaw.” Telocto i, maˈodangayto cingra. Alatek iraay ko hatiniay a saroero no miso.
w04-CH 7/15 31 fiedac 6 fatac
‘Citangalay Tamdaw Midoedoay to Sifanaˈ a Dademak’
Masinanotay moecelay a tamdaw midoedoay to sifanaˈ a dademak, malifokto ko sapalemed. Mikiˈokay ci Solomon kitanan: ‘Moecelay tamdaw marenecay ko falocoˈ, tatiihay tamdaw macahiway ko tiyad.’ (Taneng 13:25) Ano demakto no paro no lomaˈ, kalalaˈed ato roma a tamdaw, mitosilay demak, anoca maparikec, ato maamaan i nokaˈorip, mafanaˈay ci Yihofa to o manan ko saciepocay kitanan. Ano mataneng ko demak ita, sakadademaken ko sapalimoˈot no Fangcalay Cudad, mamatomesto ko epoc i nokaˈorip ita.
Odoˈ no Sinael
it-1-CH 47 fiedac 2 fatac
Olah
Olah hananay i, latekay mawiletay. Mikitini tora lalangian i fafekang, o tamdaw sapicadaaw to moecelay a sakayat palahad to soˈlinay olah i, mamikilim halo midofdof to saocor no Kawas, midoedo to safalod no Fangcalay Cudad. O roma wama wina latekay tada maolahay to wawa, ˈarawhan pakidemay ko nika olah to wawa maˈeloˈayto ko wawa, o mananto ko saali no wawa toor hananay. Cowa ka pisakadademak cangra to fadangalan no wama wina, misongilaˈ mirikec to wawa, soˈlinto mararaw ko wawa cowa ka rikecen. (Taneng 22:15) Latekay misatekeday ko mahaenay a olah, o makaniway. Sowal no Fangcalay Cudad, o mahaenay a wama wina o ˈintehay to wawa, cowa ka olah cangranan, samanen o parikecay to wawa i, mamilidong to ˈorip nangra.—Taneng 13:24; 23:13, 14.
SAKA 5 FOLAD 19-25 ROMIˈAD
O ODOˈ KO KIMAD NO KAWAS TANENG 14
Ano Mifekad ko Pades i, ‘Ka Pinaˈon a Misinanot’
Salimlaen ko Sapafeli no Kawas Kitaanan a ˈOrip
10 Latekay, awaay ko pakayraan ita miliyas to ka pifekad no katalawan a demak. Tinakoen, tatahalifa kita to pades, lifong anca malaˈodotay a demak alatek. Ano fahal sa mifekad ko hatiniay a pades i, palimoˈotay ko mirikecay no sifo papiliyas, anca mikeceng masadak to dadaya ato romaroma sakeceng, ano dofdofen ita o mamalowan ko katalawan, mihaen o mamadipot ko ˈorip. (Loma 13:1, 5-7) O romaroma a pades wa ngaˈay kita talaˈayaw misaday a misiˈayaw. Oha dadofdofen ita ko sakayat no mirikecay no sifo, itini kacalohan misongilaˈ a midemak to sapidipot a pakayraan, tinakoen misoped to nananomen, caay ka narikay mapalak a kakaenen ato sapidipot to tireng a dafong.
11 Ano matenakay ko lifong i kaitiraan ita i, sasamaan ko demak hani? Dofdofen ita ko macalohay a sapalimoˈot no sifo, tinakoen mararid a minanaw to kamay, citangoyosan, pairaen ko kalalaˈed ato tao, tooren ko mipalaliyasay a saˈosi. Ano songilaˈen ita midemak konini a demak i, paihkalay to misalimlaay kita to sapafeli no Kawas a ˈorip.
12 Ano mafekad ko demak i kacalohan a toki i, alatek mamikitini i widang, fiyaw anca sinfon matengil ko pina cowa ko soˈlinay a lihaf. Aka sahto sa pakasoˈlinen ko sowal, ao mamisinanot to safanaˈ no sifo ato lekakawa no pipaisingan to ngaˈayay tiˈeren a lihaf. (ˈOsien ko Taneng 14:15.) ˈAyaw no sapisadakaw to sakayat to pakayniay saˈopo no kasakopang ato mitosilay tayal i, o Malohemay Malitengay i Congpo ato Iing no Fenpo mamisaˈicel milifok to matatodongay a lihaf. (Hipray 13:17) Ano dofdofen ita ko sakayat, cowa ko kadipot aca no niyah ato tao, mamaˈadingho ko makapahay ngangan no kasakopang.—1 Pitiro 2:12.
Todongen ci Catok, Paihkal to Timolo
11 Ano masiˈayaw no salikaka ko katalawan a pakayraan, misaali to sapadama no mita i, wa misamaan kita mitodong ci Catokan paihkal to timolo? (1) Dofdofen ko sakayat. Doedoen ko sakayat no fenpo, ano mafekad ko macalohay a demak i, wa makakedec malacecay kita. (Hipray 13:17) Ano macerid a milomal ko malohemay malitengay to sakayat no likakawa i, wa mafanaˈ i ˈayaw ato ikor mifekad ko pades i, sasamaan misaday ko hademak. (1 Korinto 14:33, 40) (2) Ka timoloen a misinanot. (Taneng 22:3) Sakadademaken ko mihapinangay a inaneng. Aka caloh sa midemak. (3) Tiˈeren ci Yihofa. Aka mapawan, ciharatengay ci Yihofa to finawlan Ningra, wa padamaen Ningra kiso, tano matatodongay a pakayraan padama to salikaka.
