CACEKIWEN LALAKAW 46
Padamaay ci Yihofa Kitaanan Ira ko Lipahak Padotoc Mihadidi
‘Mihadidiay ci Yihofa mitala, palemed tamowanan, mamidemak Cingra, siniˈada tamowanan.’—ISAYA 30:18.
RADIW 152 O ˈIcel, O Tokel Niyam Kiso, Tatiˈeren Kiso
KALIMLAAN NO LALAKAWa
1-2. (1) Onini lalakaw mamilengo to maanan a salicay? (2) Hano mafanaˈ kita to tada macalohay ci Yihofa makalim sapadamaaw kitaanan hani?
WA NGAˈAY padama ci Yihofa kitaanan miremo to masakenaay pasangar no kaˈorip, hanaca itini pirienang to midokoay a demak milifok to lipahak. O maanan a pakayraan ko misaka dademakan Ningra padama kitaanan hani? Samaan ko pidemak ita ngaˈ milifok to sataˈangayay epoc hani? Oniya lalakaw mamilengo toniya salicay. Kawra ˈayaw nonini, salakatho kita milengo to cecay milingatay a salicay: Soˈlinay makahi ci Yihofa padama kitaanan han?
2 O misaka dademakan no tarokos ci Pawlo i Hipray cudad cecay a sowal wa ngaˈay padama kitaanan mahela ko caˈof nonini a salicay. Sanay ci Pawlo: ‘Ira ci Yihofa padama takowanan, cowa ko mamatalaw kako. Ngaˈay ko tamdaw misamaan takowanan saw?’ (Hipray 13:6) O roma taˈarawan to Fangcalay Cudad sanay, mihongyakan toniya sinael ‘padama’ a sowal, mitoroˈan i, o cecay tamdaw matengilay ko pisaali no tao to papadamaen, comikayay tayra padama cingranan. Haratengen hena, comikayay ci Yihofa milidong to misemsemay a tamdaw. Onini a coka padamaay kitaanan mihapinang, makahiay ci Yihofa, hanaca macalohay a makalim sapadamaaw kitaanan. Ira Cingra i tatihi ita, o ngangaˈay kita ira ko lipahak mihadidi to masakenaay a sapalifet.
3. Ci Yihofa tano manan tolo a pakayraan padama kitaanan ira ko lipahak padotoc a mihadidi hani?
3 Samaanay ci Yihofa padama kitaanan ira ko lipahak padotoc a mihadidi hani? Sapacaˈofaw tonini a salicay, nengnengen ita ko Isaya cudad. Onini a cudad hano kakiriwiˈen ita a misinanot hani? Samanen mikayatan no Kawas ci Isaya mitilid to adihayay sapairasol, onini a sapairasol milingatay to midokoay to Kawas a tamdaw anini. Roma i, o pilengo ni Isaya ci Yihofaan a sowal madoloay cipinang. Nengnengen ko Isaya 30 fedengan kasemeran a pilengo. Toniya fedengan, masowalay ni Isaya ko tolo a pakayraan ni Yihofa padama to finawlan Ningra: (1) Misinanotay Cingra mitengil ato pacaˈof to satolon ita, (2) pafeliay Cingra to sakayat kitaanan, (3) adihayay ko sapafeli Ningra a sapalemed kitaanan anini ato noikoran. Sanay aca hacecayen ita minengneng.
