Salicay no Miˈosiay Tamdaw

Cato ka halafin wa paroen ni Yihofa ko masamaanay a “harateng” i falocoˈ no kasakitakit hani?

Pakayni satapangan no taˈangayay padiing, Paˈarawan 17:16, 17 sanay: ‘Oya maˈaraway iso a moetep a waˈa ato ˈaˈadopen wa ˈinteh to tasalamaan a fafahiyan, misamsam cingranan, miwacay cingranan, komaenho to heci ningra, tano namal miemin a mitodoh cingranan. Samanen miparoan no Kawas ko harateng no Niyah i falocoˈ noya moetepay a waˈa, palimoˈot to moetepay a waˈa midemak to malecaday a harateng, pafeli to fadangalan no hongti i ˈaˈadopen.’ Isaˈayaw sanay ko mitepangan no lalakaw ita, paroen ni Yihofa i falocoˈ no kasakitakit a “harateng” i, o sapalaˈafoaw to polong a mararaway pihakelongan no hekal.

Kawra, misalofanto koniya pitadtad. Paroen ni Yihofa i falocoˈ no kasakitakit a “harateng” i, o ‘fadangalan no hongti pafelian i ˈaˈadopen.’ Sakafanaˈaw to sasamaan malaˈosi konini a sapairasol, nengnengen ko dotoc a salicay.

Masowalay i sapairasol a papina mitaypiyaway to maanan? Onini a “tasalamaan a fafahiyan” pangangananho to “Taˈangayay Papilon,” mitaypiyaway to polong mararaway pihakelongan no hekal. Oniya “kahngangay a ˈaˈadopen” mitaypiyaway to dipayalay lekakawa no koksay. Isalakat oniya lekakawa o Koksay Lianmong itini i 1919 miheca a mapatireng. Nohatini o Makomoday Kitakit konini a lekakawa. (Paˈarawan 17:3-5) Oniya ‘moetepay a waˈa’ mitaypiyaway to polong midamaay to ˈaˈdopen a sifo no hekal.

Tasalamaan a fafahiyanan ato kahngangay a ˈaˈadopen iraay ko manan a kalaliting? ‘Maroˈay’ kafekang no ˈaˈadopen ko tasalamaan a fafahiyan, paihkalay cowa ko pidama aca ningra to ˈaˈadopen, sapiontingawho to ˈaˈadopen.

Wa ira ko manan a teloc no tasalamaan a fafahiyan? O ˈaˈadopen ato midamaay to ˈaˈadopen a moetepay waˈa ‘wa ˈinteh to tasalamaan a fafahiyan.’ Mamiˈafas cangra to hafay no tasalamaan a fafahiyan, mifanaˈ to tamdamdaw to mariˈangay waywayan ningra, mamidemakho cangra to sasawkit ni Yihofa, misongilaˈ palaˈafo to tasalamaan a fafahiyan. (Paˈarawan 17:1; 18:8) Itiyato i, wa maemin malahdaw ko polong mararaway pihakelongan. Kawra ˈayaw nonini i, papidemaken ni Yihofa ko kasakitakit to cecay caayho pifekad a demak isaˈayaw.

Papidemaken ni Yihofa ko kasakitakit to o manan a demakan hani? O “harateng” ni Yihofa paparoen i falocoˈ no moetepay a waˈa, oniya harateng i, o ‘ˈicel ato fadangalan no Niyah’ papafelien nangra ko kahngangay a ˈaˈadopen, oya Makomoday Kitakit. (Paˈarawan 17:13) Sasamaan mafekad koniya demak hani? Polong a sifo no hekal o niyah sa ko misaˈosiay pafeli to ˈicel ato fadangalan i ˈaˈadopen han? Cowa. Sanay ko sapairasol, o Kawas ko palimoˈotay cangranan mihaen to demak. (Taneng 21:1; nengnengen ko Isaya 44:28.) Palidlid sanay ko sifo no hekal pafeli to fadangalan i ˈaˈadopen han? Cowa ka hatira. Oniya kafalic fahal sanay mafekad, malifok no ˈaˈadopen ko fadangalan no moetepay waˈa ikor i, mamidemakto to sasawkit ni Yihofa, misongilaˈ palaˈafo to polong mararaway pihakelongan no hekal.

Noikor mamifekad ko maanan a demakan hani? Cowa ko sasamacay sa kita minengneng to sinfon mihapinang to midamaay ko kasakitakit to Makomoday a Kitakit. Kawra o mitalaan ita i, fahal wa sa paparoen ni Yihofa ko harateng i falocoˈ no kasakitakit, palimoˈot cangranan pafeli to fadangalan i ˈaˈadopen. Maˈaraw ita konini a demak mifekad i, mafanaˈto misatapangayto ko taˈangayay a padiing. Fahal wa sa a mafalic, mihaenay ‘mamicerid kita talipaˈelel, padadotoc mapalal.’—1 Tisalonika 5:6.