Odoˈ no Sinael
it-2-CH 318 fiedac
Matanengay a Piharateng
Nikawrira, o matanengay a piharateng a tamdaw latekay mikaˈintehan no tao. O misowalan i Taneng 14:17 latek iraay ko mahaenay a tatodong: ‘O matanengay a piharateng a tamdaw, mikaˈintehan no tao.’ Mafokilay miharateng a tamdaw cowa ka olah to matanengay ko piharateng a tamdaw. Roma i, sakadademakay to matanengay a piharateng midofdof to araaw no Kawas a tamdaw mikaˈintehan no tao. Sanay ko sowal ni Yis Kristo: “Nikawrira, caay kono hekalan a tamdaw kamo. O nipiliˈan ako kamo a micidek nai tamdamdaw no hekal. Orasaka, kaˈintelen no i hekalay a tamdaw kamo.” (Yohani 15:19) Kawrira, ono Hipray sowal i Taneng 14:17 alatek mahawpay ko tatiihay a harateng. Mankora, tatodong nonini a sinael alatek somowalay toya misahalakaay to tatiihay demak a tamdaw mikaˈintehan no tao. Mahaenay ko pihongyak no romaroma Fangcalay Cudad: ‘Misahalakaay to tatiihay demak i, mikaˈintehan no tao.’—（和合）
SAKA 5 FOLAD 26–6 FOLAD 1 ROMIˈAD
O ODOˈ KO KIMAD NO KAWAS TANENG 15
Padama to Tao Lipahakay ko Falocoˈ
w10-CH 11/15 31 fiedac 16 fatac
Madimadi Kita Dademak!
16 Hinapaladaˈay ci Yopu. (Yopu 31:31, 32) Soˈliˈlin cowa ka cihafay kita, ngaˈayay ‘misaˈicel paihkal to hinapaladaˈay harateng.’ (Loma 12:13) Tinakoen, ngaˈayay tahidangen ita ko tao komaen. Haratengen, “o nika komaen to kalo dateng a masasiolaolah ko ngaˈay to nika komaen a mitahka to epah ato titi a masasiˈintel.” (Taneng 15:17) Masasiolaolah kita to salikaka, mitahka a komaen, ano o kalo aca kakaenen i, oha ngangaˈay mala paˈicel itini noˈadingoan.
w18.04 23-24 fiedac 16-18 fatac
Tongalen ko Pisaˈicel a Pakalalolalok
16 Soˈlin cowa ka fanaˈ kita a masasowal, wa ngaˈay a pakalalok to tamdaw. Sapakalalokaw to tamdaw cowa ko pasangaray, tinakoen ngaˈayay damsayen ko pising masedi cingranan, ano caka tawa kora tamdaw tisowanan, maedeng iraay ko pasangaray no falocoˈ ningra, misaaliay to mamitengil a tamdaw. Ano tengil han iso ko sowal ningra i, wa masayar ko falocoˈ ningra halatek.—Yakop 1:19.
17 O cecay kaemangay faˈinayan salikaka ci Enli, miliyasay ko salawina ningra to likakawa no Kawas, cowa ka hatini aca, oya malo malohemay malitengay a wama ningra cowa to pihodop ci Yihofaan, tada masomaday ci Enli tonini. O cecay kasakilac kantok mitahidangay cingranan tayra pinanoman to kafi, halafinay masasowal cingranan. Mapakalalokay ci Enli, pakahapinang ano papadama to paro no lomaˈ patikol i likakawa no Kawas, edengan a pakayraan i, mitafo to madimadiay. O roma, mikitini piˈosi to Fangcalay Cudad milifokay ci Enli to taˈangayay sapakalalok, mangalef mikitini i ˈOlic 46 fedengan; Cifaniya 3:17; ato Marko 10:29, 30.
18 Mikitini milifetan ni Marte aci Enli mahapinangay ita, o cecacecay tamdaw ngaˈayay pakalalok to misaaliay to sahinom a salikaka, mahaen o mitilidan no hongti ci Solomon: “Ano matatodong ko sowal iso i, tada makapahay. O ngaˈayay a ratoh i, o miselakay to falocoˈ a patanektek to tireng.” (Taneng 15:23, 30) O roma, ano miˈosi ko matoleday tamdaw to Mikecolay ato minengneng to wangcan no mita, wa ngaˈay tanektek a makowad. O roma sapakalalok a pakayraan malacafay a romadiw noˈadingoan a radiw, sowal ni Pawlo: “Kao taneng ko sakasasipasifanaˈ namo a mikerid. Kao ˈolic ato fangcalay a radiw ato no ˈadingoan a radiw ko sapikansiya no falocoˈ namo to Kawas a romadiw.”—Kolosay 3:16; Dmak 16:25.
Odoˈ no Sinael
ijwbq-CH saka 39 fedengan 3 fatac
O Krisciyang Ngaˈayay Miˈaraw to Ising Micada to Sapiadah Han?
2. Wa ngaˈay paˈaraw to cecay tosa a ising han? ‘Salalicayen ko ˈalomanay’ o ngaˈayay konini, ano pakidemay ko adada iso i, oha mamitengil kiso to romaroma sapaini a sowal.—Taneng 15:22.