MITENGILAY CI YIHOFA TO SOWAL ITA
4. (1) Samaanay ko pilengo ni Yihofa to i lintaday ni Isaya a Israil tamdaw? Mihayian Ningra mifekad ko manan a demak i tireng nangra? (2) Pafelian ni Yihofa ko madimadiay a Israil tamdaw to manan a hatokel? (Isaya 30:18, 19)
4 Satapang no Isaya 30 fedengan, sowal ni Yihofa o Israil tamdaw o ‘ˈatekakay ko falocoˈ a wawa,’ misaliyaliyaway cangra mitowakang, ‘matongalay ko raraw.’ Sanayho cingra: ‘O pacoliay a finawlan cangra, . . . caay kakahi mihakelong to rikec ni Yihofa.’ (Isaya 30:1, 9) Samanen cowa pihakelong ko Israil tamdaw to sowal ni Yihofa, paˈayaway ci Isaya wa hayien ni Yihofa tahacada to pades cangra. (Isaya 30:5, 17; Yirimiya 25:8-11) Soˈlinay mahaen ko demak, ikor maholiway no Papilon tamdaw cangra. Kawra, ilalomaˈ no Israil tamdaw iraay ko madimadiay to Kawas a tamdaw. O milasilan ni Isaya cecay lihaf pafeliay to hatokel nangra, wa ira ko cecay romiˈad laliyawen ni Yihofa palemed cangra. (ˈOsien ko Isaya 30:18, 19.) Cowa ko tatangsol mifekad konini a demak. ‘Mihadidiay ci Yihofa mitala, papalemed tamowanan’ tatodong noniya sowal, wa mataˈlif ko cecay liyad a toki, miliyaw a milifok to pasalat ko madimadiay Israil tamdaw. Ikor i, soˈlinay milidongan ni Yihofa cangra. Maholiw ko Israil tamdaw i Papilon 70 miheca ikor, cecay ˈopo maˈosaway tamdaw patikolay i Yirusalim. (Isaya 10:21; Yirimiya 29:10) Matedal cangra mikitini Papilon, patikol i nalacolan ikor, o losaˈ no kahemek mikotayay to losaˈ no misemsemay.
5. Isaya 30:19 pafeliay kitaanan to maanan a sakiˈok hani?
5 Anini, wa ngaˈay kita mikitini sowal ni Isaya milifok to taˈangayay sahinom, sanay cingra: ‘Matengil no Kawas ko micangacangay to salidong a ngihaˈ iso, o papalemed tisowanan. Matengil Ningra, o papacaˈof tisowanan.’ (Isaya 30:19) Mikiˈokay ci Isaya, micangacang kita ci Yihofaan, wa misongilaˈ ci Yihofa mitengil, tatangsolho a pacaˈof kitaanan. Onini mihinomay to falocoˈ a sowal padamaay kitaanan pakasoˈlin, cowa ko makahi aca ko kakarayan Wama hanaca macalohay padama to micangacangay Cingranan a tamdaw. Mafanaˈ tonini, wa ngaˈayto ira ko lipahak ita padadotoc a mihadidi.
6. Mikitini i sowal ni Isaya hano mahapinang ita, mamitengil ci Yihofa to satolon no kahacecay sikawdan Ningra?
6 Pakayni mitolonay, mikitini toniya sinael mamananamho ita ko maanan hani? Misinanotay ci Yihofa mitengil to satolon ita o kahacecay tamdaw. Hano mafanaˈ kita hani? Saˈayaway no 30 fedengan no Isaya misaka dademakay to ‘kamo’ sanay a sowal, samanen pasayraay ci Yihofa i polong a finawlan Ningra a pasowal. Kawra, 19 sinael misaka dademakay to ‘kiso’ a sowal, samanen o sowal itini pasayraay i kahacecay tamdaw a sowalen. Sanay ci Isaya: ‘Cowa ko mamararom kiso a tomangic.’ ‘O Kawas . . . papalemed tisowanan.’ ‘Papacaˈof Cingra . . . tisowanan.’ O sidaˈitay a Wama ci Yihofa, maˈaraw Ningra matoled ko cecay wawa Ningra i, cowa ko papasowal: “Ka malecad kiso to kaka iso a tanektek.” Ciharatengay Cingra kitaanan o kahacecay tamdaw, hanaca mamisongilaˈ mitengil to satolon ita o kahacecay tamdaw.—ˈOlic 116:1; Isaya 57:15.
