Pacakat to Kangaˈay no Satolon

1. Pakalalokay ci Yihofa to midokoay Cingranan a tamdaw samaan ko pidemak? (Nengnengen ko coka.)

PAPASAYRA kita cimaanan micangacang to sahinom ato sakayat hani? Mafanaˈay kita to caˈof no salicay, pasayra i Kawas ci Yihofaan. Wa ngaˈay kita pakayni satolon micangacang to sadama Ningra, ano Cingrato pakalalokay kitaanan mihaen to demak. Makalimay Cingra ‘padadotoc mitolon’ kita. (1 Tisalonika 5:17) Ano hacowato a tatokian ngangaˈay kita mitolon to Kawas, hanaca itini kahirahira no kaˈorip micangacang to sakayat Ningra. (Taneng 3:5, 6) Caay ka ˈidi ci Yihofa, cowa pisaˈosi Cingra to kakinapina kita a mitolon.

2. Onini a lalakaw mamilengo to maanan?

² O satolon hananay i, o sapafeli ni Yihofa kitaanan a masakalimlaan a sapakaolah, misaaretengay kita a minengneng. Kawrira, adihayay ko dademaken no mita, pasangaray a mahela ko toki mitolon alatek. Roma i, mahapinangay ita kangaˈay no satolon no niyah iraayho ko papacakaten. Itini toniya tosa a pakayraan, nengnengen ita ko Fangcalay Cudad mamalifok ko adihayay sapakalalok ato sakayat. Onini a lalakaw mamilengo, sasamaan kita mitodong ci Yisan milimasmas to toki a mitolon, mamilengoho ngaˈay kita itini i satolon mihadak to maanan lima a pakayraan, pacakat to kangaˈay no pitolon.

PADETENGAY CI YIS MILIMASMAS TO TOKI MITOLON

3. Pakayni mitolonay, mafanaˈay ci Yis to maanan?

³ Mafanaˈay ci Yis misaaretengay ci Yihofa to satolon no sikawdan Ningra. ˈAyaw no tayni i hekal ci Yis i, maˈaraway ni Yis ko pipacaˈof ni Yihofa to satolon no ˈalomanay madimadiay sikawdan. Tinakoen, ci Hana, Tafiti aci Iliya na mikifalocoˈay a micangacang ci Yihofaan, tiya pacaˈofen ni Yihofa cangra i, itatihiay Ningra ci Yis. (1 Samuil 1:10, 11, 20; 1 Hongti 19:4-6; ˈOlic 32:5) Mihaenay, ikor no tayni i fafekang no sera ci Yis i, pasifanaˈay to nisawawaan pairaen ko pakasoˈlin micerid a mitolon.—Matay 7:7-11.

4. Itini mitolonay a pakayraan, mikitini ci Yisan mamananam ita ko maanan?

⁴ Itini mitolonay a pakayraan, miterekay ci Yis to ngaˈayay taˈarawan no nisawawaan. Itini pidemak to mitosilay a tayal i, marariday ci Yis a mitolon. Adihayay ko dademaken ningra, marariday ˈaloman ko tamdaw mitoor cingranan, mansa papadeteng ci Yis milimasmas to toki a mitolon. (Marko 6:31, 45, 46) Paceremay cingra a lomowad, mihaen ngaˈ ira ko toki ningra misateked a mitolon. (Marko 1:35) Kinacecayay, sapidemakaw cingra to kalimlaan a sasaˈosien misalafiiay a mitolon. (Luka 6:12, 13) Roma i, sapilahciaw to sapasangaray a ˈinorong i fafekang no sera i, ˈayaw no mamikinafalah to ˈorip a dadaya kinapinapinaay ci Yis pasayra ci Yihofaan a mitolon.—Matay 26:39, 42, 44.

