“Cowato ka Toˈol Kako”

TAˈARAWAN NO WAMA WINA

O paro no lomaˈ niyam itiniay i Senghoan Teemote, o inakaay no Filiping i Manila a pala. O wama wina ako o tingsokiw cangra. Mikitini cangra i Fangcalay Cudad mafanaˈ to ngangan no Kawas o ci Yihofa ikor mafalicayto, ikorto i, malo tawlikay a Misawacayay Tamdaw ni Yihofa. O wama ako cowato ka pitoˈeto to sasing ni Yis, ao misangaˈan ningra to saka cecay tingloh no lomaˈ niyam malo o Kasaˈopoanto. Oniya kasaˈopoan o saka cecay itini i Senghoan Teemote a pala a kasaˈopoan.

Sepatay ko faˈinayan ato tatolo fafahiyan ko kaka ako, ˈayaw no hofocen kako i, misarocoday ko wama wina pakafanaˈ cangranan to Fangcalay Cudad. I 1952 miheca hofocen kako ikor, o wama wina malecaday misarocod pakafanaˈ takowanan mafanaˈ ci Yihofaan. Itini toniya kalomahadan, pakalalokay ko wama ako to romiˈamiˈad papiˈosi to cecay fedengan no Fangcalay Cudad, kalacafayay cingra takowanan miˈosi to adihayay mitepangan a cudad no likakawa no Kawas. Nolatekay, talaˈayaway ko wama wina militemoh to taypiyaw no fenpo ato milisoˈay tayal a salikaka. O paro no lomaˈ niyam mikitini sapaladaˈ nangra a milifetan milifokay to sapakalalok ato sakalipahak, pakalalokay tamiyanan paisalakat to midokoay to Kawas a demak i nokaˈorip.

O wama wina ako tangongolay ko pakasoˈlinay falocoˈ ci Yihofaan, patirengay to makapahay taˈarawan no mako. Na adada mapatay ko wina ako ikor, 1971 miheca malacafayay kako ato wama malo misakafahay. Kawra tahira i 1973 miheca, mapatayay ko wama ako, itiya 20 ko mihecaan ako. Mapatay ko wama wina tada matoˈolay mararomay kako. Kawra, o tokel no Fangcalay Cudad ‘o soˈlinay ngaˈayay tiˈeren,’ mahecad to ˈenor no tamina, padama takowanan rihaday ko falocoˈ ato tanoktok ko pihakelong. (Hipray 6:19) Mapatay ko wama ako cowa ka halafin, macadaay ako ko sanilnil tayra i Kelon malo mikiriwiˈay misakafahay, o Palawan hananay a mara:ayay mimingay a niyaroˈ.

CECAYAY MISIˈAYAW TO PASANGAR

Tahira i Kelon i, 21 ko mihecaan kako. Nano kaemang kako itiniay i maci a lomahad, tahira kako i, mahapinangay oniya mimingay a niyaroˈ awaay ko tingki ato nanom, o tosiyato ato otofay cowa ka adihay. Soˈlin ira ko papina faˈinayan salikaka, kawra awaay ko cafay ako malo misakafahay, nolatekay cecayay kako malingad a mitosil. Saka cecay folad, maˈilolay kako to paro no lomaˈ ato widang. To dadaya i, micaˈengaw kako minengneng to foˈis, lowis sanayto ko losaˈ ako. Hato cowa ko mamadangar ako koniya demak, sapinokayaw sanayto kako.

Itiya toya matoˈolay tatokian, maceriday kako pasowal ci Yihofaan to nafalocoˈan. Maharatengay ako ko pakalalokay a sowal i Fangcalay Cudad ato mitepangan a cudad, tinakoen maceriday maharateng ko ˈOlic 19:14. Mikitini toniya sinael mananamay ako, ano midotim to kaolahan ni Yihofa a demak kako, tinakoen o midemakan Ningra ato makapahay capeling, ci Yihofa wa malo ‘ˈongcoy ako, paˈoripay takowanan a Tatapangan.’ Roma i, “Cowa ka Mamatoˈol Kiso”a sanay a lalakaw no Mikecolay taˈangayay ko sapadama takowanan. Misaliyaliyawan ako a miˈosi koniya lalakaw, milifok to taˈangayay a sapakalalok. Soˈlin itiya cecayay kako, kawra adihayay ko toki kalacafay ci Yihofaan. Ngaˈayay mitolon to Kawas, mikingkiw ato midotim. O sakalimlaan a tatokian itiya.

