Micada to Sapalifet ko Madimadi i, ka Padadotoc a Talipaˈelal

1. Padadotoc a talipaˈelal o manan ko tatodong hani? (2 Timoti 4:5)

ITINI pasangaray pakayraan, o madimadi ita ci Yihofaan ato likakawa Ningra mamicada to sapalifet alatek. Sasamaan kita misaysay hani? O papadadotoc kita talipaˈelal, micerid talipaˈelal, tanektek i pihakelongan. (ˈOsien ko 2 Timoti 4:5.) Sakatalipaˈelalaw kita i, o mamitafo to rihaday, ira ko ihkalay a sapisimsim a inaneng, misaˈicel tano pinengneng ni Yihofa minengneng to demak. Mihaen, cowato ko mamapaekel no kaolahan ko sapiharateng a taneng.

2. Onini lalakaw mamilengo to manan hani?

² Itini fafekangay lalakaw malengoayto ita ko mikitiniay papotal no kasakopang tolo a sapalifet. Onini lalakaw mamilengo to roma tolo a sapalifet, onini a sapalifet o mamalifa ita i kasakopang alatek: (1) Madokaˈay no salikaka saan ko harateng, (2) micada to sapirikec, (3) pasangaray micada to kafalic no likakawa saan ko harateng. Ano tahalifa tonini a sapalifet i, sasamaan ko pidemak ita ngaˈ padadotoc talipaˈelal, padadotoc madimadi ci Yihofaan ato likakawa Ningra hani?

MADOKAˈAY NO SALIKAKA SAAN KO HARATENG

3. O demak no cecay salikaka ano midokaˈay kitaanan, wa samaan ko piharateng ita alatek?

³ Na pakayniay kiso midemakan no salikaka tada madokaˈay saan ko harateng han? Ora tamdaw iraay ko ˈinorong i kasakopang faˈinayan salikaka, o mamatongal ko kasomad iso alatek. Ora tamdaw cowa ko padetengay midokaˈ tisowanan alatek, kawra o midemakan ningra kamayan pakasomad tisowanan. (Loma 3:23; Yakop 3:2) Cowato kaala ko fafotiˈen iso to dadaya alatek, haharateng sa tonini a demak. Saan kiso miharateng: “O cecay salikaka hano midemak to mahaenay a demak, soˈlinay o likakawa no Kawas konini han?” Ano mihaen ko harateng iso marefongayto i talakal ni Satan. (2 Korinto 2:11) Ira ko mahaenay masofaway harateng ita, mamisatapang to miliyas ci Yihofaan ato likakawa Ningra alatek. Ano midokaˈay ko cecay salikaka kitaanan saan ko harateng ita, samaan ko pidemak ngaˈ padadotoc talipaˈelal, mifalah to tatiihay a harateng hani?

4. Madokaˈ no kakakaka ci Yosif, hano ngaˈay padadotoc talipaˈelal hani? Mikitini taˈarawan ningra mananam ita ko manan? (Satapangan 50:19-21)

⁴ Aka ˈinteh ko falocoˈ. Moetep ira ko pina ko mihecaan ni Yosif midokaˈan no kakakaka. ˈIntehay cangra ci Yosifan, iraay ko papina a kaka sapipatayaw cingranan. (Satapangan 37:4, 18-22) Ikor, pacakayan nangra ci Yosif malo koli. Telocto, malifaay ningra ko madadotocay pakidemay sapalifet i lalomaˈ no 13 miheca. Itini mahaenay pakayraan, na mamadolo ci Yosif misatapang cisasa to soˈlinay maolah ci Yihofa cingranan hokira, anca itini pisaalian ningra a tatokian mifalahan ni Yihofa cingra saan miharateng. Kawra cowa ka ˈinteh ko falocoˈ ni Yosif, rihadayay cingra, padotocay talipaˈelal. Ikor iraay ko toki ningra miˈodis to kakakaka, kawra cowa pihaen ko demak, ao tano ciolahay falocoˈ micada cangranan, misododay cangranan. (Satapangan 45:4, 5) Ngaˈay ci Yosif mihaen to demak samanen ihkalay ko sapisimsim ningra a inaneng. Cowa ka haharateng saan to pasangaray no niyah, o kalimlaan ko minengnengan ningra, o araaw ni Yihofa. (ˈOsien ko Satapangan 50:19-21.) Mananamay ita ko maanan hani? Ano ira ko salikaka midokaˈay tisowanan, aka ˈinteh ci Yihofaan, aka piharateng to mifalahanto Ningra kiso. Songilaˈen miharateng samanay ci Yihofa padotoc a padama tisowanan mihadidi to sapalifet, pairaenho ko olah misodod to tao.—1 Pitiro 4:8.

