Mikecolay 線上書庫
Mikecolay
線上書庫
阿美語
  • 聖經
  • 出版物
  • 聚會
  • w23 6 folad 26-30 fiedac
  • Matayal Saki Yihofaan, Adihayay ko Kahemekan ato Malifokay

你選擇的內容沒有影片。

抱歉,載入影片時出現錯誤。

  • Matayal Saki Yihofaan, Adihayay ko Kahemekan ato Malifokay
  • Mikecolay Tenaken ko Kitakit ni Yihofa (Cacekiwen Lalakaw)—2023
  • 小標題
  • 相似資料
  • MITAHIDANG CI YIHOFA TISOWANAN MIDEMAK TO MAAN I, TANAM HAN A MIDEMAK
  • TALIFAHAL SA MATAHIDANG TAYRA I ESTONIYA ATO ITINIAY I PALTIK A KITAKIT
  • O ROMA A KAFAHKAˈAN—TAYRA I ROMA A KITAKIT
  • TAYRA I ASIYA
  • KADOFAHAY KO MALIFOKAY
  • O Sapalemed ni Yihofa Takowanan Mataˈlifay ko Maharatengay
    Mikecolay Tenaken ko Kitakit ni Yihofa (Cacekiwen Lalakaw)—2019
  • I Hakelong no ˈOrip Tahacadaay to Sapasifanaˈ no Tadamaanay a Singsi
    Mikecolay Tenaken ko Kitakit ni Yihofa (Lalengoen Lalakaw)—2025
  • Maolahay Kako Minanam ato Pasifanaˈ to Pakayniay ci Yihofaan a Demak
    Mikecolay Tenaken ko Kitakit ni Yihofa (Cacekiwen Lalakaw)—2022
  • Matayal Saki ci Yihofaan, Masaloay ko Hakelong no ˈOrip a Mahemek
    Mikecolay Tenaken ko Kitakit ni Yihofa (Cacekiwen Lalakaw)—2024
查看更多
Mikecolay Tenaken ko Kitakit ni Yihofa (Cacekiwen Lalakaw)—2023
w23 6 folad 26-30 fiedac
Lino Keske.

Nalifetan No Tamdaw

Matayal Saki Yihofaan, Adihayay ko Kahemekan ato Malifokay

NALIFETAN NI LINO KESKE

KAEMANGHO, ano maˈaraw ako ko hikoki maefer i kakarayan i, makalimay kako sapikalicaw tayra i roma a kitakit. Kawra, cato ka laˈosi konini a kalim no mako alatek.

Itini Saka Tosa Lalood no Hekal a tatokian, o wama ato wina ako miliyasay to Estoniya tayra i Towic, itiraay hofocen kako. Ikor, paro no lomaˈ niyam malinahay tayra i Kanata. Satapangho, itiniay kami i ngata no Otawa i tadimocokan no pakokoˈan. Itiya tada manikaway kami, kawra iraayho ko fitaˈol sakalanam.

Cecay romiˈad, malitemohay no wina ko Misawacayay Tamdaw ni Yihofa. Miˈosian nangra ko Paˈarawan 21:3, 4, matengil no wina ko sinael tangic sanay matemer ko falocoˈ. Ikorto, misatapangay ko wama wina ako minanam to Fangcalay Cudad, caka halafin micadaayto to paputisem.

O wama wina ako soˈlin cowa ka ngaˈay kono Padaka a sowal, kawra tawlikay cangra mirienang to midokoay a tayal. Itiya, itiniay ko wama ako i mitodohay to marad a kociw i Antali Satepoli a matayal. Maedeng kahacecay pieneman a dadaya minokay matayal, mikeriday cingra tamiyanan malingad mitosil. To lipalipay paro no lomaˈ niyam malacafayay minanam to Mikecolay. Samanen padadotocay ko wama wina pasifanaˈ, matongalay ko olah ako to Kawas. Itini i 1956 miheca micadaay to paputisem, itiya 10 ko mihecaan ako. Noikoran kaˈorip, ano maharateng ako tada maolahay ko wama wina ci Yihofaan, mapakalalokayto, makalim padadotoc matayal saki Yihofaan.

Micodiyap i kawcong ikor, cisasaay ko falocoˈ ako. Ano malo misakafahay kako, tahadaˈocto cowa ko mamaetan ko adihayay a payci, palaˈosi to kalim mitaliyok toniya hekal misalama. Mahelaay ako ko cecay kaolahan a tayal, itini i tingtay misikay to romadiway a kamok. Nikawrira, itiniay i dadaya ko tayal, marariday malawa ako ko saˈopo, mararidayho micawmaˈ to cowa ka olah to Kawas a tamdaw. Ikorto, patalipaˈelalay ko makapahay falocoˈ ako, cowato ka ngaˈay kako padadotoc mahaen, o tatangsol a mifalic.

