Itini Sasowalen, Sasamaan Kiso Palipahak ci Yihofaan?

Misangaˈay a Tapang ci Yihofa, pafeliay kitaanan to kasapaan a sapatelong, o sakacaciyaw a inaneng. Ciharatengay Cingra kitaanan misinanot a misakadademak to hatiraay a inaneng hokira. (ˈOsien ko Yakop 1:26.) Mihaenay, sasamaan kita misongilaˈ a misakadademak to sakacaciyaw a inaneng, ho ngaˈay pakahemek ci Yihofaan hani?

1. Sasamaan misakadademak to sakacaciyaw a inaneng?

Palimoˈotay ko Fangcalay Cudad kitaanan: ‘Padadotoc a malahahinom, makakowad.’ (1 Tisalonika 5:11) Itini kafanaˈan iso a tamdaw, ira ko misaaliay to sahinom han? Sasamaan kiso mikowad cingraanan? Pakafanaˈen to ciharatengay kiso cingranan, ato masemeray kiso to makapahay capeling ningra. O roma i, adihayay i Fangcalay Cudad a sinael wa pakalalok to tamdaw. Ngaˈay piliˈen iso ko matatodongay a sinael, paladaˈ cingranan? Sasinanoten ko o manan ko sasowalen, samaanay kiso a sakacaciyaw, o masakalimlaan. Mihaenay i, masasowal pairaen ko siniˈada ato lopayˈay.​—Taneng 15:1.

2. Aka a caciyaw to masamaanay a sowal hani?

Sowal no Fangcalay Cudad: ‘O tatiihay awaay ko epoc a sasowalen, hamaan a hadaken i ngoyos.’ (ˈOsien ko Ifiso 4:29.) Mihaenay, aka a somowal to cikaditay a sowal, hamaan a somowal to maˈinapay ato paorafay misamsam to tao, wa matoled ko falocoˈ no tamdaw. Aka a mitongangan kita to tao, anca aka i lalikor no tao a miyakayak to sowal.​—ˈOsien ko Taneng 16:28.

3. Sapi pakahemekaw to tamdaw, samaanen ko hasowal hani?

Ano somowal kita paihkalay to o manan ko miharatengan misaaretengan ato minengnengan no niyah. (Luka 6:45) Mihaenay, pahatatanamen ita ko niyah, misarocod ko harateng to matatodongay tawlikay a demak, sahto o moecelay, makoracay, mikidatay to maolahay falocoˈ ato pakahemekay a demak. (Filipi 4:8) Sakalaˈosiaw noniya demak, sinanoten ita mipiliˈ ko lawla ato widang. (Taneng 13:20) O roma i, ˈayaw no caciyaw kita i, saharateratengen wa misamaan ko pilingat to tao. O sowal no Fangcalay Cudad: ‘Cowa ka misinanot to sowal i, mahecaday o fonos a midokaˈ to tamdaw, o sema no citanengay a tamdaw i, mahecaday o ngaˈayay a cemel.’​—Taneng 12:18.

CALEPEN MIKADKAD

4. Aka a pasowal to pasasiyoray to falocoˈ a sowal

Nolatekay pasowalay kita to cowa ka tatodong a sowal, ikor masasiyor ko falocoˈ mangodoay kita. (Yakop 3:2) ˈOsien ko Kalatiya 5:22, 23, ikor lengoen ko ilaenoay a salicay:

• Sapiˈimeraw a pasowal to cowa ka tatodong a sowal, ngaˈayay cangacangen ko Kawas a padama tisowanan, palahad to maanan a capeling?

ˈOsien ko 1 Korinto 15:33, ikor lengoen ko ilaenoay a salicay:

• O mipiliˈan iso a widang ato lawla, alatek wa samaan mifiyor to sasowalen iso alatek?

ˈOsien ko Patnakay 3:1, 7, ikor lengoen ko ilaenoay a salicay:

• No hacowa kita a tomerep, mitala to matatodongay a toki a pasowal hani?

5. Matatodongay tawlik milengo to demak no tao

IKA: Sowalen ko Mikowaday to Tamdaw a Sowal (4:07)

• Itini ikaay a salikaka, misamaanay hano mifalic to sasowalen no niyah ato waywayan?

• Samaanay ko demak ningra hani?

ˈOsien ko Patnakay 7:16, ikor lengoen ko ilaenoay a salicay:

• Ano mitoˈes ko sasowalen ita to tao i, o manan ko sasinanoten hani?

ˈOsien ko Patnakay 7:21, 22, ikor lengoen ko ilaenoay a salicay:

• Ano malikafay ko tao tisowanan i, alatek maketer kiso. Oniya tosa a sinael sasamaan padama tisowanan ho eca ka maketer?

6. Madaˈmaˈen ko sowal to paro no lomaˈ

IKA: Makakangodo Makakaolah Sakarihaday ko Paro no Lomaˈ (3:08)

• O manan a sapaini papadama tisowanan madaˈmaˈen ko sowal to paro no lomaˈ?

ˈOsien ko Ifiso 4:31, 32, ikor lengoen ko ilaenoay a salicay:

• O sasowalen ita misamaan padihko to paro no lomaˈ?

Tangongolay ko olah ni Yihofa ci Yisan, hanaca paihkalay to haitiniay a olah. ˈOsien ko Matay 17:5, ikor lengoen ko ilaenoay a salicay:

• Sapisongilaˈaw a masasowal to paro no lomaˈ, samaanen minanam ci Yihofa hani?

KALIMLAAN

Sasowalen ita ngaˈayay mikowad to tao, nolatekay midokaˈay to tao. Mansa sinanoten, o manan, sasamaan, hacowa ko sasowalen ita, o masakalimlaan.

Lomalen

• Samaanen misakadademak ko sakacaciyaw a inaneng iso, mikowad to tao hani?

• Hamaan pasowal to samaanay a sasowalen?

• O masamaanay a sapaini papadama kitaanan micerid a mikowad to tao i sasowalen?

MALALITINGAY A LALAKAW

O manan a pakayraan papadama kitaanan tawlik ko sasowalen?

Ira ko ‘Citanengay a Sema’ Han? (8:04)

Sasamaan ho eca ka pasowal to cikaditay a sowal?

“Cikaditay a Sowal Soˈlinay Tatiihay Han?” (Wangcan a lalakaw)

Samanen ngaˈ miliyas to miyakayakay a sowal?

Samaan a Paterep to Miyakayakan a Sowal? (2:36)

Nengnengen samaanay ci Yihofa padama cingranan misawad to cikaditay a sasowalen a nanaman.

“Misatapang Kako Misimsim to Patosokan no Kaˈorip Ako” (Mikecolay, 2013/8/1)