Sowal ni Isaya ‘padotocen patengil to ngihaˈ namo’ ci Yihofa. O manan ko tatodong no sowal ningra? (Nengnengen ko saka 7 fatac)
7. Samaanay ci Isaya aci Yis mitadtad to kalimlaan ko padadotocay mitolon?
7 Pasowalen ita ci Yihofa to ka calemceman no niyah a demak, sasamaan Cingra pacaˈof hani? O sasalakat Cingra pafeli kitaanan to ˈicel misiˈayaw to pasangaray alatek. O pasangaray ita ano cowa ka lecad to halamhaman ita kaliki a masaysay, papadotoc kita micangacang ci Yihofaan pafeli to ˈicel, padama kitaanan padadotoc mihadidi. Mikitini sowal ni Isaya mahapinang ita pakalalokay ci Yihofa kitaanan mihaen to demak. Sanay ci Isaya: ‘Padotocen patengil Cingra to ngihaˈ namo.’ (Isaya 62:7) Roma pihongyak toniya sowal ‘aka papipaselaˈen Cingra.’ Padamaay koni kitaanan cipinang, o papadadotoc kita mitolon ci Yihofaan, malecad to eca papipaselaˈ Cingranan. O sowal ni Isaya papiharatengay kitaanan to namisowalan ni Yis a sapatinako. Itini Luka 11:8-10, 13 pakalalokay ci Yis kitaanan ano mitolon i ka ‘timolo a padadotoc,’ ka ‘padadotoc micangacang’ to Kawas pafeli to fangcalay saocor. Roma i, wa ngaˈayho kita micangacang to sakayat ni Yihofa kitaanan, padama kitaanan citaneng ko pisaˈosi.
MIKAYATAY CI YIHOFA KITAANAN
8. Itini nolitengan samaanay malaˈosi ko Isaya 30:20, 21?
8 ˈOsien ko Isaya 30:20, 21. Miˈalikot ko sofitay no Papilon to Yirusalim cecayay miheca ira ko kalitosa ko halafin. Toya tatokian, tada marorayay ko kaˈorip no Israil, o pisemsem nangra malecaday to komaenay to holo ato nanom to romiˈamiˈad a mararid. Kawra itini Isaya 30:20, 21 mikiˈokay ci Yihofa to Israil tamdaw, ano pasasiyor cangra hanaca misalof to waywayan no niyah, o lalidongen ni Yihofa cangra. Panganganan ni Isaya ci Yihofa to ‘Kasapaan a Singsi,’ o mikiˈokay to Israil tamdaw, o papasifanaˈen ni Yihofa ko finawlan Ningra tano matatodongay a pakayraan midoko Cingranan. Miliyaw milifok to pasalat ko Israil tamdaw ikor, malaˈosiayto konini a sapairasol ni Isaya. Soˈlinay o Kasapaan a Singsi no Israil tamdaw ci Yihofa, itini sakayat Ningra, malaˈosiay cangra miliyaw patireng to matatodongay pidoko. Anini, o Kasapaan a Singsi ita ci Yihofa, tada rahekerayto kita.
9. Milifok kita to sapasifanaˈ ni Yihofa o cecay pakayraan o manan?
9 Itini toniya tosa a sinael, palalinian ni Isaya kita to sito, tosaay ko pakayraan ni Yihofa pasifanaˈ kitaanan. Saka 1, sanay ci Isaya: ‘Wa maˈaraw namo ko Kasapaan a Singsi namo.’ Oniya sapatinako maharatengay ita ko cecay a coka, tomirengay ko singsi i kaˈayaw no sito a pasifanaˈ. Samaanay ci Yihofa itini kaˈayaw ita pasifanaˈ kitaanan hani? Pakaynian Ningra i likakawa Ningra mihadak to sakayat. Pakaynian no likakawa no Kawas i saˈopo, taykay, mitepangan cudad, JW tilifi ato roma pakayraan, pafeli kitaanan to ihkalay a sakayat, padama kitaanan itini sapalifet ngaˈay ira ko lipahak padadotoc mihadidi. Pakayni tonini tada miakoˈiday kita ci Yihofaan!
