Ano Masamaanto Aka Piliyas ci Yihofaan

1. Samaan kita mafanaˈ to makalimay ci Yihofa kitaanan miingid Cingranan hani?

PAKALALOKAY ci Yihofa kitaanan miingid Cingranan. (Yakop 4:8) Mahemekay Cingra malo Kawas no mita, Wama ato Widang. Wa pacaˈofen Ningra ko satolon no mita, padamaho kitaanan misiˈayaw to pasangaray. Pakaynienho Ningra i likakawa Ningra pasifanaˈ ato midipot kitaanan. Kawra mamidemak kita to maanan miingid Cingranan hani?

2. Samaan ko pidemak ita wa ngaˈay miingid ci Yihofaan?

² Mitolon kita, micekiw to Fangcalay Cudad, hanaca midotim to Kimad no Kawas, wa ngaˈayto miingid ci Yihofaan. Mihaen kita to demak wa matongal ko kaolah Cingranan, matomes ko piakoˈid Cingranan, hanaca makalim midofdof ato pakahemek Cingranan, samanen citatodongay Cingra milifok tonini. (Paˈarawan 4:11) Matongal ko kafanaˈ ita ci Yihofaan, wa matongal ko pitadiˈec Cingranan ato misaka dademakan Ningra a likakawa padama kitaanan.

3. Sasamaan ci Satan paliyas kitaanan ci Yihofaan hani? Samaan ko pidemak ita ano tahadaˈocto cowa ko mamiliyas to Kawas ato likakawa Ningra? (ˈOlic 31:13, 14)

³ Kawra, misamacayay ci Satan paliyas kitaanan ci Yihofaan, mangalefay tahasiˈayaw kita to pasangaray i, misaka dademakan ningra ko mahaenay a toki miˈodis kitaanan. Wa tano maanan a pakayraan ci Satan hani? Wa palidlid sa mifasaw to pakasoˈlin no falocoˈ ita ci Yihofaan ato likakawa Ningra. Kawra wa ngaˈay malaˈosi ko picoˈay ita cingranan. Ira ko tanektekay a pakasoˈlin no falocoˈ ita ci Yihofaan, caay ka ngiyangi, ano tahadaˈocto cowa ko mamiliyas ci Yihofaan ato likakawa Ningra.—ˈOsien ko ˈOlic 31:13, 14.

4. Onini a lalakaw mamilengo to maanan hani?

⁴ Onini a lalakaw mamilengo to mikitiniay papotalay no kasakopang tolo a sapalifet, onini a sapalifet mamifasaw to pakasoˈlin no falocoˈ ita ci Yihofaan ato likakawa Ningra alatek. Onini a sapalifet hano papaliyas kitaanan ci Yihofaan hani? Samaan ko pidemak ita ngaˈ mapadik ko misahalakaan ni Satan hani?

TAHALIFA TO PASANGARAY

5. O pasangaray hano mamifasaw alatek to pakasoˈlin no falocoˈ ita ci Yihofaan ato likakawa Ningra?

⁵ Nolatekay, malifaay ita ko pasangaray, tinakoen malahdaw ko katayalan anca tahacada to pisafelit no paro no lomaˈ. Onini a pasangaray alatek wa sasamaan mifasaw to pakasoˈlin no falocoˈ ita to likakawa no Kawas, paliyas kitaanan to Kawas hani? Ano halafinayto a tatokian kita i pasangaray a demak, alatek wa matoled ko falocoˈ. Wa sakadademaken ni Satan ko mahaenay a tatokian, pakacisasa kitaanan cowato kaolah ci Yihofa kitaanan. Papiharatengay cingra kitaanan, o pasangaray sahtoay o ci Yihofa anca likakawa ni Yihofa ko pairaay wa saan. Itiniho i Icip ko Israil tamdaw, na iraayto ko mahaenay a demak no roma tamdaw. Salakat, pakasoˈlinay cangra ci Mosian aci Aron to miocoran ni Yihofa milidong cangranan. (Kasadakan 4:29-31) Kawra ikor mitongalan ni Falaw misaareteng ko ˈinorong nangra, hato mirorohay ci Mosian aci Aronan, sanay: ‘Pakaˈintehen namo ci Falaw ato matayalay ningra i tamiyanan, mikidatay kamo to sapipatayaw nangra i tamiyanan.’ (Kasadakan 5:19-21) Mirorohay cangra to sikawdan no Kawas, tada ka adayayanto! Ano hahalafin kiso misiˈayaw to pasangaray, samaan ko demak iso ngaˈ tanektek ko pakasoˈlin ci Yihofaan ato likakawa Ningra hani?

