O Paˈarawan ato ˈAda no Kawas

1. Pakayni finawlan no Kawas, patalahkalay ko Paˈarawan to maanan hani?

PAIHKALAY ko Paˈarawan, o Hongti Kitakit no Kawas tomirengayto i kakarayan, malaplapayto ci Satan nai kakarayan. (Paˈarawan 12:1-9) O tatodong nonini i kakarayan patikolayto a dipayal ato rihaday, kita saan i o tatahalifa to adihayay a sapalifet. Misamanay hani? Samanen tada mangolaway ci Satan, ciharatengay sapiˈodisaw to itiniay i fafekangay no sera madimadiay midoko ci Yihofaan a tamdaw.—Paˈarawan 12:12, 15, 17.

2. O maanan ko papadama kitanan padadotoc madimadi?

² Ano misiˈayaw to saˈodis ni Satan i, o maanan ko papadama kitaanan padadotoc a madimadi hani? (Paˈarawan 13:10) Mafanaˈ to mamifekad a demak noikor, tataˈangay ko sapadama kitaanan. Tinakoen, mitadtaday ko tarokos ci Yohani itini i Paˈarawan noikor o mamalifok ita a pina sapalemed, o cecay i, o mamasongilaˈ mapalaˈafo ko ˈada no Kawas. Dotoc, nengnengen ita samanay mitadtad ko Paˈarawan tonini a ˈada, ato sasamaan ko teloc nangra.

O PAˈARAWAN TANO ‘TAHAPINANGAN’ MITADTAD TO ˈADA NO KAWAS

3. Sowalen ko pina a ‘tahapinangan’ i Paˈarawan.

³ Satapangan no Paˈarawan saka cecay sinael pasowalayto kitaanan, o lihaf nonini a cudad ‘pakaynian i tahapinangan’ patangasa i tarokos ci Yohanian, o adihayay a lalakaw nonini a cudad tano tahapinangan a pakayraan a mitadtad. (Paˈarawan 1:1) Maˈosiay ita i Paˈarawan, o ˈada no Kawas tano pina cowa ka lecad a ˈaˈadopen a mitaypiyaw. O cecay i ‘nai riyaray masadak’ a ˈaˈadopen, ‘pitoay ko fongoh, i fongoh moetepay ko waˈa.’ (Paˈarawan 13:1) O roma i ‘mikitiniay i lalomaˈ no sera a masadak’ a ˈaˈadopen, ano somowal i malecaday o kangic, ngaˈayho ‘patefad to namal nai kakarayan tayni i fafekang no sera.’ (Paˈarawan 13:11-13) Iraayho ko cecay ‘kahngangay a ˈaˈadopen,’ maroˈay ko cecay tasalamaan a fafahiyan i fafekang nira. Onini a tolo ˈaˈadopen mitaypiyaway to misaˈadaay to Kawas ato Hongti Kitakit Ningra a ˈicel. Mihaenay, pafafidaˈen ita cipinang konini a ˈaˈadopen mitaypiyaway to maanan, tada masakalimlaan konini.—Paˈarawan 17:1, 3.

4-5. O Taniil 7:15-17 samaanay padama kitaanan cipinang to tatodong no pina ‘tahapinangan’ i Paˈarawan?

⁴ Pakayni to sapihapinangaw to o cima ko ˈada no Kawas, oha cacipinang kita to o maanan ko tatodong nonini a ‘tahapinangan.’ Sangaˈayay a pakayraan i papitadtaden ko Fangcalay Cudad to Fangcalay Cudad. Soˈlinay haw i, adihayay a ‘tahapinangan’ i Paˈarawan itini i romaroma cudad maharekayto mitadtad. Tinakoen, itini i lemed ni Taniil maˈaraway ko ‘sepat taˈangayay a ˈaˈadopen mikitiniay i riyar masadak.’ (Taniil 7:1-3) Maˈoningayho ni Taniil ko tatodong nonini a sepat taˈangayay a ˈaˈadopen, o sowal camiraan i mitaypiyaway to sepatay ‘hongti no kitakit,’ o sifo ko mitoroˈan. (ˈOsien ko Taniil 7:15-17.) Onini ihkalay a pitadtad padamaay kitaanan a cipinang, misowalan no Paˈarawan a ˈaˈadopen madeng o ˈicel no mirikecay ko mitoroˈan.

