Mikangodo to Kawas, Milifok to Midaˈocay a Epoc

1-2. Malecad ci Lotoan, aniniay a Krisciyang misiˈayaway to maanan a sapalifet?

MAˈARAW ita ko kapelal no waywayan nonini a hekal, malecaday ko nafalocoˈan toya moecelay a Lotoan. Maˈaraw ningra ko ‘cowa pitoor to sarikec a tamdaw kaacekan ko waywayan, tada adadaay ko falocoˈ,’ samanen mafanaˈay cingra ˈintehay ci Yihofa to tatiihay a waywayan. (2 Pitiro 2:7, 8) Samanen mangodoay ato maolahay to Kawas, cowa ka pahecad ci Loto to italiyokay a tamdaw, misaka dademak to malafoay a palinian nangra. Anini, italiyokay ita a tamdaw cowa pikangodo to palinian ni Yihofa. Kawra, ano padadotoc kita maolah to Kawas, palahad to mikangodoay Cingranan a falocoˈ, oha ngangaˈayto mitoor to ˈakawangay palinian no waywayan.—Taneng 14:2.

² Tada maolahay ci Yihofa kitaanan, sapadamaaw kitaanan, pakaynian Ningra i Taneng pafeli to sapakalalok kitaanan. Polong a Krisciyang, ano faˈinayanto fafahiyan malitengay kaemangay, ngaˈayay mikitini i citanengay a sowal no sinael milifok to epoc.

MANGODOAY TO KAWAS A FALOCOˈ WA NGAˈAY MIDIPOT KITAANAN

3. Mikitini Taneng 17:3, sapidipotaw kita to falocoˈ, o cecay kalimlaan a lalangian o maanan hani? (Nengnengen ko coka.)

³ Sapidipotaw kita to falocoˈ, o cecay lalangian i, mikinsaay ci Yihofa to falocoˈ no tamdaw. Tatodong nonini, cowa ko papotal aca ita ko maˈaraway Ningra, mafanaˈayho to soˈliˈlinay a waywayan ita. (ˈOsien ko Taneng 17:3.) O taneng no Kawas papafeli kitaanan to midaˈocay a ˈorip. Padadotoc kita misimsim to citanengay a sowal Ningra, mamaolah Cingra kitaanan. (Yohani 4:14) Matomes ko ponoˈ ita to citanengay a sowal no Kawas, cowato ko papacomod i ponoˈ ita to mangah ni Satan ato malafoay harateng no hekal, miwarak to harateng no mita. (1 Yohani 5:18, 19) Ano mangalef ko piingid ita ci Yihofaan, mamangalef ko kaolah ato pikangodo Cingranan. Caay ka ciharateng kita pakasomad Cingranan, mihaenay o piharateng aca to mamararaw mapiliˈayto kita. Ano micada to sakayhid i, wa ngaˈay kita misaharaterateng: “Ano hatiniay ko nika olah ni Yihofa takowanan, sasamaan kako padeteng sa pakasomad Cingranan hani?”—1 Yohani 4:9, 10.

4. Mikangodoay ci Yihofaan a falocoˈ samaanay midipot to cecay fafahiyan salikaka, padama cingranan malaˈosi ko picoˈay to sakayhid?

⁴ Fafahiyan salikaka ci Marta itiniay i Kroatia cingra, na micadaay cingra to sakayhid malafo ko kadadiˈi to tao. Sanay cingra: “Mamiˈimer to tireng, padadotoc ihkal ko piharateng, eca ka pilayap to pairaan no mararaway a cecayay liyad a lipahak, cowa ko madoloay! Kawra o mangodoay ci Yihofaan a falocoˈ midipotay takowanan.”b Mikangodoay a falocoˈ hano midipotay cingranan hani? Sanay ci Marta, misongilaˈay cingra misimsim to pairaan no raraw a minaroˈan. Ano kitato ngangaˈay mihaen to demak. Haratengen hena, o satatiihay a teloc o maanan hani? O papakasomad ci Yihofaan, malahdaw ko hatoki midaˈoc a midoko Cingranan. O mahaenay a teloc tada kaadayayanto!—Satapangan 6:5, 6.