6. Itini pisiˈayaw to pasangaray a demak, mikitini ci Hapakukan mananam ita ko manan? (Hapakuk 3:17-19)

⁶ Ka itini i satolon pasayra ci Yihofaan mifowah to nafalocoˈan, hanaca mitadiˈec to sapadama Ningra. Pairasolay ci Hapakuk tahasiˈayaway to adihayay pasangaray a pakayraan, na cisasaay cingra ci Yihofaan to soˈlinay a ciharateng cingranan hokira. Kawra kamayan cingra itini i satolon pasowal ci Yihofaan to nafalocoˈan no niyah, sanay cingra: ‘Yihofaaw, micangacang kako Tisowanan, tahacowa a tatokian ngaˈ tengilen Iso hani? . . . Hano hayien Iso micada ko tamdaw to saroero?’ (Hapakuk 1:2, 3) Pacaˈofan ni Yihofa ko naifalocoˈay satolon no pairasolay a Hapakuk. (Hapakuk 2:2, 3) Misongilaˈay ci Hapakuk miharateng samaanay ci Yihofa isalakat milidong to finawlan no Niyah, miliyawayto a lipahak, hanaca pakasoˈlinay to ciharatengay ci Yihofa cingranan, o papadama cingranan mihadidi to masakenakenaay a sapalifet. (ˈOsien ko Hapakuk 3:17-19.) Mananamay ita ko manan hani? Ano misiˈayaw to pasangaray i, itini i satolon pasowalen ci Yihofa to nafalocoˈan iso, hanaca tadiˈecen ko sapadama Ningra. Mihaen ko demak iso, ngaˈayto pakasoˈlin to papafelien ni Yihofa kiso to ˈicel, padama tisowanan tahatolas ko pihadidi. Ano matinako iso ko pipadama ni Yihofa, wa matongalto ko pakasoˈlin no falocoˈ.

7. O salawina ni Suli makalimay samaan ko piharateng ningra? Samaanay ko demak ningra, mansa cowa ka fasaw ko pakasoˈlinay falocoˈ?

⁷ Itini midokoay a demak padotocen ko ngaˈayay nanaman. O fafahiyan salikaka ci Suli tahalifa to pasangaray i padotocay mirienang to midokoay a demak, nengnengen mihaen to demak iraay ko manan epoc cingranan.b Itiniay ko lomaˈ ningra i Papua Niw Kini, manikaway ko lalomaˈan nangra, nolatekay awaay ko kakaenen. O cecay salawina mifasaway to pakasoˈlin ningra ci Yihofaan, sanay pasowal cingranan: “Sowal iso o fangcalay saocor no Kawas padamaay tisowanan, hano awaay maˈaraw ako hani? Kamayan manikaw ko lomaˈ namo, malingad kiso mitosil o misaloyaˈay to toki.” Sowal ni Suli: “Misatapangay kako cisasa, soˈlinay ciharateng ko Kawas tamiyanan han? Kawra tangsolay kako pasayra ci Yihofaan mitolon, polong a harateng no niyah pasowalan Cingra. Padadotocay kako micekiw to Fangcalay Cudad ato mitepangan no likakawa a cudad, cowa paselaˈ mitosil ato masaˈopo.” Kalikiay, mahapinangay ningra padadotocay ci Yihofa midimokos to paro no lomaˈ nangra. Cowa ka cahiw cingra ato paro no lomaˈ, hanaca lipahakay ko kaˈorip. Sanay ci Suli: “Soˈlinay ci Yihofa pacaˈof to satolon no mako.” (1 Timoti 6:6-8) Malecaday, ano padadotoc kiso mirienang to midokoay a demak, cowato ko papakayni i masakenakenaay a pasangaray anca sasa no falocoˈ a miliyas ci Yihofaan.

