Padadotoc Romakat i “Makoracay a Lalan”

1-2. Itiniay i Papilon a Yutaya tamdaw oha mamidemak to maanan kalimlaan a sasaˈosien? (Icra 1:2-4)

MAPATENAKAYTO ko lihaf, wa ngaˈayto ko Yutaya tamdaw minokay i nalacolan i Israil! Maholiw cangra tayra i Papilon maedeng 70 miheca, ˈarawhan ngaˈayayto a minokay! (ˈOsien ko Icra 1:2-4.) Onini demak edengan ci Yihofa ko pakadangaray. Hano saan ko sowal hani? Samanen tocerid cowa ka panokay to maholiway a tamdaw ko Papilon. (Isaya 14:4, 17) Kawra malowidayto ko Papilon, o faelohay mikowanay pasowalay to Yutaya tamdaw, wa ngaˈayto cangra miliyas to Papilon. Toniya tatokian kahacecay a Yutaya tamdaw, mangalefay o tawki no lomaˈ, oha mamisaˈosi: mamiliyas anca materek itini Papilon. Sapidemakaw toniya saˈosi cowa ko madoloay alatek. Misamaanay hani?

² ˈAlomanay Yutaya tamdaw matoˈasayto ko mihecaan, awaayto ko pakayraan maraay ko mirakatan minokay i nalacolan. Roma i, ˈalomanay Yutaya tamdaw itiniay i Papilon hofocen, mihaenay o nalacolanto nangra ko Papilon. Pakaynien cangranan, o Israil o nalacolan no tatoˈasan. O romaroma Yutaya tamdaw cihafayay ko kaˈorip itini Papilon, mihaenay pasangaran nanay cangra misawad to singdi ato sinowayay a lomaˈ no niyah, malinah tayra i kafahalan a pala maˈorip.

3. O madimadiay a Yutaya tamdaw ano makahi minokay i Israil, o mamilifok to maanan a sapalemed?

³ Pakaynien i madimadiay a Yutaya tamdaw ko sowal, o malifokay a sapalemed i ikor no minokay i Israil, ikakaay ko kaadihay to kinafalahan nangra, o sakakaay a sapalemed o milingatay to midokoay a demak. Itini Papilon mataˈlifay ko 50 pidokoan to makaniway kawas a efiw, kawra awaay ko fangcalay sefi ni Yihofa, awaay ko patoˈayaan a cadada, awaayho ko kapot no saysi. Mihaenay, awaay ko pakayraan no Israil tamdaw mitoor to Rikec ni Mosi patoˈaya ci Yihofaan. Roma i, o midokoay to makaniway kawas a tamdaw, ikakaay ko ˈaloman to midokoay ci Yihofaan a tamdaw, oniya tamdaw cowa pikangodo ci Yihofaan ato ˈakawangay palinian Ningra. Mihaenay, masapatekay masaˈofaday mangodoay ci Yihofaan a Yutaya tamdaw halamhamay patikol i nalacolan, miliyaw patireng to matatodongay a pidoko itira.

4. Mikiˈokay ci Yihofa papafeli to patikolay i nalacolan a Yutaya tamdaw to maanan a sapadama?

⁴ Mikitini Papilon tahira i Israil a lalan cowa ka ngaˈay rakaten, wa sepat folad ko halafin alatek, kawra mikiˈokay ci Yihofa papalahdaw to kihcod a sacara itini i lalan. Sanay ci Isaya: ‘Ka pisalof kamo to lalan ni Yihofa! Pakayni Kawas ita mitomadaw to moecelay a lalan i kohkoh. . . . O masahefongay masataporoay a sera o mala masadafdafto, masaˈikoˈikongay o mamoecelto a masadafdaf.’ (Isaya 40:3, 4) Haratengen hena, iraay ko cecay taˈangayay a lalan mitaˈlifay to kohkoh, moecelay masadafdafay, tada ngaˈayay a rakaten! O romakatay a tamdaw cowato ko mamitaliyok, cowa ko mamacokacok i lotok anca malikelon tayra i fideloan, tada sinowayayto, ikakaay ko kaliki.

5. Mikitini Papilon tayra i Israil oniya sapatinako a taˈangayay lalan panganganan to maanan hani?

⁵ Anini, adihayay a lalan iraay ko ngangan anca fangko. O masowalay ni Isaya sapatinako a taˈangayay lalan iraay ko ngangan, sanay ko sinael: ‘Wa ira ko cecay taˈangayay a lalan itira, panganganen to Makoracay a Lalan. O cowa ka korac a tamdaw cowa ka ngaˈay a romakat.’ (Isaya 35:8) Onini a sakiˈok pakaynien to itiyaay a Israil tamdaw o maanan ko tatodong hani? Pakayni kitaanan anini iraay ko maanan a tatodong hani?

