Sinanoten a Miconged ko Pinangan no Hekal, ho Eca ka Misakareteng Minengneng to Niyah

MAHAPINANGAY iso han? ˈAlomanay aniniay a tamdaw sakairaaw ko sangaˈayay anca mikiriwiˈ ko fadangalan no niyah. Soˈlin mikiriwiˈayto ko macadaay nangra, nanay adihayho ko mamacada sanay miharateng. Mahaen ko falocoˈ nangra, o niyah aca ko miharatengan, awaay ko miakoˈiday falocoˈ. Sowal no Fangcalay Cudad, i salikoray a romiˈad, mahaenay ko harateng no ˈalomanay tamdaw.—2 Timoti 3:2.

Kawra, itiyaho iraayto ko mahaenay a waywayan. O lalitengan no tamdaw ci Atam aci Ifa o niyah sanay misaˈosi to matatodongay tatiihay a palinian, mahaen ko demak nangra pairaay to kaadayayan a teloc. Ikor no pina caˈol miheca, o harateng no Yuta Hongti ci Uciya iraay ko fadangalan no niyah paehiw i fangcalay sefi, kawra mahaen ko harateng ningra o pakidemay a raraw. (2 Rayray 26:18, 19) Isaka 1 hahekalan i, o harateng no Farisay ato Satukay a tamdaw, ano o teloteloc ni Apraham cangra i, mamikiriwiˈ ko picada no Kawas cangranan wangaˈ sanay cangra.—Matay 3:9.

I taliyokay ita a tamdaw ˈalomanay ko misano niyahay ko harateng. (Kalatiya 5:26 ato roma pihongyak.) Ano cowa ka pisananot, wa mafiyor nangra kita, wa mikiriwiˈ ko picada no tao takowanan sato miharateng. Misamaan ko demak ita ngaˈ, eca ka hecad cangranan hani? Salakat, cacipinang kita to pinengneng ni Yihofa. Nengnengen ita mikitini i Fangcalay Cudad a mahapinang ko tosa a kalimlaan a kimad.

O manan ko mamacada ita, o ci Yihofa ko mamisaˈosi. Nengnengen ko dotoc a tinakoan.

I paro no lomaˈ, misaaliay to pikangodo no fafahi ko faˈinay, o fafahi i, misaaliay to pikaolah no faˈinay cingranan. (Ifiso 5:33) Ka madimadi cangra makakaolah to raramod ngaˈ. (1 Korinto 7:3) Iraay ko fadangalan no wama wina misaali to wawa midofdof to niyah, o wawa sa i, wa macada nangra ko olah ato pidipot no wama wina.—2 Korinto 12:14; Ifiso 6:2.
Itini kasakopang, malalokay matayal ko malohemay malitengay, citatodongayto kakangodoen ita cangra. (1 Tisalonika 5:12) Kawra, awaay ko fadangalan nangra mikowan to salikaka.—1 Pitiro 5:2, 3.
Pafelian no Kawas ko sifo no hekal to fadangalan misaali to finawlan milisata ato paihkal to mikangodoay.—Loma 13:1, 6, 7.

Sapafeli ni Yihofa kitanan, ikakaay to mamacada ita. Sahtoay o ciraraway kita, malo o ciraraway i, edengan o patay ko mamacada ita. (Loma 6:23) Kawra, madimadiay ko olah ni Yihofa, adihayay ko macadaay ita a sapalemed. (ˈOlic 103:10, 11) O mamacada ita a kahacecay sapalemed ni Yihofa, sahto o mikiriwiˈay a sidaˈit Ningra, cowa ko hatatodong ita micada.—Loma 12:6-8; Ifiso 2:8.

SASAMAAN NGAˈ ECA KA MISAKARETENG MINENGNENG TO NIYAH

Sinanoten a miconged ko pinangan no hekal. Alatek wa palidlid sa mafiyor no hekal kita, wa ikaka to tao ko mamacada no niyah sa ko harateng. Na tano sapatinako ci Yis a mitadtad, o mahaenay a harateng madoloay lomahad itini falocoˈ ita. I sapatinako, o roma maomahay pacelemay matayal, o roma maomahay cecayay aca tatokian matayal. Maraod ko palifonan no tawki i, polong maomahay mahecaday cecayay a linkim ko lifon. Cowa ka hemek koya pacelemay a maomahay, samanen saromiˈaday misacidalay matayal cangra, wa adihay ko lifon no niyah sanay miharateng. (Matay 20:1-16) Tanoniya a sapatinako ci Yis pakafanaˈ to tamdaw, ano mananto ko sapafeli ni Yihofa kitanan, wa marenecen kita ngaˈ.

I sapatinako ni Yis a maomahay i fadisosoˈ a omah, ngaliwngiway cangra to tawki. — Oya misaromiˈaday a maomahay wa adihay ko halifon ako sanay

Pairaen ko miakoˈiday a falocoˈ, hamaan ko pisaali aca. (1 Tisalonika 5:18) Haratengen ko taˈarawan no tarokos ci Pawlo. Itiraho i Korinto cingra i, soˈlinay iraay ko fadangalan ningra misaali to salikaka padama to pakadafongay, kawra cowa ka pihaen to demak cingra. (1 Korinto 9:11-14) Ano o mananto ko sapafeli no tao, pairaen ita ko miakoˈiday a falocoˈ, hamaan a haharateng sa itira i tao milifok to adihayay a dafong.

Malacafayay ko tarokos ci Pawlo ato tatosa faˈinayan misangaˈ to kopang. — Tarokos ci Pawlo cowa ka misaali to salikaka padama to padafongay cingranan

Palahaden ko misapoeneray a waywayan. Ano misakareteng ko pinengneng to niyah i, wa adihay ko mamalifok no niyah sa ko hatareng. O misapoeneray mahecaday to miadahay a cemel, padamaay kitanan mifalah toniya tatiihay a harateng.

Coka: Saka 1. Malitengayto a pairasolay ci Taniil. Saka 2. Nolitengan a niyaroˈ no Papilon. Saka 3. No kaemanganho ni Taniil ato tatolo Hipray a cafay. — Pairasolay ci Taniil padadotocay misapoener, mansa itini i pinengneng ni Yihofa o masakalimlaan a tamdaw cingra

Pakayni i misapoeneray waywayan, o ngaˈayay taˈarawan ita a pairasolay ci Taniil. Taˈangayay ko saaroˈan no paro no lomaˈ ningra, o makapahay a tamdaw kora, citanengayho cingra. Alatek oniya kangaˈayan ningra, papiharatengay cingranan cacitatodong micada to mikiriwiˈay a fadangalan cingra. (Taniil 1:3, 4, 19, 20) Kawra, i hakelong no ˈorip ni Taniil padadotocay to misapoeneray, mansa itini pinengneng ni Yihofa o masakalimlaan a tamdaw cingra.—Taniil 2:30; 10:11, 12.

Seteken ita ko falocoˈ, ho caka denga noniya hekal, hamaan pakidem misakareteng minengneng to niyah. Nanay padadotoc kita pakayni to sapalemed ni Yihofa a lipahak, haratengen koniya kihcod sahtoay o mikiriwiˈay a sidaˈit Ningra koni.