MAˈARAW KO CIˈINORONGAY FAˈINAYAN SALIKAKA TAHACADA TO SAˈODIS

8. O ciˈinorongay faˈinayan salikaka i likakawa ni Yihofa alatek wa tahalifa to maanan hani?

⁸ O ˈada ita wa pakayni i sinpong ato sapicawmaˈ malawidang a wangcan milasil to cowa ko soˈlinay a lihaf, midokaˈ to ciˈinorongay faˈinayan salikaka i likakawa no Kawas. (ˈOlic 31:13) O roma faˈinayan salikaka malepelay ato mapakokot. Saka 1 hahekalan iraay ko malecaday pakayraan, tiya mapaoraf ato malepel ko tarokos ci Pawlo i, samaanay ko harateng no romaroma Krisciyang hani?

9. Mapalit ko tarokos ci Pawlo i, samaanay ko harateng no roma Krisciyang hani?

⁹ Mapalit ko tarokos ci Pawlo itini i Loma i, o romaroma Krisciyang miliyasay cingranan. (2 Timoti 1:8, 15) Misamaanay? Mararaway tamdaw ci Pawlo sanay ko ˈalomanay, pakangodoay cangranan sanay miharateng alatek. (2 Timoti 2:8, 9) Macekiday cangra alatek, matalaw wa tahacada ko niyah to malecaday a sapalak. Soˈlin cowa ka ngaˈay kita misaˈosi o manan ko lalangian, kawra haratengen hakowaay ko kasomad ni Pawlo itiya. Na pakayniay cingra tonini a Krisciyang mihadidi to adihayay a pasangaray, hanaca makahi a kinafalah to ˈorip no niyah, ˈarawhan itini pisaalian ni Pawlo to sapadama a tatokian i mifalahay cangra i cingranan. (Dmak 20:18-21; 2 Korinto 1:8) Aka a malecad kita cangranan. Ano tahacada to sapalak ko ciˈinorongay faˈinayan salikaka i, o haharatengen ita ko maanan hani?

10. O ciˈinorongay faˈinayan salikaka ano tahacada to sapalak i, haharatengen ita ko maanan? Misamaanay?

¹⁰ Haratengen hano micada kita to sapalak, ato o cima ko mihalakaay mipalak kitaanan. Sowal no 2 Timoti 3:12: ‘O polong sapikotodaw ci Kristo Yisan mikangodoay ko kaˈorip a tamdaw i, o tatahacada to sapalak.’ Mihaenay, ano pasayraay i ciˈinorongay faˈinayan salikaka ko patosokan ni Satan i, cowa ko fafahkaˈen kita. Misaka dademakay ci Satan to mahaenay a saˈodis patalaw kitaanan, ho ecato ka madimadi kita ci Yihofaan.—1 Pitiro 5:8.

11. Mikitini taˈarawan ni Onisiforus mananamay ita ko maanan hani? (2 Timoti 1:16-18)

¹¹ Padadotoc midama to salikaka, aka piliyas cangranan. (ˈOsien ko 2 Timoti 1:16-18.) Tiya mapalit ci Pawlo i, iraay ko cecay salikaka caay ka lecad ko harateng, ci Onisiforus cingra. Caay ko malo sakangodo ningra ci Pawlo, caay pisikor to katalawan no ˈorip misaˈicel mikilim ci Pawloan, mahelato ikor mihalakaay padama ci Pawloan. Mananamay ita ko maanan hani? Aka a pakayni kaciˈangi to tamdaw a talalikor anca miliyas to micadaay to sapalak a salikaka. O tatalaˈayaw kita midama cangranan. (Taneng 17:17) Misaaliay cangra to olah ato sapadama ita.

