Milekalay ko Soˈliˈlinay a Taneng

1. Anini ano milekal ko soˈliˈlinay a taneng i, samaanay ko harateng no ˈalomanay tamdaw hani? (Taneng 1:20, 21)

ITINI adihayay a pala, maˈaraway no tamdaw masediˈay ko pising no salikaka palilam to cudad no Fangcalay Cudad i mitaˈlifay a tamdaw. Na mirienangay kiso to mahaenay a pakayraan mitosil han? Ano mirienangay to kiso, mamaharateng iso ko cecay sapatinako i Taneng alatek. Sowal nonini a sapatinako taˈangayay ko pilekal no taneng i ˈalomanay ko tamdaw a kitiraan, mitahidang to tamdaw mitengil to citanengay a sapatalipaˈelal. (ˈOsien ko Taneng 1:20, 21.) O Fangcalay Cudad ato mitepangan a cudad iraay ko ‘soˈliˈlinay a taneng,’ o taneng ni Yihofa konini. Misaaliay ko tamdaw milifok to mahaenay a taneng, ngaˈ ira ko toki romakat i sakatahadaˈoc no ˈorip a lalan. Mahemekay kita maˈaraw ko roma tamdaw makahi micada to cudad ita, kawra cowa ko polong a tamdaw makahiay micada. O roma tamdaw misakahmaway to sapatalipaˈelal no Fangcalay Cudad, o roma tamdaw matawaay malikaf kitaanan, samanen matelangayto ko Fangcalay Cudad saan cangra miharateng. Roma tamdaw malikafay to palinian no waywayan no Fangcalay Cudad, harateng nangra mitoor to palinian no Fangcalay Cudad maˈorip awaay ko pasalat sanay, hanaca misao moecelay ko niyah. Kawra padadotocay ci Yihofa ciolah paira to toki no kahacecay a tamdaw minanam to soˈlinay kimad, milifok to soˈliˈlinay a taneng. Samaanay ko pidemak Ningra hani?

2. Anini, samaanay milekal ko soˈliˈlinay a taneng? Kawra ˈalomanay tamdaw samaanay ko pidemak?

² Pakaynian ni Yihofa i Fangcalay Cudad patengil to tamdaw to ngiha no soˈliˈlinay a taneng. Nohatini, maedeng ngaˈayay maˈosi no tamdaw ko Fangcalay Cudad. O mitepangan ita a cudad samaanay hani? Samanen iraay ko sapalemed ni Yihofa, oniya mitepangan a cudad mataˈlifayto ko 1,000 a sasowalen. Miasip ko tamdaw to Fangcalay Cudad ato mitepangan cudad, halo pisakadademak to minanaman, o mitengilay to pilekal no soˈliˈlinay a taneng, o mamilifok cangra to adihayay a epoc. Kawra, ˈalomanay tamdaw pakayni i ngiha no soˈliˈlinay taneng talimaan sanay caka pitengil. Ano misaˈosi cangra i, mitiˈeray to niyah anca mitengil to sowal no tao. O romaroma tamdaw pakayni pitoor ita to sowal no Fangcalay Cudad a midemak, misakahmaway kitaanan. Onini a lalakaw mamilengo hano mahaen ko harateng no tamdaw. Kawra salakat mamilengo kita sasamaan milifok to sapafeli ni Yihofa a taneng.

MAFANAˈ CI YIHOFAAN WA IRA KO TANENG

3. O soˈliˈlinay a taneng macapiday ko maanan?

³ O taneng o sapisakadademak to sifanaˈ misaˈosi a inaneng, kawra o soˈliˈlinay a taneng adihayayho ko macapiday. Sowal no Fangcalay Cudad: ‘O mangodoay ci Yihofaan i, o satapangan no taneng, mafanaˈ to Safangcalay a Kawas iraay ko taneng.’ (Taneng 9:10) Mihaenay, o mamisaˈicel kita ‘mafanaˈ to Safangcalay a Kawas,’ cipinang to harateng ni Yihofa, hanaca mitoor to harateng Ningra a misaˈosi. Sapiremoaw tonini, o mamicekiw kita to Fangcalay Cudad ato mitepangan a cudad. Mihaen, wa irato ko soˈliˈlinay a taneng ita.—Taneng 2:5-7.