10. ‘Matengil ita ko ngihaˈ itini kaikor,’ o maanan ko tatodong hani?
10 Masowalay ni Isaya ko saka tosa a pakayraan ni Yihofa pasifanaˈ kitaanan, sanay: ‘Kamo . . . mamatengil ko ngihaˈ i kaikor.’ Itini, malecaday o singsi ci Yihofa, romakatay Cingra i kaikor no sito pafeli cangranan to sakayat, pasowal cangranan to papasicowa a romakat. Samaanay ci Yihofa itini kaikor no mita mihadak to ngihaˈ hani? Pakayniay i Fangcalay Cudad. O Fangcalay Cudad matilidayto isalakat, malecaday to itiniay i kaikor no mita. Mihaenay, micekiw kita to Fangcalay Cudad malecaday to pakatengilay to ngihaˈ no Kawas itini kaikor ita pasowal kitaanan.—Isaya 51:4.
11. Sapadotocaw lipahak midoko ci Yihofaan, o mamidemak kita to manan a demak hani? Misamaanay?
11 Pakaynian ni Yihofa i likakawa Ningra ato Fangcalay Cudad pafeli kitaanan to adihayay sakayat. Sasamaan kita ngaˈ mikitini milifok to taˈangayay epoc hani? Sinanoten ko masowalay ni Isaya tosa a demak: Saka 1, ‘o moecelay lalan koni.’ Saka 2, ‘ka romakat kamo tonini a lalan o matatodongay.’ (Isaya 30:21) Mihaenay, o kafanaˈ aca ita to moecelay a lalan koni cangoˈotayho, raromakatho tonini a lalan. O likakawa ni Yihofa padamaay kitaanan ihkal ko kacipinang to Fangcalay Cudad, mananamay ita o maanan ko saali ni Yihofa kitaanan, mananamayho sasamaan midoedo to saali Ningra midemak. Sapadotocaw kita lipahak midoko ci Yihofaan, o mamidemak tonini a tosa a demak. Edengan mihaen ko demak, ngaˈ pakasoˈlin kita to papalemeden ni Yihofa kita.
PALEMEDAY CI YIHOFA KITAANAN
12. Mikitini Isaya 30:23-26, sasamaan ci Yihofa palemed to finawlan Ningra?
12 ˈOsien ko Isaya 30:23-26. Matedal ko Israil tamdaw mikitini Papilon patikol i nalacolan ikor, samaanay malaˈosi koniya sapairasol hani? Pafelian ni Yihofa cangra to kadofahay a sapalemed, ho ngaˈay cangra milifok to kadofahay a karenec i saali no tirengan ato nafalocoˈan. Pafelian ni Yihofa ko finawlan Ningra to kadofahay a kakaenen, kawra sakakaay i, pafelian Ningra cangra to kadofahay, sapahaled to pakasoˈlin a kakaenen, hanaca padama cangranan miliyaw tano matatodongay a pakayraan midoko Cingranan. O malifokay no finawlan no Kawas a sapalemed itiya caay pakalini ko salakatay. Saka 26 sinael paihkalay, pafelian ni Yihofa ko finawlan Ningra to adihayay a tedi, hato ngaˈayay cangra cipinang to sowal Ningra. (Isaya 60:2) Samanen iraay ko sapalemed ni Yihofa, ngaˈayay ‘lipahak ko falocoˈ’ nangra, tanektek ko pakasoˈlin padadotoc midoko Cingranan.—Isaya 65:14.
