O Malo Wama Winaay, Padamaen ko Wawa Maolah ci Yihofaan

1-2. Ano mafalic ko pakayraan i, o roma safalod no Fangcalay Cudad pakayni kitaanan hano wa matongal ko kaciepoc hani?

TIYA mararamod a romiˈad, o faˈinayan ato makapahay a fafahiyan misongilaˈay mitengil to misalalangiay to Fangcalay Cudad to pakayniay i raramod a kimad. O masowalay no kimad milingatay to raramod a safalod no Fangcalay Cudad o kafanaˈan nangra, kawra mikitiya misatapang, onini a safalod pakayni cangranan o caciepoc. Misamaanay hani? Samanen mararamod ikor, mamalacafay cangra misaka dademak toniya safalod no Fangcalay Cudad.

² Ano ciwawato ko mararamoday i, wa malecad ko pakayraan. Na tahatengilayto cangra to adihayay pakayniay palahad to wawa a kimad. Kawra o masowalay no kimad a safalod no Fangcalay Cudad pakayni cangranan matongalay ko kaciepoc, samanen o papalahadto cangra to wawa no niyah. Tada kalimlaan a ˈinorong konini! Soˈlin, ano mafalic ko pakayraan i, wa mikitini to kita i faelohay a pakayraan minengneng to kafanaˈan a safalod no Fangcalay Cudad. Mihaenay, o polong a midokoay to Kawas a tamdaw mamalecad to nolitengan a Hongti no Israil, ‘hakelong no ˈorip’ wa miasip ato midotim to sowal ni Yihofa.—Limoˈot 17:19.

3. Onini a lalakaw mamilengo to maanan?

³ Malo wama winaay a Krisciyang, iraay ko tatodong namo midemak to cecay kalimlaan a demak, o papasifanaˈ to wawa mafanaˈ ci Yihofaan. Manaokaniw, o patosokan namo cowa ko pasifanaˈ aca to sifanaˈ no Kawas, papadamaho cangranan mikifalocoˈ maolah Cingranan. Sasamaan malaˈosi konini hani? Onini lalakaw mamilengo to sepat a safalod no Fangcalay Cudad padama to wama wina. (2 Timoti 3:16) Maminengnengho kita to roma malo wama winaay a Krisciyang samaanay pakayni pitengil to sapalimoˈot no Fangcalay Cudad a milifok to epoc.

NGAˈAYAY PADAMA TO WAMA WINA A SEPAT A SAFALOD NO FANGCALAY CUDAD

4. Sapadamaaw to wawa mikifalocoˈ maolah ci Yihofaan ngaˈayay sakadademaken no wama wina ko maanan a safalod hani? (Yakop 1:5)

⁴ Saka 1 safalod: Micangacang to sakayat ni Yihofa. Ka picangacang ci Yihofaan pafeli to taneng i tisowanan, padama tisowanan pasifanaˈ to wawa maolah Cingranan. (ˈOsien ko Yakop 1:5.) O citatodongay Cingra pafeli to sapaini tisowanan. Adihayay ko lalangian, nengnengen ko ilalomaˈay a tosa. Saka 1, itini pasifanaˈ to wawa iraay ko nalifetan ni Yihofa. (ˈOlic 36:9) Saka 2, o sapafeli Ningra tisowanan a sapaini ngaˈayay sakadademaken, sahtoay o sakaciepoc no miso.—Isaya 48:17.

5. (1) O likakawa ni Yihofa mihadakay to maanan padama to wama wina? (2) Mikitini i ika, pakayni i pasifanaˈ to wawa a pakayraan no salikaka ci Amolim ato fafahi ningra mananam ko maanan?

⁵ Ci Yihofa cowa ko pakayni aca i Fangcalay Cudad pafeli tisowanan to sakayat, pakayniayho i likakawa Ningra mihadak to adihayay mikitiniay i Fangcalay Cudad mitilidan a lalakaw padama tisowanan pasifanaˈ to wawa maolah Cingranan. (Matay 24:45) Tinakoen, ngaˈay kiso mikitini “Nokaˈorip no Paro no Lomaˈ” a madadoedoay lalakaw mahela ko ciepocay a sapaini. Isaˈayaw onini a lalakaw itiniay i Katalipaˈelal! a casi masadak, nohatini padadotocay i jw.org wangcan masadak. Roma i, itini i wangcan adihayay ko milicayay ato amotoˈay a ika, onini a ika papadama to wama wina mikitini i safalod ni Yihofa pasifanaˈ to wawa.b—Taneng 2:4-6.