5. Harateng ni Mikayase madokaˈay ko niyah sanay, kawra samaanay ko pidemak ningra, mansa ngaˈay padadotoc talipaˈelal?

⁵ Nengnengen ko aniniay lintad a tinakoan. Ci Mikayaseb itiniay Katimol a Amilika ko kitiraan, o malohemay malitengay. Harateng ningra iraay ko papina malohemay malitengay na tangongolay ko pidokaˈ cingranan, sanay cingra: “Na caayho ka tahalifa kako to mahaenay a demak, tada taˈangayay ko saroero saan miharateng. Matalaway kako, caay ka ala ko fotiˈ to dadaya. Tomangicayho kako, samanen awaay ko padamaay takowanan saan miharateng.” Kawra, padotocay talipaˈelal ci Mikayase, misaˈicel miˈimer to masofaway harateng no niyah. Miceriday cingra mitolon ci Yihofaan pafeli to fangcalay saocor cingranan, padama cingranan padotoc mihadidi. Mikitiniayho cingra i mitepangan no likakawa a cudad mikilim to padamaay cingranan a lalakaw. Mananamay ita ko maanan hani? Ano madokaˈay no salikaka ko niyah saan kiso miharateng, ka padadotoc rihaday, misaˈicel miˈimer to masofaway harateng. O maanan ko mikidatay to midokaˈay tisowanan a tamdaw midemak to mahaenay a demak, anca mihadak to mahaenay a sowal, cowa ka cipinang kiso alatek. Mihaenay, tolonen ci Yihofa, micangacang Cingranan padama tisowanan tano pinengneng nora tamdaw a minengneng tonini a demak. Ano mihaen, o mamadoloto pakasoˈlin kiso cowa ko padetengay kora tamdaw midokaˈ tisowanan, o mamadoloto misodod to tao. (Taneng 19:11) Haratengen, cipinangay ci Yihofa to pakayraan iso, o papafeli to ˈicel tisowanan, ho ngaˈay tawlik ko pisiˈayaw iso to mahaenay pakayraan.—2 Rayray 16:9; Patnakay 5:8.

MICADA TO SAPIRIKEC

6. Pakayniay ci Yihofa i kaolah kitaanan mansa mirikec kitaanan, cipinang tonini hano masakalimlaan hani? (Hipray 12:5, 6, 11)

⁶ Micada to sapirikec pasemsemay kitaanan alatek, kawra ano o kasomadan aca no niyah ko miharatengan ita, o mamisakahmaw minengneng to sapirikec, cowa ka sadafdaf wa saan miharateng, anca pakidemay ko pakayraan nonini pirikec saan miharateng. Telocto, wa misakahmaw to cecay kalimlaan a demak, onini i pakayniay ci Yihofa i kaolah kitaanan mansa mirikec kitaanan. (ˈOsien ko Hipray 12:5, 6, 11.) Ano mafiyor no nafalocoˈan kita, o pafeliay to toki ci Satanan miˈodis kitaanan. Makalimay cingra manaˈay kita to sapirikec, mangalef misatapang miliyas ci Yihofaan ato kasakopang. Ano micada kiso to sapirikec, sasamaan ngaˈ padadotoc talipaˈelal hani?

7. (1) Nengnengen ko coka, micada ci Pitiro to sapirikec ikor, samaanay micada to sapaˈinorong ni Yihofa? (2) Mikitini taˈarawan ni Pitiro mananamay iso ko maanan?