4. Hano edengan ci Yihofa ko ngangaˈay pafeli kitaanan to soˈliˈlinay a taneng hani?

⁴ Edengan ci Yihofa ko ngangaˈay pafeli kitaanan to soˈliˈlinay a taneng. (Loma 16:27) O Pipowaran no taneng Cingra, misamanay hani? Saka 1, o Misangaˈay a Tatapangan Cingra, ihkalay ko kafanaˈ Ningra to misangaˈan Ningra a maamaan. (ˈOlic 104:24) Saka 2, o kihcod a demak ni Yihofa patalahkalay to taneng. (Loma 11:33) Saka 3, o limoˈot ni Yihofa matomesay to taneng, pairaay to haepoc no mitengilay a tamdaw. (Taneng 2:10-12) Ano sapilifokaw kita to soˈliˈlinay a taneng, o mamicada tonini a taˈeneran a kimad, hanaca papikayat to soˈlinay kimad to pisaˈosi ato pidemak no mita.

5. Cowa pihayi ko tamdamdaw to Pipowaran no soˈliˈlinay a taneng ci Yihofa, samaanayto ko teloc hani?

⁵ Malitemohay ita mitosil ˈalomanay tamdaw mihaiay, o serayan adihayay ko kasapaan a misafacoan. Kawra cowa pihayi cangra iraay ko cecay Misangaˈay a Tatapangan materek, sahtoay o sinka ko sakaira no kihcod sanay miharateng. O roma tamdaw pakasoˈlinay to Kawas ko niyah sanay, kawra mataˈlifayto ko palinian no Fangcalay Cudad sanay miharateng, mansa mitooray to harateng no niyah a maˈorip. Telocto samanay hani? Mitiˈeray ko tamdaw to niyah a taneng cowa ko taneng no Kawas, malingaday ko kangaˈay nonini a hekal han? Mahelaay nangra ko soˈliˈlinay a lipahak han? Pakayni hanoikor iraay ko soˈliˈlinay a hatokel nangra han? O pakayraan no hekal padamaay kitaanan pakasoˈlin: ‘Ano misaˈada ci Yihofaan, awaayto ko taneng, caay ka ngaˈay mihapinang to demak, awaay ko haepoc.’ (Taneng 21:30) Mihaenay, o papasayra kita ci Yihofaan micangacang to soˈliˈlinay a taneng! Ka adayayan i cowa pihaen ko demak no ˈalomanay tamdaw, misamanay hani?

ˈALOMANAY TAMDAW HANO MANAˈAY TO SOˈLIˈLINAY A TANENG

6. Mikitini Taneng 1:22-25, o masamaanay a tamdaw talimaan sanay to soˈliˈlinay a taneng?

⁶ Sowal no Fangcalay Cudad, o soˈliˈlinay a taneng ano ‘milekal i maci’ i, talimaan sanay ko ˈalomanay tamdaw. Sowal no sinael toloay masasiroma ko manaˈayay to taneng, cangra i ‘cangoˈotay ko nalifetan a tamdaw’ ‘hinalikafay a tamdaw’ ‘mafolaay a tamdaw.’ (ˈOsien ko Taneng 1:22-25.) Wa minengneng kita hano manaˈay to taneng no Kawas koniya tamdaw, ato samaan ko pidemak ita ngaˈay miliyas malo mahaenay cangranan a tamdaw.

7. O roma tamdaw hano padotocay mipiliˈ malo ‘cangoˈotay ko nalifetan a tamdaw’ hani?

⁷ O ‘cangoˈotay ko nalifetan a tamdaw’ awaay ko kafanaˈan, madoloay mitoor to tamdaw ato malipalaw. (Taneng 14:15 ato roma pihongyak.) Itini pitosilan marariday malitemoh ita ko mahaenay a tamdaw. Haratengen hena, masapatekay masaˈofaday a tamdaw maoratay no ˈaˈideman no pihakelongan ato ˈaˈideman no mirikecay. O roma tamdaw mafanaˈ to malipalaway no ˈaˈideman ko niyah i, tada macekiday, kawra sowal no Taneng 1:22 o hatiniay tamdaw padotocay mipiliˈ malo cangoˈotay ko nalifetan a tamdaw, samanen maolahay cangra to mahaenay nokaˈorip, caay kakahi a mifalic. (Yirimiya 5:31) Maolahay cangra midoedo to coos no niyah, caay ka ciharateng cipinang to taneng no Fangcalay Cudad, caay ka ciharateng maˈimer no palinian no Fangcalay Cudad. O cecay itiniay Kanata Kowipike a fafahiyan misamacayay to pihakelongan no niyah, pasowalan ningra ko milisoˈay cingranan a Misawacayay Tamdaw ni Yihofa: “Ano mioratay ko fokosi niyam tamiyanan, o raraw ningra konini, cowa ko raraw niyam!” Harateng no ˈalomanay tamdaw malecaday cingranan, padeteng sanay cangra malo awaay ko kafanaˈan a tamdaw, maedeng caay ka ciharateng kita malecad cangranan!—Taneng 1:32; 27:12.