5. Mikitini nalifetan ni Layaw mananamay iso ko maanan?

⁵ Ano mikangodoay kita ci Yihofaan, mamikiriwiˈ a minaˈon, eca ka paˈading to mararaway waywayan no niyah. Itiniay i Kangko ci Layaw mananamay to kalimlaan mihaen to demak. Micada cingra to paputisem sepat miheca ikor, misatapangay micawmaˈ to tatiihay widang. Harateng ningra ano caka pidemak to tatiihay demak ko niyah, cowa ko papakararaw ci Yihofaan. Kawra caka halafin, itini pifiyor no tatiihay widang misatapangay haliepah, hanaca malafoay ko kadadiˈi to tao. Ikor, maharatengay ningra ko nano sapasifanaˈ no wama wina a kimad no Fangcalay Cudad, maharatengayho tada lipahakay ko kaˈorip i salakat, talipaˈelalayto cingra. Itini pipadama no malohemay malitengay, patikolayto cingra i tatihi ni Yihofa. Nohatini o malohemay malitengay ato mikiriwiˈay misakafahay cingra, lipahakayto ko kaˈorip.

6. Dotoc mamilengo kita to samaanay tatosaay ‘fafahiyan?’

⁶ Itini i hekal ni Satan, ˈalomanay a tamdaw maolahay to maˈodangay a lalakaw, maenepay to malafoay a demak. (Ifiso 4:19) Mihaenay, papadadotoc kita palahad to mikangodoay to Kawas a falocoˈ, miliyas to tatiihay a demak. (Taneng 16:6) Itini toniya pakayraan, o faˈinayan anca fafahiyan, kita maemin wa ngaˈay mikitini sapatalipaˈelal no Taneng saka 9 fedengan milifok to epoc. Toniya fedengan tano sapatinako a pakayraan, somowal to citanengay ato maapaay malo tatosa cowa ka lecad a fafahiyan.c Oniya tatosaay fafahiyan mitahidangay to ‘cangoˈotay ko nalifetan’ a tamdaw tayni i lomaˈ komaen. (Taneng 9:1, 5, 6, 13, 16, 17) Kawra, tayra i lomaˈ nonini tatosa fafahiyan, cowa ka lecad ko teloc.

MINAˈAY TO TAHIDANG NO ‘MAAPAAY A FAFAHIYAN’

7. Mikitini Taneng 9:13-18, micadaay to satahidang no ‘maapaay a fafahiyan’ samaanayto ko teloc hani? (Nengnengen ko coka.)

⁷ Nengnengen ko satahidang no ‘maapaay a fafahiyan.’ (ˈOsien ko Taneng 9:13-18.) Cowa ka ngodo cingra mitahidang to awaay ko taneng a tamdaw tayra i lomaˈ ningra komaen. O micadaay to satahidang a tamdaw samaanayto ko teloc hani? Sanay ko sinael: ‘O itiraay cingranan a tamdaw sahtoay o mapatayay.’ Satapang no Taneng misaka dademakay to malecaday a sapatinako, mirikecay ko sinael ka piliyas to ‘maˈodangay a fafahiyan,’ sanay: ‘O lomaˈ ningra pakapatayay to tamdaw.’ (Taneng 2:11-19) Itini i Taneng 5:3-10 mirikecay to tamdaw miliyas to ‘malafoay a fafahiyan,’ samanen ‘o tosa a ooˈ ningra marefongay tayra i patay.’

8. Alatek mamisiˈayaw kita to maanan a papiliˈen?

⁸ O micadaay to satahidang a tamdaw tosaay ko papiliˈen: Micada anca minaˈay. Ano kitato mamisiˈayaw to malecaday a papiliˈen, tinakoen ira ko tamdaw mikayhid kitaanan midemak to malafoay a demak, anca fahal sa maˈaraw ita ko maˈodangay a lalakaw. Toniya tatokian, sasamaan ko mipiliˈan ita hani?