⁷ Micada to sapirikec, hanaca midemak to kalimlaan a kafalic. Ci Yis cowa ka kinacecay aca itini ˈaˈayaw no romaroma tarokos misalof ci Pitiroan, maedeng pakangodoay ci Pitiroan konini. (Marko 8:33; Luka 22:31-34) Kawra, padotocay ci Pitiro madimadi ci Yisan. Micadaan ningra ko sapirikec, mikitini kararawan minanam to sapasifanaˈ. Mihaenay palifonan ni Yihofa cingra, patorod to karetengay ˈinorong cingranan. (Yohani 21:15-17; Dmak 10:24-33; 1 Pitiro 1:1) Mikitini taˈarawan ni Pitiro mananam ita ko maanan hani? Ikor no micada to sapirikec i, eca ka pakidem ko piharateng ita to papisingan no niyah, ao micada to sasalof, hanaca midemak to kalimlaan a kafalic, o ngangaˈay paira to epoc no niyah ato tao. Ano mihaen, maedeng o mamacakat kita, matongal ko pidemak ci Yihofaan ato salikaka.

8-9. Ikor no micada ci Pienato to sapirikec, satapang aca samaanay ko harateng? Kawra samaanay cingra misalof to harateng no niyah?

⁸ Nengnengen ko nalifetan ni Pienato. Itiniay cingra i Mosanpike, na malahdaway ko ˈinorong no malohemay malitengay. Satapang aca samanay ko harateng ningra hani? Sanay cingra: “Caay ka olah kako toniya saˈosi, maketeray ko harateng.” Tada calemcemay ci Pienato to samanay ko pinengneng no salikaka i kasakopang cingranan. Mihayiay cingra: “Pinaay folad kako misaˈicel ngaˈ mafalicay, tano matatodongay a pinengneng ko pinengneng to demak, miliyaw mitadiˈec ci Yihofaan ato likakawa Ningra.” Samanay ko pidemak ningra hani?

⁹ Misalofan ni Pienato ko harateng no niyah. Sanay cingra: “Malo malohemay malitengay kako i saˈayaw i, tano Hipray 12:7 padama to tao matatodong ko pinengneng to sapirikec ni Yihofa. Orato milicayan ako ko niyah, o cima ko mamihakelong tonini a sapalimoˈot no sinael hani? O polong midokoay ci Yihofaan a tamdaw, mahawpay kako i lalomaˈ.” Midemakayho ci Pienato to roma demak miliyaw patireng to pakasoˈlin ci Yihofaan ato likakawa Ningra. Matongalay ko kalalok ningra micekiw to Fangcalay Cudad, hanaca micalep misimsim to maasipay a lalakaw. Soˈlin kamayan calemcem cingra samaan ko pinengneng no salikaka cingranan, kawra kamayan malacafay cingra cangranan a mitosil, hanaca itini saˈopo tawlik pacaˈof to salicay. Ikor, miliyaway manilnil ci Pienato malo malohemay malitengay. Ano malecaday kiso ci Pienatoan micada to sapirikec, aka pakidem miharateng to papisingan no niyah, ao mamicada to sapirikec a mafalic.c (Taneng 8:33; 22:4) Mihaen o papakasoˈlinto kiso, ci Yihofa wa pakayni i ka madimadi iso Cingranan ato likakawa Ningra a palifon tisowanan.

PASANGARAY MICADA TO KAFALIC NO LIKAKAWA SAAN KO HARATENG

10. O maanan a kafalic palifetay to madimadi no romaroma Israil tamdaw alatek?

¹⁰ O pisalof no likakawa palifetay to madimadi ita alatek. Ano eca pinaˈon kita, o mamiliyas ci Yihofaan alatek. Nengnengen ikor no milasil to Rikec ni Mosi o cecay kafalic samanay mifiyor to romaroma Israil tamdaw. ˈAyaw no milasil to Rikec, o tawki no lomaˈ midemakay to tayal no saysi, tinakoen patireng to patoˈayaan a cadada ato patado to paro no lomaˈ patafang to sapatoˈaya ci Yihofaan. (Satapangan 8:20, 21; 12:7; 26:25; 35:1, 6, 7; Yopu 1:5) Kawra ikor no lasilen ko Rikec, awaayto ko fadangalan no tawki no lomaˈ mihaen to demak. Minilnilan ni Yihofa ko finacadan ni Aron malo saysi, ciˈinorong patafang to sapatoˈaya. Mikitiya, o tawki no lomaˈ ano cowa ko finacadan ni Aron, cowato ka ngaˈay midemak to tayal no saysi, ano eca i, o papatayen.d (Lifi 17:3-6, 8, 9) Ci Kora, Tatan, Apiram ato 250 ˈaˈideman cowa ka olah tonini a kafalic hokira? O cecay lalangian konini mikayatay cangranan cisasa ci Mosian aci Aronan han? (Saˈosi 16:1-3) Awaay ko pinang ita. Kawra, ci Kora ato kapot ningra soˈlinay cowa ka madimadi ci Yihofaan. O madimadi iso ano pakayniay kafalic no likakawa micada to sapalifet, sasamaan ko pidemak iso hani?