5. Patirengay ci Yis to ngaˈayay taˈarawan i mitolonay a demak, sasamaan kita pasayra cingranan minanam hani?

⁵ Mikitini taˈarawan ni Yis mananamay ita, ano hakowato ko ˈifowa no demak, o mamilimasmas kita to toki mitolon. Tinakoen, ngaˈay kita malecad ci Yisan pacerem a lomowad anca maosoy a mafotiˈ, dotoc sakadademaken konini a toki mitolon ci Yihofaan, mihaen ko demak o paihkalay kita to miakoˈiday ci Yihofaan pafeli to hatoki ita mitolon. Maharatengayho no fafahiyan salikaka ci Linnay, tiya mananam no niyah ko milingatay to mitolonay a kimad i, tada matemeray ko falocoˈ, sanay ko sowal ningra: “Mananam ako, ano hacowato tatokian ngaˈayay tolonen ci Yihofa, misatapangay palo sangaˈayay a Widang ko pinengneng ci Yihofaan, makalimay misalof to kangaˈay no satolon no niyah.” Lalomaˈ ita ˈalomanay tamdaw maedeng iraay ko malecaday harateng. Dotoc, mamilengo kita itini satolon hahadaken ko maanan lima a demak.

ITINI SATOLON NGAˈAYAY HADAKEN A LIMA DEMAK

6. Mikitini Paˈarawan 4:10, 11, citatodongay ci Yihofa milifok to maanan?

⁶ Pakahemek ci Yihofaan. Itini cecay kasapaan a mapolosi, maˈaraway no tarokos ci Yohani ko 24 a malohemay malitengay itini kakarayan midokoay ci Yihofaan. Pakahemekay cangra ci Yihofaan, somowal to citatodongay Cingra milifok to ‘ˈdil, pikangodo, ˈicel.’ (ˈOsien ko Paˈarawan 4:10, 11.) O madimadiay a coyoh pakahemekay ci Yihofaan. Adihayay ko lalangian nangra mihaen to demak, samanen malacafayay cangra ci Yihofaan itini kakarayan, cipinangay Cingranan, hanaca mikitini midemakan ni Yihofa mahapinang adihayay ko masakenakenaay makapahay capeling Ningra. Maˈaraw nangra ko nano demak ni Yihofa, mikifalocoˈayto pakahemek Cingranan.—Yopu 38:4-7.

7. Ngaˈayay kita pakayni i maanan a demak pakahemek ci Yihofaan?

⁷ Ciharatengay kita itini i satolon pakahemek ci Yihofaan, pasowal Cingranan hano maolah kita Cingranan, masemer Cingranan. Micekiw to Fangcalay Cudad i, ngaˈayay songilaˈen a miharateng, o maanan a capeling ni Yihofa ko mikiriwiˈay a misolot tisowanan. (Yopu 37:23; Loma 11:33) Ikor pasowalen ci Yihofa, onini a capeling samaanay mitemer to falocoˈ iso. Roma i, padadotocay ci Yihofa midimokos ato midipot kitaanan. Cowa ko pipadama aca Ningra tisowanan, mipadamaayho to romaroma salikaka, mansa ngaˈayay kiso pakayni tonini a demak pakahemek Cingranan.—1 Samuil 1:27; 2:1, 2.

8. Iraay ko maanan a lalangian ita miakoˈid ci Yihofaan? (1 Tisalonika 5:18)

⁸ Miakoˈid ci Yihofaan. Adihayay ko lalangian ita, itini satolon mihaen to demak. (ˈOsien ko 1 Tisalonika 5:18.) O kihcod malifokay ita a makapahay a demak sahtoay o sapafeli Ningra kitaanan, ngangaˈay kita pakayni tonini a miakoˈid Cingranan. (Yakop 1:17) Tinakoen, akoˈiden ita Cingra misangaˈ to makapahay a cikiw ato kasapaan a maamaan, akoˈidenho Cingra pafeli to ˈorip ita, paro no lomaˈ, widang ato kalimlaan a hatokel. Roma i, tada miakoˈiday kita ci Yihofaan ira ko tatodong ita malo widang Ningra.

