Mikitini Kita i Nidemakan ni Yis Kafahkaˈan a Demak Mananam ko Maanan?

1. Itini masamaanay a pakayraan midemakay ci Yis to saka cecay kafahkaˈan a demak?

ITINI i sakaˈamis no Nacali i niyaroˈ ni Yis, iraay ko cecay a niyaroˈ o Kana hananay. Itini kafalawfawan no Kongyen 29 miheca, itiya toya pisatapangan ni Yis a mitosil, cingra ato wina ningra ci Mariya ato papina nisawawaan, matahidangay tayra i Kana a mirienang to pakaetimay. O widang ni Mariya konini pakaetimay a lalomaˈan, ano nengnengen mipadangay cingra mihamham to lafang. Ikor. ˈalomanay ko mirienangay a lafang, mataˈlifay ko misaˈosian, ˈarawhan maeminayto ko epah! Onini a demak o papakangodo to faelohay mararamoday ato paro no lomaˈ nangra.b Tangsolay, mikilim ci Mariya ci Yisan, pasowal cingranan: ‘Awaayto ko epah nangra.’ (Yohani 2:1-3) Samaanayto ko demak ni Yis hani? Midemakay cingra to cecay kafahkaˈan a demak, pala ‘sangaˈayay a epah’ to nanom.—Yohani 2:9, 10.

2-3. (1) Hano nidemak ci Yis to kafahkaˈan a demak hani? (2) Misongilaˈ a miharateng to nidemakan ni Yis a kafahkaˈan a demak, iraay ko maanan a epoc kitaanan hani?

² Ikor nonini, midemakayho ci Yis to adihayay kafahkaˈan a demak, padama to masacaˈolay masaemangay a tamdaw.c Tinakoen, kinacecayay pafecolan ningra ko 5,000 a faˈinayan tamdaw, kinacecayayho 4,000 a faˈinayan tamdaw ko pafecolan ningra. Ano saˈosien ko itiraay a fafahiyan ato wawa i, maedeng mataˈlifay ko 27,000 a tamdaw. (Matay 14:15-21; 15:32-38) Itini toniya tosa a kitiraan, miadahan ni Yis ko ˈalomanay adadaay a tamdaw. (Matay 14:14; 15:30, 31) Pakayni nidemakan ni Yis a kafahkaˈan, fahal sanay miliyaw tanoktok ko tireng no ˈalomanay, hanaca micada to kakaenen, maedeng fahkaˈan nanay cangra!

³ Anini, mikitini i nidemakan ni Yis a kafahkaˈan a demak adihayay ko mananamay ita. Onini lalakaw mamilengo to pina masakalimlaan a kimad paˈicel to pakasoˈlin no falocoˈ. Mamilengoho ko lalakaw, nidemak ci Yis to kafahkaˈan a demak i, samaanay paihkal to misapoeneray ato siniˈadaay a falocoˈ, ato sasamaan kita mitodong cingranan, palahad to hatiniay tosa makapahay a capeling.

PAKAYNI CI YIHOFAAN ACI YISAN A MASAKALIMLAAN A KIMAD

4. Mikitini kafahkaˈan a demak ni Yis mananamay ita ko pakayniay cimaanan a masakalimlaan a kimad?

⁴ Pakayni nidemakan ni Yis a kafahkaˈan a demak, padamaay kitaanan mafanaˈ cingranan, padamaayho kitaanan mafanaˈ ci Yihofaan, samanen o sapidemak ni Yis to kafahkaˈan a demak a ˈicel sahtoay naitiniay ci Yihofaan. Sowal no Dmak 10:38: ‘O Kawas tano fangcalay saocor minilnil cingranan malo Kristo, pafelien cingra to ˈicel. Mirakat cingra to niyaroaroˈ a midemak to ngaˈayay, miadah to polong mapaekelay ni Akoma a tamdaw, samanen kalacafayay ko Kawas cingranan.’ Roma haratengen, somowal anca dademak ci Yis, ato nidemak to kafahkaˈan a demak i, o harateng ato nafalocoˈan ningra malecaday to kakarayan Wama. (Yohani 14:9) Dotoc mamilengo, mikitini kafahkaˈan a demak ni Yis mamananam ita ko tolo a kimad.