6. O cecay a wama pakayni mihadakan no likakawa ni Yihofa a sakayat iraay ko masamaanay a pinengneng?

⁶ ˈAlomanay a wama wina tada miakoˈiday ci Yihofaan pakayni i likakawa Ningra mihadak to sapadama. Ci Ciyaw o cecay a wama, sanay cingra: “Pasifanaˈ to tolo a wawa mitoor to kimad a maˈorip cowa ko madoloay, kako ato fafahi mitolonay micangacang ci Yihofaan padama tamiyanan. Miceriday mahapinang niyam o roma lalakaw ato ika tada matatodongay ko kasadakan a toki, ngaˈay padama tamiyanan miremo to masiˈayaway a pasangaray. Ano awaay ko sakayat ni Yihofa, wa awa ko pakayraan niyam pasifanaˈ to wawa.” Ci Ciyaw ato fafahi saan ko harateng, onini a mihadakan no likakawa a lalakaw soˈlinay ngaˈay padama to wawa nangra miingid ci Yihofaan.

7. O wama wina hano mamisaˈicel patireng to ngaˈayay a taˈarawan hani? (Loma 2:21)

⁷ Saka 2 safalod: O ngaˈayay a taˈarawan no niyah. O wawa mamisongilaˈ mihapinang to wama wina, miceridayho mitodong cangranan. Manaokaniw, awaay ko malefotay a wama wina. (Loma 3:23) Soˈlin hatira, citanengay a wama wina kamayan misarocod patireng to ngaˈayay a taˈarawan no wawa. (ˈOsien ko Loma 2:21.) O cecay wama sanay: “O wawa malecaday o takomod, miselipay to maamaan. O waywayan ita ano cowa ka lecad to mipasifanaˈan ita cangranan i, o mamahapinang nangra.” Mihaenay, ano makalimay kita maolah ko wawa ci Yihofaan, papahapinangen ita ko wawa to tada tangongolay ko olah ita ci Yihofaan.

8-9. Mikitini i sowal ni Antelo aci Ayma mananamay iso ko maanan?

⁸ Adihayay ko hapakayraan no wama wina pasifanaˈ to wawa maolah ci Yihofaan. 17 ko mihecaan a salikaka ci Antelo sanay: “O wama wina ako padadotocay misaˈicel somowal to kalimlaan ko pitolon. To dadayadaya o wama malacafayay takowanan a mitolon, ano maharekayto kako mitolon, kamayan cingra mihaen ko demak. Marariday ko wama wina patalipaˈelal takowanan ato safa sanay: ‘Ngaˈay kamo micerid pasayra ci Yihofaan a mitolon, ano kinapinato ngaˈayayto.’ Tangongolay ko pifiyor takowanan konini. Nohatini pasayra kako ci Yihofaan mitolon i, rihadayay ko falocoˈ, o Wama ako ci Yihofa saan ko harateng, hanaca maolahay Cingra takowanan.” O wama wina, tangongolay ko olah namo ci Yihofaan, o tataˈangay ko pifiyor to wawa, aka a pisakahmaw minengneng to ˈicel no taˈarawan namo.

⁹ Nengnengen ko nalifetan ni Ayma. O wama ningra miliyasay to paro no lomaˈ, miterekayho to adihayay a tadah. Sanay ci Ayma: “Marariday cangoˈot ko payci no lomaˈ, kawra misaˈicelay ko wina somowal to mamidipot ci Yihofa to finawlan Ningra. Pakayni i kaˈorip no wina mahapinangay ako, soˈlinay cingra pakasoˈlin tonini. O sapasifanaˈ no wina takowanan i matooray ningra a midemak.” Mananamay ita ko maanan hani? Soˈlin itini i pasangaray a pakayraan i, o wama wina ngangaˈay patireng to ngaˈayay a taˈarawan no wawa.—Kalatiya 6:9.

10. O Israil a wama wina iraay ko maanan a toki ngaˈay masasowal to wawa? (Limoˈot 6:6, 7)

¹⁰ Saka 3 safalod: Mararid a masasowal to wawa. Palimoˈotay ci Yihofa to nolitengan a Israil micerid a pasifanaˈ to wawa, padama cangranan mafanaˈ Cingranan. (ˈOsien ko Limoˈot 6:6, 7.) Itini nolitengan a Israil, to romiˈamiˈad adihayay ko toki no wama wina masasowal to wawa, padama cangranan palahad to olah ci Yihofaan. Tinakoen, o cecay Israil a kapah padama to wama paloma ato mipanay. O fafahiyan salikaka ningra padamaay to wina mitenoˈay, mitaˈis anca roma demak. To romiˈamiˈad adihayay ko mipalakan no wama wina a toki malacafay to wawa. Toniya tatokian ngaˈayay masasowal cangra to adihayay a kalimlaan a demak. Tinakoen, malalengo cangra to tada ngaˈayay ci Yihofa, ato samanay ci Yihofa padama to paro no lomaˈ nangra anini.