⁵ Dotoc mamifolfol koniya lalakaw to pina ‘tahapinangan’ i Paˈarawan, nengnengen samaanay ko Fangcalay Cudad padama kitaanan cipinang to o maanan ko tatodong. Salakat mamilengo kita to mitaypiyaway to maanan kora pina ˈaˈadopen, ikor nengnengen iraay ko masamanay a teloc namira, salikor mamilengo onini a demak samanay milingat kitaanan.

O SAAROˈAN NO ˈADA NO KAWAS MAPATALAHKALAYTO

6. Masowalay i Paˈarawan 13:1-4 a pitoay ko fongoh a ˈaˈadopen mitaypiyaway to maanan?

⁶ O pitoay ko fongoh a ˈaˈadopen mitaypiyaway to maanan? (ˈOsien ko Paˈarawan 13:1-4.) Onini a ˈaˈadopen malecaday o lokedaw, kawra o waˈay nira malecaday to waˈay no tomay, o ngoyos malecaday to ngoyos no layong, i fongoh iraay ko moetep a waˈa. Masowalay i Taniil saka 7 fedengan a sepat taˈangayay a ˈaˈadopen iraay ko mahaenay a tahapinangan. Kawra itini Paˈarawan, onini a tahapinangan masaˈopoay i tireng no cecay ˈaˈadopen, ao cowa ka licinowas i tireng no sepat a ˈaˈadopen. Mahapinangay, o mitaypiyawan nonini pitoay ko fongoh a ˈaˈadopen cowa ko cecay sifo anca ciˈicelay a kitakit tonini a hekal. Cimira i ‘mikowanay to kasangasaw, kasafinacadan, sasowalen, ato kasakitakit a tamdaw,’ mihaenay o ˈicel nimira madeng ikakaay ko taˈangay to polong no sifo no kasakitakit. (Paˈarawan 13:7) Mihaenay, o mitaypiyawan nonini a ˈaˈadopen o halafinay to mikowan to tamdaw a ˈicel no polong a mirikecay.b—Patnakay 8:9.

7. O pitoay a fongoh no ˈaˈadopen mitaypiyaway to maanan hani?

⁷ Pitoay a fongoh no ˈaˈadopen mitaypiyaway to maanan? Masowalay itini Paˈarawan 13 fedengan a ˈaˈadopen iraay ko cecay a sasing, itini saka 17 fedengan mitadtaday tonini a sasing. Mihaenay, ano nengnengen ita ko pitadtad no saka 17 fedengan, o mamafanaˈ to misowalan no saka 13 fedengan pitoay a fongoh no ˈaˈadopen mitaypiyaway to maanan. Paˈarawan 17:10 sanay: ‘Iraay ko pito a hongti, matelepayto ko lalima, materekayho ko cecay, o roma i cowaho ka ira. Ano irato cimira i, mamaterek to cecay liyad.’ Itini mikowanan ni Satan a mirikecay, o pitoay ciˈicelay a mikowanay palinian to pito a ‘fongoh,’ onini a ciˈicelay mikowanay no hekal taˈangayay ko pifiyor to finawlan no Kawas. Tahini i romiˈad no tarokos ci Yohani, o lalima ciˈicelay mikowanay to hekal na masadakay to i likisi no hekal, o Icip, Asiriya, Papilon, Mitiya-Pirsiya ato Kirisiya. Micada ko tarokos ci Yohani to sapaˈaraw i, o saka enem ciˈicelay mikowanay o Loma a kitakit. O saka pito, oya salikoray a fongoh, o cima a ciˈicelay mikowanay hani?

8. O saka pito a fongoh no ˈaˈadopen mitaypiyaway to maanan hani?

⁸ O sapairasol no Taniil ngaˈay padama kitanan cipinang, o pitoay a fongoh no ˈaˈadopen mitaypiyaway to maanan. Itini ‘romiˈad no Tapang,’ itini tonini saikorayto a lintad, o cima ko ciˈicelay a mikowan nohatini hani? (Paˈarawan 1:10) Onini ciˈicelay a mikowan tosaay ko kitakit makakapotay, o Ikok ato Padaka. Ngaˈay mahapinang ita, o Ikok ato Padaka ciˈicelay a mikowanay o masowalay no Paˈarawan 13:1-4 saka pito a fongoh no ˈaˈadopen.

