Ano Kalaloodanto Kadipayalanto, Pafeliay ci Yihofa to ˈIcel Tamiyanan

Pawlo: 1985 miheca 11 folad i cecay romiˈad, mikalicay kami to hikoki tatayra i Kaˈetipan no Afrika i Lipiliya, o saka cecay katayraan niyam malo mikiriwiˈay manilnil a mitosilay a kilac. Tada lipahakay kami. Paselaˈ ko hikoki itini Senikal i, sanay ci Anni: “Cecayto ko toki tatahirato kami i Lipiliya!” Nikawrira, fahal sanay ira ko salasil: “O tatayra i Lipiliya a tamdaw kaˈepod i hikoki. Samanen masasifoday tora pala, awaay ko pakayraan no hikoki patefo itira.” Dotoc a 10 romiˈad, malacafayay kami to itiniay i Senikal mikiriwiˈay manilnil a mitosilay. Padadotocay matengil niyam ko sinfon no Lipiliya, adihayay ko mapatayay tamdaw itira sanay, saksak sanay ko mapatayay tamdaw, mikecengay ko mirikecay cowa ka ngaˈay masadak to dadaya, ano eca ka pitengil i, o papatayen sanay.

Anni: Cowa ko maolahay kami misiˈayaw to katalawan a demak. Soˈlinay haw i, nano kaemangan kako “o hinatalaway” sanay ko roma tamdaw. Mitaˈlif aca to lalan marawrawayto ko harateng. Kawra misetekay kami to falocoˈ tayra i manilnilay a kitiraan.

Pawlo: Kako aci Anni itiniay i Kakaˈetipan no Ingkelan a hofocen, o kararaay no lomaˈ niyam faloay aca kongli. Micudiyap i kaocong i, tangsolay kami malo misakafahay, samanen o wama ato wina ako, ato wina ni Anni pakalalokay tamiyanan miemin to toki matayal saki Yihofaan. Misarocoday cangra midama tamiyanan miemin to toki matayal saki Kawas i hakelong no kaˈorip. 19 ko mihecaan ako, misatapangay tayra i Pitil matayal. 1982 miheca mararamoday kako aci Anni, ikor tayraay cingra i Pitil matayal.

Anni: Maolahay kami i Pitil, kawra makalimay kami sakatayraaw i misaaliay to mitosilay a kilac matayal. Itini i Pitil, iraay ko toki niyam malacafay to na manilnilay malo mikiriwiˈay mitosilay a salikaka dademak, mitongalay to kalim niyam konini malo mikiriwiˈay manilnilay mitosilay. Itini 3 mamihecaan, to dadayadaya pakayniay kami tonini a demak ihkal ko pitolon. Mihaenay, itini 1985 miheca matahidang kami mirienang to saka 79 laliyadan a Kiliyat Picudadan i, mikiriwiˈay ko hemek niyam. Ikor no micudiyap, miocoran kami tayra i Kaˈetipan no Afrika i Lipiliya.

MIKITINI I OLAH NO SALIKAKA MILIFOK TO ˈICEL

Pawlo: Ngaˈayayto kami mikalic to tatayra i Lipiliya a hikoki. Kamayan marawraw ko pakayraan itira, mikecengayho ko sifo caka ngaˈay masadak to dadaya. Itini icifa, o intoc no paliding ano fahal sa masadak ko taˈangayay soni, waho sanay a macekid miowaw ko ˈalomanay tamdaw! Sapadotocaw rihaday ko falocoˈ, to dadayadaya miˈosiay kami to sinael no ˈOlic. Soˈlin pasangaray ko pakayraan, kamayan maolah kami to katayalan niyam. Itiniay i kilac ci Anni malo mikiriwiˈay manilnilay mitosilay, kako sa i, itiniay i Pitil malacafay ci Yohani Ciyaroana a matayal. Kadofahay ko nalifetan ningra, cipinangay to pakayraan no salikaka, mikitira cingranan adihayay ko mananamay ako.

Anni: Itini kamotoˈay a tatokian hano maolah kami to Lipiliya hani? Samanen ciolahay ko salikaka, hanaca tada madimadiay cangra. Mapatirengay niyam ko tangongolay no kalawidang cangranan, malecaday o masalalomaˈay no paro no lomaˈ. Ngaˈayay ko sapaini nangra tamiyanan, marariday pakalalok tamiyanan. O mitosilay a tayal itira mahecaday o mitiihan a makapah. Milisoˈ kiso to cecay cilomaˈay i, ano kahnay a miliyas, maketeray ko cilomaˈay! Malalengoay ko tamdaw i maci to Fangcalay Cudad, ngaˈayay kiso mirienang tonini a kalalengo nangra. Makalimay sapinanamaw to Fangcalay Cudad a tamdaw tada ˈalomanayto, caay ka pakadangar kami to kaadihay no pakingkiwan. Tada kalipahakan niyam pasangaray a demak koni!