5. Midemak ci Yis to kafahkaˈan, samanen iraay ko masamaanay a nafalocoˈan ningra to tamdaw? (Matay 20:30-34)

⁵ Saka cecay, tangongolay ko olah ni Yis aci Yihofa kitaanan. Ta itiniho ci Yis i fafekang no sera i, midemakay cingra to kafahkaˈan a palahdaw to roray no tamdaw, mahapinangay ita itini tangongolay ko olah ningra to tamdaw. Kinacecayay, tatosa a mapohaway tamdaw milekalay mingitangit ci Yisan to sapadama ningra. (ˈOsien ko Matay 20:30-34.) Sinanoten hena, samanen ‘siniˈadaay cangranan’ ci Yis sanay ko sinael, hato miadahan cangra. Ora mihongyakan ‘siniˈadaay’ sanay a Krisiya a sowal, maˈaraw ni Yis ko tamdaw misemsem hato matapaˈay no poˈot ko falocoˈ ningra. Roma sa i, pafecol ci Yis to macahiway tamdaw, miadah to malonoˈay a adadaay tamdaw, mikitiniay i tangongolay a siniˈadaay a falocoˈ ko sapihaen ningra to demak. Siniˈada ci Yis to tamdaw, samanen o ciolahay cingra. (Matay 15:32; Marko 1:41) Papakasoˈlinen ita, ‘matomesay ko sidaˈitay’ a Kawas ci Yihofa ato kanonoˈan Ningra a Wawa ci Yis, tangongolay ko kaolah kitaanan, maˈaraw ko nika pisemsem ita i, tada adadaay ko falocoˈ Nangra. (Luka 1:78; 1 Pitiro 5:7) Maedeng miharatengay Cangra to sapikalikiaw a palahdaw to kihcod a pades, ho ecato ka pisemsem ko tamdaw.

6. Pafelian no Kawas ci Yis to ˈicel midemak to maanan?

⁶ Saka tosa, pafelian no Kawas to ˈicel ci Yis, palahdaw to polong pasangaray no tamdaw. Mikitini i nidemakan ni Yis a kafahkaˈan mahapinangay ita, awaay ko hapakayraan ita misaysay to pasangaray, ˈarawhan madoloay a madangar ni Yis. Tinakoen, iraay ko ˈicel ningra palahdaw to lamit no roray, oya pairaan no mirocokan ita a raraw, ato pairaan no raraw a adada ato patay. (Matay 9:1-6; Loma 5:12, 18, 19) O nidemakan ni Yis a kafahkaˈan misawacayay, ngaˈayay cingra a miadah to ‘masakenakenaay a adada,’ ato patikol paˈorip to mapatayay tamdaw. (Matay 4:23; Yohani 11:43, 44) Roma i, iraay ko ˈicel ni Yis paterep to faliyos, milaplap to tatiihay coyoh. (Marko 4:37-39; Luka 8:2) Pafelian ni Yihofa ko kanonoˈan a Wawa Ningra to taˈangayay a ˈicel, mafanaˈ toninian tada rihadayay ko falocoˈ ita.

7-8. (1) O nidemakan ni Yis a kafahkaˈan papasoˈlinen ita ko maanan? (2) Hinatalaay kiso itini faelohay hekal maˈaraw ko maanan a kafahkaˈan a demak hani?

⁷ Saka tolo, o Hongti Kitakit no Kawas papalemed to tamdamdaw noikor. O Hongti no Kitakit no Kawas ci Yis, mamikowan to polong no cikiw. Mikitini nidemakan ningra a kafahkaˈan a demak mahapinang ita, papalaˈosien ningra ko masamaanay a demak, hanaca mikikaka ko kataˈangay. Haratengen hena, kakalikito a milifok kita to masamaanay a sapalemed. Ira ko malefotay tanektekay a tireng ita, samanen papalahdawen ni Yis ko pasemsemay to tamdaw a adada ato samoˈ. (Isaya 33:24; 35:5, 6; Paˈarawan 21:3, 4) Cowato ko mamacahiw kita anca tahapades. (Isaya 25:6; Marko 4:41) Lalipahak kita militemoh to patikolay maˈorip a salawina. (Yohani 5:28, 29) Itini faelohay a hekal hinatalaay kiso maˈaraw ko maanan kafahkaˈan a demak hani?

