SAKA 8
Hano Pakihateren no Kawas ko Tatiihay ato Pades Hani?
1. Samaanay a misatapang ira ko tatiihay hani?
Pafelian no Kawas ko tamdaw to Koˈdaway toki a mikowan, misawacay to caay pakasaysay to pasangar no tamdaw
Ta pasowal ci Satan to saka cecay a mangah i, itiyaay misatapang ira ko tatiihay. Ci Satan o nano malefotay a coyoh, kawra ‘cowa pitoor to soˈlinay kimad a dademak.’ (Yohani 8:44) Maˈinalay ci Satan mato o Kawas a dokoen no tamdaw. Samangahen ningra ci Ifa, pasoˈlin sa ci Ifa tora mangah, hawad sato midofdof to Kawas. Ikor i, mikihatiyaay ci Atam ci Ifaan a misafelit to Kawas. Telocto i, iraayto ko roray ato patay no tamdamdaw.—ˈOsien ko Satapangan 3:1-6, 19.
Kayhidan ni Satan ci Ifa misafelit to Kawas, mitowakang to pikowan no Kawas, misilikor to Saˈakawangay noka Pikowan no Kawas. Teloc i, mitooray ko ˈalomanay ci Satanan, manaˈay to pikowan no Kawas. Mihaenay haw i, malo “mikowanay tonini a hekal” ci Satan.—ˈOsien ko Yohani 14:30; 1 Yohani 5:19.
2. Sangaˈen no Kawas ko coyoh ato tamdaw, iraay ko dangoc han?
Sahtoay o malefotay ko kihcod a nisangaˈan no Kawas. Misangaˈ to coyoh ato tamdaw Cingra, nao ngangaˈay cangra a malefot ko pidofdof to Kawas. (Limoˈot 32:4, 5) Misangaˈ ko Kawas to tamdaw i, pafelian to pasalat cangra, ano mipiliˈ to ngaˈayay ko pidemak ita i, ngangaˈay paihkal to olah to Kawasan.—ˈOsien ko Yakop 1:13-15; 1 Yohani 5:3.
3. Hano tahaninien no Kawas ko pisemsem no tamdaw?
Pakihateran no Kawas ko pades to cecay a liyad, o sapisawacayaw ano caka picada to pikowan no Kawas i, cowa ko raraheker ko tamdaw. (Patnakay 7:29; 8:9) Itini toni 6,000 a mihecaan a likisi no tamdaw, mahapinangay ko wacay. O pikowan no tamdaw caay pakasaysay to pasangar, tatiihay, lalood, adada ato caay ka sadafdaf a demak.—ˈOsien ko Yirimiya 10:23; Loma 9:17.
O pikowan no Kawas cowa ka hecad. Ano micada to pikowan no Kawas i, papaira to rehekeray no kaˈorip no tamdamdaw. (Isaya 48:17, 18) Mangataayto tatekopen no Kawas ko polong a sifo no hekal. Itiya, edengan o micadaay to pikowan no Kawas a tamdaw ko aitini i Lakoing a maˈorip.—Isaya 11:9.—ˈOsien ko Taniil 2:44.
Nengnengen ko ika Hano Pakihateren no Kawas ko Pades i Hekal Hani?
4. Mihadidiay ko Kawas, hato iraay ko toki ita misamaan ko demak hani?
Sowal ni Satan awaay ko tamdaw to nika olah to Kawas a midoko Cingranan sanay. Sapisawacayaw kiso to mararaway ci Satan hokira? O ngangaˈay kiso mihaen to demak! Mihadidiay ko Kawas, hato iraay ko toki ita, patalahkal to pidopo to cimaanan. O kaˈorip ita patalahkalay to midopoay to pikowan no Kawas.—ˈOsien ko Yopu 1:8-12; Taneng 27:11.
5. Samaan kita patalahkal to midopoay to pikowan no Kawas?
O noka pipiliˈ ita paihkalay to midopoay kita to pikowan no Kawas hokira
Ano doedoen ita ko Kimad no Kawas, mikilim ato mirienang to soˈlinay a pihakelongan i, o midopoay kita to pikowan no Kawas. (Yohani 4:23) Kita i, matira ci Yisan caka picapid to mikowanay a demak ato lalood no hekal, paihkal to manaˈayay kita to pikowan ni Satan.—ˈOsien ko Yohani 17:14.
Ci Satan mikayhiday to tamdaw midemak to mafolaay ato tatiihay a demak. Ano minaˈay kita to matiraay a demak i, mamilikaf a paculi ko paro no lomaˈ ato widang alatek. (1 Pitiro 4:3, 4) O mamipiliˈ ko kahacecay a tamdaw. Mipiliˈ a misawidang to maolahay to Kawas a tamdaw han? Makahi midofdof to sarikec no citanengay ciolahay a Kawas han? O tamdaw ‘itini i saroero cowa ko mamidofdof to Kawas,’ sanay ci Satan, ˈarawhan ano masamaamaan dofdofen ita ko Kawas i, ngangaˈayto misawacay to mararaway ci Satan.—ˈOsien ko 1 Korinto 6:9, 10; 15:33.
Tada maolahay ko Kawas kitanan, mankora papalahdawen Ningra ko tatiihay ato pades. Ano pakasoˈlin kita to ciolahay masadafdafay ko demak no Kawas a midopo to pikowan Ningra i, o ngangaˈay kita tahadaˈoc a lipahak ko ˈorip i Lakoing.—ˈOsien ko Yohani 3:16.