9-10. Hano mamiliyas kita to malafoay madadiˈiyay a waywayan hani?

⁹ Adihayay ko lalangian ita miliyas to malafoay madadiˈiyay a waywayan. Sowal no ‘maapaay a fafahiyan’ sanay: ‘O mitakawan a nanom tada koesanay.’ ‘O mitakawan a nanom’ o maanan ko mitoroˈan hani? Patinakoen no Fangcalay Cudad ko madadiˈiyay a demak no mararamoday to nanom. (Taneng 5:15-18) O mararamoday wa mikitini toniya makakaolahay a demak milifok to lipahak. Kawrira, ‘mitakawan a nanom’ cowato ka lecad. ‘O mitakawan a nanom’ o malafoay a madadiˈiyay a waywayan. Midemakay to hatiniay a demak a tamdaw matalaway maˈaraw no tao, malecaday o tohoy. O midemakan no niyah cowa ko mamafanaˈ ko tamdaw ano saan cangra, o koesanay ko ‘mitakawan a nanom’ wa saanto ko piharateng. O misamangahay to niyah konini! Maˈaraway ni Yihofa maemin. Malahdaw ko pihayda ni Yihofa o kasomadan a demak konini, sasamaan o koesanay konini hani? (1 Korinto 6:9, 10) Cowa konini aca, wa iraho ko maanan a tatiihay a teloc hani?

¹⁰ Mifekad ko malafoay madadiˈiyay a demak ikor, mamalahdaw ko kasenengan no niyah, mangodoen ko harateng. O hatiniay a demak sakaira no kapiliˈan a kapoyapoy ato maliwasak ko paro no lomaˈ. Mahapinangay, eca ka tayra i lomaˈ no ‘maapaay a fafahiyan’ a komaen o citanengay a pisaˈosi. ˈAlomanay tamdaw mifekad ko malafoay madadiˈiyay a demak ikor, mapalakayto ko ngaˈayay kalalaˈed aci Yihofaan, pakayniho i kadenga no katalawan a adada malahdaw ko ˈorip no niyah. (Taneng 7:23, 26) Mitolasay ko sowal no Taneng 9:18 sanay: ‘O lafang ningra itiniay i kemod no patademan.’ Ano kaadayayan ko teloc i, hano ˈalomanho ko malipalaway a tamdaw, micada to satahidang ningra hani?—Taneng 9:13-18.

11. Minengneng to maˈodangay a lalakaw hano tada tatiihay hani?

¹¹ O marariday maˈaraw a talakal o maˈodangay a lalakaw. Harateng no ˈalomanay minengneng to maˈodangay a lalakaw awaay ko katatiihan sanay, kawra cowa ka hatira ko demak. Tada tatiihay ko maˈodangay a lalakaw, cowato pikangodo to niyah ato tao, madoloayho a mahiyan. O sasing no maˈodangay padotocay materek i ponoˈ, caay ka lahdaw. O maˈodangay a lalakaw cowa ko mamifalah, ao mamitongal to mararaway coos. (Kolosay 3:5; Yakop 1:14, 15) Hatiraayto, ˈalomanay minengnengay to maˈodangay a lalakaw ikor mifekaday ko malafoay kadadiˈi to tao.