ANO CIˈANGI MATALAW I, PAFELIAY CI YIHOFA TO ˈICEL TAMIYANAN

Pawlo: Mataˈlif ko 4 a miheca dipayalay a tatokian, itini 1989 miheca taˈangayay ko kafalic no Lipiliya—mifekaday ko lalood ilalomaˈ no kitakit. 1990 miheca 7 folad 2 romiˈad, maˈafasay no mitowakangay a sofitay i ngata no Pitil a niyaroˈ. Toloay folad a tatokian caay ka ngaˈay masadak kami, caayho ka ngaˈay mirinnak to paro no lomaˈ ato i Congpoay salikaka. Hato awaayto ko sifo no kitakit, cangoˈotay ko kakaenen, adihayay ko miˈodangay to fafahiyan a demak mifekad. Polong no kitakit sasifod sanay, 14 miheca ko kahalafin nonini a demak.

Anni: I kalalaˈed no cowa ka lecad a finacadan marariday mifekad ko lacongis, mapapatayay. Itini lalan ˈalomanay ko masasiromaay ko rikoˈ a cikowangay tamdaw, pakalomalomaˈay cangra miˈafas to dafong. Pakaynien i cikowangay a tamdaw, mipatay to tamdaw malecaday o mitokaday to kokoˈ. Itini patirengan nangra sapiˈeteng a kitiraan mataringay ko mapatayay a tamdaw, o roma piˈetengan a kitiraan i ngataay no fenpo. O romaroma madimadiay salikaka mipatayan nangra, mahawpay ko tatosaay kafanaˈan niyam mikiriwiˈay manilnilay a mitosilay.

Itiya, o roma ko finacadan a salikaka milepelan papatayen, o romaroma salikaka caay ka talaw mapatay padama cangranan milimek, o mikiriwiˈay manilnilay mitosilay ato i Pitilay a salikaka mihaenay ko demak. Itini i Pitil, o romaroma milaliway to pades a salikaka kalacafayay tamiyanan itini tingloh no Pitil, o roma itiniay i laeno. I kafotiˈan niyam papitoay ko milafinay.

Pawlo: O cikowangay a tamdaw to romiˈamiˈad sapicomodaw i Pitil, sapinengnengaw to iraay ko mihimedan niyam a tamdaw hokira. Itiya iraay ko sasepat a tamdaw milimasmasan niyam to sakadipayal: Ano tayraay i papotal no fawahan ko tatosa tamdaw i, o roma tatosa tamdaw itiniay i kafotiˈan mikitini i sasingaran minengneng. Oya i papotalay tatosa tamdaw ano ikaˈayawen nangra ko kamay, paihkalay koni to awaay ko katalawan; kawra ano itinien nangra i kalikor ko kamay, paihkalay koni to mariˈangay ko cikowangay a tamdaw, itiniay i sasingaran minengneng a salikaka tangsolay papilimek to salikaka.

Anni: Mataˈlif ko cecay liyad a tatokian, cecay romiˈad, o papina mangolaway cikowangay a tamdaw comod sanay i Pitil. Mikeridan ako ko cecay fafahiyan salikaka milimek i kamisiˈan, micikeran ko fawahan. Itini kamisiˈan iraay ko kaemingay a pinaˈenang to dafong, comoday koya fafahiyan salikaka. Oya cikowangay a tamdaw cikay sanay macokacok, maketeray a mikongkong to fawahan no kamisiˈan. Sanay ci Pawlo: “Misiˈay ko fafahi ako nohatini.” Miˈading kako toya kaemingay kitiraan iraay ko soni, palakay to miming a toki patikol minaˈeng to dafong ilalomaˈ, maedeng cisasaay ko harateng nangra, mansa mirmir sanay ko tireng ako. Mafanaˈay kako ˈayaw no masadak o rarihaday ko falocoˈ ako ngaˈ, tolonay kako itini falocoˈ, micangcang to sadama ni Yihofa takowanan. Ikor fohaten ako ko fawahan, sarihaday sanayto a mihamham cangranan. Wanik sanay ko cecay tamdaw takowanan, pasayraay toya pinaˈenang to dafong a romakat, fohat han ningra, misongilaˈay cingra a mikilim, kawra awaay ko mahelaay, fahkaˈan nanay cingra! Ikorto, cangra maemin misolapayho to kahacecay kafotiˈan, awaay ko mahelaay nangra.

