Cacekiwen Lalakaw 21
Samaanay ci Yihofa Pacaˈof to Satolon Ita
‘Mafanaˈay kita to mamalifok ko nicangacangan, samanen maherekayto kita micangacang Cingranan.’—1 YOHANI 5:15.
RADIW 56 Tengilen ko Satolon Ako
KALIMLAAN NO LALAKAWa
1-2. Pakayni i satolon, iraay ko maanan a sasa no falocoˈ ita hani?
COWA pipacaˈof ci Yihofa to satolon iso, na sanay kiso miharateng han? Ano iraay ko mahaenay a noka piharateng iso i, kasayar ko falocoˈ, ˈalomanay salikaka na iraay ko mahaenay a sasa no falocoˈ sanay cangra, mangalefay ano tahalifa to pasangar i, iraay ko mahaenay a piharateng. Ano tahapadesay kita nohatini, wa pasangar a mahapinang to samaanay ci Yihofa pacaˈof to satolon ita.
2 Nengnengen ita hena, hano ngaˈay kita a pakasoˈlin, to papacaˈofen ni Yihofa ko satolon no madimadiay sikawdan Ningra. (1 Yohani 5:15) Mamilengo kita to ilaenoay a salicay: Nolatekay hano caka hapinang ko pipacaˈof ni Yihofa to satolon ita? Sasamaan ci Yihofa pacaˈof to satolon ita hani?
LATEK COWA KA HECAD TO NIHARATENGAN ITA KO PIPACAˈOF NI YIHOFA
3. Misamaanay hano makalimay ci Yihofa mitolon kita Cingranan?
3 Pasowalay ko Fangcalay Cudad kitaanan, tangongolay ko nika olah ni Yihofa kitaanan, tada kalimlaan kita sanay a miharateng. (Hakay 2:7; 1 Yohani 4:10) Mankora pakalalokay Cingra kitaanan mitolon micangacang to sapadama Ningra. (1 Pitiro 5:6, 7) Makalimay Cingra padama kitaanan padadotoc miingid Cingranan, ciharatengayho to sapadamaaw kitaanan malaˈosi ko pisiˈayaw to maamaan a pasangar no kaˈorip.
Mitengilan ni Yihofa ko satolon ni Tafiti, milidong cingranan paliyas i kamay no ˈada (Nengnengen ko saka 4 fatac)
4. Samaan kita mafanaˈ to papacaˈofen ni Yihofa ko satolon no madimadiay sikawdan Ningra? (Nengnengen ko coka.)
4 Maˈosiay ita ko adihayay maˈoningay i Fangcalay Cudad, pacaˈofan ni Yihofa ko satolon no madimadiay sikawdan Ningra. Maharatengay iso ko maanan a tinakoan han? Haratengen ko Hongti ci Tafiti, i hakelong no kaˈorip ningra ˈalomanay ko sapipatayaw cingranan a ˈada, mihaenay i, marariday cingra i satolon micangacang ci Yihofaan. Kinacecayay sanay ci Tafiti a micangacang: ‘Yihofaaw, nanay tengilen Iso ko satolon ako, tengilen ko picangacang ako, tano soˈlinay Iso ato moecelay pacaˈof takowanan.’ (ˈOlic 143:1) Pacaˈofan ni Yihofa ko satolon ni Tafiti, milidong cingranan paliyas nai masakatalawan. (1 Samuil 19:10, 18-20; 2 Samuil 5:17-25) Mankora pakasoˈlinay ko falocoˈ ni Tafiti a pasowal: ‘Polong mingitangitay ci Yihofaan, polong soˈlinay a milongoc Cingranan i, miingidan no Kawas cangra.’ Ngaˈayay kita ira ko mahecaday cingranan a pakasoˈlin no falocoˈ.—ˈOlic 145:18.
Pacaˈofanho ni Yihofa ko satolon ni Pawlo, pafeli cingranan to ˈicel, ho ngaˈay cingra padadotoc miemem (Nengnengen ko saka 5 fatac)
5. Itini nolitengan, tooran ni Yihofa a pacaˈof ko satolon no sikawdan Ningra to halamhaman nangra han? Sadaken ko tinakoan a mitadtad. (Nengnengen ko coka.)