12. Pakayni mikidatay to sakaˈodang a sasing, sasamaan ko pidemak ita hani?

¹² Itini i tingnaw ano mahadak ko maˈodangay a sasing, sasamaan ko pidemak ita hani? O tatangsol kita a misaˈosi, eca ka pinengneng to mahaenay a sasing. Pakaynien kitaanan, o kalalaˈed aci Yihofaan o sakakaay kalimlaan. Maharateng konini, o mamadoloto tangsol a midemak. O roma sasing cowa ko maˈodangay a lalakaw saan ko pinengneng no tamdaw, kawra mikidatay to sakaˈodangaw. O mahaenay a sasing hano laliyasen hani? Samanen o mimingay aca maˈodangay a harateng caay ka olah kita. (Matay 5:28, 29) Ci Taywi o malohemay malitengay i Taylan, sanay cingra: “Milicayan ako ko niyah: ‘Soˈliˈlin cowa ko maˈodangay a lalakaw konini a sasing alatek, kawra ano padadotoc kako minengneng, mamahemek ci Yihofa han?’ Miharateng tonini a salicay, padamaay takowanan citaneng ko pisaˈosi.”

13. O maanan ko papadama kitaanan citaneng ko pisaˈosi hani?

¹³ Mikangodo kita ci Yihofaan, caay ka ciharateng to sakaecaaw kahemek Ningra, wa ngaˈayto citaneng ko pisaˈosi. Mikangodo to Kawas o ‘satapangan no taneng.’ (Taneng 9:10) Satapang aca no saka 9 fedengan no Taneng misaˈicelayto tonini. Itini toniya sinael, patinakoan ko ‘soˈlinay a taneng’ to roma a fafahiyan.

MICADA TO SATAHIDANG NO ‘SOˈLINAY A TANENG’

14. Taneng 9:1-6 mihadakay to maanan cowa ka lecad a satahidang hani?

¹⁴ ˈOsien ko Taneng 9:1-6. Itini maˈosiay ita ko satahidang no ‘soˈlinay a taneng.’ Onini a satahidang ci Yihofa ko mihadakay, samanen o kihcod a taneng mikitiraay Cingranan a ira. (Taneng 2:6; Loma 16:27) Somowalay ko sinael to cecay pitoay ko hecek a taˈangayay lomaˈ, mitadtaday konini a sapatinako to hinapaladaˈay ci Yihofa, ano makahi ko tamdaw pasayra Cingranan minanam to taneng, mihamhamay Cingra.

15. Makalimay ko Kawas samaan ko pidemak ita hani?

¹⁵ Taneng saka 9 fedengan paliniay to cecay fafahiyan to ‘soˈlinay a taneng,’ somowal to misadayay cingra i lomaˈ to ˈaredetay kakaenen ato kaesoˈay a epah.d Mikitini toniya sapatinako ngaˈay mahapinang ita, tada hinapaladaˈay ci Yihofa, makahiay pafeli to adihayay sapalemed i tamdaw. (Taneng 9:2) Saka 4 ato 5 sinael sanay: ‘Pasowalay ko taneng to cowa ka citaneng a tamdaw, sanay: “Ka tayni komaen to misangaˈan ako a epang.”’ Hano mamicada kita to satahidang tayra i lomaˈ no ‘soˈlinay a taneng’ a misalafang hani? Samanen ci Yihofa makalimay malo citanengay a tamdaw kita, ngaˈay citaneng ko pisaˈosi, miliyas to katalawan. Caay ka ciharateng Cingra tahalifa kita to roray ngaˈ mananam ko sapasifanaˈ, telocto kaadayayan ko kaˈorip. Mansa mihaen ko sowal no sinael: ‘Padamaan ningra ko moecelay tamdaw ira ko ciepocay a taneng.’ (Taneng 2:7) Mikangodo kita ci Yihofaan, o mamakalim pakahemek Cingranan. Mamakahi kita mitengil to limoˈot Ningra hanaca mitoor a midemak.—Yakop 1:25.

16. O mangodoay to Kawas a falocoˈ samaanay padama to faˈinayan salikaka ci Alangan citaneng ko pisaˈosi? Samaanay ko teloc hani?