11. O Krisciyang a wama wina ngaˈay saka dademaken ko maanan a toki masasowal to wawa?

¹¹ Anini mafalicay ko lintad, itini adihayay a pala, o wama wina mimingay ko toki malacafay to wawa. Matayalay ko wama wina, micudaday ko wawa. Mihaenay, o wama wina mamikilim to toki ngaˈ ngaˈay masasowal to wawa. (Ifiso 5:15, 16; Filipi 1:10) O pakalomaˈay a pidoko o cecay ngaˈayay a toki. O cecay kapah salikaka ci Yalisanta sanay: “O wama ako kiemelay padadotoc misikay to pakalomaˈay a pidoko, cowa ka pakayni i roma a demak palasawad toniya limasmas. Maharek ko pakalomaˈay a pidoko, o paro no lomaˈ niyam ngaˈayayto sinoway a masasowal.”

12. Itini pakalomaˈay a pidoko i, o tawki no lomaˈ haharatengen ko maanan?

¹² Ano o tawki no lomaˈ kiso, sasamaan ko demak iso, matongal ko kaolah no wawa to pakalomaˈay a pidoko hani? Ngaˈay kiso malacafay to wawa minanam to Layapen ko Midaˈocay ˈOrip! toniya faelohay cudad. Oniya cudad o ngaˈayay a lalosidan, ngaˈayay kiso masasowal to wawa. Ano makalim kiso makahi ko wawa mihadak to nafalocoˈan tisowanan, aka a itini pakalomaˈay a pidoko a tatokian mirikec anca malikaf cangranan. O sowal no wawa ano cowa ka lecad to safalod no Fangcalay Cudad, aka a ranikay a maketer. Soˈlin, makahi ko wawa pasowal to nafalocoˈan nangra tisowanan, o mamahemek kiso. Pakalaloken cangra padadotoc makahi mihadak to nafalocoˈan, edengan mafanaˈ kiso to soˈlinay a harateng no wawa, ngaˈ ngaˈay pafeli cangranan to sangaˈayay a sapadama.

13. O wama wina ngaˈayho tano maanan a tatokian padama to wawa miingid ci Yihofaan?

¹³ To romiˈamiˈad o wama wina mamikilim to toki padama to wawa miingid ci Yihofaan, cowa ko edengan itini minanam to Fangcalay Cudad a tatokian ngaˈ mihaen to demak. O cecay wina ci Lisa sanay: “Padamaay kami to wawa pakahapinang to itatihiay a kihcod iraay ko maanan kalaliting ci Yihofaan. Tinakoen, o waco niyam ano midemakay to pakatawaay a kawing, pakatawa to wawa i, wa pasowal kami to wawa, oniya demak mitadtaday o misangaˈay kitaanan a Yihofa o mamenacay, o lipahakay a Kawas Cingra, makalimayho Cingra kitaanan lipahak a maˈorip.”

14. O wama wina padama to wawa micawmaˈ to ngaˈayay widang, hano o kalimlaan? (Taneng 13:20)

¹⁴ Saka 4 safalod: Padama to wawa micawmaˈ to ngaˈayay a widang. Ihkalay ko sowal no Fangcalay Cudad, o widang ita iraay ko ngaˈayay anca tatiihay a pifiyor kitaanan. (ˈOsien ko Taneng 13:20.) Malo wama winaay mafanaˈay kiso to widang no wawa han? Maˈaraway iso cangra hanaca kalacafay cangranan han? Ngaˈay kiso midemak to maanan padama to wawa micawmaˈ to maolahay ci Yihofaan a tamdaw malo widang han? (1 Korinto 15:33) O cecay pakayraan i, tahidangen ko maolahay ci Yihofaan a salikaka mirienang to pakalomaˈay a demak namo.—ˈOlic 119:63.