⁸ Midemak ci Yis to kafahkaˈan i, tada misapoeneray, siniˈadaay to tamdaw, oniya tosa a capeling papalahaden no mita. Nengnengen ita ko tosa a maˈoningay, o saka cecay i, o nidemakan ni Yis i Kana a kafahkaˈan a demak.

MISAPOENER TO WAYWAYAN

9. Itini pipakaetiman midemakay ci Yis to maanan hani? (Yohani 2:6-10)

⁹ ˈOsien ko Yohani 2:6-10. Maeminto ko epah i pakaetimay i, iraay ko ˈinorong ni Yis mimaan han? Awaay, samanen awaay ko sapairasol to mamidemak ci Misiya to kafahkaˈan pala epah to nanom. Haratengen hena, ano maeminto ko epah i pakaetiman iso i, sasamaan ko harateng iso hani? Maedeng siniˈadaay ci Yis tora mipakaetimay a paro no lomaˈ, mangalefay oya faelohay a mararamoday. Cowa ka ciharateng cingra to mamangodo cangra, hato midemakay tora nisowalan i satapang fatac a kafahkaˈan a demak, midemakan ningra ko 390 kongsen a nanom pala sangaˈayay a epah. Matira ko kaadihay no epah maedeng iraay ko ˈosaw, mihaen i, onini a faelohay mararamoday irato ko maˈosaway hanoikor, anoca pacakayen nangra ira ko payci. Tada taˈangayay ko pipadang ni Yis cangranan!

10. Yohani saka 2 fedengan maˈoningay ko maanan kasemeran ita a demak? (Nengnengen ko coka.)

¹⁰ Yohani saka 2 fedengan maˈoningay ko pina kasemeran a demak. Sinanoten ita, cowa pikidat ci Yis to sapinengnengaw no tamdaw to pidemak ningra. Tinakoen, cowa ko cingra ko mitomesay to nanom i koreng, papidemakan ningra ko matayalay. (Saka 6, 7 sinael) Maherek cingra pala epah to nanom ikor, cowa ko cingra ko pafeliay to epah i citodongay to tahka a tamdaw, ocoran ningra ko matayalay tamdaw midemak. (Saka 8 sinael) Roma sa i, cowa ka pitatiw ci Yis to ciepahay a katotong, itini i kaˈayaw no lafang a pasengi: ‘Ati, mitanam tonini pala epahan ako a nanom, tada kaesoˈayto a nanomen!’

11. Mikitini i pipala epah ni Yis to nanom a kafahkaˈan a demak, mamananam ita ko maanan hani?

¹¹ Mikitini kita to pipala epah ni Yis to nanom a kafahkaˈan a demak, mamananam ko maanan hani? O misapoeneray. Midemak ci Yis tonini a kafahkaˈan cowa ka sapipasengiaw to niyah. Soˈlinay haw i, to hati:niay cowa ka pasengi cingra to nano demak no niyah. Mitawmecay cingra to misapoeneray, panokayan ningra ko ˈdil i Wamaan. (Yohani 5:19, 30; 8:28) Ano mitodong kita ci Yisan, mararid a mitawmec to misapoeneray i, cowa ko papahiyo kita to nano demak no niyah. Ano o mananto ko midemakan ita i ci Yihofaan, nanay cowa ko mamalitaˈang kita, o papaˈdilen koya midokoan ita tadamaanay a Kawas. (Yirimiya 9:23, 24) Nanay panokayen ita ko kihcod a ˈodingar i Cingranan. Citatodongay Cingra toninian, samanen ano awa ko sapadama Ningra, cowa ko mamalaˈosi ko maamaan a demak ita.—1 Korinto 1:26-31.

