‘Maˈaraway’ Nangra ko Olah no Salikaka

ITINI i Kowatimala a mimingay niyaroˈ ko lomaˈ ni Yomara ato tatosa a safa ningra ci Masaylo aci Iwi. Ci Yomara ko kaˈayaway malacafay to Misawacayay Tamdaw ni Yihofa mikingkiw to Fangcalay Cudad, dotoc i, o safa ningra tatosa mikihatiyaay a minanam. Kawra, maka mapohaway cangra malikaka tatolo, mafokilay to tano kamayan a mikama a cudad. Misahatiraay i, asipanho no pakingkiway ko kihcod a sinael ato fatac patengil cangranan.

Sapirienangaw to saˈopo cangra cowa ko madoloay. Samanen ingataay nangra a Kasaˈopoan i, maedeng 40 ehon ko karaay, mansa awaay ko pakayraan malingad. Oranto i, milimasmasan no salikaka, pakalic cangranan mirienang to saˈopo. Ikorto, misatapangayto malikaka tatolo to mihatatanamay a kamok itini mitosilay ato nikaˈorip a saˈopo, padamaen no salikaka cangra paiharateng han i ponoˈ ko hahadaken a kimad.

Itini 2019 miheca 5 folad, iraayto i niyaroˈ nangra ko saˈopo no kasakopang. Itiya i, iraay ko mararamoday a misakafahay malinah tayra tora niyaroˈ nangra. Soˈliˈlin cowa ka fanaˈ cangra tano kamayan mikama a cudad, kawra patirengay cangra to patosokan to sapakafanaˈaw tora tatoloay malikakaay mafanaˈ miˈosi ato tano kamayan mikama a cudad. Oranto i, micaliway cangra i tosokowan to tilid no mahaenay a cudad, halo mihatatanam pakafanaˈ to mapohaway tamdaw a tilid.

Pi:nato a folad ikor onini tatoloay mafanaˈayto to tano kamayan mikama a cudad, misahatiraay haw i, kalikiayto macakat cangra itini soˈlinay kimad. Anini sato i, ci Yomara, ci Masaylo aci Iwi mala misakafahayto, ci Masaylo i, malo damaay a sikawdan cingra. Fanekfekay cangra mirienang to masakenakenaay midokoay a demak to lipalipay, ora nika faedet no falocoˈ nangra tada mikowaday to romaroma a salikaka.

Miakoˈiday cangra tatolo to ciolahay falocoˈ no salikaka a padama cangranan. Sowal sa ci Yomara: “Sakinacecay malitemoh niyam ko Misawacayay Tamdaw ni Yihofa i, padadotocay cangra mipaihkal to soˈlinay olah no Krisciyang.” Sowal sa ci Masaylo: “Itini kasakopang kami iraayto ko ngaˈayay widang, masalalomaˈayto no matomesay ko olah a masakapotay salikaka i paro no kakarayan.” Ci Yomara ato tatosaay a faˈinayan a safa hinatalaay cangra pakaˈaraw ko mata to nika malakoing nonini a cikiw.—ˈOlic 37:10, 11; Isaya 35:5.