SAKA 6 FOLAD 2-8 ROMIˈAD
O ODOˈ KO KIMAD NO KAWAS TANENG 16
Tolo a Salicay Padama Tisowanan Citaneng ko Misaˈosian
w14-CH 1/15 19-20 fiedac 11-12 fatac
Kapah a Tamdaw, ka Mataneng ko Pipiliˈ
11 O sakakaay a lipahak no kaˈorip no tamdaw i, itiniay i katayal saki ci Yihofaan. (Taneng 16:20) Iraay ko cecay liyad, dama ni Yirimiya ci Paruk cowa pakahapinang toninian, awaayto ko hemek ningra midoko ci Yihofaan. Hananay ni Yihofa pasowal cingra: ‘Misahalakaayho kiso to taˈangayay a demak saki niyah han? Akato pisahalaka. . . . O tatefaden Ako ko padiing i polong a tamdaw. Kawra ano talacowato kiso, o papaˈoripen Ako kiso.’ (Yirimiya 45:3, 5) O harateng iso i, samaanay noka pipiliˈ ni Paruk papalipahak cingranan hani? O sapihalakaaw to saki niyah ha? Anca madimadi a matayal saki Kawas, ho ngaˈayto malaliw ko nika mapalaˈafo no Yirusalim aki?—Yakop 1:12.
12 O cecay faˈinayan salikaka ci Lamiro malifetayto ningra o kahemekan ko matayalay. Sowal sa i: “O itiniay i Antis a lotok cecay niyaroˈ a lomahad kako, manikaway ko paro no lomaˈ. Ikorto i, o sowal sa no kaka ako i, papicudaden ningra kako i taykak, tada o masakalimlaan konini a toki. Kawra, itiya i, cada sanayho kako to paputisem mala o Misawacayay Tamdaw ni Yihofa, iraay ko roma papiliˈen ako. Iraay ko cecay misakafahay mitahidangay takowanan malacafay cingranan malinah tayra i roma niyaroˈ mitosil. Misetekay kako a malacafay cingranan. Itiya i, mafanaˈayto kako miˈisˈis to fokes, patirengay to cecay taˈisˈisan to sakaˈorip ako. Saˈicelay kami a mitosil, ˈalomanay tamdaw makahiay minanam to Fangcalay Cudad. Ikorto i, mirienangay kako to faelohay patirengan tono Yincumin ko sowal a kopang. Tahanini, moetepayto a miheca misakafah kako. Ngaˈay padama to roma tamdaw tano nowinaan a sowal nangra a minanam to Fangcalay Cudad, tada kahemekanto, awaay ko pakaliniay tonini a demak.”
w13-CH 9/15 17 fiedac 1-3 fatac
Maherekayto Kiso Mifalic Han?
KALOMAHADAN ato lalengawan taˈangayay ko pifiyor kitanan. Samaanay ko kacirikoˈ kapilafa ita, nanaman a komaen, o waywayan, awaawa sa i, o widang ko piˈarawan, itiniay i masamaanay a serangawan, itiniay i masamaanay a kitiraan ko kaˈorip, iraay ko pifiyor kitanan.
2 O kakaenen ato caˈedong o mimingay aca a demak, kawrira iraay ko romaroma demak to tada masakalimlaan. Tinakoen, o ngaˈayay tatiihay palinian no mita, o ngaˈayay tatiihay a piharateng tohati:niay naitiraay i kaemanganho a noka mapasifanaˈ, kawra cowa ka lecad a tamdaw caay ka lecad ko pinengneng. Roma i, o makapahay falocoˈ mamifiyor to kapipiliˈ ita. Sowal no Fangcalay Cudad, o awaay ko rikec a roma finacadan a tamdaw ‘ono niyah sanay a falocoˈ mitoor to pinangan no tireng.’ (Loma 2:14) Ano hatiraay i, ano awa ko rikec no Kawas a mikeceng i, wa pakihater han ita ko pinangan a lomahad ato serangawan ita a misaˈosi to demak han?
3 O Krisciyang cowa ko mamihaen ko demak. Misamaanay hani? Tosaay ko kalimlaan a lalangian. Saka cecay, sowal no Fangcalay Cudad: ‘O moecelay koniya lalan sa ko tamdaw i, ˈarawhan salikor i, o sakatayra i kapatayan a lalan.’ (Taneng 16:25) Cowa ko malefotay kita maemin, cowa ka pakahapinang to o manan ko matatodongay a lalan, cowa ko hamamalefot ko pikayat to hawang no niyah. (Taneng 28:26; Yirimiya 10:23) Saka tosa, sowal no Fangcalay Cudad, o ‘kawas noniya lekakawa no hekal’ ci Satan miˈimeray to pinangan noniya hekal ato palinian. (2 Korinto 4:4; 1 Yohani 5:19) Misahatiraay, ano makalimay kita sapilifokaw to sapalemed ni Yihofa ato pihayda Ningra i, oha mamitengil to sapalimoˈot no Loma 12:2.—ˈOsien.