9. Hano papalahad kita to miakoˈiday a falocoˈ ci Yihofaan hani?

⁹ Mamikiriwiˈ kita mihadak to ˈicel alatek, miharateng iraay ko maanan a lalangian no niyah miakoˈid ci Yihofaan. Anini, ˈalomanay tamdaw awaay ko miakoˈiday a falocoˈ, tocerid o misaalian aca no niyah ko kaciharatengan nangra, cowa ka pakayni i iraayto no niyah paihkal to miakoˈiday. Ano mafiyor no mahaenay a waywayan kita, alatek sasaali wasa mitolon ci Yihofaan. Sapicongedaw to mahaenay a demak mifekad, papadadotoc kita palahad ato paihkal to miakoˈiday a falocoˈ ci Yihofaan.—Luka 6:45.

10. O miakoˈiday a falocoˈ samaanay padama to cecay fafahiyan salikaka mihadidi to pasangaray? (Nengnengen ko coka.)

¹⁰ O miakoˈiday a falocoˈ papadama kitaanan mihadidi to pasangaray. Nengnengen ko Mikecolay 2015 miheca saka 1 folad 15 romiˈad, nalifetan no fafahiyan salikaka ci Yicingso. Makinsaay to ciekangay ko falaˈ ningra, sanay cingra: “Onini adada taˈangayay ko pisetiˈ takowanan, awaayto ko kihcod sanay kako a matalaw.” Samaanay cingra misiˈayaw toniya sapalifet hani? ˈAyaw no mafotiˈ to dadayadaya, tayraay cingra i fadahong no lomaˈ mihadak to ngihaˈ mitolon, somowal toya romiˈad iraay ko maanan lima a demak to aakoˈiden ci Yihofa. Padamaay konini cingranan milifok to rihaday no falocoˈ, padamaayho cingranan makalim paihkal to olah ci Yihofaan. Matinakoay ningra samaanay ci Yihofa padama to tahapadesay a madimadiay sikawdan, mahapinangayho o malifokay ita a sapalemed mataˈlifay ko malifaay a sapalifet. Malecad to salikaka ci Yicingsoan, soˈlin tahalifa to sapalifet, adihayayho ko lalangian ita miakoˈid ci Yihofaan. Aka mapawan, itini satolon paihkal to piakoˈid ci Yihofaan, papadama kitaanan mihadidi to sapalifet, padadotoc a rihaday.

11. Patikol ci Yis tayra i kakarayan ikor, hano misaaliay to timolo ko nisawawaan ningra hani?

¹¹ Cangacangen ci Yihofa pafeli kitaanan to timolo a mitosil. ˈAyaw no patikol tayra i kakarayan i, palimoˈotan ni Yis ko nisawawaan ningra ‘itini i Yirusalim, Yutiya, Samariya, tahira i samaraayay a pala’ misawacay cingranan. (Dmak 1:8; Luka 24:46-48) Caka halafin ikor, o ˈaˈideman no pihakelongan no Yutaya mirepetay to tarokos ci Pitiroan aci Yohanian, patayra cangranan i Lomaocay, halo patalaw cangranan, mikeceng cangranan a mitosil. (Dmak 4:18, 21) Samaanay ko harateng ni Pitiro aci Yohani hani?

12. Mikitini Dmak 4:29, 31, midemakay ko nisawawaan to maanan?

¹² Misiˈayaw to pipatalaw no ˈaˈideman no pihakelongan no Yutaya, ci Pitiro aci Yohani sanay pacaˈof: ‘Midofdof tamowanan eca ka pidofdof to Kawas, o matatodongay i pinengneng no Kawas hokira, o kamo ko mamisaˈosi! O manengnengay matengilay niyam a demak, cowa ka ngaˈay mihawad a pasowal.’ (Dmak 4:19, 20) Matedal ci Pitiro aci Yohani ikor, makelecay malacecay ko falocoˈ no nisawawaan mitolon to Kawas, micangacang to Kawas padama cangranan mitoor to araaw Ningra a midemak. Sanay cangra: ‘Nanay, pafelien ko koli to timolo, ho ngaˈay kami padotoc a milasil to sowal Iso.’ Pacaˈofan ni Yihofa konini a mikifalocoˈay a satolon.—ˈOsien ko Dmak 4:29, 31.