13. Pakayni miliyaw tomireng ko matatodongay pidoko a sapairasol samanay a malaˈosi anini hani?
13 Pakayni miliyaw tomireng ko matatodongay pidoko a sapairasol, malaˈosiay anini han? Hayi. Samaanay malaˈosi hani? Mikitini 1919 miheca misatapang, masacaˈolay masaemangay a tamdaw miliyasay to mararaway pihakelongan, mihepol to safakec no Taˈangayay Papilon, micomod i lakoing no midokoay a pakayraan. Onini a sera ikakaay ko kangaˈay to Mikiˈokan ni Yihofa pafeli to Israil tamdaw a Sera. (Isaya 51:3; 66:8) O lakoing no midokoay a pakayraan o manan ko mitoroˈan hani?
14. O lakoing no midokoay a pakayraan o manan ko mitoroˈan? Anini o cima ko maˈoripay tonini a lakoing? (Nengnengen ko Sapitadtad a Sowal.)
14 Mikitini 1919 miheca misatapang, manilnilay no fangcalay saocor a Krisciyang padotocay itini lakoing no midokoay a pakayraan maˈorip.b Ikor, ‘roma lopayˈay siri,’ oya iraay ko tokel itini fafekang no sera tahadaˈoc maˈorip a tamdaw, micomoday tonini a lakoing, hanaca milifokay to kadofahay a sapalemed ni Yihofa.—Yohani 10:16; Isaya 25:6; 65:13.
15. O lakoing no midokoay a pakayraan icowaay hani?
15 Anini o lakoing no midokoay a pakayraan icowaay hani? Midokoay ci Yihofaan a tamdaw miedefay i paro no kakarayan, mihaenay icowacowa pala no hekal iraay ko lakoing no midokoay a pakayraan. Ano icowaayto ko kitiraan iso toniya hekal, ano tawlikay kiso mirienang to matatodongay pidoko, o masalalomaˈayto nonini a lakoing.
Kita kahacecay tamdaw sasamaan mihadak to ˈicel patongal to ˈodingar no lakoing no midokoay a pakayraan? (Nengnengen ko saka 16-17 fatac)
16. Samaan ko pidemak ita wa ngaˈay padadotoc masemer a minengneng to ka fangcal nonini a lakoing?
16 Sapadadotocaw materek i lakoing no midokoay a pakayraan, o mamihadak kita to adihayay ˈicel. Tinakoen, o mamisalimla kita to polong kasacefang no salikaka. Samaan ko pidemak hani? O mamasemer minengneng to kangaˈayan no salikaka, aka piharateng to dangoc nangra. (Yohani 17:20, 21) Mihaen to demak hano kalimlaan hani? Haratengen ko cecay sapatinako. Itini kita i makapahay a colicolingan maˈaraway ko masakenakenaay a kilang. Malecaday, anini i kasakopang no Krisciyang iraay ko masakenakenaay a tamdaw, mahecaday cangra to masasiromaromaay a kilang. (Isaya 44:4; 61:3) O mamisongilaˈ kita minengneng to polong a “colicolingan” hakowaay ko ka fangcal, cowa ko caciharateng to hakowaay ko dangoc no tatihiay ita a “kilang.” O salikaka ita i paro no kakarayan makakedecay a dipayal, tada makapahayto koni, tada kalimlaan, aka a pakayni ka caka lefot no niyah ato roma tamdaw misakahmaw tonini.
17. Kita kahacecay tamdaw sasamaan mihadak to ˈicel padama to kasakopang mitafo to makakedecay hani?
17 Kita kahacecay tamdaw sasamaan mihadak to ˈicel padama to kasakopang mitafo to makakedecay hani? O mamisarocod micowat to dipayal. (Matay 5:9; Loma 12:18) O kahacecay ka talaˈayaw ita midama to ngaˈayay kalalaˈed to salikaka i, o patongalay to ˈodingar no lakoing no midokoay a pakayraan. Haratengen ita, o kahacecay tamdaw nonini a lakoing sahtoay o misolotan ni Yihofa mirienang to matatodongay a pidoko. (Yohani 6:44) Itini pinengneng ni Yihofa, sahtoay o kalimlaan ko kahacecay tamdaw i kasakopang. Ano maˈaraw Ningra ko pisaˈicel ita micowat to dipayal ato kakedec no kasakopang, maedeng o mamahemek.—Isaya 26:3; Hakay 2:7.