5 Latek cowa ka hecad to mihalamhaman ita ko pipacaˈof ni Yihofa to satolon. Tarokos ci Pawlo iraay ko mahaenay a nalifetan, pasowal cingra to niyahan ‘mapacekay no ceka ko tireng’ ako sanay, mansa kinatoloay cingra mingitangit ci Yihofaan padama cingranan palahdaw tonini a pasangar. Pacaˈofan ni Yihofa han? Hayi, kawra cowa ka lecad to niharatengan ni Pawlo. Cowa ka palahdawen ni Yihofa ko pasangar ningra, ao pafelian no Kawas to ˈicel cingra, toha ngangaˈayto cingra padadotoc madimadi.—2 Korinto 12:7-10.
6. Nolatekay ano nengnengen i, hano cowa ka pacaˈof ci Yihofa to satolon no mita?
6 Malecaday, nolatekay malifokay ita ko pipacaˈof, kawra cowa ka lecad to halamhaman no mita. Ngaˈayay a pakasoˈlinen ita, mafanaˈay ci Yihofa sasamaan padama kitaanan ko sangaˈayay. Cingra i, ‘papalaˈosi to tadamaanay a demak, ikakaay no nilongocan ato niharatengan ita a maamaan a demak.’ (Ifiso 3:20) Mihaenay i, alatek aitini i cowa ka harateng ita a tatokian, anca cowa ka harateng ita a pakayraan, pacaˈof ci Yihofa to satolon ita.
7. Misamaanay hano mamifalic kita to misowalan i satolon alatek? Sadaken ko tinakoan a mitadtad.
7 Ano mahapinangto ita to o maanan ko araaw ni Yihofa i, latek mamifalic to misowalan i satolon. Nengnengen ko tinakoan no salikaka ci Marting Posinke. Caho ka halafin noka ciraramod i, pacomodan cingra i kapalitan no Naci. Satapang i, micangacangay ci Yihofaan patedal cingranan, ho ngaˈay midimokos to fafahi ato padadotoc a mitosil. Mataˈlifto ko tosa a lipay, mahapinangay ningra awaay ko harateng ni Yihofa pasadak cingranan, oranto mitolon cingra: “Yihofaaw, pasifanaˈen kako, makalimay Kiso samaan ko pidemak ako.” Ikor i, misatapangay cingra miharateng to malifaay no romaroma salikaka i kapalitan. Maharatengto no salikaka ci Posinke, ˈalomanay salikaka calemcemay to fafahi no niyah ato wawa, hato sanayto a mitolon cingra: “Yihofaaw, akoˈiday Kiso pafeli takowanan to faelohay a ˈinorong. Nanay padamaen Iso kako pakalalok to salikaka, patanoktok cangranan.” Ikor no 9 miheca, mihaenay ko demak no salikaka ci Posinke i kapalitan.
8. Itini i pitolon haharatengen ita ko maanan masakalimlaan a demak hani?
8 Haratengen ita, iraay ko araaw ni Yihofa, aitini i misaˈosian Ningra a tatokian palaˈosi tonini a araaw Ningra. Onini araaw mamidaˈoc, misongilaˈ a misaysay to kihcod a roray ato pasangar, tinakoen o pades no serayan, adada ato patay. O papakaynien ni Yihofa i Hongti Kitakit Ningra palaˈosi tonini a demak. (Taniil 2:44; Paˈarawan 21:3, 4) Kawra iˈayaw noniya demak i, mihayian ni Yihofa ci Satan mikowan tonini a hekal.b (Yohani 12:31; Paˈarawan 12:9) Ano aniniho misaysay ci Yihofa to pasangar no tamdamdaw i, ngaˈayayto ko pikowan ni Satan, wa saanto ko pinengneng no tamdaw alatek. Mansa, o mamitala kita ci Yihofaan palaˈosi to mikiˈokan Ningra. Kawra itini i pitalaan ita a tatokian, wa pakihater sa ci Yihofa eca ka pidemak, cowa ka saan. Dotoc nengnengen ita ko pina hapakayraan ni Yihofa a padama kitaanan.