Odoˈ no Sinael
it-1-CH 515 fiedac
Sapirikec
O teloc no Mitengilay ato Caay ka Pitengil. O tatiihay, maapaay ato malafoay a tamdaw ˈintehay to sapirikec, talidoˈeng sanay to sapalimoˈot ni Yihofa. (ˈOlic 50:16, 17; Taneng 1:7) O maapaay a tamdaw saliyaliyaw sanay mararaw ko demak, telocto i, pakidemayto ko sasayfang. Matatodongay ko sowal no Taneng: ‘O maapaay a tamdaw marikecay no maapaay a demak no niyah.’ (Taneng 16:22) Caka kahi ko tamdaw mitengil to sapirikec, o sakanikaw no niyah alatek, mapakangodo, pakidem ko adada, fahal sato a mapatay. Paihkalay ko likisi no Israil tamdaw, caka kahi mitengil to sapirikec pakidemay ko tatiihay a teloc. Na tano masakenakenaay a pakayraan ci Yihofa mirikec to finawlan, tinakoen miocor to pairasolay mirikec ato palimoˈot cangranan, nikawrira caay ka pisikor cangra, ecato ka mapalemed ato madipot cangra, kaadayayan i, caay pitemer to falocoˈ nangra. Telocto, pakidemayto ko macadaay no Israil tamdaw a sapirikec, malaˈafoay ko kitakit, maholiwayto cangra, matiya o paliˈayawan no pairasolay.—Yirimiya 2:30; 5:3; 7:28; 17:23; 32:33; Hosiya 7:12-16; 10:10; Cifaniya 3:2.
SAKA 6 FOLAD 9-15 ROMIˈAD
O ODOˈ KO KIMAD NO KAWAS TANENG 17
Madadipayal ko Mararamoday, Tada Lipahakay
g-CH 9/14 11 fiedac 2 fatac
Samaan Palasawad to ˈInteh
Sasoˈlin a misinanot to niyah. Sowal no Fangcalay Cudad, o roma tamdaw ‘kalaketeray, hinangolaway.’ (Taneng 29:22) O mahaenay a tamdaw kiso han? Licayen ko niyah: “Hinaketeray kako han? Marariday kako maketeren to miming a demakan han?” Sowal no Fangcalay Cudad, ‘misaliyaliyaway somowal to kararaw no tao i, palaliyasay to ngaˈayay a widang.’ (Taneng 17:9; Patnakay 7:9) Onini a sowal ngaˈayay sakadademaken i kalalaˈed no raramod. Mihaenay haw i, ano marariday kiso maketeren to ramod i, salalicayen ko niyah: “Ngangaˈay kako adihay ko pihadidi to raramod han?”—Safalod no Fangcalay Cudad: 1 Pitiro 4:8.
w08-CH 5/1 10 fiedac 6 fatac-11 fiedac 1 fatac
Sasamaan Misalof to Pasangar no Raramod
1. Palaken ko toki malalengo tora pasangar. “Ano o maamaanto a demakan, ira ko pipatonekan a romiˈad, . . . ira ko katomerepan, ira ko kacaciyawan a romiˈad.” (Patnakay 3:1, 7) Oya masowalay i fafekang a kalaliyang paihkalay, o romaroma pasangaray mamikidat to taˈangayay a keter. Ano masadak ko mahaenay a demak i, katomerep, ˈimeren ko niyah, ˈayaw no mafetas ko keter i, sawad hanho kora pasangaray. Sowal no Fangcalay Cudad: “Matiya o nifowahan a nanom ko satapangan no kacacolicoli,orasaka, iˈayaw no kacacoli i, ˈemeten ta caay pisetol ko kacacoli.” Ano tengilen iso konini sapalimoˈot i, caay ito kapelaˈ ko kalalaˈed.—Taneng 17:14.
Nikawrira, o mararamoday ‘ira ko kacaciyawan a tatokian.’ O pasangar i, malecaday to rengos, ano caka faliwen i, malasemotayto. Mansa aka talimaan han ko demak, lahdaw wa sato ko pasangar aka saan miharateng. Ano sawad hanho iso ko sakalacongis a demak, piliˈen iso ko tatokian, kalikien a misalof kora pasangar, mihaen o misakaretengay to raramod. Mihaen to demak, papadama to mararamoday a tamdaw patalahkal to sapasifanaˈ no Fangcalay Cudad: “Aka ka tahaceremen ko keter namo.” (Ifiso 4:26) Manaokaniw, ano mihayian to nohacowa a misaysay, tooren kora sowal.
Odoˈ no Sinael
it-2-CH 766 fiedac 3 fatac
Mata
O mata no tamdaw pahapinangay to nafalocoˈan, tinakoen patalahkalay to siniˈada no falocoˈ anca caay ka siniˈada ko falocoˈ. (Limoˈot 19:13) ‘Misasikisikiw ko mata’ hato milokesaw to tao, ‘misakenikeniˈay to mata’ latek misahalakaay to tatiihay. (ˈOlic 35:19; Taneng 6:13; 16:30) Mikepit to mata awaay ko sapasasiyoraw, mitahaf to mata cowa sapisikolaw to tao. (Matay 13:15; Taneng 28:27) Sowal no Fangcalay Cudad o maapaay a tamdaw ‘pasiraayay a mimelaw ko mata,’ awaay ko patonekan a minengneng, saolatekay sa miharateng. (Taneng 17:24) O mata hananay i, ngaˈayay patalahkal to ngaˈayay ko tireng no tamdaw anca masomaday ko falocoˈ hokira, ato ciangilay hokira. (1Samuil 14:27-29; Limoˈot 34:7; Yopu 17:7; ˈOlic 6:7; 88:9) Hongti ci Yihosafat patalahkalay to nika pakasoˈlin, pasowal ci Yihofaan: ‘O mata niyam mitiˈer i Tisowanan’ sanay.—2Rayray 20:12.
