Mafanaˈay Kiso Han?

Itini i likisi soˈlinay ira ko ci Mortikay hananay a tamdaw han?

ITINI Istir cudad iraay ko cecay kalimlaan a tamdaw, ci Mortikay cingra, o Yutaya tamdaw. Soˈlin o maholiway cingra, kawra itiniay i lomaˈ no hongti no Pirsiya matayal cingra. Maˈorip cingra itini satapang no ˈAyaw no Kongyen saka 5 hahekalan, oya ‘pikowan ni Kirkis a tatokian.’ (Anini, oniya hongti ci Suesis sanay ko harateng no ˈalomanay tamdaw.) Na patalahkalay ci Mortikay to sapipatayaw to hongti a halaka, mansa milifokay to sapakahemek no hongti. Ikor no mapatay koya ˈintehay ci Mortikayan ato Yutaya tamdaw a Haman i, manilnilay no hongti ci Mortikay malo ˈaˈideman. Malo ˈaˈideman, ngaˈayay ci Mortikay milasil to rikec, milidong to ilalomaˈay no Pirsiya a Yutaya tamdaw miliyas to katalawan, hoeca ka malaˈafo ko finacadan.—Istir 1:1; 2:5, 21-23; 8:1, 2; 9:16.

Itini saka 20 hahekalan, sowal no roma mikingkiway to likisi, o tawcikel ko maˈoningay no Istir cudad, itini likisi awaay ko ci Mortikay hananay a tamdaw sanay. Kawra, mahapinangay no mikingkiway to nolitengan a tamdaw itini 1941 miheca, wa ngaˈay midama to pakayniay ci Mortikayan maˈoningay i Fangcalay Cudad. Mahapinangay no mikingkiway to nolitengan a tamdaw ko manan hani?

Mahapinangay no mikingkiway ko cecay Pirsiya tilid a cudad masowalay ko cecay ci Martoka hananay a tamdaw (oniya “Martoka” ato “Mortikay” o malecaday a sowal). Itini Susa a niyaroˈ matayal cingra, o kayki alatek. Mahela konini a cudad i, mikingkiway to likisi no kawali a kitiraan ci Atue Annate sanay ko sowal, o sakinacecay a mahadak i potalay no Fangcalay Cudad a cudad konini a ‘Mortikay’ sanay a ngangan.

Mihadak ci Annate toniya caˈof ikor i, o masacaˈolay masaemangay no Pirsiya a tilid mahongyakayto, ilalomaˈ mahawpay ko mahadakay i Pirsiyapolis tano ditaˈan a sapad. Oniya ditaˈ a sapad itiniay i ngata no lowil cecay mala horacayto a soko mahela, oniya mihecaan maedeng itiniay i pikowan ni Suesis a tatokian. O matiliday i fafekang no ditaˈ a sapad tano Aylan a sowal tiliden, i fafekang iraay ko masowalay no Istir cudad a roma ngangan no tamdaw.a

Itini Pirsiyapolis a roma ditaˈ a sapad masowalay ko cecay a ngangan ci Martoka a tamdaw, sowal cingranan itiniay i pikowan ni Suesis a tatokian, itini i lomaˈ no hongti i Susa mitatiliday ko tayal. Iraayho ko cecay ditaˈ a sapad somowalay to o mihongyakay ci Martoka, onini a demak matatodongay to misowalan no Fangcalay Cudad pakayni ci Mortikayan. Itiniay i lomaˈ no Hongti ci Kirkis mala tapang ci Mortikay, maedeng tosaay sasowalen ko kafanaˈan. Itiniay cingra i fawahang no lomaˈ no hongti i Susa a matayal. (Istir 2:19, 21; 3:3) O fawahang no lomaˈ no hongti tada taˈangayay ˈakawangay, o katayalan no tapang a kitiraan.

O masowalay i ditaˈ a sapad a Martoka ato ilalomaˈay no Fangcalay Cudad a Mortikay iraay ko kalecadan. Malecaday ko kaˈoripan nangra a tatokian, kalecadan a kitiraan, malecaday ko kitiraan a matayal. Onini a demak paihkalay, mahapinangay no mikingkiway to nolitengan ci ‘Martoka’ oniya tamdaw o masowalay i Istir cudad a Mortikayan.