NOLITENGAN ATO ANINIAY A “MAKORACAY A LALAN”

6. O makoracay konini a lalan hano han ko sowal hani?

⁶ “Makoracay a Lalan”—onini a ngangan tada mikiriwiˈay a masakasemeran! Hano makoracay han konini a lalan hani? Samanen miliyawan patireng a Israil tamdaw caay ko mamicada to ‘cowa ka korac a tamdaw,’ o kahacecay a Yutaya tamdaw ano haratengay sa ko demak, padadotoc maˈodang, mitaˈong to samiyay anca midemak to pakidemay a raraw, awaayto ko katomirengan itira. O patikolay i nalacolan a Yutaya tamdaw o mamalo ‘makoracay finawlan’ no Kawas. (Limoˈot 7:6) Sakoniya sowal, ikor no miliyas ko Yutaya tamdaw to Papilon cowato ko hamamisalof to maanan, o ngangaˈayto padadotoc milifok to pihayda ni Yihofa hokira? Cowa ka hatira.

7. O romaroma Yutaya tamdaw misaaliay to mamifalic to maanan? Sadaken ko tinakoan mitadtad.

⁷ Masowalay i fafekang a lalakaw, ˈalomanay a Yutaya tamdaw itiniay i Papilon a hofocen. Ano nengnengen, ilalomaˈ nangra ˈalomanay tamdaw mananamayto to pinangan ato palinian no Papilon. Onini iraay ko maanan a pifiyor hani? Saka cecay a liyad minokay i Israil a Yutaya tamdaw ikor no pina miheca, mafanaˈay ci Icra o romaroma Yutaya tamdaw cifafahiyay to midokoay to makaniway kawas a ˈalafang fafahiyan. (Kasadakan 34:15, 16; Icra 9:1, 2) Ikor, mahapinangay no ˈAˈideman ci Nihimiya, o mihofocan no Israil a wawa cowa ka fanaˈ tono Hipray a sowal. (Limoˈot 6:6, 7; Nihimiya 13:23, 24) Itiya, o Kimad no Kawas tano Hipray a sowal tiliden, ano cowa ka fanaˈ koniya wawa to mahaenay a sowal i, sasamaan a minanam maolah ato midoko ci Yihofaan hani? (Icra 10:3, 44) Mihaenay, o tataˈangay ko pifalic noniya Yutaya tamdaw. Kawra itini Israil, madoloay cangra mihaen to demak, samanen itini toniya pala palidlid sanay patikol ko matatodongay a pidoko.—Nihimiya 8:8, 9.

8. Kita anini hano mamisinanot to mifekaday i tireng no Yutaya tamdaw a demak? (Nengnengen ko papotalay coka.)

⁸ O roma tamdaw saan miharateng alatek: “O likisi no Yutaya tamdaw kasemeranto, kawra o halafinayto mifekad a demak isaˈayaw milingatayho kitaanan anini han?” Hano eca pilingat, samanen romakatay kita to aniniay a lintad a “Makoracay a Lalan.” Ano o manilnilay no fangcalay saocor a Krisciyang kita, anca ‘o roma lopayˈay a siri,’ oha mamaterek i “Makoracay a Lalan.” Mihaen ngaˈ, ngaˈay kita padadotoc midoko ci Yihofaan anini, noikor mamilifokho to pairaan no Hongti Kitakit no Kawas i tamdaw a masakenakenaay a sapalemed.b (Yohani 10:16) Mikitini 1919 miheca misatapang, iraay ko masapatekay masaˈofaday a tamdaw miliyasay to Taˈangayay Papilon, oyaan mararaway a pihakelongan. Iraay ko faˈinayan fafahiyan matoˈasay kaemangay, misatapangay cangra romakat tonini sapatinako a taˈangayay lalan, alatek o masalalomaˈay kiso. Soˈlin onini a lalan itiniay i ˈayaw no 100 miheca a fohaten, kawra itini ˈayaw no mifohat to pina soˈot a miheca, misatapangayto ko misadayay a tayal.

MISADAY TO TAYAL

9. O nisowalan no Isaya 57:14 a “Makoracay a Lalan” samaanay ko kapisaday?

⁹ Pakayni i miliyasay to Papilon a Yutaya tamdaw mipalahdawanto ni Yihofa ko kihcod a sacara i lalan. (ˈOsien ko Isaya 57:14.) Anini a lintad “Makoracay a Lalan” o masamaanay hani? Itini ˈayaw no 1919 miheca to pina soˈot miheca, sakadademakan ni Yihofa ko papina mangodoay Cingranan a tamdaw palahdaw to sacara, ho ira ko toki no tamdaw mikitini Taˈangayay Papilon masadak. (Nengnengen ko Isaya 40:3.) Midemakay cangra to kalimlaan misadayay a tayal, itini sapatinako a tatodong mitomadaw to lalan, padama to moecelay ko falocoˈ a tamdaw miliyas to mararaway a pihakelongan, micomod i lakoing no midokoay a pakayraan, tano matatodongay a pakayraan midoko ci Yihofaan. Onini ‘mitomadaway to lalan a tayal’ mahawpay ko maanan a tayal hani? Dotoc nengnengen ko pina ilalomaˈ.