15. O wama wina sasamaan padama to wawa micawmaˈ to ngaˈayay widang?

¹⁵ Nengnengen ko nalifetan no salikaka ci Toni, somowalay cingra to niyah ato fafahi samaanay padama to wawa micawmaˈ to ngaˈayay widang, sanay cingra: “Adihayay mihecaan, kako ato fafahi marariday mitahidang to cowa ka lecad ko mihecaan ato lalengawan a salikaka tayni i lomaˈ a komaen, anca mirienang to pakalomaˈay a pidoko niyam. Mihaen ngaˈay kami micalep mafanaˈ to ˈalomanay maolahay ci Yihofaan, lipahakay midoko Cingranan a salikaka. Malikoay kami mitahidang to kasakilac kantok, mikiriwiˈay manilnil a mitosilay ato roma salikaka milafin i lomaˈ niyam. O nalifetan nangra, paihkalay to fanekfekay a falocoˈ ato kinafalahay harateng tangongolay ko pifiyor to wawa no niyam, padama cangranan matongal ko piingid ci Yihofaan.” O wama wina, seteken ko falocoˈ namo, padama to wawa micawmaˈ to ngaˈayay widang.

AKA PISAWAD TO HATOKEL!

16. Ano cowato ko mamidoko ci Yihofaan saan ko wawa, sasamaan kiso misiˈayaw toniya demak hani?

¹⁶ Ano misaˈicelay kiso pasifanaˈ to wawa, o wawa eca ka ciharateng midoko ci Yihofaan, sasamaan kiso misiˈayaw toniya demak hani? O pasokiyaway ko niyah aka ka saan miharateng. Pafeliay ci Yihofa to kahacecay a tamdaw to pasalat, ngaˈay kita pasalat mipiliˈ to mamidoko Cingranan hokira, mahawpay ko wawa iso. Ano ecato pidoko ko wawa iso ci Yihofaan, aka pisawad to hatokel, pasoˈlinen to iraayho ko toki ningra patatikol. Haharatengen ko malafelay wawa a sapatinako. (Luka 15:11-19, 22-24) Oya malafelay a wawa i sapatinako midemakay to adihayay tatiihay a demak ikor, patatikolayto. O roma tamdaw saan alatek: “O sapatinako aca koni, aniniay a kaˈorip soˈlinay mifekad ko hatiniay a demak han?” Iraay, o mahaenay ko demak ni Ayli.

17. O nalifetan ni Ayli pafeliay tisowanan to maanan a sapakalalok?

¹⁷ Sanay ci Ayli somowal to wama wina: “Misaˈicelay cangra pasifanaˈ takowanan maolah to Kawas ato Fangcalay Cudad. Kawra, moetep ira ko pina ko mihecaan ako misatapangay mitowakang.” Cowa kafanaˈ ko wama wina to midemakay ci Ayli to mararaway a demak. Soˈlin misaˈicelay ko wama wina padama cingranan mitoor to soˈlinay kimad a maˈorip, kamayan cingra mihaen ko demak. Miliyas cingra to lomaˈ ikor, mangalef mangalefay ko tatiih no kaˈorip. Soˈlin mahaen, latekay kamayan cingra pasowal to cecay widang to Fangcalay Cudad. Sanay ci Ayli: “Matongal ko kalalengo cingranan ci Yihofaan, matongalay ko toki ako miharateng ci Yihofaan. Toya mihecaan o mikosaman no wama wina a sapaloma no soˈlinay kimad i falocoˈ ako, onini a sapaloma halafinay a mihecaan cowa ka molecis, nohatini palidlid sanay lomahad.” Ikor, patikolayto ci Ayli i tatihi ni Yihofa.c O wama wina ni Ayli, maedeng malikoay cangra itini kaemangho ci Ayli pasifanaˈto cingranan maolah ci Yihofaan.—2 Timoti 3:14, 15.

18. Maˈaraw ko malo wama winaay misaˈicel a padama to wawa maolah ci Yihofaan, samaanay ko harateng iso?

¹⁸ O malo wama winaay, iraay ko cecay taˈangayay a kalikoan namo, o pipadama to wawa malo midokoay ci Yihofaan a tamdaw. (ˈOlic 78:4-6) O tada pasangaray a ˈinorong konini. Padadotoc kamo misaˈicel a pasifanaˈ to wawa, tada ngaˈayayto ko midemakan namo! Padadotoc kamo misaˈicel padama to wawa maolah ci Yihofaan, mitoor to araaw ni Yihofa mirikec ato palimoˈot cangranan, midipot ato palahad cangranan, ngaˈayto pakasoˈlin o sidaˈitay a Wama ita i kakarayan wa taˈangay ko lipahak.—Ifiso 6:4.