11. Mikitini taˈarawan no Kohat tamdaw mananam ita ko manan?

¹¹ Misarocod midama to kafalic no likakawa. Ano malinah ko Israil tamdaw i kohkoh i, o Kohat tamdaw ciˈinorongay to cecay mikiriwiˈay a tayal. Ano mamalinah ko Israil tamdaw i, papina Kohat tamdaw citodongay mililid to katatelekan a lipa, hanaca itiniay kaˈayaw no polong a finawlan romakat. (Saˈosi 3:29, 31; 10:33; Yosuwa 3:2-4) Tada kalikoanto konini! Kawra, itinito i Mikiˈokan no Kawas a Pala mikilomaˈ ko Israil tamdaw i, mafalicayto ko pakayraan. Cowato ko mamararid milinah cangra to katatelekan a lipa. Mihaenay, tahira pikowanan ni Solomon a tatokian, o romaroma Kohat tamdaw manilnilay malo romadiway, o romaroma mihimaway to fawahan, iraayho ko papina mihimaway to palofoan. (1 Rayray 6:31-33; 26:1, 24) Cowa ka somowal ko Fangcalay Cudad o Kohat tamdaw na iraay ko mikiriwiˈay a ˈinorong a ngaliwngiw, anca misaali to mikiriwiˈay a saaroˈan. Mananamay ita ko maanan hani? Soˈlin o katayalan ita mafiyoray pakayni kafalic no likakawa no Kawas, o mamadimadi kita a midama to faelohay limasmas. Ano o mananto a tayal ko macadaay iso, o mamikitini a mikilim to sakalipahak. Haratengen, o epoc iso cowa ko saaroˈan matayal. Palinien to ˈinorong iso, o misaaretengan ni Yihofa i midofdofay kiso hokira.—1 Samuil 15:22.

12. Paliyasen ci Caina i Pitil i, samaanay ko nafalocoˈan ningra?

¹² Nengnengen ko nalifetan no itiniay i Taliyok no Israil fafahiyan salikaka ci Caina. Maolahay cingra to tayal i Pitil, kawra mataˈlif ko 23 miheca matayal i Pitil ikor i, mifalican no likakawa ko katayalan ningra, miocor cingranan tayra i kilac matayal. Sanay cingra: “Onini a kafalic tada macekiday kako. Awaay ko kapo no niyah saan miharateng, lalicay sanayto niyah o manan ko mararaway ako a demak.” Pakasomaday cingranan i, pasowalay ko salikaka i kasakopang cingranan: “Ano ngaˈayay ko demak iso, cowa ko papaliyasen no likakawa kiso i Pitil.” Cecay liyad a tatokian, matoleday ci Caina, tomangicay to dadayadaya, kawra sanay cingra: “Misetekay kako to falocoˈ midama to likakawa no Kawas, eca ka cisasa to olah ni Yihofa takowanan.” Hano ngaˈay ci Caina padadotoc talipaˈelal hani?

13. Sapiremoaw to masofaway harateng, midemakay ci Caina to manan?

¹³ Samaanay ci Caina miremo to masofaway harateng hani? Micekiway cingra to mitepangan no likakawa a pina lalakaw, oniya lalakaw milingatay to masiˈayaway ningra a pasangaray. Mikecolay 2001 miheca 2 folad 1 romiˈad “Wa Ngaˈay Kiso Miremo to Matoleday Falocoˈ!” Oniya lalakaw taˈangayay ko sapadama cingranan. Masowalay no lalakaw, mitiliday to Fangcalay Cudad ci Marko na tahalifaay to kafalic no katayalan, maedeng milooday cingra to masofaway harateng no niyah. Sanay ci Caina: “O ngaˈayay taˈarawan ni Marko malecaday o sapaiyo, padama takowanan ecato katoled.” Roma i, cowa pisiwatid ci Caina to niyah, cowa ka haharateng sa to kasiniˈadaan ko niyah, ao miceriday malacafay to salikaka. Mahapinangay ni Caina, o likakawa ni Yihofa itiniay sakayat no fangcalay saocor a misaˈosi, hanaca o ciˈinorongay a faˈinayan salikaka tada ciharatengay cingranan. Cipinangayho ci Caina, sapilahciaw to tayal ni Yihofa, o likakawa ni Yihofa o mamidemak to matatodongay a limasmas.