O PAKAYRAAN NI YIHOFA A PACAˈOF TO SATOLON
9. Ano mamisaˈosi kita i, samaanay ci Yihofa padama kitaanan hani? Sadaken ko tinakoan mitadtad.
9 Pafelian ni Yihofa kita to taneng. Mikiˈokay ci Yihofa to papafeli kitaanan to taneng, ho mataneng ko pisaˈosi ita. Itini i kalimlaan a pisaˈosi i nokaˈorip, tinakoen caay ko caciraramod ha anca ciraramod ha, mikiriwiˈay a misaali kita to sakayat no Kawas. (Yakop 1:5) Nengnengen ko tinakoan no salikaka ci Mariya,c caayho ka ciraramod cingra, o miceriday misakafahay cingra, lipahakay a matayal saki Yihofaan, o madimadiay a salikaka ko wina ningra. Ikor, makakafanaˈay to cecay faˈinayan salikaka. Sowal ningra: “Matongal matongal ko kafanaˈ niyam ikor, matongal matongalayto ko kakaolah niyam. Mafanaˈay kako to hamamisaˈosi ko niyah, pakayni toninian a demak halafinay kako a mitolon. Misaaliay kako to sakayat ni Yihofa, kawra mafanaˈay kako cowa ko papatado ci Yihofa takowanan a misaˈosi.” Misamaanay a mahapinang ningra to pipacaˈof ni Yihofa to satolon ningra hani? Misongilaˈay cingra micekiw to mitepangan a cudad no likakawa, mahelaayto ko pina lalakaw, hato mapacaˈofayto ko salicay ningra. O roma i, o wina ni Mariya pafeliay cingranan to matatodongay a sapaini, micadaan ningra. Tona mitengilay tonini a sapaini, ngaˈayay cingra mifolfol to nafalocoˈan no niyah. Salikorto i, iraayto ko matanengay a pisaˈosi ningra.
Samaanay ci Yihofa pafeli to ˈicel kitaanan padadotoc miemem? (Nengnengen ko saka 10 fatac)
10. Mikitini Filipi 4:13, samaanay ci Yihofa padama to madimadiay sikawdan Ningra hani? Sadaken ko tinakoan. (Nengnengen ko coka.)
10 Pafelian ni Yihofa kita to ˈicel padadotoc a miemem. Na pafelian ni Yihofa to ˈicel ko tarokos ci Pawlo, o papafeli Cingra kitaanan to ˈicel, padama kitaanan mihadidi to sapalifet. (ˈOsien ko Filipi 4:13.) Nengnengen samaanay ci Yihofa padama to faˈinayan salikaka ci Penciming, itini i pasangaray padadotoc a miemem. Kaemangho ci Penciming i, halafinay malacafay to paro no lomaˈ itini i pipanikiran to mapadesay i Afrika. Sanay cingra: “Miceriday kako a mitolon ci Yihofaan, micangacang Cingranan pafeli takowanan to ˈicel midemak to kaolahan Ningra a demak. Pacaˈofanto ni Yihofa ko satolon no mako, malifokayto ako ko rihaday no falocoˈ, pafeli takowanan to timolo padadotoc a mitosil, malifokayho ako ko sapahaled to pakasoˈlinay falocoˈ a mitepangan no Fangcalay Cudad.” Sanayho ko sowal ningra: “Maˈosi ko nalifetan no salikaka, maˈaraw to samaanay padama ci Yihofa cangranan padadotoc a miemem i, misetekayto kako to falocoˈ madimadi a tahatolas.”
Pakaynian ni Yihofa i salikaka padama kitaanan, na iraay ko mahaenay a nalifetan iso han? (Nengnengen ko saka 11-12 fatac)d
11-12. Samaanay ci Yihofa pakayni i salikaka pacaˈof to satolon no mita? (Nengnengen ko coka.)
11 Pakaynian ni Yihofa i salikaka padama kitaanan. ˈAyaw no kinafalah to ˈorip ci Yis toya dadaya, mingitangitay a mitolon ci Yihofaan, micangacang to Wama i kakarayan aka papitamorongen cingra to pakaditay a raraw. Soˈlin cowa ka tooren ni Yihofa ko micangacangan ni Yis a pacaˈof, kawra miocoran ni Yihofa ko cecay coyoh mitongal to ˈicel ningra. (Luka 22:42, 43) Anini, ci Yihofa papakayni i salikaka mitongal to ˈicel ita alatek, tinakoen patingwa ko salikaka pakalalok kitaanan, anoca tayni a milisoˈ kitaanan. Soˈlinay haw i, kita kahacecay tamdaw ngangaˈay talaˈayaw a tano ‘fangcalay a sowal’ pakalalok to salikaka.—Taneng 12:25.