12. Mikitini Rowasiyaay a salikaka mananamay ita ko maanan hani?

¹² Itini pipadama to mapalitay a Krisciyang a demak, o salikaka itini Rowasiya patirengay to ngaˈayay taˈarawan no mita. Ano ira ko tamdaw tayra i hoing micada to sasawkit i, ˈalomanay salikaka tayraay i hoing midama cangranan. Mananamay ita ko maanan hani? O ciˈinorongay faˈinayan a salikaka ano mapakokot no tamdaw, malepel anca micada to sapalak, aka matalaw kita. Patadoen cangra mitolon, midimokos to paro no lomaˈ nangra, padadotoc mikilim to roma pakayraan midama cangranan.—Dmak 12:5; 2 Korinto 1:10, 11.

ANO LOKESEN NO TAMDAW

13. O pilokes no tao alatek o sasamaan mipalak to pakasoˈlinay falocoˈ ita ci Yihofaan ato likakawa Ningra hani?

¹³ Cowa pihakelong a salawina, cafay matayal anca cafay micudad milokesay matawa to mitosilay a tayal ita alatek, anca pakayni pidofdof ita to ˈakawangay palinian no waywayan ni Yihofa matawaay kitaanan alatek. (1 Pitiro 4:4) Saan cangra somowal alatek: “O ngaˈayay tamdaw kiso, kawra pakidemay ko saali no pihakelongan iso, malaliwayto ko pinengneng namo to demak.” O roma tamdaw malikafay to pakayraan ita micada to mafalahay tamdaw alatek, saan ko sowal: “Mihaen ko demak namo, timoloho pasowal to ciolahay ko niyah han?” O mahaenay a sowal papaira to sasa no falocoˈ ita alatek, misatapang miharateng: “O saali ni Yihofa takowanan pakidemay ko ˈakawang han? Pakidemay ko saali no likakawa Ningra han?” Ano misiˈayaw to mahaenay pakayraan, sasamaan ko demak iso ngaˈ eca ka piliyas ci Yihofaan ato likakawa Ningra hani?

14. Midoedo kita to palinian ni Yihofa maˈorip ano malokes no tamdaw, sasamaan kita misiˈayaw hani? (ˈOlic 119:50-52)

¹⁴ Ka pisetek to falocoˈ midofdof to palinian ni Yihofa. Soˈlin lokesen no tamdaw ci Yopu, kamayan midofdof to palinian ni Yihofa. Sanayho ko sowal no makaniway widang cingranan, midofdof anca capidofdof cingra to palinian no Kawas, cowa pisaareteng ko Kawas saan. (Yopu 4:17, 18; 22:3) Kawra cowa pakasoˈlin ci Yopu to mahaenay a mangah. Ihkalay ko kafanaˈ ningra o ngaˈayay tatiihay a palinian ni Yihofa o matatodongay, misetekay to falocoˈ midofdof tonini a palinian. Cowa ka pakayni i sowal no tao a mifalah cingra to madimadi to Kawas. (Yopu 27:5, 6) Mananamay ita ko maanan hani? Aka a pakayni pilokes no tao a cisasa to palinian ni Yihofa. Tikolen miharateng o nalifetan iso, coko misawacayay ko demak, o palinian ni Yihofa sahtoay o matatodongay hanaca pairaay to epoc no miso han? Seteken ko falocoˈ midama to likakawa no Kawas, samanen onini a likakawa midofdofay to palinian ni Yihofa. Mihaenay, soˈlin micada to adihayay pilokes, cowa ko mamiliyas kiso ci Yihofaan.—ˈOsien ko ˈOlic 119:50-52.