12. Sasamaan kita mitodong ci Yisan mala misapoeneray a tamdaw? Sadaken ko tinakoan hena.

¹² Sinanoten sasamaan kita mitodong ci Yisan malo misapoener a tamdaw. Haratengen hena, o cecay kaemangay a dama sikawdan misadayay cingra to sakinacecay a pakapapotalay a kimad, o cecay malohemay malitengay adihayay ko mapalakay a toki padama cingranan. Telocto, ngaˈayay ko pikimad nora kapah a salikaka, mapakalalokay ko salikaka maemin. Ikor no saˈopo, iraay ko pasowalay tora malohemay malitengay: “Tada ngaˈayayto tengilen ko kimad noya salikaka, samaanay ko piharateng iso hani?” Alatek wa saan koniya malohemay malitengay: “Hayi, ngaˈayay ko kimad ningra, kawra adihayay ko mapalakay ako a toki padama cingranan.” Mihaen ko sowal ningra misapoeneray han? Anca wa ngaˈay haenen ningra ko sowal: “Hayi, ngaˈayay ko kimad ningra, patadoay kako cingranan a mahemek.” Ano misapoeneray kita, o mananto ko demak ita to tao, aka pahiyo to niyah. O nano demak ita maˈaraway ni Yihofa, misalimlaay Cingra, mafanaˈ toninian i, marenecan nanayto kita. (Nengnengen ko Matay 6:2-4; Hipray 13:16) Mitodong kita ci Yisan mala misapoeneray a tamdaw, wa pakahemek to falocoˈ ni Yihofa.—1 Pitiro 5:6.

SINIˈADA TO TAO

13. Itini i ngata no Nain a niyaroˈ maˈaraway ni Yis ko maanan? Ikor midemakay cingra to maanan? (Luka 7:11-15)

¹³ ˈOsien ko Luka 7:11-15. Kongyen 31 miheca ikor no Pitaˈlifan a Lisin, tayraay ci Yis i Nain niyaroˈ no Kalili. Onini a niyaroˈ mingataay to Sunim, maedeng ˈayaw no 900 miheca, pairasolay ci Ilisa itiniay i Sunim patikol paˈorip to wawa no cecay fafahiyan. (2 Hongti 4:32-37) Ta mangatato tahira ci Yis i ˈadawang no Nain i, malitemohay ko mitademay masadak nai niyaroˈ. Ilalomaˈ nangra i, iraay ko cecay tada mararomay a fafahiyan, ˈalomanay ko tamdaw i tatihi ningra. O maponengay a fafahiyan cingra, o tada edengan a wawa ningra koya mapatayay. Tada kasomadan konini! Paterep hananay toni Yis konini a mitademay, ikor midemakay to kafahkaˈan a demak. Patikolan ningra paˈorip ko wawa nonini masomaday a wina! Sepat Ratoh a Cudad kinatoloay somowal to pipaˈorip ni Yis to mapatayay, o sakinacecay konini.

14. Luka saka 7 fedengan maˈoningay ko maanan kasemeran ita a demak? (Nengnengen ko coka.)

¹⁴ Luka saka 7 fedengan maˈoningay ko pina kasemeran a demak. Sinanoten, isalakatay maˈaraw ni Yis konini masomaday a wina ngaˈ, masadakay ko siniˈadaay a falocoˈ ningra. (Saka 13 sinael) Alatek onini a wina romakatay i kaˈayaw no mililiday to mapatayay a tamdaw, tatangic sanay a romakat. Maˈaraw ni Yis cingra i, sasiniˈada sanay cingranan. Kawra cowa ko kasiniˈada aca ko harateng ni Yis, palademakan ningra kora siniˈadaay a falocoˈ. Hananay ni Yis cingra: ‘Akato a tomangic.’ Somowal cingra tonini a sowal i, maedeng damsayay ko ngihaˈ ningra. Oranto i, palowaden ni Yis kora mapatayay, ‘patorod hanto cingra i wina ningra.’—Saka 14, 15 sinael.

