CACEKIWEN LALAKAW 22
Papikayaten ko Taneng to Kaˈorip Ita
‘Pafeliay ci Yihofa to taneng i tamdaw.’—TANENG 2:6.
RADIW 120 Tengilen a Mitoor Mapalemed
KALIMLAAN NO LALAKAWa
1. Hano misaaliay kita to sapafeli no Kawas a taneng hani? (Taneng 4:7)
NA MIDEMAKAY kiso to maanan kalimlaan a sasaˈosien han? Itiya maedeng pasayraay kiso ci Yihofaan micangacang to taneng, samanen mafanaˈay kiso misaaliay ko niyah to sakayat Ningra. (Yakop 1:5) Sowal no Hongti ci Solomon: ‘Sakakaay kalimlaan ko taneng, mihaenay cangacangen ko saka citaneng.’ (ˈOsien ko Taneng 4:7.) Manaokaniw, o misowalan ni Solomon cowa ko taneng no tamdaw, ao mikitiniay ci Yihofaan a taneng. (Taneng 2:6) Kawra o sapafeli no Kawas a taneng wa ngaˈay padama kitaanan miremo to malifaay anini a pasangaray han? Hayi, onini lalakaw mamisongilaˈ milengo tonini.
2. Ano sapilifokaw kita to soˈlinay a taneng, samaan ko hademak hani?
2 Iraay ko tatosa tamdaw samanen tada citanengay hato mikangodoan no tamdaw. Misarocod kita minanam ato misakadademak to sapalimoˈot nangra, o mamilifok to soˈlinay a taneng. Salakat nengnengen ita ci Solomon. Sowal no Fangcalay Cudad: ‘Pafelian no Kawas ci Solomon to tadamaanay a taneng, ato sapihapinang a ˈicel.’ (1 Hongti 4:29) Dotoc minengnengho kita ci Yisan, i likisi o sacitanengay a tamdaw cingra. (Matay 12:42) Iraay ko cecay pakayniay ci Yisan a sapairasol sanay: ‘O fangcalay saocor ni Yihofa padotocay i tireng ningra, paira to taneng ato sakafanaˈ ningra.’—Isaya 11:2.
3. Oniya lalakaw mamilengo to maanan?
3 Pakayni pitadiˈec to sapafeli no Kawas a taneng, ci Solomon aci Yis mihadakay to ciepocay a sapalimoˈot, padama kitanan o polong a tamdaw milifok to epoc. Onini a lalakaw mamilengo to pina sapalimoˈot nangra, padama kitaanan pakayni payci, tayal ato niyah matatodong ko pinengneng.
MATATODONG KO PINENGNENG TO PAYCI
4. O sakaˈorip ni Solomon aci Yis iraay ko maanan kasasiroma?
4 Tada cihafayay ci Solomon, tada idahiyay ko kaˈorip. (1 Hongti 10:7, 14, 15) Masafelitay, cowa ka adihay ko dafong ni Yis, awaay ko masaˈosiay a kitiraan. (Matay 8:20) Nikawrira, cangra tatosa matatodongay ko pinengneng to payci, samanen iraay ko mikitiniay i Kawas ci Yihofaan a taneng nangra.
5. Ci Solomon pakayni payci iraay ko maanan matatodongay a pinengneng hani?
5 Sowal ni Solomon: ‘O payci ngaˈayay midipot to tamdaw.’ (Patnakay 7:12) Ira ko payci, ngaˈayto kita milifok to sakaˈorip a dafong, ngaˈayho micakay to kaolahan no niyah a dafong. Kawra cihafayay a Solomon cipinangay, o roma a demak mikikakaay to payci masakalimlaan. Tinakoen, sanay cingra: ‘Mipiliˈ to hafay ka pipiliˈ to makapahay ngangan ko ngaˈay.’ (Taneng 22:1 ato roma pihongyak.) Mahapinangay ni Solomon, maˈanofay to payci a tamdaw ano hakowato ko adihay, pasangaray a marenec. (Patnakay 5:10, 12) Patalipaˈelalay cingra to tamdaw aka patoroden i payci ko hatokel, samanen o payci cecay pedek no mata malahdawayto.—Taneng 23:4, 5.