8. Sapilifokaw to nalifetan, citanengay a pakayraan o maanan?

⁸ Pakalalokay ko Fangcalay Cudad kitaanan aka padotoc malo cangoˈotay ko nalifetan a tamdaw, ao ‘palecaden to matoˈasay tamdaw’ ko sakacipinang a inaneng no niyah. (1 Korinto 14:20) Tada matatodongay konini a sapatalipaˈelal. Sapilifokaw kita to nalifetan, inanengay a pakayraan i, sakadademaken ko safalod no Fangcalay Cudad i kaˈorip. Palidlid saan, matinako ita ko sapadama no safalod no Fangcalay Cudad kitaanan miliyas to pasangaray, padamaho kitaanan inaneng ko misaˈosian. Mamicerid kita misinanot to niyah itini pisakadademak to safalod no Fangcalay Cudad iraay ko maanan kacakat. Ano halafinayto kita minanam to Fangcalay Cudad ato mirienang to saˈopo, kawra caayho patafang to tireng micada to paputisem, ngaˈayay haratengen o maanan ko lalangian. Ano micadaayto kita to paputisem, ngaˈayay haratengen: Itini mitosil ato pasifanaˈ to tamdaw macakatay kako hokira? Ano misaˈosi i, misaka dademakay kako to safalod no Fangcalay Cudad han? Ano malacafay to tao i, patalahkalay kako to ngaˈayay capeling no Krisciyang han? Ano mahapinang ita iraayho ko hakacakatan no niyah, sasinanoten ko sapatalipaˈelal ni Yihofa, samanen o sapatalipaˈelal Ningra ngaˈayay ‘padama to cangoˈotay ko nalifetan a tamdaw ira ko taneng.’—ˈOlic 19:7.

9. Samaanay ko pidemak no ‘hinalikafay a tamdaw,’ paihkal to manaˈayay cangra to soˈliˈlinay a taneng?

⁹ Manaˈayay to taneng no Kawas saka 2 a tamdaw i, ‘hinalikafay a tamdaw.’ Malitemohay ita i pitosilan ko mahaenay tamdaw alatek. Lipahakay cangra milikaf to tao. (ˈOlic 123:4) Patalipaˈelalay ko Fangcalay Cudad kitaanan, itini salikoray romiˈad wa adihay ko mahaenay a tamdaw. (2 Pitiro 3:3, 4) Anini, o roma tamdaw malecaday to kadafo ni Loto, caay pisikor to mihadakan ni Yihofa a sapirikec. (Satapangan 19:14) ˈAlomanay tamdaw malikafay to mitooray to safalod no Fangcalay Cudad maˈorip a tamdaw. Maolahay cangra ‘pakihater to coos no niyah, midemak to misakahmaway to Kawas a demak.’ (Yuta 7, 17, 18) Matatodongay ko sowal no Fangcalay Cudad, o mitowakangay to kimad a tamdaw ato manaˈayay to taneng no Kawas a tamdaw o mahaenay.

10. Mikitini ˈOlic 1:1, sasamaan ko pidemak ita hoeca ka malo hinalikafay a tamdaw hani?

¹⁰ Sasamaan kita ngaˈ madipot ko niyah, hoeca ka malo hinalikafay a tamdaw hani? O cecay pakayraan i, liyasen ko hinalikafay a tamdaw. (ˈOsien ko ˈOlic 1:1.) Tatodong i cowa ko mamitengil cowa ko maminengneng to sasowalen no mitowakangay to kimad a tamdaw. Roma i, maminaˈon kita, aka hinalikaf, misatapang cisasa to pakayraan ni Yihofa a dademak ato mikitiniay i likakawa Ningra a sakayat. Ngaˈayay licayen ita ko niyah: Ano ira ko faelohay pitadtad no likakawa to sinael, anca pafeli kitaanan to faelohay sakayat i, tocerid o masofaway ko sasowalen ako han? Marariday kako malikaf to mikeriday a salikaka i likakawa han? Ano tangsol kita misalof to mararaway a waywayan no niyah, o mamaolah ci Yihofa kitaanan.—Taneng 3:34, 35.