9. ‘Iraay ko tosa a waˈa’ a ˈaˈadopen mitaypiyaway to maanan hani?

⁹ Itini Paˈarawan 13 fedengan pakayni tonini a saka pito a fongoh no ˈaˈadopen, o Ikok ato Padaka ciˈicelay a mikowanay palinian to roma a ˈaˈadopen, sanay ‘tosaay ko waˈa nira, malecaday o waˈa no lopayˈay a siri, somowal sa malecaday o kangic.’ Onini a ˈaˈadopen ‘midemakay to kafahkaan a demak, itini kaˈayaw no tamdaw patefaday to namal nai kakarayan tayni i fafekang no sera.’ (Paˈarawan 13:11-15) Itini Paˈarawan saka 16 ato 19 fedengan panganganan to ‘makaniway pairasolay.’ (Paˈarawan 16:13; 19:20) Paˈayaway ci Taniil o Ikok ato Padaka ciˈicelay mikowanay ‘papaira to katalawan a sakalaˈafo.’ (Taniil 8:19, 23, 24, ato roma pihongyak.) Onini a demak soˈlinay mifekad i saka tosa lalood no hekal, o sakahererek nonini a lalood o tosaay fakotang o kakakosiya no Ikok ato Padaka ko misangaˈay. O Ikok ato Padaka ciˈicelay mikowanay soˈlinay ‘mikitini kakarayan patefad to namal tayni i fafekang no sera.’

10. O sasing no ˈaˈadopen mitaypiyaway to maanan hani? (Paˈarawan 13:14, 15; 17:3, 8, 11)

¹⁰ Dotoc milengo to masowalay i Paˈarawan saka 17 fedengan a ˈaˈadopen. Ano nengnengen konini a ˈaˈadopen malecaday toya pitoay ko fongoh a ˈaˈadopen, dengan kahngangay ko kodong nira, panganganan cimira to ‘sasing no ˈaˈadopen’ o ‘saka falo a hongti.’c (ˈOsien ko Paˈarawan 13:14, 15; 17:3, 8, 11.) Sowal no Paˈarawan onini a hongti masadakay to cecay liyad malahdawayto, ikor miliyaway masadak. Mahaenay ko kalingad no demak no Makomoday Kitakit. Onini a lekakawa misaˈicelay midipot to sakangaˈay no kalo a kitakit, salakat masadak cira o Koksay Linmong, ikor itini saka tosa lalood no hekal malahdaway. Miliyaw cira masadak i, o kafanaˈan ita nohatini a Makomoday Kitakit.

11. O mitaypiyaway tonini a ˈaˈadopen a ˈicel no mirikecay miowingay to tamdaw midemak to maanan? Hano cowa ko mamatalaw kita aki?

¹¹ O mitaypiyaway tonini a ˈaˈadopen a ˈicel no mirikecay mifekaday to sapilasil a piˈodis, miowing to polong a tamdaw micoˈay ci Yihofaan ato finawlan Ningra. Malecad o misowalan no Paˈarawan, onini a ˈaˈadopen misaˈopoay to ‘polong a hongti no hekal,’ itini ‘romiˈad no malefotay ko ˈicel a Kawas’ mirienang to Armakiton a lalood. (Paˈarawan 16:13, 14, 16) Nikawrira, cowa ko mamatalaw kita. O kasapaan a Kawas ita ci Yihofa o kakaliki a midemak, milidong to polong midamaay to sapikowan a fadangalan Ningra a tamdaw.—Icikil 38:21-23.

12. Wa ira ko masamaanay teloc nonini a ˈaˈadopen hani?

¹² Wa ira ko masamaanay teloc nonini a ˈaˈadopen? Paˈarawan 19:20 sanay: ‘O ˈaˈadopen ato makaniway pairasolay malepetay. O makaniway pairasolay itini ˈaˈayaw no ˈaˈadopen na midemakay to kafahkaan, miolat to micadaay to tahapinangan no ˈaˈadopen ato midokoay to sasing no ˈaˈadopen a tamdaw. Mihaenay, o ˈaˈadopen ato makaniway pairasolay itini kaˈoripho fafahkolen i marengrengay ko namal a fanaw.’ Mihaenay, onini a misaˈadaay to Kawas a sifo itini pikowan nangra a tatokian, o sasongilaˈen no Kawas a palaˈafo cangra.