O pinengneng ita to hafay micaraay to paisalakaten ita a micangacang to Hongti Kitakit no Kawas hokira? (Nengnengen ko saka 6-7 fatac)d
6. Pakayni i nodafongan iraay ko maanan matatodongay a pinengneng ni Yis hani? (Matay 6:31-33)
6 Ci Yis pakayni dafong iraay ko matatodongay a pinengneng. Maˈorip cingra itini fafekang no sera i, na komaenay to ˈaredetay kakaenen ato epah. (Luka 19:2, 6, 7) O midemakan ningra sakacecay kafahkaan o palaepahay to nanom. (Yohani 2:10, 11) Tiya mapatay cingra a romiˈad o matekesay ko misarikoˈan ningra. (Yohani 19:23, 24) Kawra cowa ka paisalakaten ni Yis ko dafong i nokaˈorip ningra, pasowalan ningra ko nisawawaan: ‘Cowa ka ngaˈay tosa ko tapang no mala koliay a tamdaw . . . Cowa ka ngaˈay kamo malo koli no Kawas, malo koliho no hafay.’ (Matay 6:24) Somowalayho ci Yis, ano salakaten ita micangacang ko Hongti Kitakit no Kawas, o dadimokosen ni Yihofa ko sakaˈorip no mita.—ˈOsien ko Matay 6:31-33.
7. O cecay salikaka pakayni payci iraay ko matatodongay a pinengneng, mansa malifokay ko maanan a epoc hani?
7 ˈAlomanay salikaka mitooray to sapalimoˈot ni Yihofa, minanam matatodong ko pinengneng to payci, telocto adihayay ko malifokay a epoc. Cecey cowa ka ciramod faˈinayan salikaka ci Tannie, sanay cingra: “Moetep ira ko pina ko mihecaan ako i, misaˈosiay paisalakat i nokaˈorip to pidoko ci Yihofaan.” Padotocay kantang ko kaˈorip ni Tannie, mansa ngaˈay misaka dademak to toki ato inaneng no niyah, adihay ko tayal saki likakawa no Kawas. Sanay cingra: “Ngaˈay soˈlin ko sowal ako, cowa ka makesem kako tonini a mipiliˈan. Manaokaniw, ano paisalakaten ako ko mietanay to payci i nokaˈorip, maedeng wa adihay ko maetanay a payci. Kawra ano hakowato ko payci cowa ko papakafalic to iraay nohatini a kalawidang ako, cowa ko papakacakay to pairaan no paisalakat to Hongti Kitakit a karenec no falocoˈ. Ano hakowato ko maetanay a payci, cowa ko papakalini to sapafeli ni Yihofa takowanan a sapalemed.” Mahapinangay, pakayni kita i Kawas eca ka pakayni i payci a maˈorip, oha mamilifok to soˈliˈlinay a epoc.
MATATODONG KO PINENGNENG TO TAYAL
8. Hano mafanaˈ kita pakayni i tayal iraay ko matatodongay a pinengneng ni Solomon? (Patnakay 5:18, 19)
8 Sowal ni Solomon, malifokay a lipahak mikitini karoray matayal i ‘o sapafeli no Kawas a sidaˈit.’ (ˈOsien ko Patnakay 5:18, 19.) Sanay cingra: ‘Masakenaay karorayan a tayal sahtoay o ciepocay.’ (Taneng 14:23) Matinakoay ni Solomon konini. Na adihayay ko tayal ningra, tinakoen palomaay to fadisosoˈ, patirengay to lomaˈ, paloma to kilang ato fanaw, mitomadawayho to adihayay niyaroˈ. (1 Hongti 9:19; Patnakay 2:4-6) Sahtoay o taˈangayay patirengay a tayal konini, mikitini maedeng milifokay cingra to karenec. Kawra mafanaˈay ci Solomon, sapilifokaw to soˈliˈlinay a lipahak, cowa konini aca ko hademak, mamirienangho to midokoay ci Yihofaan a demak. Tinakoen, mikantok cingra to patirengay to fangcalay sefi a tayal, pitoay miheca ko pipatireng tonini a makapahay fangcalay sefi. (1 Hongti 6:38; 9:1) Midemak to masakenakenaay a demak ikor, mahapinangay ni Solomon matayal saki Yihofaan ikakaay ko kalimlaan to picangacang to romaroma a demak. Sanay cingra: ‘Tolasen ko sowal i: Kangodoen ko Kawas, kaˈimeren a midoedo ko limoˈot Ningra.’—Patnakay 12:13.
