“Makalimay Kako Matayal Saki Yihofaan”

Sapadotocaw somowal toniya tawcikel i, salakat somowal kako to samaanay misatapang kako miemin to toki matayal saki Kawas.

1942 miheca, itiniay i Kolaso hofocen kako. Oniya makapahay a potipot itiniay i Kalepiya, o wama ako pakayni i tayal mikitiniay i Solinan malinah tayni. ˈAyaw hofocen kako pina miheca malo Misawacayay Tamdaw ni Yihofa cingra, o salakatay micada to paputisem a tamdaw i potipot.a Kahacecay lipay pasifanaˈay ko wama tamiyanan papina wawa minanam to Fangcalay Cudad, soˈlin hinasalamaay kami, kawra kamayan cingra mihaen to demak. 14 ko mihecaan ako, sapidimokosaw ko wama to matoˈasayto a wina ningra, miˈorongay to paro no lomaˈ patikol malinah tayra i Solinan.

NGAˈAYAY WIDANG, NGAˈAYAY KO PIFIYOR

Itini Solinan, misatapangay kako macacawmaˈ to fanekfekay midoko ci Yihofaan a kaemangay a tamdaw i kasakopang. Ikakaay to pina miheca cangra takowanan, hanaca sahtoay o misakafahay. Ano milengo cangra to nalifetan mitosil tada lipahakay mahemek. Maherek ko saˈopo ikor i, kami papina a widang padadotocay malalengo to lalakaw no Fangcalay Cudad, nolatekay i papotalay kami maroˈ, minengnengay to foˈis a masasowal. Oniya widang padamaay takowanan mahela ko patosokan no kaˈorip! Makalimay kako matayal saki Yihofaan, orato 16 ko mihecaan ako micadaay to paputisem, hanaca itini 18 ko mihecaan misatapangay malo misakafahay.

MANANAMAY KO KALIMLAAN A KIMAD

Malo misakafahay i adihayay ko mananamay ako, padamaay takowanan itini mieminay to toki a tayal ngaˈay ko katayal ci Yihofaan. Mananamay ako a cecay demak i, pahatatanam to tao o kalimlaan. Misatapang kako misakafah i, o faˈinayan salikaka ci Wilim Fansaye tada midimokosay takowanan, o mikiriwiˈay manilnil a mitosilay cingra, pasifanaˈay cingra takowanan to adihayay a demak, pasifanaˈ takowanan sasamaan misaysay to tayal no kasakopang.b Ikor ngaˈ mafanaˈ to kako, tada misaaliay kako toniya pihatatanam, saka 2 miheca manilnilayto kako malo mikiriwiˈay misakafahay, itini Solinan a colin midimokos to roma maraayay a kapot. Tada miakoˈiday kako to matatodongay a sapahatatanam no salikaka! Mikitiya misatapang, padotocay kako mimetmet to toki pahatatanam to tao.

Saka 2 kalimlaan mananamay ako i, kantangen ko kaˈorip, misongilaˈho mihalaka misaˈosi. Itini satapang no folad, kako ato mikiriwiˈay misakafahay a cafay mamisongilaˈ miharateng, dotoc a cecay folad misaaliay to manan a dafong, ikor lalomaˈ no cecay tamdaw niyam tatayra i maraayay a maci micakay to dafong. Cowa ka adihay ko lifon no niyam, mansa mamisongilaˈ misaˈosi, mirahid to kakaenen mihaen ngaˈ malakowit ko cecay folad. Itini colicolingan ano maeminto ko dafong, soˈlin caay ka fanaˈ o cima ko ngangaˈay padama tamiyanan! Mikitini kaemang a tatokian mananamay ako misongilaˈ mihalaka misaˈosi, kantangen ko kaˈorip, onini padamaay takowanan hakelong no kaˈorip misamacay to tayal ni Yihofa.

Saka 3 kalimlaan mananamay ako i, tano wina a sowal no tao pasifanaˈ cangranan minanam to Fangcalay Cudad matongalay ko kangaˈay. Kaemangho mafanaˈay to kako somowal to Helan a sowal, Padaka a sowal, Papiyamento a sowal, ato Siranantociya a sowal no Solinan. Kawra mahapinangay ako, itini colicolingan tano wina a sowal no itiraay a tamdaw mitosil i, matongalay ko kaolah no tamdaw. O roma sowal pasangaray nanamen, tinakoen o sowal no Saramaka, o hatiniay a sowal iraay ko ˈakawangay iraay ko poeneray a ngiha, mansa pasangaray nanamen. Kawra, o mihadakan ako a ˈicel iraay ko epoc. Halafinay mihecaan, samanen mafanaˈay kako to sowal no itiraay a tamdaw, mansa ngaˈay padama to ˈalomanay a tamdaw mafanaˈ to soˈlinay kimad.

Manaokaniw, o pinanam to roma a sowal adihayay ko kangodoan a nalifetan. Kinacecayay, o cecay somowalay to Saramaka a sowal a sito no Fangcalay Cudad adadaay ko tiyad, harateng ako milicay cingranan “samanayto kiso,” kawra ora salicay ako i “mapoyapoyay kiso han.” Haratengen hena, maedeng pakangodoay cingranan. Soˈlin marariday kako mihadak to mahaenay katawaan a sowal, kamayan kako misarocod tano sowal no itiraay a tamdaw a mitosil.