15. Hano micada ci Pulicite to pilikaf ato pisafelit hani?

¹⁵ Itiniay i Intiya fafahiyan salikaka ci Pulicite pakayni pihakelongan micadaay to pisafelit ato kalikaf no paro no lomaˈ. Itiniay 1997 miheca micada to paputisem cingra, kawra cowa pihakelong ko faˈinay. Ikor caka halafin micada to paputisem, malahdaway ko katayalan no faˈinay, misaˈosiay ko faˈinay miˈorong cingranan ato tatolo fafahiyan a wawa malinah tayra i roma niyaroˈ mitiˈer to wama wina no niyah. Kawra dotocto i, misiˈayaway ci Pulicite to madadotocay a sapalifet. Samanen awaay ko mahelaay a tayal no faˈinay ningra, mieminay to toki cingra maomah paririˈ to paro no lomaˈ. Roma i, samangataay a kasakopang 350 kongli ko raay. Pakidemay ko pisafelit no paro no lomaˈ no faˈinay to pihakelongan ningra, hato miliyaway cangra malinah. Ikor, fahal sanay mapatay ko faˈinay ningra. Caka halafin, pakayni i ekang mapatayay ko cecay 12 ko mihecaan a fafahiyan wawa ningra. O salawina ni Pulicite mirorohay cingranan tonini a demak. Sanay ko sowal nangra, pakayniay malo Misawacayay Tamdaw ni Yihofa ci Pulicite, mansa mifekad konini a kihcod ka adayayan a demak. Soˈlin mahaen, kamayan mitadiˈec ci Pulicite ci Yihofaan, mikedec a mitiˈer to likakawa Ningra.

16. Madimadiay ci Pulicite ci Yihofaan ato likakawa Ningra, malifokay ko manan sapalemed?

¹⁶ Samanen maraayay ko kasakopang, pakalalokan no kasakilac kantok ci Pulicite itini sa i kilac no niyah mitosil, hanaca i lomaˈ misikay to saˈopo. Satapang aca, pasangaran nanay cingra mihaen to demak, kawra kamayan mihakelong cingra to sakayat. Milasil to ngaˈayay lihaf i tamdaw, itiniay i lomaˈ misikay to saˈopo, milimasmasho to toki malacafay to wawa misikay to pakalomaˈay pidoko. Telocto samaanay hani? ˈAlomanay ko makilimay ni Pulicite a sito no Fangcalay Cudad, ilalomaˈ no sito iraay ko micadaay to paputisem. 2005 miheca, satapangay cingra malo misakafahay. Mitadiˈecay cingra ci Yihofaan, madimadi to likakawa Ningra, soˈlinay milifok to sapalemed ni Yihofa. Itini kilac ningra, tosaayto ko kasakopang nohatini, o wawa ningra madimadiay midoko ci Yihofaan. Pakasoˈlinay ci Pulicite, o ci Yihofa ko pafeliay to ˈicel cingranan, padama cingranan ngaˈay misiˈayaw to pasangar, miemem to pilokes no paro no lomaˈ.

MADIMADI CI YIHOFAAN ATO LIKAKAWA NINGRA

17. Mamisetek kita to falocoˈ samaan ko pidemak hani?

¹⁷ Tahalifa kita to pasangaray i, mioratay ci Satan kitaanan, papiharateng kitaanan cowa pisaareteng ci Yihofa kitaanan, pakayniay pidama to likakawa ni Yihofa mansa matongal ko pasangar no kaˈorip saan miharateng. Iraay ko ˈinorong a faˈinayan a salikaka mapakokot no tamdaw, masafelit anca mapalit i, makalimay ci Satan matalaw ko harateng ita. Ano ira ko malikafay kitaanan a tamdaw i, makalimay ci Satan malahdaw ko pakasoˈlin ita to palinian ni Yihofa ato likakawa Ningra. Ihkalay ko kafanaˈ ita to masakenaay halaka ni Satan, cowa ko mamalipalaw. (2 Korinto 2:11) Mamisetek kita to falocoˈ minaˈay to mangah ni Satan, tahatolas a madimadi ci Yihofaan ato likakawa Ningra. Aka mapawan, cowa ko mamiliyas ci Yihofa kitaanan. (ˈOlic 28:7) Mihaenay, ano samaanto aka a piliyas ci Yihofaan!—Loma 8:35-39.

18. Dotoc a lalakaw mamilengo to manan?

¹⁸ Onini lalakaw milengoay to mikitini papotal no kasakopang tolo a sapalifet, onini a sapalifet o mamifiyor to pakasoˈlin ita ci Yihofaan ato likakawa Ningra. Kawra, o sapalifet mamikitini i lalomaˈ no kasakopang ira alatek. Sasamaan kita ngaˈ malaˈosi ko pisiˈayaw hani? Dotoc a lalakaw mamilengo tonini a salicay.