18. O mamararid kita midotim to maanan a demak? Misamaanay?
18 Adihayay ko sapalemed no Kawas kitaanan, samaan ko pidemak ita wa ngaˈayto milifok to taˈangayay haepoc hani? Ngaˈayay calepen ita miharateng ko mananamay no niyah i Fangcalay Cudad a lalakaw, mihaen ko demak wa ngaˈay padama kitaanan palahad to makapahay capeling no Krisciyang, ho ngaˈay kita ‘ira ko olah no salikaka, tano damsayay masasicada.’ (Loma 12:10) Roma i, misongilaˈ kita miharateng to iraay nohatini a sakaraheker no niyah, o papaˈicel to kalawidang ci Yihofaan; misongilaˈ kita miharateng mamilifokho to maanan sapalemed noikor, mamatongal ko pakasoˈlin ita to sapafeli no Kawas a hatokel, pakasoˈlin to tatahadaˈoc ko niyah itini i faelohay a hekal midoko Cingranan. Midotim toniya demak aniniho wa ngaˈayto kita ira ko lipahak matayal saki Kawas.
MISETEK TO FALOCOˈ TAHATOLAS MIHADIDI
19. (1) Mikitini Isaya 30:18, ngaˈay pakasoˈlin kita to maanan? (2) O maanan ko papadama kitaanan ira ko lipahak padotoc a mihadidi?
19 O ‘mamidemak’ ci Yihofa palaˈafo tonini ciraraway a hekal. (Isaya 30:18) Pakasoˈlinay kita ‘o masadafdafay a Kawas ci Yihofa.’ Maharekayto Cingra mitoor to masadafdafay palinian Ningra misaˈosi to sapisawkitaw a toki, cowa ko papanayar to cecay romiˈad materek ko hekal ni Satan. (Isaya 25:9) Mihadidi kita malacafay ci Yihofaan a mitala, tahira kairaan no pilidongan a romiˈad Ningra. Toniya tatokian, misetek kita to falocoˈ padotoc mitolon, micekiw ato misaka dademak to Kimad no Kawas, hanaca misongilaˈ midotim to sapalemed Ningra kitaanan. Mihaen, o papadamaen ni Yihofa kita padadotoc a mihadidi, padadotoc lipahak midoko Cingranan.
RADIW 129 Fakecen ko Hatokel no Mita
a Oniya lalakaw mamifolfol to Isaya 30 fedengan, milengo tano maanan tolo a pakayraan ci Yihofa padama kitaanan ira ko lipahak padotoc mihadidi. Mamananam ita, pasayra ci Yihofaan mitolon, micekiw to Sowal Ningra ato midotim to sakaraheker anini ato noikoran, tada kalimlaan.
b SAPITADTAD A SOWAL: ‘O lakoing no midokoay a pakayraan’ mitoroˈan i o dipayalay a pakayraan, itiniay kita toniya pakayraan makelec malacecay a midoko ci Yihofaan. Itini tonini a lakoing, iraay ko kadofahay sapahaled to nafalocoˈan ita a kakaenen, hanaca onini a kakaenen cowa picamol ko kimad no mararaway pihakelongan. Adihayayho ko parenecay kitaanan a tayal, o milasilay to ngaˈayay lihaf no Hongti Kitakit no Kawas a emin a tayal. Roma i, milifokay kita to tangongolay kalawidang ci Yihofaan, dipayalay malacafay to salikaka, padamaay cangra kitaanan ira ko lipahak itini pasangaray a pakayraan padadotoc mihadidi. Misatapangay kita tano matatodongay a pakayraan midoko ci Yihofaan, hanaca misaˈicel mitodong Cingranan, o micomodayto to lakoing no midokoay a pakayraan.