9. Samaanay matatodong ko pinengneng ni Yis to tayal no niyah hani?
9 Ci Yis o malalokay matayal a tamdaw. Kaemangho cingra i, misasayhoay ko tayal. (Marko 6:3) Misaˈicelay cingra matayal, milowanay to ˈinorong no wama wina paliliˈ to paro no lomaˈ, maedeng misayaray to wama ato wina. Haratengen hena, o malefotay a tamdaw ci Yis, o idahiyay a inaneng ningra matayal maedeng adihayay ko masolotay a lafang, ano ci Yisto marenecay to nano tayal no niyah. Soˈlin mahaen, milimasmasay cingra to toki midoko to Kawas. (Yohani 7:15) Misatapang cingra miemin to toki mitosil pasifanaˈ to tamdaw ikor, pakalalokay to tao ‘aka pakayni mamapalak a kakaenen a matayal, ka pakayni i papaira to midaˈocay a ˈorip a kakaenen ko katayal.’ (Yohani 6:27) Itini kimad ni Yis i lotok sanay: ‘Ka pitaling to hafay no niyah i kakarayan.’—Matay 6:20.
Sasamaan kita itini katayalan ato pidoko a demakan mitafo to masadafdafay? (Nengnengen ko saka 10-11 fatac)e
10. Romaroma salikaka itini tayal tahalifaay to maanan a pasangaray alatek?
10 O sapafeli no Kawas a taneng padamaay kitaanan matatodong ko pinengneng to tayal. Palimoˈotay ko Fangcalay Cudad to Krisciyang: ‘Ka malalok, midemak to matatodongay a tayal.’ (Ifiso 4:28) ˈAlomanay tawki masemeray to soˈliˈlinay ko falocoˈ ita, malalokay matayal, pakahemekayho to ngaˈayay waywayan ita matayal. Makalimay kita ngaˈay ko pinengneng no tawki to Misawacayay Tamdaw ni Yihofa alatek, orato matongal matongalay ko toki a matayal. Nao ngaˈayay ko araaw, kawra papalidlid sato misakahmaw to ˈinorong no paro no lomaˈ ato midokoay to Kawas a demak. Ano mahaenay i, oha mamifalic kita, mitongal to toki no niyah midemak to kalimlaan a demak.
11. Pakayni i tayal ira ko matatodongay a pinengneng, mananamay no cecay faˈinayan salikaka ko maanan?
11 Mahapinangay no cecay kapah salikaka ci Wilin, itinien i matatodongay a kitiraan miteli to tayal pairaay to maanan a epoc. O tawki ningra isalakat o malohemay malitengay, onini a salikaka masadafdafay ko pinengneng to tayal ato nokaˈorip, o ngaˈayay a taˈarawan. Sanay ci Wilin: “Malalokay cingra, ngaˈayay ko midemakan, mansa maolahay ko lafang cingranan. Ikor no matayal cingra to cecay romiˈad, mafanaˈay to sasamaan paselaˈ to tayal, misamacay midimokos to paro no lomaˈ ato mihodop to Kawas. O salipahakay a kafanaˈan ako a tamdaw cingra!”b
MATATODONG KO PINENGNENG TO NIYAH
12. Itini kaemangho ci Solomon iraay ko maanan matatodongay a pinengneng to niyah hani? Kawra ikor samaanay mafalic ko waywayan ningra?