10-11. Miinsac ato mihongyak pakayni sapatenakaw to soˈlinay kimad no Fangcalay Cudad iraay ko maanan a sapadama? (Nengnengen ko coka.)

¹⁰ Miinsacay. Itini ˈayaw no saka 15 hahekalan, sahtoay miliyawan mitilid ko Fangcalay Cudad. Samanen miliyaw mitilid to Fangcalay Cudad adihayay ko mapalakay a toki, mansa cowa ka adihay ko Fangcalay Cudad, hanaca matekesay ko ˈaca. Kawra irato ko sapiinsac a kikay ikor, cowato ka lecad ko pakayraan. Mikitiya misatapang, adihayayto ko miinsacan a Fangcalay Cudad ato palilaman.

¹¹ Mihongyak. Itini adihayay hahekalan, o adihayay a Fangcalay Cudad sahtoay ono Latin a Sowal, edengan o ˈakawangay ko picudadan a tamdaw ko mafanaˈay a miˈosi. Kawra, adihay adihayto ko miinsacan ikor, o mangodoay to Kawas a tamdaw matongalayto ko pisaˈicel a mihongyak to Fangcalay Cudad, malo kafanaˈan no kalo a tamdaw a miˈosi. Mikitiya misatapang, o miˈosiay to Fangcalay Cudad a tamdaw ngaˈayto mihapinang to sapasifanaˈ no kiyokay a kimad, o matatodongay to Fangcalay Cudad hokira.

12-13. Itini saka 19 hahekalan, papina misongilaˈay micekiw to Fangcalay Cudad a tamdaw, samaanay misatapang mitihedak to mararaway kimad no pihakelongan? Sadaken ko tinakoan.

¹² Sapicalep micekiw to Fangcalay Cudad a lalosidan. O misongilaˈay micekiw to Fangcalay Cudad a tamdaw mikitini Kimad no Kawas mananamay ko adihayay soˈlinay kimad, hanaca cowa ka talaw cangra maketer ko misasingsiay, misaˈicelay pasowal to tao to mananamay a soˈlinay kimad. Tinakoen itini saka 19 hahekalan, o papina soˈliˈlinay ko falocoˈ a tamdaw misatapangay miinsac to kihpicay cudad, mitihedak to mararaway kimad no kiyokay.

¹³ O sowal no adihayay a kiyokay hofoc han ko tamdaw iraayto ko cowa ka patay a saloˈafang sanay. Itini 1835 miheca, ci Henli Kelo mitepangay to cecay kihpicay cudad, mitadtaday to pakayraan no mapatayay tamdaw. O mangodoay to Kawas a tamdaw cingra, mikitini i Fangcalay Cudad a misawacay, o mararaway konini a sowal no kiyokay, edengan milifok ko tamdaw to sapalifon no Kawas ngaˈ iraay ko cowa ka patay a ˈorip. 1837 miheca, cecay ci Ciyawce Setoes a fokosi itini kasoling i, maˈaraway ningra ko mitepangan ni Henli Kelo a kihpicay cudad. Maherek cingra miˈosi ikor, pakasoˈlinay to mahelaay no niyah ko cecay masakalimlaan a soˈlinay kimad, oranto misaˈosiay a pasowal to roma tamdaw toniya soˈlinay kimad. 1842 miheca, mihadakay cingra to madadoedoay a kimad, lalangian i “O Cecay a Picekiw—O Tatiihay Tamdaw Cowa ko Mamapatay Han?” Ikor, o mitilidan ni Ciyawce Setoes a lalakaw tangongolay ko pifiyor toya kaemangay a Cares Tayce Losoan.

14. O ‘mitomadaway to lalan a tayal’ no saˈayaway a tamdaw, pakayni salikaka ci Losoan ato cafacafay ningra iraay ko maanan a sapadama hani? (Nengnengen ko coka.)