13. Wa paira ko sifo to Krisciyang to masamaanay a saroero?

¹³ Onini a demak pakayni kitaanan iraay ko maanan a tatodong? O Krisciyang kita, o mamadimadi to Kawas ato Hongti Kitakit Ningra. (Yohani 18:36) Mihaenay, itini mirikecay a demak o papadadotoc kita to misatenokay a saaroˈan. Kawra mihaen to demak cowa ko madoloay, samanen o sifo no hekal misaaliay to finawlan itini sasowalen waywayan midama cangranan. Itini i saroero ano mapadik ko cecay tamdaw, midama to sifo ecato ka madimadi to Kawas, malecaday o micadaay to tahapinangan no ˈaˈadopen. (Paˈarawan 13:16, 17) O cima ano micada to tahapinangan no ˈaˈadopen, wa malahdawto ko pihayda ni Yihofa, cato pilifok to midaˈocay a ˈorip. (Paˈarawan 14:9, 10; 20:4) Mihaenay, ano hakowato ko taˈangay no saroero, kita o kahacecay tamdaw itini i mirikecay a demak o mamitafo to misatenokay a saaroˈan.

KAACEKAN A TASALAMAAN A FAFAHIYAN KAADAYAYAN KO TELOC

14. Mikitini Paˈarawan 17:3-5, maˈaraway ni Yohani ko manan, tada pacekiday cingranan?

¹⁴ Sowal no tarokos ci Yohani, maˈaraway ningra ko roma a demak ‘tada macekiday,’ o manan ko maˈaraway ningra hani? Iraay ko cecay fafahiyan mikalicay i fafekang no mariˈangay a ˈaˈadopen. (Paˈarawan 17:1, 2, 6) Sowal no Paˈarawan cimira o ‘tasalamaan a fafahiyan,’ o ngangan o ‘Taˈangayay Papilon,’ ‘maˈaˈodangay to kalo a hongti cimira.’—ˈOsien ko Paˈarawan 17:3-5.

15-16. O ‘Taˈangayay Papilon’ mitaypiyaway to manan? Misamaanay?

¹⁵ O cima ko ‘Taˈangayay Papilon?’ Onini a fafahiyan cowa pitaypiyaw to lekakawa no mirikecay, samanen sanay ko sowal no Paˈarawan, maˈaˈodangay cimira to kalo a hongti no hekal. (Paˈarawan 18:9) Soˈlinay i, sapiˈimeraw cimira to ˈaˈideman no mirikecay, malecaday o mikalicay i fafekang nangra. O roma i, cowa ka pitaypiyaw cimira to maˈanofay a lekakawa no misasingdiay i hekal ni Satan. O lekakawa no misasingdiay o ‘misasingdiay tamdaw no hekal’ ko mitaypiyaway.—Paˈarawan 18:11, 15, 16.

¹⁶ Itini i Fangcalay Cudad, ‘pacopiyaway,’ ‘maˈodangay,’ ‘maˈaˈodangay’ a waywayan ngaˈayay o sapatinako ko tatodong, o cecay tamdaw midokoay to Kawas saan ko sowal, kawra midokoay to samiyay, anca malawidangay tonini a hekal. (1 Rayray 5:25 ato roma pihongyak; Yakop 4:4 ato roma pihongyak.) Roma pakayraan i, o madimadiay midoko to Kawas a tamdaw panganganan no Fangcalay Cudad to ‘makoracay a limocedan.’ (2 Korinto 11:2; Paˈarawan 14:4) Nolitengan a Papilon o satenokan no mararaway pidoko, mihaenay o ‘Taˈangayay Papilon’ mitaypiyaway to polong mararaway a pihakelongan no hekal.—Paˈarawan 17:5, 18; nengnengen ko lalakaw no jw.org wangcan “Misowalan no Fangcalay Cudad a ‘Taˈangayay Papilon’ o Manan ko Mitoroˈan?”