12 Tiya madimadi ci Solomon to Kawas i, matatodongay ko pinengneng to niyah. Kaemangho cingra tada misamimingay ko falocoˈ, mihaiyay to citolasay ko ˈicel no niyah, hanaca micangacangay to sakayat ni Yihofa. (1 Hongti 3:7-9) Satapang mikowan, mafanaˈay ci Solomon katalawan ko misatakaraway. Sanay cingra: “Pasayra i katekopan ko rakat no malataˈangay, o misatakaraway a tamdaw i, caay ka eca ka tefad.” (Taneng 16:18) Ka adayayan i, misowalan ni Solomon a sapirikec, cowa ka tooren no niyah. Mala hongti cingra to cecay liyad ikor mangalef mangalefay a misatakaraw, cowa to mipisikol to saali no Kawas. Tinakoen, o cecay sarikec no Kawas sanay: ‘Cowa ka ngaˈay adihay ko fafahi no hongti, hoeca ka piliyas ko falocoˈ ningra to matatodongay a lalan.’ (Limoˈot 17:17) Cowa pisikol ci Solomon tonini a saˈosi, 700 ko fafahi ato 300 ko kapi ningra, ilaloma nangra ˈalomanay ko midokoay to makaniway Kawas. (1 Hongti 11:1-3) Harateng ni Solomon mihaen ko demak cowa ko papaira to katalawan no niyah sanay, kawra ikorto pakayni noka eca pidofdof ningra ci Yihofaan micadaay to kaadayayan a teloc.—1 Hongti 11:9-13.
13. Wa ngaˈay kita mikitini misapoeneray a taˈarawan ni Yis minanam to maanan?
13 Tada misapoeneray ko falocoˈ ni Yis, padadotocay matatodong ko pinengneng to niyah. ˈAyaw no tayni i hekal, misarocoday cingra to falocoˈ ato ˈicel matayal saki Yihofaan, adihayay ko midemakan kasapaan a demak. Tinakoen, o maamaan i paro no kakarayan ‘sahtoay pakayniay cingranan a sangaˈen.’ (Kolosay 1:16) Ikor no micada to paputisem cingra, maharatengay ko na midemakan a kihcod i tatihi no kakarayan a Wama. (Matay 3:16; Yohani 17:5) Kawra cowa ka pakayni tonini a malitaˈang cingra. Na cowa ka pisaˈakawang cingra to niyah, misakahmaw to tao. Pasowalan ningra ko nisawawaan, tayni cingra i fafekang no sera ‘cowa ko mamatayal ko tamdaw saki cingranan, ao mamatayal saki tamdaw, hanaca patafang to ˈorip malo sapilidong to ˈalomanay tamdaw a sapatefoc.’ (Matay 20:28) Misamimingay ko falocoˈ ningra a pasowal, ano o mananto ko demak cowa pitoor to harateng no niyah a midemak. (Yohani 5:19) Tada misapoeneray ko falocoˈ ni Yis, tada o ngaˈayay a taˈarawan ita!
14. Pasifanaˈay ci Yis kitanan pairaen ko maanan matatodongay a pinengneng to niyah hani?
14 Pasifanaˈan ni Yis ko nisawawaan matatodong ko pinengneng to niyah. Kinacecayay, pasowalan ni Yis ko nisawawaan: ‘Ano o fokesto namo maeminay a misaˈosi.’ (Matay 10:30) Ano madoloay kita ira ko masofaway pinengneng to niyah, onini a sowal o mamikiriwiˈ a mihinom kitanan. Paihkalay ko sowal ni Yis, tada ciharatengay ko kakarayan Wama kitaanan, o kalimlaan kita sanay miharateng. Ano micadaan ni Yihofa ko pidoko ita, o ngangaˈay tahadaˈoc maˈorip i faelohay hekal saan miharateng, cowato ko cacisasa kita to pisawkit Ningra, awaay ko tatodong no niyah saan miharateng.
Pakidem misaareteng minengneng to niyah alatek wa malahdaw ita ko maanan a toki ato sapalemed? (Nengnengen ko saka 15 fatac)f
15. (1) O cecay Mikecolay a lalakaw palimoˈotay kitaanan, pakayni to niyah ira ko maanan a matatodongay a pinengneng hani? (2) Saka 24 fiedac a coka paihkalay, ano pakidemay kita misaareteng to niyah, aawa ko maanan a sapalemed?
