‘ Padadotoc Mitadiˈec to Fangcalay Saocor a Malacecay’
PAKALALOKAN no tarokos ci Pawlo ko Ifisoay a Krisciyang ‘tano olah a masasihepol, pakayni i dipayal a makakedec, misarocod a mitadiˈec to fangcalay saocor a malacecay.’—Ifiso 4:2, 3.
O “kalacecay” no mita i, o makakedecay, ‘pakayniay i pitadiˈec to fangcalay saocor.’ Kawra mahecad o misowalan ni Pawlo, makakedecay misaaliay to sapadadotocaw. O cima ko mamihaen to demak hani? O kahacecay a Krisciyang iraay ko ˈinorong ‘padadotoc mitadiˈec to fangcalay saocor a malacecay.’
Haratengen ko cecey sapatinako, ano iraay ko tamdaw patelong tisowanan to faelohay tosiya i, ikor cima ko misongilaˈ midimokos toniya tosiya hani? O kisoto. Ano cowa ka misongilaˈ midimokos toniya tosiya, telocto i, mapalakto, cowa ka ngaˈay kiso miroroh toya patelongay tisowanan a tamdaw.
Malecaday, o kakedec ita ato salikaka o sapafeli no Kawas a sapatelong, iraay ko ˈinorong ita misongilaˈ a midimokos. Ano caka malakangaˈay kita to cimaanan a salikaka, licayen ko niyah: “Misaˈicelay kako misaysay to lacongis, padadotoc mitadiˈec to fangcalay saocor a malacecay han?”
‘Misarocod’ Padadotoc a Makakedec
Mikitini sowal ni Pawlo mahapinangay ita, sapadotocaw mitadiˈec to fangcalay saocor a malacecay cowa ko madoloay, mangalef ano pakararaw to salikaka kitanan i, pasangarayto mihaen to demak. Mihaenay i, tatodong no sapadadotocaw makakedec, ano ira ko lacongis ita to salikaka i, kilimen kora tamdaw a masasowal han? Awaay ko pinang. Salalicayen ko niyah: “Mikilim kako tora tamdaw masasowal, o sapicowataw to dipayal han? Anca pakidem ko katatiih no demak han?” Latekay, o citanengay a pakayraan i, makahi a misodod a mahahepol.—Taneng 19:11; Marko 11:25.
Salalicayen ko niyah: “Mikilim kako tora tamdaw masasowal, o sapicowataw to dipayal han? Anca pakidem ko katatiih no demak han?”
Pakalalokay ko tarokos ci Pawlo kitanan ka ‘tano olah masasihepol.’ (Ifiso 4:2) O cecay milengoay to Fangcalay Cudad a cudad sanay, oniya sowal wa ngaˈay mihongyak to “cadaen ko pinengneng no tao.” Tadtaden ko cecay a demak i, mahecaday ko salikaka kitanan cowa ko malefotay a tamdaw, mamararaw. Mamisaˈicel kita micaˈedong to ‘faelohay a capeling,’ kawra awaay ko kahacecacecay tamdaw pakalefotay to demak. (Ifiso 4:23, 24; Loma 3:23) Ano cipinangayto kita to mahaenay a pakayraan, wa madoloto a masasihepol, masasodod, mihaen i, wa ngaˈay ‘padadotoc mitadiˈec to fangcalay saocor a malacecay.’
Mamisaˈicel kita misodod to salikaka a mihepol to raraw nangra, wa ngaˈay ‘pakayni i dipayal a makakedec.’ ‘Pakayni i dipayal a makakedec’ hananay i, itini Krisiya sowal tatodong i, o “dipayalay a olat.” Tada ciˈicelay a kodait ko olat, wa ngaˈay pakaketing to ˈokak. Mahecadayto, tada ciˈicelay ko dipayal ato olah, soˈlin malacongis kita to salikaka, kawra pakayni i dipayal ato olah wa ngaˈay makakedec kita to salikaka a malacecay.
Mihaenay, ano mapakararaw no salikaka kiso i, tano sidaˈitay a falocoˈ cowa ko samacay sa minengneng to dangoc no tao. (Kolosay 3:12) Kita maemin cowa ko malefotay, na pakararaway to tao. Haratengen konini papadama tisowanan misaˈicel misakadademak to safalod no Fangcalay Cudad, ‘padadotoc mitadiˈec to fangcalay saocor a malacecay.’