ITINI KATOˈEMANAN PADOTOCAY MATEDI KO LIKAT NO SOˈLINAY KIMAD

Pawlo: Pinaay a folad cangoˈotay ko kakaenen niyam, nikawrira pakayni pitadiˈec to sapahaled to pakasoˈlinay falocoˈ a kakaenen padadotocay a tanektek. Lomowad to papacem tocerid awaay ko kakaenen niyam, kawra o pidoko no Pitil to papacem malecaday o “sakaranam” niyam, paˈicel tamiyanan milakowit to cecay romiˈad.

Pakayni sapilifokaw to kakaenen ato nanom ano miliyas kami i Pitil, cowato ko ngangaˈay midipot to milimekay i Pitil a salikaka, o mamapatay no tao cangra alatek. Nikawrira mirenecay ci Yihofa to saali niyam, nolatekay o pakayraan Ningra ato katatodong no tatokian malecaday o kafahkaˈan a demak. Cowa ka hatini aca, padamaayho Cingra tamiyanan miremo to ciˈangiay a falocoˈ.

Ano mangalef ko toˈeman no hekal, mangalefay matedi ko likat no soˈlinay kimad. Pakayni sakaˈoripaw, ˈalomanay salikaka saliyaliyaw sanay milaliw to pades, nikawrira kamayan tanektek ko pakasoˈlinay falocoˈ nangra, padotocay a rihaday. Sowal no roma tamdaw, tahalifa to lalood padamaay cangraanan ‘talaˈayaw misaday to taˈangayay padiing noikor.’ O malohemay malitengay ato kapah salikaka timoloay talaˈayaw a midemak, mitamorong to mikeriday a ˈinorong. O milaliway to pades a salikaka madadamadamaay, talacowa ko pilaliwan i, itiraay a mitosil. Itiniay cangra i colicolingan patirengay to kantangay Hongti Kitakit Kasaˈopoan, pisikayan to saˈopo. Itini toni mafodifoday a laliyadan, o saˈopo ato mitosilay mipaˈicelay to salikaka, padama cangranan tawlik misiˈayaw to pasangaray. Ano palilam kami to sakaˈorip a dafong i, sowal no ˈalomanay salikaka o misaalian nangra i, cowa ko rikoˈ ao sapitosil a kafang, tada mitemeray to falocoˈ no niyam. Tahalifa to lalood masomaday ko falocoˈ a tamdaw makalimay tahatengil to ngaˈayay lihaf. Maˈaraw nangra ko Misawacayay Tamdaw ni Yihofa kamayanho a lipahak, tawlik ko waywayan, fahkaˈan nanay minengneng. Itini tonini toˈemanay a hekal, o salikaka malecaday o tedi a pataengad! (Matay 5:14-16) Fanekfekay cangra mitosil, ano mariˈangayto cikowangay a tamdaw mapadamaay nangra malo salikaka no mita.

ANO MASOMAD MALALIYAS I, PAFELIAY CI YIHOFA TO ˈICEL TAMIYANAN

Pawlo: Kinapinaay mapacieciay kami miliyas to Lipiliya, kinatoloay kamotoˈay ko toki, kinatosaay cecayay a miheca a miliyas. O cecay fafahiyan salikaka mikiriwiˈay manilnil mitosil kasemeran ko pilomal ningra to malifaay niyam, sanay cingra: “Itini Kiliyat micadaan niyam a sapasifanaˈ, sarocoden ko falocoˈ itini katayalan no niyah, maolah to itiraay a salikaka sanay, soˈlinay mihaen ko demak niyam. Nohatini saan o laliyasen niyam ko tahapadesay a salikaka, mihaenay hato mikeritan ko falocoˈ niyam.” Kao ngaˈayay, itini i fiyaw a kitakit wa ngaˈayho kami padotoc padama to Lipiliyaay a salikaka.

Anni: 1996 miheca 5 folad cecay romiˈad, sasepatay kami parakatay to tosiya no fenpo, itini tosiya iraay ko milingatay to fenpo kalimlaan a lalakaw. Harateng niyam tatayra kami 16 kongli ko raay dipayalay a kitiraan, itiniay i roma a lawac no niyaroˈ konini. Itiya toya tatokian, o kitiraan niyam tahalifaay to saˈodis, oya mangolaway cikowangay a tamdaw pasikakarayan mikowang pacieci tamiyanan tomerep. Tengtengan nangra ko tatoloay tamdaw paepod i tosiya, parakatan nangra ko tosiya niyam miliyas, kawra itiraayho i tosiya ci Pawlo, tireng sanay kami itira, cowa ka fanaˈ to sasamaan ko demak. Fahal sanay, masadak i kaˈalomanan ci Pawlo pasayni tamiyanan a romakat, malakisay ko remes i laway. Itini kafodifodan, makowangay cingra sanay kami, kawra fahal sanay maharateng niyam, ano mahaenay cato ka ngaˈay cingra romakat! ˈArawhan, o cecay cikowangay a tamdaw safanaˈ sanay micikeloh cingranan, kao ngaˈayay cowa ka taˈangay ko dokaˈ ningra.