Malinahay kako tayra i Antali Osawa a pala. Itira, malitemohay ko salikaka ci Ray Noman, ci Layseli o fafahiyan a safa ningra, ato romaroma misakafahay. Tada ciharatengay takowanan. Maˈaraw ko kalipahak nangra, tada makowaday kako, hato miliyaway misinanot to patosokan no niyah. Itini pipakalalok nangra, misatapangay mala misakafahay isaka 1966 miheca 9 folad. Tada lipahakay mahemek to misakafahay a tayal. Dotocto, mafalicay ko kaˈorip ako. Adihayay ko kafahkaˈan a demak mitala takowanan i kaˈayaw!

MITAHIDANG CI YIHOFA TISOWANAN MIDEMAK TO MAAN I, TANAM HAN A MIDEMAK

Itiniho i kawcong, misingsiayto kako sakatayraaw i Pitil no Toronto a matayal. Misatapangto kako misakafah ikor, mitahidangay ko Pitil takowanan tayra matayal to sepat miheca. Kawra maolahay kako ci Layselian, matalaway kako ano cadaen konini a satahidang i, wa ecato ka ˈaraw cingra alatek. Halafinay kako mingitangit ci Yihofaan a mitolon ikor ngaˈ, micadaayto to satahidang no Pitil, tangoˈolay kako ci Layselian.

O mifafacaˈay to rikoˈ ko tayal ako i Pitil, ikor mala padamaay a mitatiliday. Itiya i, mala mikiriwiˈay a misakafahay ci Layseli i Katiniyo no Kowipike a pala. Marariday kako miharateng: “Mimaanay ci Layseli nohatini aki? Matatodongay konini saˈosi ako han?” ˈArawhan cowa ka harateng, faˈinayan kaka ni Layseli ikor matahidangay tayni i Pitil, malacafay kami i cecay kafotiˈan. Tada kalipahakan konini! Mihaenay i, mararinnakayto kako aci Layseli. Isaka 1971 miheca 2 folad 27 romiˈad, malahciay ako ko sepat mihecaan a katayal i Pitil, toya romiˈad mararamodayto kami.

Ci Lino aci Layseli, isaka 1975 miheca misasing.

1975 miheca misatapang malo milisoˈay to kasakilac a tayal

Kami maocoray tayra i Kowipike a pala i cecay sano Frans sowal a kasakopang a matayal. Ikor no pina miheca i, matahidangay kako malo kasakilac kantok, itiya 28 ko mihecaan. Kaemangayho sanay kako a miharateng, awaay ko nalifetan. Toniya pakayraan, mikitiniay kako i Yirimiya 1:7, 8 milifok to taˈangayay sapakalalok. Kawrira, iraayho ko roma a pasangar niyam. Ci Layseli kinapinapinaay masongtol no citosiya, cowa ka ngaˈay ko fotiˈ. Sasamaan kami malo milisoˈay ko tayal hani? Kawra sanay ci Layseli: “Ano mitahidangay ci Yihofa kitaanan midemak to maanan a tayal i, coko mamitanam kita han?” Oranto micadaay kami tonini a sacorcor, lipahakayto ko kaˈorip niyam tonini 17 mihecaan a milisoˈay tayal.

O milisoˈay a demak tada ˈifowaay ko katayal, marariday a awa ko toki ako mikalacafay ci Layselian. Oha maminanam kako tonini a demak. To cecay dafak no Picecayan a romiˈad, iraay ko mikongkongay to fawahan. Fawah han ako awaay ko maˈaraway a tamdaw, edengan ko cecay kadango, ilalomaˈ iraay ko kiradom, losay, epang, ato cecay talid epah, iraayho ko caay tiliden ko ngangan a tikami, sanay kora sowal: “ˈOrongen ko fafahi iso tayra i pala a komaen!” Makapahay ko romiˈad itiya, macidalay. Kawra pasowalan ako ci Layseli: “O mamisadayho kako to pina a kakimaden, cowa ka ngaˈay a masadak.” Cipinangay cingra, kawra masomaday to miming. Maroˈ kako ikaˈayaw no cokowi i, satapangay macariraw ko falocoˈ. Maharatengay ko sowal no Ifiso 5:25, 28. Hato patalipaˈelalay ci Yihofa takowanan, dipoten ko nofalocoˈan a saali no fafahi sanay hokira? Maherek kako mitolon i, hananay ako ci Layseli: “Tatata, malingadto kita!” Tada lipahakay cingra. Parakaten ako ko tosiya tayra i lawac no ˈalo makapahay a kitiraan, ceraken niyam ko kiradom i sera, tada rihakeday kami toya romiˈad. Ikor, malahciay ako misaday ko kakimaden.

