Madoloay a Salicay, Kadofahay ko Malidongay

O Misawacayay Tamdaw ni Yihofa a mararamoday ci Mari aci Yohani,a i pikilomaˈan nangra, ˈalomanay ko naitiniay i Filipingay tayni a matayal a tamdaw, ci Mari aci Yohani maceriday mitosil cangranan. I 2019 kalifongan a tatokian, adihayay ko mapatirengay ni Mari a pakingkiwan. Ora pakingkiwan ningra iraay ko itiraayto a tamdaw, iraayho ko i romaay kitakit a tamdaw. Samaanay makilim ni Mari koniya pakingkiwan hani?

Milicayan ni Mari ko pakingkiwan ningra: “I kafanaˈan iso a tamdaw iraay ko sapinanamaw to Fangcalay Cudad han?” Ano iraay i, hananay ni Mari milicay: “Ngaˈayay siwkayen iso cangra mafanaˈ takowanan han?” Licayen toniya madoloay a salicay maceriday ira ko ngaˈayay minaroˈan, samanen oniya maolahay to Fangcalay Cudad a tamdaw, maceriday sapifanaˈaw to paro no lomaˈ ato widang to mananamay nangra. Mihaen a milicay ci Mari, samaanay ko minaroˈan hani?

O pakingkiwan ni Mari ci Ciyasmin misiwkayay to sepatay a pakingkiwan ci Marian, ilalomaˈ no cecay ci Kristina. Maolahay ci Kristina minanam to Fangcalay Cudad, ikorto i, kina tosaen kako to cecay lipay a pakingkiw hananay ningra. Licayan ni Mari cingra, i kafanaˈan iso iraay ko sapinanamaw to Fangcalay Cudad han? Sanay ci Kristina: “Iraayto, siwkayen ako kiso to widang ako.” To pina lipay i, misiwkayayho ci Kristina to sepatay a pakingkiwan. Ikor i, misiwkayayho ci Kristina to roma sapinanamaw to Fangcalay Cudad a tamdaw ci Marian, oniya tamdaw misiwkayayho to adihayay a pakingkiwan.

Halamhamay ci Kristina to i Filipingay a paro no lomaˈ minanam to Fangcalay Cudad, orato i, pakalalokay cingra to fafahiyan wawa ci Anteria minanam to Fangcalay Cudad. Na iraay ko mararaway a harateng ni Anteria to Misawacayay Tamdaw ni Yihofa, o maliyangay a pihakelongan hananay sanay cingra, cowa pakasoˈlin cangra ci Yisan, edangan ko Katelangay Katatelekan a Fangcalay Cudad ko minengnengan. Kawra, kinacecayay aca minanam ikor, malahdawayto koniya mararaway harateng ningra. Padadotocay cingra minanam to Fangcalay Cudad, halo maceriday pasowal: “Ano mahaen ko sowal no Fangcalay Cudad, o soˈlinayto koni!”

Mataˈlif ko cecay liyad, misiwkayay ci Anteria to tatosaay widang ato cecay cafay matayal ci Marian, misatapangay cangra minanam to Fangcalay Cudad. O roma i, o fai ni Anteria ci Ancila, soˈlin o mapohaway cingra, kawra mikingkiwto ci Anteria i, ikatihiay cingra mitengil, cowa ka fanaˈ ci Mari toniya demak. To cecay romiˈad, ci Ancila pasowal ci Anteriaan mifanaˈ ci Marian, sapikingkiwaw kako to Fangcalay Cudad sanay cingra. Tada maolahay ci Ancila tora mananamay ningra a soˈlinay kimad, cecayay aca a folad adihayayto ko kafanaˈan ningra a sinael, hanaca kina sepaten pakingkiw to cecay lipay! I sapadama ni Anteria, miceriday ci Ancila tano wanglo mirienang to saˈopo.

Mahapinangay ni Mari, mikingkiw ci Kristina i, o faˈinay ningra ci Ciyawsowa maceriday mahadak ilalikor ningra. Kinacecay, licayan ni Mari ci Ciyawsowa sapinanamaw kiso han? Sanay ci Ciyawsowa: “Ngaˈayayto, kawra hamaan licayen kako to salicay. Ano milicay kiso takowanan i, miliyas kako.” Kawra mirienang cingra cowaho ka lima ehon adihayayto ko salicay ningra, ikakaayto ni Kristina ko adihay. Ikor, makahiayto cingra padadotoc minanam to Fangcalay Cudad.

28 ko patirengan ningra a pakingkiwan, oniya pakingkiwan itiniay i sepatay masasiroma a kakitakitan. Pafelianho ningra ko roma pakingkiwan to salikaka. Tano madoloay a salicay ni Mari, mahelaayto ko adihayay a pakingkiwan!

Oniya lalakaw mihadakan a saˈayaway pakingkiwan ci Ciyasmin itini 2021 miheca Kasepatan a Folad mipaputisem. 2022 miheca Kalimaan a Folad mipaputisemay ci Kristina, nohatini minokayayto cingra tayra i Filiping malacafay to paro no lomaˈ maˈorip. Ikor no mipaputisemayto ni Kristina ko pina folad, ci Ancila mipaputisemayto, nohatini o miceriday misakafahay cingra. Misiwkayan ni Kristina a tatosa pakingkiwan micadaayto to paputisem. Roma i, o faˈinay ni Kristina ci Ciyawsowa, o fafahiyan wawa ci Anteria, ato romaroma pakingkiwan padadotocay a macakat.

Itini saka 1 hahekalan, ˈalomanay a tamdaw mikitiniay i paro no lomaˈ anca i widang tahatengil to ngaˈayay lihaf. (Yohani 1:41, 42a; Dmak 10:24, 27, 48; 16:25-33) Salalicayen iso ko pakingkiwan anoca maolahay to Fangcalay Cudad a tamdaw: “I kafanaˈan iso a tamdaw iraay ko sapinanamaw to Fangcalay Cudad han?” Mahaen ko demak iso, alatek wa adihay ko mapatirengay a pakingkiwan!