¹⁴ O ‘mitomadaway to lalan a tayal’ no saˈayaway a tamdaw, pakayni salikaka ci Losoan ato cafacafay ningra iraay ko maanan a sapadama hani? Ano micekiw to Fangcalay Cudad i, adihayay ko citing nangra, pirorodan to tilid no Fangcalay Cudad ato mihongyakan a Fangcalay Cudad ngaˈayay taˈarawan, onini sahtoay o itiniay i ˈayaw a lintad nangra maherekayto a misaday. O roma i, o minaroˈan no mikingkiwan ni Henli Kelo, Ciyawce Setoes ato romaroma tamdaw taˈangayay ko sapadama cangranan. Itini tonini a taˈeneran, salikaka ci Loso ato cafacafay ningra padadotocay mihadak to sapadama i ‘mitomadaway to lalan a tayal,’ adihayay ko mitepangan to mitadtaday to Fangcalay Cudad a cudad ato kihpicay cudad.

15. Isaka 1919 miheca, mafekaday ko maanan a demak?

¹⁵ Isaka 1919 miheca, matedalayto ko finawlan no Kawas miliyas to Taˈangayay Papilon. Itiyaay toyaan a mihecaan, ‘madimadiay citanengay a koli’ misatapangay matayal, militemoh to matatodongay ko piharateng a tamdaw romakat to mafawahayto a “Makoracay a Lalan.” (Matay 24:45-47) Samanen iraayto ko misadakan a sapadama no iˈayaway a madimadiay ‘mitomadaway to lalan a tamdaw,’ oya romakatay tonini taˈangayay lalan a tamdaw, hato matongal matongalayto ko kafanaˈ ci Yihofaan ato araaw Ningra. (Taneng 4:18) Mikitiniayto cangra mitoor to palinian ni Yihofa a maˈorip. Soˈliˈlin adihayay ko sasalofen no finawlan no Kawas, kawra cowa ka halamham ci Yihofa cangranan to tatangsol sa madangar koniya kihcod, ao palidlid hananay a misalof cangra. (Nengnengen ko sapatongal lalakaw “Palidlid Hananay ni Yihofa ko Finawlan Ningra Misalof.”) Ikorto i, kita kahacecay tamdaw ngangaˈay a pakahemek ci Yihofaan itini maamaan a demakan, itiya o hahakowato ko kalipahak ita saw!—Kolosay 1:10.

O “MAKORACAY A LALAN” KAMAYANHO MAFOHAT

16. Tadtaden mikitini 1919 miheca misatapang, samaanay a matomadaw ko “Makoracay a Lalan”? (Isaya 48:17; 60:17)

¹⁶ O kahacecay a lalan o caceriden a mitomadaw. Mikitini 1919 miheca misatapang, mitomadaway to “Makoracay a Lalan” caay ka paselaˈ, o araaw i, papadama to ˈalomanay tamdaw miliyas to Taˈangayay Papilon. Ta manilnil ko madimadiay citanengay a koli i, misatapangayto a matayal. 1921 miheca, mitepangay cangra to sapadama to tamdaw minanam to Fangcalay Cudad a lalosidan, o Datok no Kawas hananay pangangan konini a cudad. Salikor o mitepangan toniya cudad 600 ˈofad ko adihay, 36 ko kasasiroma no sowal, pakayniay toniya cudad ko ˈalomanay tamdaw mafanaˈ to soˈlinay kimad no Fangcalay Cudad. Caka halafin, iraayto ko faelohay a cudad ita to sapisikay to pakingkiway a demak, o ngangan no cudad Layapen ko Midaˈocay ˈOrip! Itini salikoray ˈawaled, pakaynian ni Yihofa i likakawa Ningra padadotoc mihadak to sapahaled to pakasoˈlinay falocoˈ a kakaenen, padama kitaanan maemin padadotoc a romakat to “Makoracay a Lalan.”—ˈOsien ko Isaya 48:17; 60:17.

17-18. O kahiceraan no “Makoracay a Lalan” icowaay hani?

¹⁷ Ngaˈayay haenen ita ko sowal, misatapangho minanam ko tamdaw to Fangcalay Cudad i, ngaˈayayto a romakat tonini “Makoracay a Lalan.” Romaroma tamdaw mimingayho ko mirakatan, miliyasayto tonini a lalan. O romaroma tamdaw misetekay to falocoˈ padadotoc a romakat, tangasa i kahiceraan. Icowaay ko kahiceraan hani?

¹⁸ Pakaynien ko sowal i tatayra i kakarayan ko kaˈorip a Krisciyang, o “Makoracay a Lalan” mamikerid cangranan micomod to ‘lakoing no Kawas’ i kakarayan. (Paˈarawan 2:7) Pakaynien ko sowal i sakitini fafekang no sera tahadaˈoc maˈorip a Krisciyang, wa itini cangra kahererekan no Pikowan ni Kristo to Comaˈol Miheca tangasa i kahiceraan, itiya malo malefotayto a tamdaw cangra. Ano romakatay kiso nohatini tonini a lalan, aka a pasilikor a minengneng, aka a miliyas, ka padadotoc a romakat, tangasa i faelohay hekal. Mikifalocoˈay kami makalim tisowanan dipayal ko karomakat!