Rihakeday kami to milisoˈay a tayal, adihayay ko milisoˈan a pala. Tayraayto kami milisoˈ to Koronpiya tangasa i Niwfenlan no Pritin. Satapangayto malaˈosi ko nano mimingho miharatengan ako a talacowacowa. Miharatengay kako sapisingsiaw to Kiliyat Picudadan, kawra cowa ka sakatayraaw i roma kitakit malo mikiriwiˈay manilnil a mitosilay, samanen edengan oya idahiyay a tamdaw ngaˈ ngaˈay malo mikiriwiˈay manilnil a mitosilay sanay kako miharateng, awaay ko tatodong no mako. Hanaca, o romaroma Afrika a kitakit adihayay ko lalood ato matenakay ko adada, matalaway kako maocor tayra to mahaenay a pala. Ngaˈayayto ko katayalan ako anini saan.

TALIFAHAL SA MATAHIDANG TAYRA I ESTONIYA ATO ITINIAY I PALTIK A KITAKIT

Ci Lino aci Layseli, isaka 1975 miheca misasing.

Milisoˈay to i Paltikay a kasakitakit

Ikor, malasawadto ko pikeceng to mitosilay a demak i Sowiay. Isaka 1992 miheca, milicayay ko salikaka makahi kami tayra i Estoniya malo mikiriwiˈay manilnil a mitosilay hokira. Fahkaˈan nanay kami, pakayni tonini a demak mitolonay kami, miliyaw haca miharateng: “Ano mitahidangan ni Yihofa kami midemak to maanan a tayal i, coko mamitanam kami saw?” Mankora cada hananayto niyam kora satahidang, miharateng ko falocoˈ: “Cowa ko tatayra i Afrika i, mamaan saw.”

Tangsolay kami misatapang minanam tono Estoniya a sowal. Pina folad kami i Estoniya ikor, misatapangay kami malo kasakilac milisoˈay a tayal, tayra i Paltik a tolo kasakitakit ato Kalingnikat no Rowasiya, maedeng 46 kasakopang ko milisoˈan ato pina a kasakomi. Tatodong nonini i, o maminanamho kami tono Latowiya, Litawan ato Rowasiya a sowal, cowa ko madoloay konini. Kawra maˈaraw no widang kami a misaˈicel masemeray ko falocoˈ, adihayay ko sapadama tamiyanan. 1999 miheca, itini Estoniya mapatirengayto ko fenpo, manilnilay kako mala Iing no Fenpo a matayal, malacafay aci Tomas Aitoe, Lenpite Reylay, Tomi Kawke.

Kawili: Mikimaday i kasapala taykay no Litawan

Kawanan: Ling no fenpo i Estonia, mapatirengay isaka 1999 miheca

ˈAlomanay ko kafanaˈan niyam to mapaholiway tayni i Sipoliya a salikaka. Soˈliˈlin mapacieciay cangra miliyas to paro no lomaˈ, misemsemay itini i kapalitan, kawra cowa ka ngaliwngiw cangra. Padadotocay a lipahak ko falocoˈ, fanekfek a mitosil. O taˈarawan nangra mahapinangay niyam, ano itinito i pasangaray a pakayraan, wa ngaˈay kita padadotoc mihadidi a lipahaken ko falocoˈ.

Adihayay mihecaan padadotocay kami misaˈicel a matayal, cowa ka paselaˈ. Ikor malotay malotayay ko tireng ni Layseli, tada pakidemayto. Itiya, cowa ka fanaˈ kami to ciadadaay to pakidemay ko talengteng no tireng. Misahalakaay kami miharateng to sapinokayaw tayra i Kanata, ˈarawhan mitahidangay ko congpo tamiyanan tayra i Padaka Niwyok Patterson micada to sapahatatanam. Awaayto ko hapakayraan to sakatayraaw sa kami miharateng, kawra mikifalocoˈay kami mingitangit a mitolon, ikorto i, micadaan niyam ko satahidang. Onini a saˈosi milifokay to sapalemed ni Yihofa. Itini kami i Patterson i, micadaayto ci Layseli to matatodongay a sapiadah, telocto patikolayto a masolimet ko demak niyam.