14. Pasangaray ci Folato micada to manan a kafalic? Samanay cingra misalof to harateng no niyah?

¹⁴ 73 ko mihecaan ci Folato o malohemay malitengay, itiniay i Selowiniya ko kitiraan. O kasakopang ningra makakadepay to roma kasakopang, oya telang a Hongti Kitakit Kasaˈopoan maˈedefayto. Pasangaray cingra micada tonini a kafalic, sanay cingra: “Caay ka cipinang kako, makapahay a Kasaˈopoan hano ˈedefen. Tada masomaday kako, samanen Kasaˈopoan niyam caho ka halafin na mitomadawanto, o misasayhoay kako, o pina dafong no Kasaˈopoan kako ko misangaˈay. Roma i, liyawen mikapot ko kasakopang macapiday ko adihayay kafalic, pakaynien i tamiyanan matoˈasay a tamdaw, cowa ko madoloay.” Samaanay ci Folato misalof to harateng no niyah, midama to saˈosi no likakawa hani? Sanay cingra: “Misaˈicel palecad to kafalic no likakawa ni Yihofa pairaay to sapalemed. Oniya pisalof padamaay tamiyanan talaˈayaw a misaday to taˈangayay a kafalic no ikor.” O kasakopang iso na mikadepan han? O katayalan iso mafalicay han? Pasangaray kiso micada han? Aka calemcem, ci Yihofa masongilaˈay ko kacipinang to nafalocoˈan iso. Ano misarocod kiso micada to kafalic, madimadi ci Yihofaan ato likakawa Ningra, o mamilifok to sapalemed ni Yihofa.—ˈOlic 18:25.

I POLONG A DEMAK KATALIPAˈELAL

15. Tahalifa kita to sapalifet i kasakopang i, sasamaan padadotoc talipaˈelal?

¹⁵ Mangata mangataayto ko salikoray romiˈad, itini kita i kasakopang tahalifaay to pina pasangaray a demak, palifetay konini to ka madimadi ita ci Yihofaan. Mihaenay, o papadadotoc kita talipaˈelal. Ano midokaˈay ko salikaka tisowanan saan ko harateng iso, aka ˈinteh ko falocoˈ. Ano micada kiso to sapirikec, aka pakidem ciharateng to papisingan no niyah, ao mamicada to sapalimoˈot, midemak to kafalic. O pisalof no likakawa ni Yihofa ano mifiyoray tisowanan, ka mikitini falocoˈ micada ato midofdof to sakayat.

16. Samaan ko pidemak iso, wa ngaˈay padotoc mitadiˈec ci Yihofaan ato likakawa Ningra?

¹⁶ O mamalaˈosi kiso misiˈayaw to sapalifet, padadotoc mitadiˈec ci Yihofaan ato likakawa Ningra. Kawra sapidemakaw tonini, kalimlaan ko padadotoc iso a talipaˈelal, sakoniya sowal mamitafo to rihadayay, ira ko ihkalay sapisimsim a inaneng, hanaca tano pinengneng ni Yihofa ko pinengneng to demak. Songilaˈen micekiw ko Fangcalay Cudad, nengnengen samaanay ko madimadiay sikawdan no Kawas malaˈosi misiˈayaw to malecaday pasangaray, misongilaˈho miharateng sasamaan pasayra cangranan minanam. Ka pasayra ci Yihofaan mitolon, micangacang to sapadama Ningra, aka a piliyas to kasakopang. Mihaen, ano o mananto a demakan ko mifekaday, caay ko ngangaˈay ci Satan paliyas tisowanan ci Yihofaan ato likakawa Ningra.—Yakop 4:7.