SAKA 6 FOLAD 16-22 ROMIˈAD
O ODOˈ KO KIMAD NO KAWAS TANENG 18
Hinomen ko Adadaay a Tamdaw
Milekalay ko Soˈliˈlinay a Taneng
17 ˈAyaw no somowal saharateratengen. Ano eca pinaˈon, o mihadakan ita a sowal papaira to taˈangayay pidokaˈ to tao alatek. Sowal no Fangcalay Cudad: ‘Ano caay minaˈon to sowal i, matiya o mikotangay a midokaˈ to tamdaw, o citanengay a sema matiya o ngaˈayay a sapaiyo.’ (Taneng 12:18) Miliyas kita itini lalikor a milengo to dangoc no tao, ecato pipalak to kalalaˈed no tamdaw. (Taneng 20:19) Ano makalimay kita o sowal no niyah ngaˈay mihinom eca pidokaˈ to tao, papatomesen ko kemoday falocoˈ no niyah to harateng no Kawas. (Luke 6:45) Midotim to sowal no Kawas, o mihadakan ita a sowal o mamalo ‘pipowaran no taneng,’ wa ngaˈay pasinoway to tamdaw.—Taneng 18:4.
mrt-CH saka 19 fedengan sapatongal lalakaw
Talifahal sa Adada ko Tireng i, Sasamaan ko Demak?
Hadidien a mitengil. O cecay hapakayraan a padama to widang i, ano sakacaciyawaw cingra i, hadidien a mitengil. Ano o mananto ko sowal ningra i, pacaˈofento iso, aka pihaen a miharateng, nolatekay tengil hanca ko sowal ningra maedengayto. Tanamen a cipinang ko nafalocoˈan ningra, aka likafen cingra. O adada no roma tamdaw cowa ka hapinang i papotal, mansa cipinangayto kako to nafalocoˈan ningra aka ka saan.—Taneng 11:2.
Tawliken ko sowal. Latekay cowa ka fanaˈ kiso to o manan ko hasowal to widang. Soˈlinay haw i, “mafanaˈay kako to cowa ka dolo kiso,” mihaen to sowal maedengayto, o mamisayar cingranan. Anoca, patalahkalen ko kaciharateng iso cingranan, haenen ko sowal, “cowa ka fanaˈ kako to sasamaanen ako pasowal kiso, kawra soˈlinay ciharateng kako to nika adada iso.” Aka haenen ko sowal, “cowa ka masamaan kora pakayraan,” “cowa ka tada pakidem kora adada iso.”
Tanamen a mikingkiw ko adada no widang iso, paihkal to nika ciharateng iso to widang. Mihaen i, o sasayar a sowal iso caciepocto, latek mamiakoˈid ko widang to nika pikingkiw iso to adada ningra. (Taneng 18:13) Kawrira, aka pafesoc sa caka pisaharaterateng misadak to sapaini a sowal.
Sadaken ko ciepocay a sapadama. Licayen ko widang to o manan ko saali ningra, mafanaˈayto kako to o manan ko saali ningra aka ka saan. Haratengen, latekay mangodoay ko widang pasowal to papadamaen cingra, samanen cowa ka sapiafadaw cingra tisowanan. Ano mahaenay i, pasowal han ko widang to mamisamaan kiso padama cingranan, tinakoen micakay to dafong, miasik to lomaˈ.—Kalatiya 6:2.
Aka a pisawad. Tona adadaay ko widang, latekay palasawaday to maanan a limasmas, anoca cowa sakasasowalaw tisowanan. Itiya i, siniˈadaen ko falocoˈ ningra, hanaca hadidien cingra. Padadotocen a mipadang cingra.—Taneng 18:24.
wp23.1-CH 14 fiedac 3 fatac-15 fiedac 1 fatac
Sasamaanen a Mipadang
‘Sayaren ko matoleday ko falocoˈ a tamdaw.’—1 TISALONIKA 5:14.
Latekay tada marawraway ko falocoˈ no widang iso, awaay ko kapo no mako sanay miharateng to niyah. Soˈlinto cowa ka fanaˈ kiso to o manan ko hasowal, pasowal han cingra to ciharatengay kiso cingranan, o mamasayarto ko falocoˈ ningra ato makowadto ko falocoˈ ningra.
‘O soˈlinay widang marariday patalahkal to olah.’—TANENG 17:17.
Pafelien cingra to ciepocay a sapadama. Latek cowa ka fanaˈ kita to samaanay ko harateng no widang, mansa i, o ngaˈayay hapakayraan salalicayen cingra to maanan ko saali ningra. Ano cowa ka fanaˈ cingra to maanan ko saali ningra i, ngaˈayay pasowalen iso malacafay kamo masadak a romakat. Patadoen cingra micakay to dafong, ato miasik to lomaˈ ningra.—Kalatiya 6:2.
‘Pairaen ko mihadidiay a falocoˈ.’—1 TISALONIKA 5:14.
Latekay awaay ko sakacaciyawaw no widang, ngaˈayay pasowalen iso, ano sakasasowalaw cingra i, mamakahi kiso a mitengil. Samanen o adadaay i, o sowal ningra ato midemakan ningra latek mamidokaˈ tisowanan. Nolatekay maherekayto misaˈosi a demak palasawad hananay ningra, latek maketeray tisowanan. Mankora, ano mipadang kiso cingranan i, kacipinang to harateng ningra, pairaen iso ko mihadidiay a falocoˈ.—Taneng 18:24.