Tahira kako i Kelon cowa ka halafin i, manilnilay malo malohemay malitengay. Samanen cecayay ko malohemay malitengay toniya niyaroˈ, to lipalipayan wa misikay kako to polong a kamok no saˈopo, mahawpay ko Pahatatanamay Saˈopo, Mitosilay Saˈopo, Kasakopang a Pikingkiw to Cudad ato Kadadoedo no Mikingkiw to Mikecolay. Roma i, to lipalipayan wa mikimad kako to pakapapotalay a kimad. Haratengen no miso, itini toniya pakayraan, wa matoˈolho kako han? Awaay ko romiˈad ako a matoˈol!

Itini kako i Kelon mitosil i, tada ciepocay, o pakingkiwan ikor micadaay to paputisem, maolahay kako itira mitosil. Kawra, tahalifaay kako to pasangar. Nolatekay, kalitosaay no romiˈad romakat ngaˈ tahira i pitosilan a kilac, kawra tahira ikor i, cowa ka fanaˈ kako aicowa a mafotiˈ to dadaya. Roma i, o kilac no kasakopang mahawpay ko mimimimingay a niyaroˈ, wa mikalic to tamina ngaˈ tahiraay, kawra nolatekay ira ko taˈangayay fali ato tapelik, cowa ka fanaˈ kako midangoy, tada pasangaran nanay kako itiya. Kawra, kamayan ci Yihofa midipot midama takowanan. Ikor mahapinangay ako, itiya padamaan ni Yihofa kako a papilimasmas, micada to hanoikor a cowa ko madoloay a ˈinorong.

PAPUA NIW KINI

I 1978 miheca, maocoray kako tayra i Papua Niw Kini. I kakaˈamisan no Awtariya koniya kitakit, mahecaday to Sipanya a kitakit ko kakahad ningra, hanaca adihayay ko lotok. Tahira kako fahkaˈan nanay kako, 300 efan a tamdaw o sasowalen sa i, 800 ko kasasiroma no sasowalen. Ngaˈayay sa i, mafanaˈay ko ˈalomanay somowal to Papoyapici a sowal.

Maocoray kako tayra i maci no Moecipi minato no Padaka sowal a kasakopang. Ikor, malinahay kako tayra i Papoyapici sowal a kasakopang, tayraay minanam to sowal nangra. Mitosil i, ya matakciay ako i sakadademakan ako, padamaay takowanan kaliki a mafanaˈ toniya faelohay a sowal. Cato ka halafin i, mafanaˈay kako tano Papoyapici a sowal mikimad to pakapapotalay a kimad. Caka cecay miheca itira i Papua Niw Kini, manilnilay kako mala kasakilac kantok, milisoˈ to Papoyapici a sowal a kasakopang! Taˈangayay koniya kasakilac, mahawpay ko pina taˈangayay a pala.

Samanen mara:ayay ko kalalaˈed no kasakopang, misaaliay kako sapilimasmas to pina a taykay, misatikotikol adihayay ko mapalakay a toki. Salakat i, matoˈolay kako, samanen itiniay kako i faelohay a kitakit, somowal to faelohay a sowal, o serangawan cowa ka hecahecad. Adihayay ko lotok itira, masahefohefongay cowa ka sadafdaf ko lalan, cowa ka depoc ko rarakaten, mansa to lipalipay pakahikokiay ko lingad ako milisoˈ to kasakopang. Latekay, o mimingay a hikoki ko mikalican ako, hanaca cecayay kako a mikalic. Pakayni takowanan i, o mahaenay a lingad katalawan to mahecaday to mikalicay to tamina!

Cowa ka adihay ko citingwaay no itiraay, mansa o tikami ko sapirinnak to kasakopang. I kalo a romiˈad, tahiraayto kako i katayraan, kawra cowaho katahira ko tikami, telocto i, salalicayan ako ko itiraay a tamdaw, icowaay ko salikaka. Kawra makilim ako ko salikaka ikor, mahemekay cangra militemoh takowanan, tada ciepocay ko narorayan ako. Malifetay ako ko pidama ni Yihofa takowanan i kalo a pakayraan, makedecay ko kalawidang ako Cingranan.

Sakacecey ako mirienang to saˈopo i Pokanwie i, iraay ko mararamoday tawa sanay militemoh takowanan, milicayay cangra takowanan: “Maharatengayho iso kami han?” Maharatengayto ako, isalakat tayni kako i Moecipi minato na mitosilan ako cangra. Misatapang cangra mikingkiw ikor, patorodan ako ko itiraay a faˈinayan salikaka a pakingkiw. Nohatini mipaputisemayto cangra tatosa. I Papua Niw Kini to tolo a miheca, adihayay ko malifokay a sapalemed, oni ko cecay.

