Sasamaan Malo Soˈlinay Widang?

SANO niyahay a cecay misiˈayaw kiso to pasangar han? Maˈoripay kita i ‘pasangaray a lintad,’ mansa madoloay matoled awaay ko ˈicel miremo sanay ko harateng. (2 Timoti 3:1) Kawra sanay ko Fangcalay Cudad, mifekad ko pasangar i, soˈlinay widang ngaˈayay padama kitanan, kalacafay kitanan misiˈayaw to ‘pasangar.’ (Taneng 17:17) Mansa cowa ko cecayay kita hato awaay ko papadama!

SOˈLINAY WIDANG SASAMAAN A PADAMA

Tarokos ci Pawlo tayra icowacowa mitosil i, ˈalomanay ko salikaka kalacafayay cingranan, oniya widang padamaay cingranan. (Kolosay 4:7-11) Na mapalit cingra i Loma i, o mananto a demak cowa ka madangar, padamaayto ko widang cingranan, tinakoen ci Ipafrotitus nai Filipiay a salikaka miˈorong to saali ni Pawlo a dafong, ci Tikikusa patayraan ningra ko tikami ni Pawlo to icowacowaay a kasakopang. (Filipi 4:18; Kolosay 4:7) Ngaˈayayto ira ko sapadama no widang, soˈlin mapalit ci Pawlo i kapalitan, ngaˈayay padadotoc mitosil. Anini, sasamaan kiso malo soˈlinay widang no tao hani?

ˈAlomanay ko taˈarawan no salikaka a mahapinang ita, soˈlinay widang sasamaan a padama. Nengnengen ita ko nalifetan no i Sipanyaay a misakafahay fafahiyan a salikaka ci Ilisapic. Na mafanaˈ to o ekang ko adada no wina ningra ikor i, sapakalalokaw ko cecay fafahiyan salikaka cingranan, palihafan ningra to adihayay mahawpay ko lihaf no Fangcalay Cudad. Sanay ci Ilisapic: “Oniya lihaf mafanaˈay kako to iraay ko ciharatengay takowanan. Dihkoaan nanay kako, iraayto ko ˈicel misiˈayaw to pasangar to romiˈamiˈad.”—Taneng 18:24.

O roma i, padama kita to salikaka mirienang to demak no kasakopang, makedecay ko kalawidang. Tinakoen, ngaˈayay pakalic to matoˈasay a salikaka mirienang to saˈopo anca mitosil han? Ano mihaen ko demak iso, pakalalok cangranan. (Loma 1:12) Kawra, o roma salikaka cowa ka ngaˈay mahadak, wa samaan kiso malo soˈlinay widang nangra hani?

PADAMA TO COWA KA NGAˈAY MAHADAK A SALIKAKA, MALO SOˈLINAY WIDANG NANGRA

O roma salikaka adadaay anca o roma a lalangian, cowa ka ngaˈay tayra i kasakopang misaˈopo. O nalifetan ni Tafiti mahaenay. Na mafanaˈ cingra to ekang ko adada i, kalitosaay no mihecaan oha mamipaising. Oniya pipaisingan a tatokian, cingra ato fafahi ci Litiya tano wanglo aca sanay mirienang to saˈopo.

Samaanay padama ko salikaka cangranan hani? Maherek ko saˈopo i, ˈalomanay ko salikaka tayraay i kaˈayaw no pisasingan no tingnaw masasoˈaraw. Ano pacaˈofay cangra i saˈopo i, palihafan no salikaka i soci a pakahemek pakalalok cangranan. Pairaay to manan a epocan hani? Ci Tafiti aci Litiya cowa ko matoˈolay kami sanay miharateng.

Roma i, ngaˈayay kita malalok kalacafay to cowa ka ngaˈay mahadak a salikaka mitosil. Ano mihaen i, oha mamisalof kita to niyah a demak, kawra mihaen ko demak ciepocayto, ngaˈay mahapinang nangra cowa ka pawan ko kasakopang cangranan. (Taneng 3:27) Alatek ngaˈayay limasmasen iso kalacafay cangra tano tikami anca tingwa a mitosil. O malohemay malitengay ngaˈayay milimasmas, ho ngaˈay cangra kalacafay tano wanglo mirienang to ˈayaw no mitosilay a saˈopo. Ci Tafiti aci Litiya miakoˈidayto limasmas no kasakopang. Sanay ci Tafiti: “Ngaˈay mirienang to malalengo no mitosilay kapot, kalacafay to salikaka mitolon to Kawas, soˈlin ˈapotoay ko toki, pakalalokay tamiyanan.” Nolatekay, wa ngaˈay kiso mitaaw to pakingkiwan tayra i lomaˈ nangra a mikingkiw han? Kawra, saˈayaw licayenho cangra to mamadepoc hokira.

Ano mipalak kita to toki kalacafay to cowa ka ngaˈay mitosil a salikaka, wa mafanaˈ to makapahay a capeling nangra. Mihaen, wa masemer kita cangranan, matongal ko kalawidang cangranan. Tinakoen, ya maˈaraw ita to samaanay cangra tano Kimad no Kawas mitemer to falocoˈ no tao i, wa mangalef masemer cangranan. I pidokoan a demak padama kita to salikaka, wa matongal ko ngaˈayay widang.—2 Korinto 6:13.

Tahalifa to pasangar ko tarokos ci Pawlo i, o widang ningra ci Titus tayniay i tatihi ningra, ho malifokay ningra ko sahinom. (2 Korinto 7:5-7) Oniya miˈoningan patalipaˈelalay kitanan, tahalifa ko salikaka to pasangar i, tano sowalen ita a mihinom cangranan, ngaˈayay i tatihi nangra a kalacafay, misaˈicel midemak a midama cangranan.—1 Yohani 3:18.

MISIˈAYAW TO SAPALAK I, MALO SOˈLINAY WIDANG

I Rowasiyaay a salikaka misiˈayaw to sapalak madadamaay cangra, patirengay to makapahay taˈarawan no mita. Nengnengen ko nalifetan no mararamoday ci Siekay aci Taciyana. Cecay romiˈad, iraay ko dimeng tayra i lomaˈ midakdak to dafong nangra a mikinsa, ikor patayraan cangra i dimeng a milicay. Saho i, pahadakan ci Taciyana. Mitikol miharateng ci Siekay sanay: “Minokay ci Taciyana caka halafin, iraay ko cecay fafahiyan salikaka milosimet to lomaˈ niyam, mihaen ko demak no salikaka misaaliay to timolo. Ikor, romaroma salikaka tayniay i lomaˈ ako a padama.”

Sanayho ci Siekay: “Maolahay kako to Taneng 17:17, sanay ko sinael: ‘O soˈlinay widang maceriday paihkal to olah, malecad o malikakaay malacafay misiˈayaw to pades.’ Tahalifa to sapalifet i, cowa to ka tomeseng kako, pakaynian ni Yihofa to timoloay a salikaka midama takowanan, itini saali ako padamaay cangra takowanan, ho mitemeray to falocoˈ ako koniya sinael.”b

Anini, masiˈayaway ita ko pasangaray a pakayraan, misaaliay to sapadama no widang. Noikor itini taˈangayay a padiing, misaaliay kita maladadama. Mihaenay, aniniho misatapang kita misaˈicel malo soˈlinay widang no tao.—1 Pitiro 4:7, 8.