15. Mikitini to nidemakan ni Yis a kafahkaˈan a demak, mananamay ita ko maanan hani?

¹⁵ Pakayni nidemakan ni Yis a kafahkaˈan o mamananam ita ko maanan hani? Oha sasiniˈada kita to tahalifaay to mapatayay ko salawina a tamdaw. Manaokaniw, cowa ka hatira kita ci Yisan ngaˈay a paˈorip to mapatayay tamdaw. Kawra ngaˈayay kita pahecad ci Yisan, ciharateng to roray no falocoˈ no mapatayay ko salawina a tamdaw, mihaen i, wa matongal ko siniˈada ita cangranan. Ikor i, palademaken kora siniˈadaay falocoˈ. Talaˈayaw kita pasowal to sahinom, anca mipadang to saali nangra.d (Taneng 17:17; 2 Korinto 1:3, 4; 1 Pitiro 3:8) Soˈlinto caka hakowa ko misowalan, anca miming aca ko midemakan, wa ngaˈay kita a padihko to falocoˈ nangra.

16. Nengnengen ko miliyawan misasing a coka. Mikitini i nalifetan no mapatayay ko fafahiyan a wawa a salikaka, mananamay iso ko maanan hani?

¹⁶ Nengnengen ko cecay tinakoan. ˈAyaw no pina miheca romadiw ko cecay fafahiyan salikaka itini saˈopo i, maˈaraway ko cecay fafahiyan salikaka tomangicay. Ora radiw itiya pakayniay i patikolay maˈorip ko mapatayay sanay, oya tomangicay a salikaka caayho ka halafin mapatayay ko kaemangayho a fafahiyan wawa ningra. Mafanaˈay konini fafahiyan salikaka tora a demak, tangsolay i tayra mitakec cingranan, pacafay cingranan milahci tora radiw. Ikor sanay ko sowal nonini wina: “Ngaˈayay ko salikaka takowanan, tada mitemeray to falocoˈ ako.” Mahemekan nanay kako mirienang to saˈopo, sanay cingra: “Ano tayraho kako i Kasaˈopoan i, iraayto ko malifokay a sapadama.” Ano palademaken ita ko siniˈadaay a falocoˈ, mihinom toya mapatayay ko salawina a ‘adadaay ko falocoˈ’ a tamdaw, soˈlinto kantangay kora midemakan ita, maˈaraway ni Yihofa maemin, mitelian Ningra i falocoˈ.—ˈOlic 34:18.

ADIHAYAY KO EPOC TISOWANAN A MICEKIWAY A LIMASMAS

17. Mikitini i nidemakan ni Yis a kafahkaˈan a demak mananam ita ko maanan?

¹⁷ Songilaˈen ita a micekiw ko maˈoningay a nidemakan ni Yis a kafahkaˈan, makowaday ko falocoˈ ita. Onini a maˈoningay papakasoˈlinen ita, ci Yihofa aci Yis tangongolay ko olah kitaanan, iraay ko ˈicel ni Yis palahdaw to polong a pasangaray no tamdaw, anoikor o Hongti Kitakit no Kawas o papalemed to polong a tamdaw. Micekiw tonini a maˈoningay i, mamananamho ita samaan mitodong ci Yisan palahad to masakenakenaay makapahay a capeling. Tanamen iso itini notekedan a picekiw anca pakalomaˈay a pidoko i, satapangen konini minanamay a limasmas, songilaˈen a micekiw ko na nidemakan ni Yis a romaroma a kafahkaˈan a demak. Hapinangen o mamananam no niyah ko maanan a kimad, ikorto i paladaˈen i tao ko mananamay iso. Maedeng mamalifok iso ato tao ko adihayay a epoc.—Loma 1:11, 12.

18. Ilaenoay a lalakaw mamilengo to maanan hani?

¹⁸ Mikitini i maˈoningay no Fangcalay Cudad, kinatoloay ci Yis midemak to kafahkaˈan patikol paˈorip to mapatayay tamdaw. Tiya mamahererek ko mitosilay a demak ningra i fafekang no sera i, midemakay cingra to sakinatolo. Kawra cowa ka hecad konini, ora patikolan ningra paˈorip i, o kanonoˈan ningra a widang, tada mikiriwiˈay kora demak. Mikitini tonini nidemakan ni Yis a kafahkaˈan mamananam ita ko maanan hani? Mamisamaan kita matongal ko pakasoˈlin to patikolay maˈorip a hatokel hani? O mamilengo tonini ko ilaenoay a lalakaw.