ˈIFOWAAY A PARO NO LOMAˈ

Itiraay kako i 1978 miheca ˈayaw no miliyas to Kelon i, mafanaˈay to cecay fafahiyan salikaka ci Ataye, masolotay ningra kako. Iraay ko kinafalahay to niyah a harateng, mala miceriday misakafahay, paririˈay to tosa wawa ningra, Samuil aci Sili. Itiya i, wa midipotho to matoˈasay a wina. 1981 miheca 5 folad, minokayay kako tayra i Filiping mararamod aci Ataye. Ikor no mararamod i, malacafayay midipot to paro no lomaˈ, malacafayayho malo miceriday misakafahay.

Soˈlin midipotho to paro no lomaˈ, i 1983 miheca miliyaway a maocor malo mikiriwiˈay misakafahay, halo maocor tayra i Palawan pala Linapakan niyaroˈ a matayal. Malinahay ko paro no lomaˈ niyam tayra i awaay ko salikaka a mara:ayay a kilac. Ikor no cecay miheca, mapatayay ko wina ni Ataye. Kawra, ˈifowaay kami to mitosilay a demak, padamaay tamiyanan misiˈayaw to rarom no kapatay no wina. Adihayay ko mapatirengay niyam a pakingkiwan, kalikiay ko kacakat no pakingkiwan, cato ka halafin misaaliay kami to hakasaˈopoan, oranto i, patirengay to kami to kasaˈopoan. Tahira kami to tolo miheca, 110 a tamdaw ko mirienangay to Piharatengan to Kinafalah ni Yis a Saˈopo, miliyas kami ikor ˈalomanay ko micadaay to paputisem a tamdaw. Tada mahemekay kami maˈaraw ko mahaenay a minaroˈan!

1986 miheca, maocoray kako tayra i Koliyang matayal, itira iraay ko manoˈnoˈay ko adada a tamdaw a kitiraan. Ikor, ci Ataye manilnilay malo mikiriwiˈay misakafahay. Satapang, mitosil to manoˈnoˈay a tamdaw cowa ka ngaˈay ko harateng ita, kawra pasowalay ko itiraay a salikaka tamiyanan, miadahanto maemin koniya tamdaw, mansa cowa ko mamidenga ko adada nangra to tao. Mafanaˈayho kami, o roma a manoˈnoˈay a tamdaw itira to cecay fafahiyan salikaka a lomaˈ mirienang to saˈopo. Kalikiay kami mananamayto itira a mitosilay a tayal, paladaˈ to makapahay hatokel no Fangcalay Cudad to manoˈnoˈay a tamdaw tada ciepocay. Malonicay no adada cangra, mahecaday to mifalahan tono Kawas ato i katihiay a tamdaw ko niyah, kawra maharateng ko niyah ano ikor wa patikol to malefot ko ˈorip, ho tanoktok cangra. Maˈaraw nangra ko hakelong no ˈorip irato ko hatokel, wa lipahak kita!—Luka 5:12, 13.

O wawa niyam itini Koliyang samaanay ko kaˈorip hani? I Kelonan tatosa fafahiyan salikaka micadaay to satahidang ako aci Ataye, malinah tayra i Koliyang, mansa iraay ko ngaˈayay a widang no wawa. Ci Samuil, Sili ato tatosa kaemangay fafahiyan salikaka mahemekay cangra itini a mitosil. Pakafanaˈan nangra ko ˈalomanay wawa minanam to Fangcalay Cudad, kako aci Ataye pakafanaˈay to wama wina noniya wawa. I cecay a liyad, iraay ko 11 a paro no lomaˈ kalacafay tamiyanan minanam to Fangcalay Cudad. Cowato ka halafin, ˈalomanayto ko macakatay a pakingkiwan niyam, ngaˈayayto patireng to faelohay a kasakopang!

Isalakat o kako aca ko malohemay malitengay itira, mihaenay tahidangan no Pitil kako to lipalipayan pakayni to Koliyang faloay a mitosilay misikay to saˈopo, ikor tayraho i Marili a niyaroˈ pakayni to siwaay a mitosilay misikay to saˈopo. Mikitini i Koliyang tahira i Marili, mikalicay to tamina maedeng toloay tatokian. To lipalipayan malahci ko saˈopo no Marili ikor, o paro no lomaˈ niyam pinaay a tatokian ko rarakaten a lalan, milakowitayho to lotok, tayra i Halsi hananay a niyaroˈ misikay to pakingkiway a demak.

Ikor itini kami i Marili ato Halsi iraay ko ngaˈayay a minaroˈan, oranto itiniay kami toniya tosa a pala tosaay ko mapatirengay a Kasaˈopoan. Mahecaday to Linapakan a Kasaˈopoan, patireng toniya Kasaˈopoan misaaliay toya tamdaw atoya dafong, sahtoay o salikaka ato mahemekay to kimad a tamdaw ko midamaay. Itini Marili a Kasaˈopoan maedengay 200 ko tamdaw mirienang, hanaca oniya Kasaˈopoan wa ngaˈayho a macowat, mansa ngaˈayayho kami itira misikay to taykay.