17. Wa samaan ko teloc no ‘Taˈangayay Papilon?’

¹⁷ Wa samaan ko teloc no ‘Taˈangayay Papilon?’ Paˈarawan 17:16, 17: ‘Maˈaraway iso moetepay waˈa ato ˈaˈadopen wa ˈinteh to tasalamaan fafahiyan, milonic cimiraan, pakakawang cimiraan, komaenho to heci nimira, tano namal mitodoh cimiraan. Samanen miparoan no Kawas ko harateng no Niyah i falocoˈ no moetepay a waˈa, misaali to moetepay waˈa midemak to mahecaday harateng nangra.’ Wa cikelohen ni Yihofa ko kalo a kitakit mitoor to harateng Ningra a midemak, wa sakadademaken no kalo a kitakit koya kahngangay a ˈaˈadopen, o Makomoday Kitakit, palaˈafo to polong a mararaway pihakelongan.—Paˈarawan 18:21-24.

18. Sasamaan kita malaliyas to ‘Taˈangayay Papilon?’

¹⁸ Onini a demak pakayni kitaanan iraay ko manan a tatodong? O mamisaˈosi kita o pidoko no niyah itini pinengneng no Kawas ‘o makoracay awaay ko kadit.’ (Yakop 1:27) O mararaway a kimad no ‘Taˈangayay Papilon,’ o nanaman no lisin, misakawasay a waywayan ato malafoay a palinian no waywayan taˈangayay ko pifiyor to tamdaw, oha laliyasen no mita. Roma i, papadotoc kita mihadak to sapirikec i tamdaw, pasowal cangranan ‘kasadak ilalomaˈ nimira,’ mihaen ngaˈ eca ka piladaˈ to raraw nimira.—Paˈarawan 18:4.

SAKAKAAY A ˈADA NO KAWAS MAMICADA TO SASAWKIT

19. O cima ko ‘cinamalay taˈangayay kahngangay a kangic’ hani?

¹⁹ Masowalay no Paˈarawan ko cecay ‘cinamalay taˈangayay kahngangay a kangic.’ (Paˈarawan 12:3) O taˈangayay kangic malalooday ci Yisan ato coyoh ningra. (Paˈarawan 12:7-9) Taˈangayay kangic miˈodisay to finawlan no Kawas, hanaca pafeliay to fadangalan i mitaypiyaway to mirikecay a ˈaˈadopen. (Paˈarawan 12:17; 13:4) O cima ko taˈangayay kangic hani? Cingra i oya ‘salakatay a ˈoner, ci Akoma ato ci Satan ko ngangan.’ (Paˈarawan 12:9; 20:2) Cingra i o micolohay i kaikor no misaˈadaay ci Yihofaan a mariˈangay.

20. Wa samaan ko teloc no taˈangayay a kangic?

²⁰ Wa samaan ko teloc no taˈangayay a kangic? Sowal no Paˈarawan 20:1-3, o cecay coyoh mamifahkol ci Satanan tayra i awaay ko paraˈ a ofang, o tatodong i, ci Satan cowato kangaˈay pasalat a dademak, malecaday o mapalitay. ‘Cowato kangaˈay miolat to kalo kitakit, tangasa i mahererek ko 1,000 miheca.’ Saikor i, ci Satan ato cafay ningra tatiihay coyoh wa fahkolen i ‘marengrengay ko namal a fanaw,’ tatodong i, wa masongilaˈ malaˈafo cangra. (Paˈarawan 20:10) Haratengen hena, ci Satan ato cafay ningra tatiihay coyoh cowato kangaˈay paira to pades no tamdaw, tada o kalipahakanto a romiˈad itiya!

21. Cipinang to lalakaw no Paˈarawan i, hano papakalalok kitaanan hani?

²¹ Cowa ko kacipinang aca ita to o cima ko ˈada no Kawas, mafanaˈayho to sasamaan ko teloc nangra. Ngaˈay cipinang to tatodong no ‘tahapinangan’ i Paˈarawan, tada pakalalokay kitaanan! Malecad misowalan no Paˈarawan: ‘Cima ko miasipay, mitengilay to sowal no sapairasol a cudad, o mapalemeday!’ (Paˈarawan 1:3) Masongilaˈ mapalaˈafo ko ˈada no Kawas ikor, o madimadiay to Kawas a tamdaw mamilifok to maanan sapalemed hani? Dotoc a lalakaw mamilengo tonini a salicay.