12 Nengnengen ko nalifetan no fafahiyan salikaka ci Miriyamo. Mapatay ko faˈinay ningra to pina lipay ikor, cecayay ci Miriyamo i lomaˈ, tada matoleday ato mararom cingra. Cowa ka tomerep a tomangic cingra, sapikilimaw to sakasasowal a tamdaw. Sanay ko sowal ningra: “Awaay ko ˈicel ako sapatingwaaw to roma a tamdaw, oranto mitolonay ci Yihofaan. Tiya tomangicho kako a mitolon i, mahoniayto ko tingwa. Patingwaay ko cecay malohemay malitengay, o ngaˈayay a widang niyam cingra.” Mikitini toniya malohemay malitengay ato fafahi ningra malifokay ni Miriyamo ko taˈangayay a sahinom, pakasoˈlinay cingra o ci Yihofa ko miocoray toniya salikaka a patingwa.
Alatek sasamaan ci Yihofa miocor to romaroma tamdaw a padama kitaanan? (Nengnengen ko saka 13-14 fatac)
13. Samaanay ci Yihofa mipakayni i cowa pidoko Cingranan a tamdaw pacaˈof to satolon no mita? Sadaken ko tinakoan.
13 Alatek pakaynian ni Yihofa i cowa pidoko Cingranan a tamdaw pakalalok kitaanan. (Taneng 21:1) Latekay maherek kita mitolon ikor i, alatek pakaynian ni Yihofa i cowa pidoko Cingranan a tamdaw patado kitaanan midemak to pina a demak. Tinakoen, mikayatan ni Yihofa ko harateng no Hongti ci Artakirkis, mihaydaanto no Hongti ci Artakirkis ko saali ni Nihimiya, panokay ci Nihimiyaan tayra i Yirusalim mipadang to mipatirengay a tayal. (Nihimiya 2:3-6) Anini, itini i pisaalian ita a tatokian, alatek pakaynian ni Yihofa i cowa pidoko Cingranan a tamdaw mipadang kitaanan.
14. Mikitini i nalifetan no salikaka ci Sokim mananamay iso ko maanan? (Nengnengen ko coka.)
14 Mahapinangay no cecay fafahiyan salikaka ci Sokim, pakaynian ni Yihofa i ising a padama cingra. O faˈinayan a wawa ningra ciadadaay to nosingkian a adada. Ikor masongtolayho no paliding, oranto, cingra ato faˈinay sawad sanay to tayal a midimokos to faˈinayan a wawa. Telocto i, awaayto ko payci nangra. Hato mamalatoˈ a komo ko piharateng ni Sokim to niyahan, tahiraayto i tolas. Pasowalan ningra ci Yihofa to harateng ato nafalocoˈan no niyah, micangacang to sapadama ni Yihofa. Fahkaˈan nanay cangra, tada ciharatengay ko ising to malifaay nangra a demak, sapipadamaaw cangranan. Ikorto macadaay nangra ko sapadama no sifo, mahelaay ko kaˈemeday a lomaˈ. Sanay ko sowal ni Sokim: “Mahapinangay niyam o ci Yihofa ko padamaay tamiyanan, soˈlinayto o ‘Mitengilay to satolon a Tapang’ Cingra.”—ˈOlic 65:2.
PAIRAEN KO PAKASOˈLINAY FALOCOˈ, MIHAPINANG HALO MICADA TO SAPACAˈOF NI YIHOFA
15. O cecay fafahiyan salikaka samaanay mihapinang to mapacaˈofay ko satolon ningra?
15 O Wama ita i kakarayan tocerid cowa ka tano masakafahkaˈan a pakayraan pacaˈof to satolon no mita, kawra oha papacaˈof Cingra, o sapadama Ningra o soˈlinay a nisaalian no mita, ho ngaˈay kita padadotoc a madimadi Cingranan. Mihaenay haw i, sinanoten a minengneng ko pipacaˈof ni Yihofa tisowanan. Salikaka ci Yoko na miharatengay to cowa pacaˈof ci Yihofa to satolon ningra, kawra ikor mitilidan ningra ko micangacangan a demak ci Yihofaan. Mataˈlifto ko cecay liyad ikor, mitikolan ningra minengneng ko na mitilidan no niyah, ˈarawhan mipacaˈofanto ni Yihofa ko adihayay satolon ningra, ano oyato a matawalay ningra a satolon, pacaˈofan ni Yihofa. Ngaˈayay kita misalatelatek a tomerep, misongilaˈ a miharateng to samaanay ci Yihofa pacaˈof to satolon no mita.—ˈOlic 66:19, 20.