I ngata iraay ko sapionpang to dafong a paliding no sofitay mamalingadto, matomesay i paliding ko marawraway ko falocoˈ a tamdaw. Caay ka ngaˈay kami mikalic tora paliding, metmet hananay no kamay ko lawac no paliding. Parakat koya parakatay a tamdaw tangsolay a pacikay to paliding, mangata mafahkol kami. Miˈowawan niyam kora parakatay paterep to paliding, kawra tada matalaway cingra, cowa ka pisikol tamiyanan. Kafahkaˈan i, tahiraay kami i kahiceraan, nikawrira tada malotayay kami sasepat, mirmir sanay ko tireng.

Pawlo: Itiya kakadit sanay macicihay ko rikoˈ niyam, awaayto ko maamaan. Kami sasepat minengnengan ako cingra minengnengay cingra takowanan, caay ka harateng kamayanho a maˈorip kami. Toya dadaya itini kami i panahalay a sera mafotiˈ, itatihi niyam iraay ko maofangay no timra a hikoki. Saka tosa romiˈad, onini a mamapalakto a hikoki miˈorongay tamiyanan tayra i Sairariang. Madipot ko ˈorip tada miakoˈiday kami, kawra calemcemay kami to itiniay i Lipiliya a salikaka.

MISIˈAYAW TO TALIFAHAL SANAY A PASANGAR I, MIKITINI CI YIHOFAAN MILIFOK TO ˈICEL

Anni: Rihadayayto kami tahira i Fenpo no Sairariang Foliton, itira macadaay niyam ko ngaˈayay a pidimokos. Kawra i ponoˈ ako padadotocay a mahadak ko iˈayaway a masakatalawan a demak. To romiˈad misinanotay kako to taliyok, tada marawraway ko falocoˈ ako, maapohayto ko pinengneng ako to taliyok, hato cowato ko soˈlinay. To dadaya i, talifahal sanay kako a mapalal, macepaˈay no sinoet ko tireng, cato ka ngaˈay saselaˈ, tatirtir sanayto, hato mamifekadto ko taˈangayay a pades. Takec hananay ni Pawlo kako, malacafay kami a mitolon. Romadiwayho kami to radiw no Hongti Kitakit, tahira kaecaan katirtir no mako. Hato mamasingkito kako a miharateng, alatek caayto ka ngaˈay mala mikiriwiˈay manilnilay mitosilay.

Cowa ko mamapawan kako to midotocay mifekad a demak. Toya lipay macadaay ako ko tosa a casi. O cecay i, 1996 miheca 6 folad 8 romiˈad a Katalipaˈelal! ilalomaˈ iraay ko cecay “Miremo to Pifekad no Kaciˈangian” sanay a lalakaw. Padamaay koniya lalakaw takowanan to samaanay kako nohatini. O roma casi i, 1996 miheca 5 folad 15 romiˈad a Mikecolay, o cecay lalangian i, “Mikicowaay Cangra Milifok to ˈIcel?” lalomaˈ no lalakaw iraay ko cecay madokaˈay a ˈadipangpang a coka. Sanay ko lalakaw, soˈlin pakidem a madokaˈ ko sapikpik no ˈadipangpang, kamayan ngaˈayay a maefer mikilim to kakaenen. Malecaday, soˈlin madokaˈ ko nafalocoˈan niyam, kamayan ngaˈay mitadiˈec to fangcalay saocor ni Yihofa padadotoc a padama to tao. Onini a tosa lalakaw o sapatelong ni Yihofa i matatodongay a tatokian sapahaled to pakasoˈlinay falocoˈ a kakaenen. (Matay 24:45) Padotocay kako mikilim ato mihoped to malecaday a lalakaw, mikitini milifok to taˈangayay sapadama. Mataˈlif ko cecay liyad, palidlid sanayto maadah ko nano dokaˈ no falocoˈ ako.