11. Samaanay ko pinengneng no ‘mafolaay a tamdaw’ to palinian no waywayan ni Yihofa hani?

¹¹ Manaˈayay to soˈliˈlinay a taneng saka 3 a tamdaw o ‘mafolaay a tamdaw.’ Saka mafola cangra i, samanen manaˈayay cangra mitoor to palinian no waywayan no Kawas a maˈorip, samacay sanay midemak to no niyah a harateng. (Taneng 12:15) Cowa pihayi cangra to Pipowaran no taneng ci Yihofa. (ˈOlic 53:1) Ano mitosil kita malitemohay ko mahaenay a tamdaw, samanen mikangodoay kita to palinian no Fangcalay Cudad marariday cangra milokes a milikaf kitaanan. Soˈlinay i, awaay ko mihadakan nangra ngaˈayay a sapaini. Sowal no Fangcalay Cudad: ‘Pakaynien i mafolaay a tamdaw, caay pakalifok to soˈliˈlinay a taneng; malalengo i fawahan no niyaroˈ, awaay ko pakayraan no mafolaay tamdaw mihadak to sowal.’ (Taneng 24:7) O mafolaay tamdaw caay ka somowal to citanengay a sowal, mansa patalipaˈelal ci Yihofa kitaanan ‘ka piliyas to mafolaay a tamdaw’!—Taneng 14:7.

12. Samaanay ko pidemak ita ecato ka malo mafolaay a tamdaw hani?

¹² Caay kalecad to ˈintehay to sapatalipaˈelal no Kawas a tamdaw, maolahay kita to taneng ni Yihofa ato palinian no waywayan Ningra. Sapadadotocaw palahad to mahaenay a waywayan, palalinien ko midofdofay ato cowa pidofdof pairaay to maanan masasiromaay a teloc. Haratengen eca pidofdof ko mafolaay tamdaw to sapatalipaˈelal no Kawas, telocto pairaay to masamanay pasangaray no niyah. Dotoc haratengen midofdof kiso to Kawas, tada lipahakay ko minaroˈan.—ˈOlic 32:8, 10.

13. Wa pacieci ci Yihofa kitaanan micada to taneng Ningra han?

¹³ Pairaan ni Yihofa ko toki no polong a tamdaw milifok to soˈliˈlinay a taneng, kawra cowa ka pacieci Cingra to kahacecay tamdaw micada to taneng Ningra. Kawra ihkalay Cingra mitadtad, manaˈayay to taneng a tamdaw wa ira ko maanan a teloc. (Taneng 1:29-32) Oya mipiliˈay eca pidofdof ci Yihofaan a tamdaw wa ‘pakayni i demak no niyah micada to tatiihay a teloc.’ O pakayraan nangra maˈorip o papaira to roray ato cariraw nangra, salikor tatahadaˈoc malaˈafo. Roma i, oya mipiliˈay midofdof ci Yihofaan a tamdaw, mikiˈokay ci Yihofa: ‘Midofdofay Takowanan a tamdaw wa dipayal ko kaˈorip, milifok to rihaday, caay ka talaw to pades.’—Taneng 1:33.

O SOˈLIˈLINAY A TANENG PAIRAAY TO HAEPOC NO MITA

14-15. Mikitini i Taneng 4:23 mananam ita ko maanan?

¹⁴ Ano tooren ita ko taneng no Kawas a midemak, o mamilifok to haepoc. Masowalay i fafekang, padamaay ci Yihofa kitaanan o kahacecay tamdaw ngaˈay milifok to soˈliˈlinay a taneng. Tinakoen, mitilidan Ningra i Taneng ko caay ka taˈlif citanengay a sowal, ano tooren ita a midemak o mamasalof ko kaˈorip no niyah. Nengnengen ita ko sepat a tinakoan.

¹⁵ Dipoten ko kemoday falocoˈ iso. Sowal no Fangcalay Cudad: ‘Dipoten ko falocoˈ iso, ikaka to pidipot to kihcod, samanen o pipowaran no ˈorip mikitiniay i falocoˈ masadak.’ (Taneng 4:23) Haratengen hena, sapidipotaw to falocoˈ ita, kakomaen kita to cihaleday a kakaenen, ira ko ciepocay a pionto, miliyasho to tatiihay nanaman. Midipot to kemoday falocoˈ ita malecaday, to romiˈamiˈad wa mikitini kita i Sowal no Kawas micada to haled. Mamisaday kita to saˈopo, micerid mirienang to saˈopo ato tawlik pacaˈof to salicay. Mamiceridho kita tawlik mirienang to mitosilay. Roma i, sakaecaaw madenga no tatiihay nanaman, mamiliyas kita to malafoay a lawla, tatiihay a widang ato kihcod mamiwarak to harateng ita a demak.