13. Mikitini taˈarawan no salikaka ci Cawcenhe mananam ita ko maanan?

¹³ Ano mikeceng ko sifo kitaanan a mitosil, ngaˈayay todongen ita ko taˈarawan no saka 1 hahekalan a nisawawaan kiemel mitosil. Nengnengen ko tinakoan no faˈinayan salikaka ci Cawcenhe. Pakayniay i eca pirienang to sofitay a mapalit, itini kapalitan, maocoray cingra mipawsa to kakaenen ato romaroma dafong i micidekan a mipalit a tamdaw, kawra mikecengay ko kapalitan cowa ka ngaˈay cingra milengo to Fangcalay Cudad, ato cowa pilingat to tayal a demak. Oranto i, mitolonay cingra ci Yihofaan pafeli to taneng ato timolo cingranan, ho ngaˈay cingra misaka dademak to kahacecay a toki malalengo to soˈlinay kimad i tamdaw. (Dmak 5:29) Sowal ningra: “Pacaˈofan ni Yihofa ko satolon ako, pafeli takowanan to taneng ato timolo, oranto itini pina fawahang no kapalitan misatapangay kako to 5 efon a pacekiway. To dadaya mitiliday kako to tikami sapafeli to mapalitay, saka 2 romiˈad ngaˈayayto pafeli cangranan.” Ngangaˈay kita pakasoˈlin papadama ci Yihofa kitaanan milahci to mitosilay tayal. Malecad to salikaka ci Cawcenhean, ngangaˈay kita mitolon micangacang ci Yihofaan pafeli to taneng ato timolo kitaanan.

14. O maanan ko papadama kitaanan misiˈayaw to pasangaray? (ˈOlic 37:3, 5)

¹⁴ Cangacangen ci Yihofa padama kitaanan misiˈayaw to pasangaray. Kita ˈalomanay tamdaw misiˈayaway to hakokay, adada, nafalocoˈan a pasangaray, mapatay ko salawina, ato pasangaray no paro no lomaˈ masakenakenaay a sapalifet, o lifong ato malalooday a pades mitongalay to pasangar no mita. Mihaenay, o nafalocoˈan iso ato masiˈayaway a pasangaray eminen pasowal ci Yihofa, malecad ono kasasowal to ngaˈayay a widang. Aka calemcem, o papadamaen ni Yihofa kiso.—ˈOsien ko ˈOlic 37:3, 5.

15. Mitolon sasamaan padama kitaanan padadotoc mihadidi itini kapadesan? Hadaken ko tinakoan.

¹⁵ Kiemel a mitolon papadama kitaanan padadotoc mihadidi i kapadesan. (Loma 12:12) Mafanaˈay ci Yihofa to malifaay no finawlan Ningra ko maanan, o picangacang nangra to salidong, matengilay Ningra maemin. (ˈOlic 145:18, 19) 29 ko mihecaan a misakafahay fafahiyan salikaka ci Kristi soˈlinay a tahatinako tonini. Fahal sanay ira ko pakidemay adada no tireng ningra, telocto tada matoleday ko falocoˈ ningra. Ikor, mafanaˈay cingra to pakidemay ko adada no wina ningra. Sanay ci Kristi: “Pasayraay kako ci Yihofaan mikifalocoˈ a mitolon, micangacang Cingranan pafeli takowanan to ˈicel, ho ngaˈay malakowit ako ko kahacecay romiˈad. Misaˈicelay kako mirienang to midokoay a demak, kiemel a mirienang to saˈopo, ato micekiw to Fangcalay Cudad.” Sanayho cingra: “Mitolon padamaay takowanan milakowit to tada pasangaray a tatokian. Mafanaˈ to itiniay tatihi ako ci Yihofa, tada mahinomay ko falocoˈ. O adada no tireng soˈlin cowa ka tangsol a malahdaw, kawra pacaˈofay ci Yihofa to satolon ako, padamaay takowanan rihaday ko falocoˈ.” Nanay eca ka pawan kita, ‘mafanaˈay ci Yihofa sasamaan mikitini sapalifet milidong to soˈliˈlinay ko falocoˈ midoko Cingranan a tamdaw.’—2 Pitiro 2:9.