MITAMORONG TO ADIHAYAY ˈINORONG

1970 miheca, manilnilay kako malo kasakilac kantok. Toya miheca itiniay i colin adihayay maraayay kapot pasadakay kako to cecay ika, lalangian i “Minengneng to Congpo no Misawacayay Tamdaw ni Yihofa.” Sapiˈarawaw to salikaka, kako ato papina faˈinayan salikaka mikalicay to cecay koedaway a tamina, midoedoay to ˈalo micomod i lalomaˈ no colin. Miˈorongay kami to sapatingki a kikay, paetang no simal, simal no tinghoy ato sapasadak to ika a kikay tayni i tamina. Ikor tahira kahiceraan ko tamina, mionpangay kami toniya kikay patayra i pihadakan a kitiraan. Caay ka mapawan ako i, itini maraayay kilac a tamdaw tada maolahay minengneng toniya ika. Ngaˈay padama to tamdaw mafanaˈ ci Yihofaan ato likakawa Ningra i fafekang no sera, tada lipahakay kako. Soˈlin matayal ci Yihofaan adihayay ko mihadakan, kawra palalinien to malifokay ako a sapalemed, oniya kinafalah cowa ka samaan.

SATOLOEN A MIKAERED KO SASOˈOT

Soˈlin mahapinangay ako ano matayal ci Yihofaan caka ciramod adihayay ko kangaˈayan, kawra kamayan makalim kako ira ko cafay i hakelong no kaˈorip. Orato misatapangay misongilaˈ kako pasayra ci Yihofaan mitolon, micangacang Cingranan padama takowanan mahela ko malalokay ngaˈayay a fafahi, mihaen tatosa kami ngaˈayay lipahak itini colin malacafay miemin to toki matayal. Maedeng cecay miheca ikor, satapangay kako makakaolah ci Aysayean. O mikiriwiˈay misakafahay cingra, iraay ko kinafalahay a harateng ningra. Mikitini kaemangho misatapang tada masemeray cingra to tarokos ci Pawloan, makalimay malecad ci Pawloan misarocod mirienang to mitosilay tayal. Itini 1971 miheca 9 folad mararamoday kami, hanaca misatapangay malacafay milisoˈ to kasakilac a tayal.

Mikikaemang tahira i liteng awaay ko sinowayay a nokaˈorip ni Aysaye, mansa madoloay a mananam cingra to milisoˈay a tayal i colicolingan. Misaday kami milisoˈ to kasakopang i colicolingan i, cowa piˈorong to adihayay a dafong. Mifacaˈ ato maynoˈ kami itiniay i ˈalo. Mihamhamay tamiyanan a tamdaw o manan ko malepelay i colicolingan, anca malepelay i ˈalo, o manan ko mikaenan niyam, tinakoen makaenayto niyam ko falalodaˈay ato komaenay to tamdaw a foting. Awaay ko piyar, tano papah hananay no pawli a miˈatal to kakaenen, awaay ko saka komaen a lalosidan, tano kamay hananay niyam a komaen. Miharateng kako aci Aysaye, samanen patafangay kami to niyah malacafay matayal saki Yihofaan, patanektekay to raramod niyam, malecad o misatoloan a mikaered ko sasoˈot. (Patnakay 4:12) Onini a kalimlaan a nalifetan awaay ko pakaliniay, soˈlin miliyaw ko kaˈorip, o kakamayan kami mipiliˈ to mahaenay a nokaˈorip.

Itini pinokayan niyam i colicolingan a lalan, tahalifaay to misowalan i satapang katalawan a demak. O tamina niyam micomod i cedas no ˈalo ikor, cecay liyad matolemay i nanom, kawra tangsolay masadak i fafekang no nanom. Kao ngaˈayay caay ka tefad kami i nanom, hanaca micaˈedongay kami to sapilidong to ˈorip a rikoˈ. Kawra o tamina niyam sahtoay o nanom, orato mitaktakan niyam ko piparoan to kakaenen a talid, ikor tano talid micihok to nanom pasadak i tamina.

Padadotocay talaˈayaw ko tamina niyam. Samanen awaayto ko kakaenen niyam, tanamay kami mipacemot to foting, kawra awaay ko malepelay. Orato mitolonay kami ci Yihofaan, micangacang Cingranan pafeli tamiyanan to kakaenen toya romiˈad. Mahererek ko pitolon niyam, cecay salikaka miferet to pacemot. Caay ka harateng malepelay ningra ko cecay taˈangayay foting, hato mafocolay kami lalima toya dadaya.

TOLOAY KO ˈINORONG: O FAˈINAY, O WAMA, O KASAKILAC KANTOK

Midemak to milisoˈay a tayal lima miheca ikor, milifokay kako aci Aysaye to cecay caay ka harateng a sapalemed. Wa malo wama winato kami! Tada mahemekay kami, kawra cowa ka fanaˈ to iraay ko maanan a pifiyor to kaˈorip niyam. Makalimay kako aci Aysaye padadotoc materek i mieminay to toki matayal. 1976 miheca, o sakacecay a wawa niyam ci Aytenie mihofocanto. Ikor no tosa ira ko kalitosa a miheca, iraay aca ko sakatosa a wawa niyam ci Ciyawani.