O ROMA A KAFAHKAˈAN—TAYRA I ROMA A KITAKIT

Minokayto tayra i Estoniya i, isaka 2008 miheca o cecay dadaya macadaay ako ko tingwa no congpo. Milicayay to mamakahi kami tayra i Kangko hokira, papacaˈofen cangra to cila a romiˈad. Tada macekokay kako, cowa ka tangsol han ako pasowal ci Layseli tonini a demak, samanen matalaway kako macokat cingra. ˈArawhan i, o kako ko macokatay, salafii sa kako mitolon ci Yihofaan, pasowal Cingranan to cariraw no falocoˈ ako.

To cila a romiˈad, pasowalan ako ci Layseli toniya lihaf, ikor miharatengay kami: “Ano o satahidang ni Yihofa tamiyanan tayra i Afrika i, ano eca pitanam kami, samaan mafanaˈ to cowa ko mamadangar niyam aki?” Oranto i, itini kami i Estoniya matayal to 16 mihecaan i, mikalicayto kami to hikoki tayra i Kinsasa no Kangko. Itiraay a fenpo tada makapahay, malecad o kandaway makarengosay a pala. Misolimet to kafotiˈan ci Layseli i, saˈayaw a mitelian ningra, oya miliyas kami to Kanata a mihawikidanto ningra a kato, sanay matilid tora kato: “Ano icowaay kiso a mapaloma, wa itira kiso a mafociyar to makapahay a hana.” Mafanaˈayto kami to itiraay a salikaka, misikay to pakingkiwan, marihakeday ko katayal niyam itini, taˈangayay ko kalipahak. Ikor, malo mitaypiyaway no congpo tayra i maedeng 13 kasakitakit no Afrika milisoˈ to masasiromaay a fenpo. Ngangaˈayto a mafanaˈ to romaroma tamdaw, mahapinangay ko masasiromaay a finacadan ato serangawan a tamdaw, iraay ko karahekeran a capeling nangra. Oya isalakatay a calemcem no falocoˈ niyam malahdawayto, tada miakoˈiday kami ci Yihofaan macorcor kami tayni i Afrika a matayal.

Itini Kangko, patahkaan no salikaka kami to caayho ka kaekaen niyam a kakaenen, tinakoen o fao. Kawra nengneng han ˈaredetay ko kakomaen nangra, tanam hananayto niyam, soˈlinay kaesoˈayto a kaenen.

Itini kakawalian no Kangko, marariday ira ko milipalaway a sofitay miˈodis to niyaroˈ, mikariˈang to fafahiyan ato kaemangay, mansa tayraay kami mipakalalok ato mipadang to itiraay a salikaka. Soˈliˈlin tada manikaway ko ˈalomanay salikaka itira, kawra tangongolay ko olah nangra ci Yihofaan, madimadi midama to likakawa no Kawas, tanektekay ko pakasoˈlin no falocoˈ to patikolay maˈorip a tokel, makowaday ko falocoˈ niyam. O taˈarawan nangra pakalalokay tamiyanan mikinsa to falocoˈ no niyah i pidoko ci Yihofaan, patanoktok to nika pasoˈlin niyam ci Yihofaan. Maˈaraw ko salikaka malahdaw ko lomaˈ ato panay nangra i, ˈangongolay ko kacipinang niyam, wa fahal saan malahdaw ko dafong, edengan o hafay i kakarayan o soˈlinay a ciepocay. O roma sa i, soˈlinto tahalifa ko salikaka to pakidemay a sapalifet cowa ka ngaliwngiw cangra, pakalalokay tamiyanan konini ano tahalifa to adada no tireng ato romaroma a pasangaray, mamitawmec kami to timoloay a misiˈayaw.

Saka 1 coka: Itini Kasaˈopoan, mikimaday to tahapadesay a tamdaw ci Reino. Saka 2 coka: Itini i mimingay hikoki micoloˈay to dafong ko salikaka.

Kawili: Mikimaday to itiraay pipanikilan to mapadesay a tamdaw

Kawanan: Miˈorong to sapaiyo mipadang to mapadesay tamdaw i Tongko no Kangko

TAYRA I ASIYA

Dotoc iraayho ko cowa ka harateng a kafalic. Matahidangay kami tayra i Hong Kong fenpo matayal. Cowa ka harateng niyam to aitini i Kakawalian ko kaˈorip, kawra isaˈayaw a cecacecay a tayal niyam, matinakoay ko pikihar ato pidama ni Yihofa, mansa nohatini micadaan niyam ko satahidang. Isaka 2013 miheca, tahalosalosaˈay kami, miliyas to kanonoˈan a widang ato makapahay a Afrika. I ˈaˈayaw iraay ko maanan mitalaay tamiyanan hani?