15 ˈAyaw no 15 miheca, cecay lalakaw no Mikecolay palimoˈotay kitaanan pairaen ko matatodongay pinengneng to niyah. Sanay ko lalakaw: “Cowa ka ngaˈay kita patakaraw to niyah, misaˈakawang ko falocoˈ, kawra cowa ka ngaˈay pakidem ko harateng, hato misakahmaw to niyah. Matatodong ko pinengneng ita to niyah, ihkal a mafanaˈ to tolas no niyah, aka pisakahmaw to kangaˈayan no niyah. Cecay fafahiyan a Krisciyang sanay: ‘Cowa ko tatiihay tamdaw kako, cowa ko malefotay tamdaw, malecaday to polong a tamdaw, iraay ko kangaˈayan ako, iraay ko dangoc.’”c Ano ngaˈay irako mahaenay matatodongay a pinengneng ita to niyah, maedeng wa milifok to adihayay a epoc.
16. Hano pafelien ni Yihofa kita to sakayat?
16 Pakaynian ni Yihofa i Fangcalay Cudad mikayat kitaanan, paira to taneng ita. Maolahay Cingra kitanan, makalimay lipahak kita. (Isaya 48:17, 18) O pidoko ita ci Yihofaan a demak paitinien i salakat no kaˈorip, o matanengay a demak konini, ngaˈay milifok to sataˈangayay a lipahak. Mihaen, caayto kita kalecad toya pakidemay misaareteng to payci, katayalan ato niyah a tamdaw adihay ko pasangar ato cariraw. Nanay kita mapolong misetek to falocoˈ, malo citanengay a tamdaw, pakahemek to falocoˈ ni Yihofa!—Taneng 23:15.
RADIW 251 Arayen ko Kawas Pafeli to Fangcalay Cudad
a Ci Solomon aci Yis tada citanengay, o taneng nangra sahtoay mikitiniay i Kawas ci Yihofaan. Pakayni sasamaan matatodong ko pinengneng to payci, tayal ato niyah, ci Solomon aci Yis itini Fangcalay Cudad mihadakay to citanengay a sapalimoˈot. Onini a lalakaw mamilengo mikitini tonini a sapalimoˈot ngaˈay mananam ita ko maanan, mamilengoho papina a salikaka midoedo tonini a sapalimoˈot milifokay to maanan a epoc.
b Nengnengen ko Mikecolay Saka 2 Folad 1, 2015, “Samaan Mikitini Tayal Makilim ko Lipahak.”
c Nengnengen ko Mikecolay a lalakaw Saka 8 Folad 1, 2005, “Ngangaˈay Padama ko Fangcalay Cudad Tisowanan Malifok ko Lipahak.”
d TATODONG NO COKA: Ci Yohani aci Tamo oniya tatosaay kapah faˈinayan salikaka itiniay i malecaday a kasakopang. Adihayay ko mipalakan ni Yohani a toki mitomadaw to paliding no niyah, ci Tamo i tano niyah a paliding micada to salikaka mirienang to mitosilay ato saˈopo.
e TATODONG NO COKA: Miciyapanay ci Yohani. Cowa sapatoledaw to tawki cingra, ano hacowato a tatokian papiciyapan ko tawki cingraanan i, mihaiyay to cingra. Itini i malecaday a tatokian, o dama a sikawdan ci Tamo malacafayay to malohemay malitengay milisoˈ to salikaka. Iˈayaw maherekay to cingra pasowal to tawki, pakayni mirienang to midokoay to Kawas a demakan, itini i lalomaˈ no cecay lipay cowa ko mamiciyapan ko niyah.
f TATODONG NO COKA: O niyah aca ko kaciharatengan ni Yohani. Ci Tamo sa i paitinian i salakat ci Yihofa, midamaay cingra to miliyaway misangaˈ to pitaykayan, mihaenay hato ˈalomanayto ko kafanaˈan a faelohay a widang.