Odoˈ no Sinael
it-1-CH 229-230 fiedac
Miritos
O ‘miritosay’ hananay i, o sakadademakan no tamdaw to sapisaˈosiaw to manan ko aalaen anoca kadadoedo no demak, halafinayto ko mahaenay a nanaman, ora pakayraan i, mialaan ko pina mapeciˈay a fakeloh, mimingay limoloay a fakeloh, mimingay sapad no kilang, telien i ˈalofo no rikoˈ anoca i talid, ikor kowakoˈen, o manan ko saˈayaway mahodocay i, oranan ko mipiliˈan. Malecaday ko miritosay ato miketonan a sowal, iraay ko mingitangitay a tatodong a mipatalahkal to hademak, mingitangit to sakayat ni Yihofa. O miritosay (Hipray., goh·ralʹ) a pakayraan i, miritosay to ‘lalayapen a miparocekan a hafay’ anoca ‘cecay a sapakilac.’—Yosuwa 15:1; ˈOlic 16:5; 125:3; Isaya 57:6; Yirimiya 13:25.
Hapakayraan a miritos. Taneng 16:33 sowal sa: ‘Telien ko ritos i ˈalofo no rikoˈ, kawra ci Yihofa ko misaˈosiay to demak.’ Itini Israil, o tamdaw tano ritosan a misaysay to demak: ‘Miritos ngangaˈay misalof to kalacongis, ngangaˈay misaysay to kacacoli no tatosaay.’ (Taneng 18:18) O miritosay i, caay ka pilingat to malakisaway ato malowiday, awaay ko mipowakiyaway, mansa o tamdaw itini i piontoan, pisalamaan ato pipowakiyawan cowa ka piritos. O tamdaw cowa ka piritos misaˈosi to hahakowa ko sapakiyaho to fangcalay sefi ato saysi, ato hahakowa ko sapakiyaho to mipadangay a lekakawa. O sofitay no Loma miritosay to kafafang ni Yis, o notekedan a coˈos to sapiˈafasaw tora kafafang, tatodong sanay a malaˈosi ko sapairasol no ˈOlic 22:18.—Matay 27:35.
SAKA 6 FOLAD 23-29 ROMIˈAD
O ODOˈ KO KIMAD NO KAWAS TANENG 19
Malo Soˈliˈlinay a Widang no Salikaka
Sasamaan Padadotoc Fanekfek a Masasiolah?
16 O kangaˈayan no salikaka ko samacayen minengneng, ao cowa ka itinien i dangoc. Haratengen ko cecay sapatinako. Malacafayay kiso to papina salikaka malisopsop, ira ko lipahakay no kacacawmaˈ. Mahererekto micawmaˈ i, pacafayan iso ko ˈalomanay misasing, dotoc kinatosaayho kiso misasing, samanen cowa ka ngaˈay koya saka cecay misasingan alatek. Nohatini toloayto ko sasing iso, kawra mahapinangay iso ko cecay sasing ˈosengetay ko cecay faˈinayan salikaka. Sasamaan ko demak iso hani? Wa mipadeng kiso tonini a sasing, samanen iraayho ko tosa ngaˈayay nengnengen a sasing. Itini toniya tosa sasing, onini a salikaka ato romaroma tamdaw matawaay ko pising.
17 Wa ngaˈay kita palalini to maharatengay no niyah to miterekan a sasing. Adihayay ko malifetay ita kahemekan macacawmaˈ to salikaka. Nikawrira kinacecayay, o cecay faˈinayan salikaka anca fafahiyan salikaka somowalay to pina sowal anca pina a demak, pakasomaday kitanan. Sasamaan ko pidemak ita hani? Ngaˈayay tanamen ita mipawan konini a demak, malecad o pipadeng to cecay cowa ka ngaˈay nengnengen a sasing. (Taneng 19:11; Ifiso 4:32) Cowa ko nanaˈengen ita i falocoˈ ko mimingay raraw no widang, samanen iraayho ko adihayay makapahay nalifetan ita malacafay cingranan, o hatiniay nalifetan o sasalimlaen ita minaˈeng.
w23.07 9-10 fiedac 10-11 fatac
Padotocen Mitongal ko Olah Iso
10 Mamikilim kita to pakayraan padama to salikaka. (Hipray 13:16) Nengnengen ko fafekangay lalakaw somowalay to samaanay ko demak no salikaka ci Anna. Mifekad ko pakidemay a faliyos ikor, ci Anna ato faˈinay ningra milisoˈay to cecay paro no lomaˈ, mahapinangay to matefaday ko fadahong no lomaˈ nangra, awaayto ko makoracay a rikoˈ cacaˈedongen nangra. Sanay ci Anna: “Mialaan niyam ko rikoˈ nangra mifacaˈ, miaylong, mitepik ikor patikolan cangra. Soˈlin kaemingay a demak koni, pakayniay ko pipatireng niyam to kalawidang cangranan, tahanini kamayanho o ngaˈayay a widang.” Ci Anna ato faˈinay maolahay to salikaka, mansa makahi talaˈayaw a ciepoc ko pipadama cangranan.—1 Yohani 3:17, 18.