¹⁶ Nengnengen o mangodoay to Kawas a falocoˈ samaanay padama to faˈinayan salikaka ci Alangan citaneng ko pisaˈosi. O malohemay malitengay cingra, itiniay i picudadan malo singsi. Sanay cingra: “ˈAlomanay cafay ako matayal minengneng to maˈodangay ika o sakacipinang to madadiˈiyay a pakayraan sanay.” Kawra cowa ka lipalaw no mararaway a sasowalen ci Alang. Sanay cingra: “Pakayni kangodo to Kawas, misetekay kako to falocoˈ eca ka pinengneng to mahaenay ika, mitadtadayho i cafay matayal to hano eca ka pinengneng kako.” Mitengilan ningra midofdof ko limoˈot no ‘soˈlinay a taneng,’ ‘pakayni i noka citaneng ngaˈay ko kaˈorip.’ (Taneng 9:6) Tanektekay ko saaroˈan ni Alang, hato mitemeray to falocoˈ no cafay matayal. Telocto, misatapangay cangra minanam to Fangcalay Cudad, hanaca mirienangay to saˈopo no Krisciyang.

17-18. Micadaay to satahidang no ‘soˈlinay a taneng’ a tamdaw, nohatiniho mamilifokto to maanan haepoc hani? Wa iraho ko maanan a hatokel noikor? (Nengnengen ko coka.)

¹⁷ Sakadademakan ni Yihofa ko tatosaay fafahiyan a sapatinako, padama kitaanan cipinang samaan milifok to lipahakay a hanoikor. ‘Maapaay a fafahiyan’ kafangafangan mahadang, micadaay to satahidang ningra a tamdaw sapilifokaw to kasalo no mitakawan a olah. I kaˈayaway aca ko misikolan no hatiniay tamdaw, cowa pisimsim to hanoikoran. Teloc nangra marefongay i ‘kemod no Patademan.’—Taneng 9:13, 17, 18.

¹⁸ Micadaay to satahidang no ‘soˈlinay a taneng’ a tamdaw cowa ka hecad! Polong misalafangay a tamdaw mitahkaay to kadofahay a tahka nohatini, milayap to ˈaredetay, pahaleday to nofalocoˈan a ‘kakaenen.’ (Isaya 65:13) Pakaynian ni Yihofa i pairasolay a Isaya somowal: ‘Ka pisinanot kamo mitengil to sowal Ako, o mamitanam to ˈaredetay kakaenen, milifok to cihaleday a kakaenen, lipahak ko falocoˈ.’ (Isaya 55:1, 2) Padotocay kita minanam maolah to kaolahan ni Yihofa, ˈinteh to kaˈintehan ni Yihofa. (ˈOlic 97:10) Misaˈicelayho kita mitahidang to tao mitengil to sapasifanaˈ no ‘soˈlinay a taneng,’ hanaca pakayni ko kalipahak no falocoˈ. Malecaday kita to itiniay i ˈakawangay a niyaroˈ milekal: ‘O cima ko cangoˈotay to nalifetan, ka tayni mamaan!’ Kita ato polong micadaay to satahidang a tamdaw ‘pakayni i noka citaneng ngaˈay ko kaˈorip,’ cowa ko anini aca ngaˈayto milifok to adihayay sapalemed, noikor mamilifokho to midaˈocay a epoc, tahadaˈoc a maˈorip.—Taneng 9:3, 4, 6.

19. Mikitini Patnakay 12:13, 14, mamisetek kita to falocoˈ samaan ko pidemak hani? (Nengnengen ko sapatongal lalakaw “Mikangodo to Kawas o Sakaciepoc no Mita.”)

¹⁹ ˈOsien ko Patnakay 12:13, 14. O mikangodoay ci Yihofaan a falocoˈ papadama kitaanan midipot to falocoˈ, toniya katalawan a laliyadan padadotoc makorac ko waywayan, malo moecelay a tamdaw itini pinengneng no Kawas. O mangodoay a falocoˈ pakalalokay kitaanan mitahidang to ˈalomanay tamdaw micangacang to ‘soˈlinay a taneng,’ mikitini a milifok to epoc. Nanay padadotoc kita misarocod to falocoˈ mikangodo ci Yihofaan!