16. Hano mamicangacang kita to sapadama ni Yihofa micoˈay to sakayhid?

¹⁶ Cangacangen ci Yihofa padama kitaanan micoˈay to sakayhid. Cowa ka lefot kita, mansa marariday milood to mararaway a coos no falocoˈ. Ci Satan tano masakenakenaay a pakayraan mikayhid kitaanan, itini tonini a lalood mipadik kitaanan. O cecay pakayraan ningra i, tano malafoay a lawla minahol to falocoˈ no mita, mirienang kita to mahaenay a lawla, mamatomesto ko ponoˈ to cikaditay a harateng. O mahaenay a harateng papakadit to falocoˈ no mita, mikayat kitaanan midemak to pakidemay a raraw.—Marko 7:21-23; Yakop 1:14, 15.

17. Sapicoˈayaw to sakayhid, maherek mitolon sasamaan ko pidemak ita? (Nengnengen ko coka.)

¹⁷ Ano sapilowidaw kita to sakayhid eca ka pidemak to mararaway a demak, misaaliay to sapadama ni Yihofa. Ci Yis itini taˈarawan a satolon micangacangay ci Yihofaan sanay: ‘Aka parefongen kami i sakayhid, paˈoripen kami a paliyas toya tatiihay.’ (Matay 6:13) Makalimay ci Yihofa sapipadamaaw kitaanan, kawra papasayra kita Cingranan micangacang to sapadama ngaˈ ngaˈay. Papahecadenho ita ko demak to mitolonan. Tinakoen, o micadaan no ˈalomanay tamdaw a pinengneng i hekal ni Satan sahtoay o mararaway, ngangaˈay kita misaˈicel, miliyas to mahaenay mararaway harateng. (ˈOlic 97:10) Ngaˈay kita micekiw to Fangcalay Cudad, mitomes to matatodongay a harateng i ponoˈ no niyah. Roma i, mirienang to saˈopo ato mitosil mamidipot to harateng no mita. Aka mapawan, mikiˈokay ci Yihofa, cowa ko papicadaen Ningra kita to caay ko mamahadidi ita a sapalifet.—1 Korinto 10:12, 13.

18. Pakayni mitolonay, mamisamaan ko pidemak ita?

¹⁸ Itini tonini a pasangaray a lintad, kita o kahacecay tamdaw o mamikifalocoˈ pasayra ci Yihofaan mitolon, ngaˈ padadotoc madimadi ci Yihofaan. To romiˈamiˈad milimasmas to toki mikifalocoˈ a mitolon ci Yihofaan, makalimay Cingra kitaanan ‘mifowah to nafalocoˈan i kaˈayaw Ningra.’ (ˈOlic 62:8) Pakahemeken ci Yihofa, pakayniho midemakan Ningra a kihcod miakoˈid Cingranan. Micangacang Cingranan padama tisowanan timolo a mitosil, cangacangenho Cingra padama tisowanan misiˈayaw to pasangaray, micoˈay to sakayhid. Aka a papicaraen ko tamdaw ato demak tisowanan micerid a mitolon ci Yihofaan. Sasamaan ci Yihofa pacaˈof to satolon ita hani? Dotoc a lalakaw mamilengo tonini kalimlaan a salicay.