16. Itini mitolonay a demak, sasamaan kita patalahkal to pakasoˈlinay falocoˈ? (Hipray 11:6)
16 Pasayra kita ci Yihofaan mitolon, micadaho to pakayraan Ningra pacaˈof, paihkalay to pakasoˈlinay kita Cingranan. (ˈOsien ko Hipray 11:6.) Nengnengen ko nalifetan ni Mayke ato fafahi ningra ci Kelisi. Iraay ko cecay patosokan nangra, tatayra i Pitil a matayal. Sanay ci Mayke: “Halafinayto kami misingsi, pakayni tonini patosokan kinapinapinaay a mitolon ci Yihofaan, nikawrira caayho ka cada niyam ko satahidang.” Pakasoˈlinay ci Mayke aci Kelisi, mafanaˈay ci Yihofa samaan misaka dademak cangranan o sangaˈayay. Misarocoday cangra, itini misaaliay to mitosilay a pala malo miceriday misakafah, midamaho to patirengay a tayal no likakawa no Kawas. Nohatini, o milisoˈay ko tayal nangra. Sanay ci Mayke: “Cowa ka sahto sa ci Yihofa mitoor to saali niyam pacaˈof tamiyanan, nikawrira soˈlinay Cingra pacaˈof, hanaca o pakayraan Ningra pacaˈof mikikakaay ko kangaˈay to maharatengay niyam.”
17-18. Mikitini ˈOlic 86:6, 7, ngaˈay kita pakasoˈlin to maanan?
17 ˈOsien ko ˈOlic 86:6, 7. Pakasoˈlinay ko mitiliday to ˈOlic a Tafitian, cowa ko pitengil aca ni Yihofa to satolon ningra, o papacaˈofho Cingra. Ano kisoto ngaˈayay ira ko mahaenay a pakasoˈlinay falocoˈ. Malengoay nonini a lalakaw a tinakoan paihkalay, papafeli ci Yihofa to taneng kitaanan, pafeliho to ˈicel kitaanan padadotoc a miemem. Misaka dademakayho Cingra to salikaka, ato cowaho ka pidoko Cingranan a tamdaw, padama kitaanan.
18 Cowa ko mamitoor ci Yihofa to halamhaman ita a pakayraan pacaˈof to satolon no mita alatek, kawra mafanaˈay kita, o papacaˈof Cingra, hanaca itini pisaalian ita a tatokian mihadak to sapadama. Mihaenay haw i, ka padadotoc paira to pakasoˈlinay falocoˈ a mitolon, pakasoˈlin to mamidimokos ci Yihofa tisowanan, hanaca itini faelohay hekal noikor mamirenec to kalim no polong a tamdaw.—ˈOlic 145:16.
RADIW 2 Akoˈiden Niyam Kiso Yihofa
a Mikiˈokay ci Yihofa, o satolon ita ano malecad to araaw Ningra i, o papacaˈofen Ningra. Tahalifa to sapalifet i, ngaˈayay pakasoˈlinen ita to papadamaen ni Yihofa kita padadotoc a madimadi. Onini a lalakaw mamilengo, samaanay ci Yihofa pacaˈof to satolon ita.
b Ano sakacipinangaw to misamaanay hano mihayi ci Yihofa ci Satanan mikowan tonini a hekal, nengnengen ko Mikecolay Saka 6 Folad, 2017, “Sarocoden ko Falocoˈ to Masaka Limlaan a Demak.”
c Mifalican ko ngangan no tamdaw itini toni lalakaw.
d TATODONG NO COKA: Pakayni pilaliw to pades, cecay wina miˈorongay to fafahiyan a wawa tayra i roma kitakit. O itiraay a salikaka tada fanekfekay a mihamham cangranan, pafeliho cangranan to misaalian a sapadama.