16. Taneng 23:4, 5 anini hano mikiriwiˈay padama kitaanan hani?

¹⁶ Karenec. Palimoˈotay ko Fangcalay Cudad kitaanan: ‘Aka pisamacay micangacang to hafay. . . . Pasayra i hafay ko patosokan iso, malahdaway ko hafay. O cacisapikpik ko hafay, malecad o lidep pasayra kakarayan maefer.’ (Taneng 23:4, 5) Caay ka halafin ko hafay, cecay melet awaayto alatek. Kawra anini ano cihafayayto anca manikaway tamdaw, misamacayay mietan to payci. Tocerid mikayatay konini cangranan midemak to saka tatiih no niyah a demak, telocto mipalakay to ngangan no niyah, kalalaˈed to tamdaw, anca tanoktok no tireng. (Taneng 28:20; 1 Timoti 6:9, 10) Kawra, ira ko taneng ita, wa matatodong ko pinengneng to payci. O mamidipot konini kitaanan eca ka lefong i talakal no maˈanofay to hafay, wa ngaˈayho parenec ato palipahak kitaanan.—Patnakay 7:12.

17. Ano makalimay kita ira ko misowalan no Taneng 12:18 ‘citanengay a sema,’ samaan ko pidemak hani?

¹⁷ ˈAyaw no somowal saharateratengen. Ano eca pinaˈon, o mihadakan ita a sowal papaira to taˈangayay pidokaˈ to tao alatek. Sowal no Fangcalay Cudad: ‘Ano caay minaˈon to sowal i, matiya o mikotangay a midokaˈ to tamdaw, o citanengay a sema matiya o ngaˈayay a sapaiyo.’ (Taneng 12:18) Miliyas kita itini lalikor a milengo to dangoc no tao, ecato pipalak to kalalaˈed no tamdaw. (Taneng 20:19) Ano makalimay kita o sowal no niyah ngaˈay mihinom eca pidokaˈ to tao, papatomesen ko kemoday falocoˈ no niyah to harateng no Kawas. (Luka 6:45) Midotim to sowal no Kawas, o mihadakan ita a sowal o mamalo ‘pipowaran no taneng,’ wa ngaˈay pasinoway to tamdaw.—Taneng 18:4.

18. Misaka dademak to safalod no Taneng 24:6, sasamaan padama kitaanan ngaˈay ko pidemak to mitosilay a tayal hani?

¹⁸ Ka pidofdof to sakayat. Pasowalay ko Fangcalay Cudad kitaanan to cecay ciepocay a safalod: ‘Malingad milood, pitengil to citanengay a sakayat; ano ˈalomanay ko pitengilan, o papakalowid.’ (Taneng 24:6 ato roma pihongyak.) Sakadademaken ita konini a safalod, o ngangaˈayto ko pidemak to mitosilay ato pasifanaˈay a tayal. Cowa ko mamitoor kita to pakayraan no niyah midemak to mitosilay a tayal, ao mamitoor to sakayat no likakawa a midemak. Itini kasaˈopoan mamisinanot kita to matengilay a sakayat, minanam to ngaˈayay a pakayraan no tao pasifanaˈ. Roma i, adihayay ko mitepangan no likakawa no Kawas a cudad ato ika, oniya ciepocay sapasifanaˈ a lalosidan wa ngaˈay padama to tamdaw cipinang to kimad no Fangcalay Cudad. Misongilaˈay kiso misaka dademak toniya lalosidan han?

19. Pakayni taneng ni Yihofa samaanay ko pinengneng iso hani? (Taneng 3:13-18)

¹⁹ ˈOsien ko Taneng 3:13-18. Tada miakoˈiday kita pakaynien ni Yihofa i sowal Ningra pafeli kitaanan to ngaˈayay a sapatalipaˈelal! Ano awaay ko sapatalipaˈelal Ningra, caay ka fanaˈ kita sasamaan ko kaˈorip no niyah. Onini a lalakaw milomalay to pina ciepocay a safalod no Taneng, padama kitaanan mihapinang to tada citanengay ko sowal no Kawas. Soˈlinay i, komodan no Fangcalay Cudad matomesay to citanengay a sowal ni Yihofa. Nanay misetek kita to falocoˈ, tocerid mitoor to taneng ni Yihofa a maˈorip. Soˈlin ˈalomanay tamdaw no hekal misakahmaway to taneng no Kawas, kawra cowa ko kalimlaan ko pinengneng nangra. Pakasoˈlinay kita, ‘midofdofay to taneng i, o mapalemeday a tamdaw.’