11 Tocerid, ira ko olah ita micada to salikaka, mamahapinang nangra to misaˈicelay kita mitodong ci Yihofaan. Hakowaay ko piakoˈid nangra kitaanan, cowa ka songilaˈ ko kafanaˈ ita alatek. Masowalay i fafekang salikaka ci Akim padotocay miharateng toya na padamaay cingranan a salikaka. Sanay cingra: “Tada miakoˈiday kako to polong na mikeriday takowanan malingad mitosil a salikaka. Tayni cangra i lomaˈ micada takowanan, mitahidang takowanan malacafay mitiyamsim anca malahok, ikor rihaked a panokay takowanan. Anini fanaˈ sanayho kako to adihayay ko mihadakan nangra a ˈicel, hanaca mikitiniay i olah ko pihaen to demak.” Manaokaniw, padama kita to tao, cowa ko mamiakoˈid ko tao kitaanan alatek. Milengo ci Akim toya na padamaay cingranan a tamdaw sanay: “Ngaˈay ko picada nangra takowanan, makalimay kako sapatikoaw cangranan, kawra cowa ka fanaˈ kako to icowaay cangra nohatini. Nikawrira, mafanaˈay ci Yihofa to kihcod, mihaenay mitolonan ako Cingra patado takowanan patiko cangranan.” Matatodongay ko sowal ni Akim, o demak ita i tao soˈlin mimingay aca a demak, maˈaraway ni Yihofa maemin. O pinengneng Ningra to ngaˈayay demak ita malecaday o kalimlaan a sapatoˈaya, o papatikoen Ningra kita, malecad to citadahay kitaanan.—ˈOsien ko Taneng 19:17.
Padadotoc Masasi Paihkal to Madimadiay a Olah
6 O cecay matayalay ano halafinayto matayal i kaysiya, papasowal ko ˈalomanay tamdaw o ‘madimadiay a matayalay’ cingra. Kawra, soˈlin halafinay cingra matayal i kaysiya, cowa ka fanaˈ cingra to ˈakawangay a kakeridan no kaysiya alatek, o pakayraan no kaysiya cowa ka pihayi cingra alatek. Soˈlinay i, matayal cingra itini cowa ko pakayniay kaolah ningra tonini a kaysiya, samanen o pisaali aca to katayalan ato lifon. Itini roma pala ano awaay makilim ningra ko ngaˈayay a katayalan, papadotoc matayal tonini a kaysiya tahira i pisawadan matayal.
7 Harateng no kalo tamdaw o kasasiroma no ‘madimadiay’ ato madimadiay a olah, itiniay i araaw no falocoˈ. O nolitengan a madimadiay sikawdan no Kawas hano paihkal to madimadiay a olah hani? Mihaen ko demak nangra cowa ko mapacieciay, ao mikifalocoˈay a sapidemakaw. Haratengen ko tinakoan ni Tafiti, soˈlin o wama ni Yonatan sapipatayaw ci Tafitian, kawra kamayan paihkal ci Tafiti to madimadiay a olah ci Yonatanan, mikifalocoˈay ci Tafiti maolah tonini a widang. Mapatay ci Yonatan ikor no pina miheca, kamayan ci Tafiti tano madimadiay a olah micada to wawa ningra ci Mifipositan.—1 Samuil 20:9, 14, 15; 2 Samuil 4:4; 8:15; 9:1, 6, 7.
Odoˈ no Sinael
it-1-CH 689 fiedac
Pasifanaˈ, Matanengay
Ci Yihofa o malefotay ko taneng, edengan Cingra cowa ko mamicada to sapasifanaˈ. (Isaya 40:13; Loma 11:34) Wawa Ningra midofdofay to araaw Ningra, iraay ko saocor Ningra i cingranan, mansa o ‘matanengay a mipasifanaˈay,’ fangcalay ko pikayat to tamdaw. (Isaya 9:6; 11:2; Yohani 5:19, 30) Somowalay konini edengan matatodongay to araaw ni Yihofa i, o ngaˈayay a harateng, ngaˈayay a misahalakaan. Maamaan misafelitay to milimasmasan misahalakaan no Takaraway a Tapang i, o mamalakisaw, awaay ko maamaan a epocan.—Taneng 19:21; 21:30.
SAKA 6 FOLAD 30–7 FOLAD 6 ROMIˈAD
O ODOˈ KO KIMAD NO KAWAS TANENG 20
O Hapakayraan Malaˈosi ko Makakaolahay
w24.05 26-27 fiedac 3-4 fatac
Samaan a Makakacawmaˈ Hongaˈ Citaneng ko Pisaˈosi?
3 Soˈliˈlin palipahakay to tamdaw ko makakaolahay, nikawrira o makakaolahay a tamdaw mamisaareteng a minengneng tonini a demak, samanen mamararamod konini tatosaay a tamdaw noikor alatek, i kararamodan a romiˈad, o aitini i kaˈayaw ni Yihofa miketon to sowal cangra, mikiˈok i hakelong no kaˈorip maolah ato mikangodo to ramod. ˈAyaw no miketon to sowal mamisongilaˈ kita a misimsim. Hatiraay ko miketonan a sowal no mararamoday. (ˈOsien ko Taneng 20:25.) O makakaolahay a tamdaw pakayniay i kacacawmaˈ a masasicipinang, hanaca mataneng ko pisaˈosi. O mamararamod ko saˈosi nangra alatek, anca malasawad ko kacacawmaˈ nangra alatek. Ano malasawad ko makakaolahay a tamdaw, o pasokiyawayto cangra cowa ka saan. ˈArawhan, o kacacawmaˈ nangra malaˈosiay ko araaw, padamaay cangranan mataneng ko pisaˈosi.