Itiya tada misaaliay to kasakilac kantok i Solinan, milimasmasay ko fenpo takowanan padadotoc midemak to milisoˈay a tayal. Kaemangho ko wawa i, manilnilay kako milisoˈ to cowa ka ˈaloman ko kasakopang a kasakilac. Cecay folad wa tano tosa lipay a toki kako milisoˈ to kasakopang, ˈosawto a toki wa itini i kasakopang no niyah malo misakafahay. Ano mangataay no lomaˈ ko milisoˈan ako a kasakopang, miˈorongay to wawa ci Aysaye malacafay takowanan. Kawra ano tayra kako i colicolingan milisoˈ to kasakopang i, anca iraay ko taykay i colicolingan i, cecayayto kako a tayra.

Sapitamorongaw to kihcod a ˈinorong, mamisongilaˈ kako a mihalaka. Milimasmasay kako, to lipalipay ngaˈay misikay to pakalomaˈay a pidoko. Ano milisoˈ kako to kasakopang itini colicolingan i, ciˈinorongay misikay ci Aysaye to pakalomaˈay pidoko. Kawra ano ngangaˈay i, malacafayay ko paro no lomaˈ niyam a midemak. Kako aci Aysaye miceriday miˈorong to wawa malacafay midemak to sakangaˈay no tireng a demak, tinakoen misalama, anca tayra i makapahay a kitiraan romakat. Sapidemakaw to tayal no likakawa, miceriday tahira i lafii matayal kako, ci Aysaye o masowalay no Taneng 31:15 a ngaˈayay a fafahi, to romiˈamiˈad ecaho ka taengad ko romiˈad lomowaday to cingra. Mihaen, ˈayaw no tayra i picudadan ko wawa i, ngaˈay malacafay malanam ko paro no lomaˈ, malacafay milengo to pakaromiˈaday sinael. O ngaˈayay a fafahi ako iraay ko kinafalahay a harateng, misarocoday cingra padama takowanan mitamorong to patorodan ni Yihofa a kihcod a ˈinorong, tada miakoˈiday kako cingranan!

Misaˈicelay kami mararamod padama to wawa maolah ci Yihofaan, maolahho to mitosilay a tayal. Makalimay kami to wawa mirienang to mieminay to toki matayal i Kawas, kawra o tokel niyam mihaen ko pidemak nangra cowa ko sapakahemekaw tamiyanan, ao iraay ko mahaenay a kalim nangra. Marariday kami somowal to mirienang to mieminay to toki matayal tada o lipahakay. Caay ka piliyas kami milengo to pasangaray, kawra adihayay ko pilengo niyam to samaanay ci Yihofa padama ato palemed to paro no lomaˈ niyam. Misaˈicelay kami milimasmas to masakenaay a toki, padama to wawa mala widang no misarocoday matayal ci Yihofaan a salikaka.

Padadotocay ci Yihofa midimokos to saali no paro no lomaˈ niyam. Manaokaniw, misarocoday kako mitamorong to ˈinorong no niyah. Caho ka ciramod kako itini colicolingan malo mikiriwiˈay misakafahay, itiya mananamayto ako sasamaan misaka dademak to payci. Kawra soˈlin misarocodayto nolatekay, pasangarayho ko sakaˈorip niyam. Tikolen miharateng, toniya pakayraan midimokosay ci Yihofa tamiyanan. Tinakoen itini 1986 tangasa 1992 miheca a tatokian, mifekaday ko kalalood no finacadan i Solinan, mansa nolatekay pasangaray malifok ko sakaˈorip. Kawra kamayan ci Yihofa padadotoc midama to sakaˈorip niyam.—Matay 6:32.

TIKOLEN MIHARATENG

Tikolen miharateng ko hakelong no kaˈorip, padadotocay midimokos ci Yihofa tamiyanan, lipahakay ato marenec ko kaˈorip niyam. O wawa o kalimlaan a sapatelong ni Yihofa tamiyanan, mahemekay kami pasifanaˈ cangranan malo maolahay ci Yihofaan a tamdaw. Maˈaraw cangra mipiliˈ to mieminay to toki matayal saki Yihofaan, tada mahinomay ko falocoˈ niyam. Ci Aytenie aci Ciyawani na mirienangay to pahatatanaman no likakawa, nohatini cangra ato fafahi itiniay i fenpo no Solinan a matayal.

Anini malitengayto kako aci Aysaye, kawra kamayanho kami tano mikiriwiˈay misakafahay matayal saki Yihofaan. ˈIfowaayho kami nohatini, awaayho ko toki ako minanam midangoy! Kawra cowa ka makesem kako. Tikolen miharateng, itini kaemangho i mipiliˈ to mieminay to toki matayal malo tayal no hakelong no kaˈorip, tada o citanengay a saˈosi sanay kako miharateng.