Salicay no Miˈosiay Tamdaw

Mitiliday to Fangcalay Cudad a tamdaw itini Taneng 30:18, 19 somowalay to ‘cowa ka cipinang cingra to malacafay ko faˈinayan ato limocedan a demak.’ O manan ko tatodong no sowal ningra hani?

ˈAlomanay tamdaw miˈosi toniya sinael i makarioratay ko harateng, o roma mikakingkiway to Fangcalay Cudad a tamdaw iraay ko mahaenay a harateng. Itini i Fangcalay Cudad Faelohay Hekal Mihongyakan, onini a sinael sanay ko sowal: ‘Cowa ko kacipianangan ako a demak [o roma pihongyak, ‘harateng ako i kasemeran a demak.’] toloay, sepatay ko cowa ko kacipianangan a demak, o maeferay ko lidep i kakarayan, minafoyay ko ˈoner i dapiyapiyacan, romakatay ko tamina i liyar, malacafay ko faˈinayan ato limocedan a demak.’—Taneng 30:18, 19.

Isaˈayaw sanay ko harateng ita, ‘malacafay ko faˈinayan ato limocedan a demak’ o mitoroˈan toniya sinael o cowa ka ngaˈay ko tatodong, misamaanay hani? Samanen o ikaˈayaway ato dotoc a sinael, o milengoan sahtoay o tatiihay a demak, tinakoen masowalay ikaˈayaway a sinael to pina cowa ka pasowal to ‘maedengayto’ a dafong. (Taneng 30:15, 16) Saka 20 a sinael masowalay ko pacopiyaway midemak to kaacekan a demak ikor, awaay ko midemakan to manan no niyah sanay. O roma i, o misowalan noniya sinael to pina a demak iraay ko mahecaday: Maeferay ko lidep i kakarayan, minafoyay ko ˈoner i dapiyapiyacan, romakatay ko tamina i riyar, sahtoay cowa ka hapinang ko nalikoran, o cecay faˈinayan alatek takaw sanay a midemak, pasangaray mahapinang no tao. Mihaenay, isaˈayaw sanay kita, ‘malacafay ko faˈinayan ato limocedan a demak’ mitoroˈan i, o milihiway a kapah mikayhiday to limocedan a madadiˈi cingranan, hanaca cowa ka hapinang no limocedan ko pakayraan ningra.

Kawra, iraay ko lalangian ita pakasoˈlin, oniya mitiliday paihkalay aca to fahkaˈay cingra, ora sowal ningra cowa ko tatiihay ko tatodong.

O Hipray a sowal noniya sinael midamaay toniya demak. O cecay citing no Fangcalay Cudad, itini Taneng 30:18 mahongyak ko ‘cowa ka cipinang kako’ sanay a Hipray a sowal, o mitoroˈan i, ‘o roma a demak kafahkaˈan nanay ko tamdaw, pasangaray haratengen, tada kasapaanto.’

I Padaka Hafor Taykak ci Kelawfote Toyi a singsi saan ko harateng ningra, oniya sowal awaay ko tatiihay a tatodong, saan cingra: “Oniya mitiliday o sowal aca kasemeranto koniya demak sanay.”

Mihaenay, iraay ko lalangian ita a pakasoˈlin, Taneng 30:18, 19 somowalay to kasapaan a demak, hanaca awaay ko pakayraan ita misongilaˈ a cipinang toniya demak. Mahecaday to mitiliday to Fangcalay Cudad a tamdaw, maˈaraway ita ko lidep i kakarayan a maefer, awaay ko ooˈ a ˈoner ngaˈayay i dapiyac a minafoy, taˈangayay a tamina ngaˈayay i riyar a romakat, fahkaˈan nanay kita toniya demak. Mahecadayto, makakaolah ko kamangay fafahiyan faˈinayan halo patireng to rahekeray a paro no lomaˈ, o kasapaan a demak konini.