4 Matatodong ko pinengneng to makakacawmaˈay, hano masakalimlaan hani? Ano matatodong ko pinengneng i, o caayho ka ciramod a tamdaw ano awaay ko harateng to sakaciraramodaw tora tamdaw, cowato ko makakaolah tora tamdaw. Nikawrira, cowa ko caayho ka ciramod a tamdaw aca ko aira ko matatodongay a pinengneng, o mamihaen ko polong a tamdaw. Tinakoen, harateng no romaroma tamdaw misatapang makakaolah ko tatosaay a tamdaw o caciraramodto sanay. Mahaenay a pinengneng samaanay ko pifiyor to caayho ka ciramod a Krisciyang hani? Itiniay i Padaka caay ka ciramod a fafahiyan salikaka ci Milisa, sanay cingra: “O makakaolahay a salikaka taˈangayay ko macadaay a saroero. Telocto, o romaroma makakaolahay mafanaˈayto to cowa ka tatodong tatosa, kawra matalaway malicinowas. O roma caayho ka ciramod a salikaka matalawayto makakaolah to tao. Tada taˈangayayto ko saroero nangra.”
Samaan Pakatama to Matatodongay a Haramod?
8 Ngaˈayay kiso misamaan mihapinang cingranan hani? Itini saˈopo no kasakopang anoca itini picawmaˈan to salikaka, ngaˈayay kiso mihapinang to pinangan ato waywayan nonini tamdaw, ato samaanay ko nika lalaˈed ningra aci Yihofa. O masamaanay a tamdaw ko widang ningra hani? Ano caciyaw cingra i, o manan ko sowal ningra hani? (Luka 6:45) O patosokan ningra malecaday tono miso han? Misalalicayho to mafanaˈay cingranan a tamdaw, tinakoen malohemay malitengay no kasakopang ningra ato romaroma matenesay a Krisciyang. (Taneng 20:18) Licayen iso cangra samaanay ko pinangan nonini tamdaw, samaanay ko masowalay no tao i cingranan. (Rucu 2:11) Itini pihapinang iso i, aka a parawrawen ko falocoˈ ningra, sakangodoen cingra, ato notekedan a demak ningra.
Samaan a Makakacawmaˈ Hongaˈ Citaneng ko Pisaˈosi?
7 Sasamaan ko pidemak iso hongaˈ mafanaˈ to i kemoday no falocoˈ a waywayan nora tamdaw hani? O cecay ngaˈayay pakayraan i, mikifalocoˈ a masasowal tora tamdaw, hadaken ko salicay, songilaˈen a mitengil. (Taneng 20:5; Yakop 1:19) Ngaˈayay malacafay kamo midemak to pina ngaˈayay ko kasasowal a demakan, tinakoen malacafay komaen, romakat ato mitosil. Malacafay kamo mipalak to toki macacawmaˈ to paro no lomaˈ ato widang, mamatongal ko kasasifanaˈ namo. Roma i, ngaˈayay kamo milimasmas mirienang to pina a demak, ho ngaˈay kamo masasihapinang itini cowa ka lecad a pakayraan samaanay ko pidemak, ato samaanay ko picada to romaroma tamdaw. Nengnengen ko itiniay i Helan ci Aswen aci Aylisiya samaanay ko pidemak i makakaolah cangra, sanay ko sowal ningra: “Mikilimay kami to ngaˈayay mitongal to kasasicipinang a demak. O hatiniay a demak to cerid o kantangay, tinakoen malacafay mitangtang, malacafay midemak to no lomaˈ a tayal. Ano midemak to hatiniay a tayal i, mamaˈaraw ita o kangaˈayan ato dangoc ningra.”
8 Malacafay kamo mikingkiw, ngaˈay matongal ko kasasicipinang. Ano mararamod kamo noikor, mamilimasmas to toki malacafay to pakalomaˈay a pidoko, mihaen papadamaen no Kawas kamo tanektek ko raramod. (Patnakay 4:12) Ano mahaenay i, makakaolahho kamo i, ngaˈayto milimasmas malacafay mikingkiw. Manaokaniw, makakaolahay a tamdaw cowaho ko paro no lomaˈ, o faˈinayan salikaka cowaho ko fongoh no fafahiyan salikaka. Kawra, micerid kamo malacafay mikingkiw, cacipinang to samaanay ko kalalaˈed nora tamdaw aci Yihofaan. Ci Makes aci Laysa o itiniay i Padaka mararamoday, mahapinangay nangra malacafay mikingkiw iraay ko roma kangaˈayan. Sanay ci Makes: “Misatapang kami macacawmaˈ i, malacafayayto mikingkiw to milingatay to makakaolahay, raramod ato kaˈorip no paro no lomaˈ a lalakaw. Onini a lalakaw pairaay to hatoki niyam malalengo to kalimlaan a demak, o hatiniay a sasowalen cowa ka masowal itini i kalo a romiˈad.”
Odoˈ no Sinael
it-1-CH 350 fiedac 7 fatac
Dawdaw
Taneng 20:27 sanay ko sowal: ‘Saselaˈan no tamdaw o dawdaw ni Yihofa, pahapinangay to ikemoday a falocoˈ no tamdaw.’ O ‘saselaˈan’ no tamdaw hananay i, o nisadakan a sowal ningra, ano o ngaˈayay o tatiihay, patalahkalay to capeling ato kemod no falocoˈ ningra.—Nengnengen ko Dmak 9:1.