O Hong Kong i, tada o macakatay ko kadofah a kitakit, itini a maˈorip tada taˈangayay ko kafalic. Roma sa i, cowa ka dolo minanam to Kowantong a sowal. Kawra o salikaka mahemekay mihamham tamiyanan, marihakeday kami to ˈaredetay a kakaenen. Kalikiay macowat ko demak no fenpo, kawra matekesay ko payci to sapicowataw to fenpo, samanen itini i Hong Kong o acaˈ no lomaˈ ato sera kalikiay a macakat. Oranto i, misaˈosiay ko Malohemay Malitengay i Congpo papipaliwalay to adihayay a kaitiraan no fenpo. Caho ka halafin, isaka 2015 miheca malinah haca kami tayra i Koriya, tahaniniay kami itira a matayal. Minanam to sowal no Koriya cowa ko madoloay, caayho ka malaymay ko sowal no niyam. Kawra macakatayto kamo sanay ko widang pasowal, makowaday ko falocoˈ niyam.

Saka 1 coka: Ci Reino aci Layseli, pasasingay i Hong Kong, ilalikoray i, o ˈakawangay a lomaˈ. Saka 2 coka: Itini fenpo no Koriya.

Kawili: Misatapang ko kaˈorip i Hong Kong

Kawanan: Fenpo no Koriya

KADOFAHAY KO MALIFOKAY

Micawmaˈ to faelohay widang cowa ko madoloay nolatekay, kawra mahapinangay niyam, ano talaˈayaw a mitahidang to tao tayni i lomaˈ misalafang, wa kaliki a mafanaˈ cangranan. Mahapinangay ita o kalecadan no salikaka i kalalaˈed ikakaay to kasasiroma ko noka adihay, mahapinangayho kasapaan ko pisafaco ni Yihofa kitaanan, hato ngaˈayay kita mifohat to falocoˈ, paihkal to damsayay i kahacecay tamdaw.—2 Korinto 6:11.

Mananamay niyam ano sapilecadaw ci Yihofaan micada to tao i, aitini i kaˈorip mikilim to wacay to nika olah ni Yihofa ato pikayat Ningra. Ano matoled ko falocoˈ i, anca calemcem to maolahay ko salikaka tamiyanan hokira, mihadakan niyam ko mitilidan no widang a tikami anca kato, liyawan niyam a miˈosi ko ilalomaˈay sapakalalok a sowal. Soˈlinayto matinakoay niyam ko pipacaˈof ni Yihofa to satolon niyam, patanoktokay to falocoˈ niyam ato paˈicel tamiyanan.

Adihayay mihecaan, mananamay ako aci Layseli, ano hakowato ko kaˈifowa no demak limasmasen ko toki a malacafay tatosa. Cipinangayho kami, ano mararaw i, tawa han ko niyah, mangalef itini i pinanam to faelohay a sasowalen i, haenen a matawa to niyahan. To dadayadaya, mikilimay kami to lalangian a miakoˈid ci Yihofaan.

Soˈlinen ko sowal haw i, isaˈayaw cowa ko mamalo mikiriwiˈay manilnil a mitosilay ko niyah, sanay kako a miharateng, anca itini i roma kitakit ko kaˈorip. Matinakoayto ako, iraay ko sapadama ni Yihofa, malaˈosiayto ko kihcod. Tada lipahakay kako! Maharatengay ako ko nano sowal no pairasolay ci Yirimiya, sanay cingra: ‘Yihofaaw, masafanaˈ Iso kako.’ (Yirimiya 20:7) Soˈlinay pafelian ni Yihofa kami to adihayay kafahkaˈan ato cowa ka harateng a sapalemed, halo pirenec to kalim ako i kaemangho mikalic to hikoki talacowacowa misalama. Tayraay kami i icowacowa pala, milisoˈan a fenpo miedefay i lima taˈangayay pala, onini cowa ka haraterateng ako i kaemangho. Roma i, tada miakoˈiday kako ci Layselian, ano icowato ko katayalan, mikifalocoˈay cingra midama takowanan.

Marariday kami patalipaˈelal to niyah matayalay i cimaanan, ato hano mihaen ko demak. O malifokay niyam anini a sapalemed, padamaay tamiyanan cipinang to hahakowa ko nika fangcal no kaˈorip i faelohay hekal. Itiyato i, o larenecen ni Yihofa ko kalim no polong a tamdaw.—ˈOlic 145:16.

    Amis Mitepangan Cudad (2013-2025)
    登出
    登入
    • 阿美語
    • 分享
    • 設定
    • Copyright © 2025 Watch Tower Bible and Tract Society of Pennsylvania
    • 使用條款
    • 隱私權政策
    • 隱私設定
    • JW.ORG
    • 登入
    分享