MIREMO TO MARAROMAY ATO MATOˈOLAY A HARATENG, PADADOTOC A LIPAHAK

Lomahadto ko wawa ikor, itini 1993 miheca kako aci Ataye itira i Filiping misatapang milisoˈ to kasakilac. Itini 2000 miheca, mirienangay kako to MTS, halo mapahatatanamay kako i noikor mala mapakafanaˈay noniya mihatatanamay a singsi. Cowa ko mamadangar ako koniya faelohay a ˈinorong sanay kako miharateng, kawra padadotocay ci Ataye pakalalok takowanan. Patalipaˈelalay cingra takowanan, wa pafelien ni Yihofa kako to ˈicel, padama takowanan misongilaˈ midemak toniya faelohay ˈinorong. (Filipi 4:13) O sowal ni Ataye soˈlin o niyah a nalifetan koni, samanen micada cingra toniya sanilnil a tatokian, wa misiˈayawho to tanoktok no tireng a pasangar. Itini toniya cecay liyad, padadotocay cingra matinako ko sapadama ni Yihofa.

2006 miheca ya mala singsiho kako, ciadadaay ci Ataye to Pakinson adada, tada macekiday kami. Pasowalen ako ci Ataye, sapiliyasaw kako toniya tayal, misarocod midimokos cingranan. Kawra sanay cingra: “Kilim han ko ising miadah takowanan ngaˈayto, mafanaˈay kako wa padamaen ni Yihofa kita padadotoc a mihadidi.” Dotoc a enem miheca, padadotocay ci Ataye matayal saki ci Yihofaan, awaay ko ngaliwngiw. Ikor cowato ka romakat cingra, maroˈay to cikalilengay a kamaroˈan mitosil. Pasangarayto ko caciyaw ningra i, tano kantangay cecay tosa a sowal ko sapacaˈof i kasaˈopoan. Maceriday macada ni Ataye ko palihafay no salikaka, miakoˈid to pihadidi ningra a makapahay taˈarawan. 2013 miheca, mapatayayto ci Ataye. Toniya 30 a miheca, i katihi ako iraay ko mahaenay a madimadiay ciolahay a fafahi kalacafay takowanan. Kawra nohatini, mararomay ato matoˈolay a harateng miliyaway aca matomes i falocoˈ ako.

Makalimay ci Ataye materek kako i katayalan, mitooran ako midemak. Padadotocay kako a ˈifowa, padamaay koni takowanan miremo to matoˈolay a harateng. Mikitini 2014 tangasa 2017 miheca, manilnilay kako tayra i makecengay mitosil a pala milisoˈ to Takalok sowal a kasakopang. Ikor, milisoˈay kako to Taiwan, Padaka ato Kanata a Takalok sowal a kasakopang. 2019 miheca, itiniay kako i Intiya ato Tailan mala singsi no sano Padaka a sowal no SKE. Oniya emin a ˈinorong pairaay to taˈangayay a lipahak takowanan. Misarocod kako matayal saki ci Yihofaan i, tada marenecay ko falocoˈ ako.

ITINIAY I KATIHI AKO CI YIHOFA TAHADAˈOC

Ano o mananto ko ˈinorong a matayal, palahadan ako ko tangongolay kalawidang to salikaka, mansa miliyas cangranan tangoˈolay ko falocoˈ. Toniya tatokian i, misarocoday kako mitiˈer ci Yihofaan. Tada matinakoay ako ko sadama Ningra, padamaay koni takowanan mahemek micada to kafalic. Nohatini, itiniay kako i Filiping malo mikiriwiˈay misakafahay, dihkoay ko kasakopang ako, ciharatengay ko salikaka takowanan, itini kako hato mahelaay ko paro no lomaˈ. Mahemekay kako maˈaraw ci Samuil aci Sili mahecaday to wina nangra tanoktok ko pakasoˈlinay falocoˈ.—3 Yohani 4.

Tikolen miharateng ko hakelong no ˈorip ako, adihayay ko sapalifet takowanan, mahawpay maˈaraw ko ciadadaay a fafahi palidlid sa malonay, ikorto mapatay. Minanamho kako to masakenaay a faelohay kitiraan. Kawra kinapinapinaay milifet kako to ‘cowa ka piraay ci Yihofa to kahacecay a tamdaw.’ (Dmak 17:27) Ano hacowato i, padamaan ni Yihofa ko sikawdan Ningra, soˈlin itini cangra i inaka a pala, wa macada nangra ko sapadama ni Yihofa. (Isaya 59:1) O ˈOngcoy ako ci Yihofa, kamayan i katihi ako, tada miakoˈiday kako Cingranan. Cowato ka toˈol kako.