PAFELIAN NI YIHOFA TO ˈICEL KAMI MANANAM TO FAELOHAY A KATAYALAN

Pawlo: Minokayto kami tayra i Lipiliya lipahakay ko falocoˈ, malecaday to minokayayto i lomaˈ. Tahira i salikor no 2004 miheca, maedeng 20 miheca kami itini i Lipiliya a matayal. Mahererekayto ko lalood, mihalakaay ko likakawa itini fenpo to patirengay a tayal, kawra talifahal sanay, matahidangay kami tayra i cecay faelohay a katayalan.

Sapicadaaw tonini a kafalic cowa ko madoloay. Tada ngaˈayay ko kalalaˈed niyam to salikaka itini i Lipiliya, hano eca ka tangoˈol miliyas cangranan saw? Kawra, mikitini piliyas niyam to salawina tayra i Kiliyat Picudadan padotocay a matinako, ano paiken han niyam ko niyah i kamay ni Yihofa, o mamilifok to sapalemed Ningra. Oranto i, micadaan niyam koniya faelohay katayalan, misaday malinah tayra i fiyaw a kitakit i Kana.

Anni: Miliyas kami to Lipiliya i, talalosaˈay kami. Iraay ko cecay matanengay matoˈasay a faˈinayan salikaka ci Folanke, sanay ko sowal ningra tamiyanan: “O papawanen namo kami!” Sowal ningra macekokay kami, dotoc sanay cingra a pasowal: “Mafanaˈay kami cowa ko mamapawan namo kami, kawra mamisamacay kamo to faelohay a katayalan. Onini a katayalan i, o sapafeli ni Yihofa tamowanan, mihaenay mamisongilaˈ kamo a midimokos to itiraay a salikaka.” Padamaay ko sowal no salikaka tamiyanan misongilaˈ a misaday, itini faelohay a kitiraan misatapang a matayal.

Pawlo: Kalikiay kami malecad o paro no lomaˈ ko salikaka i Kana. ˈAlomanay ko Misawacayay Tamdaw ni Yihofa itira! Adihayay ko faelohay widang niyam. Tanektekay ko pakasoˈlin nangra hanaca madimadiay, mikitira cangranan adihayay ko mananamay niyam. Matayal itini i Kana to 13 miheca ikor, macadaay aca niyam ko caay ka harateng a ˈinorong, matahidang tayra i Kawali no Afrika fenpo no Kenya a matayal. Soˈlin tangoˈolay kami to katayalan niyam i tosa kitiraan a widang, kawra kalikiay mapalahad niyam ko ngaˈayay kalawidang to Kenyaay salikaka. Malecad to itiniay i Kana ato Lipiliya, o mitosilay a tayal i Kenya padotocay a macowat, mihaenay adihayay ko hatayal niyam.

TIKOLEN MIHARATENG KO ISAˈAYAWAY

Anni: Toniya pinapina mihecaan, malifaay ako ko adihayay kaciˈangian a demak. Orira katalawan ato karawrawan a pakayraan taˈangayay ko pifiyor to falocoˈ ato tireng niyam. Tonini a demakan, cowa ko hahalamham kami to sapidemakaw ni Yihofa to kafahkaˈan a midipot tamiyanan. Nohatini matengilho ako ko soni no kowang, adadaayto ko fitoka, matimelay ko kamay. Kawra mananamayto ako mikitini mihadakan ni Yihofa a kihcod milifok to ˈicel, mahawpay micada to sapadama no salikaka. Mahapinangay no mako, ano misaˈicel kami padotoc to pinangan a midoko, o papadamaen ni Yihofa kami materek i katayalan.

Pawlo: Milicayay ko romaroma tamdaw: “Maolahay kamo to katayalan no niyah han?” I cecay kitakit adihayay ko makapahay a kitiraan alatek, nikawrira mamafalic a masakatalawan ko pakayraan alatek. Mihaenay, palinien to kitakit, ikakaay ko olah niyam to salikaka, paro no lomaˈ niyam. Soˈlin taˈangayay ko kasasiroma no serangawan ato kalomahadan niyam, kawra kami maemin maolahay ci Yihofaan, o pinengneng to demak malecaday to pinengneng ni Yihofa. Isaˈayaw harateng niyam miocoran kami pakalalok cangranan saan, nikawrira misawacayay ko demak o kami ko micadaay to sapakalalok.

Malinahto kami tayra i faelohay kitiraan, maˈaraway ko cecay kafahkaˈan a demak aniniay a lintad, o kasacefang no salikaka. Ano o icowaayto a kasakopang kami i, iraayto ko lomaˈ niyam, iraayto ko pinokayan. Pakasoˈlinay kami, ano padadotoc mitadiˈec ci Yihofaan i, o tatooren Ningra ko saali niyam pafeli tamiyanan to kadofahay a ˈicel.—Filipi 4:13.