I Hakelong no ˈOrip Tahacadaay to Sapasifanaˈ no Tadamaanay a Singsi

O TAˈARAWAN NO WAMA WINA

1957 miheca, o wama wina ako nai Itali malinahay tayra i Kanata, palomaˈay kami tayra i Citesli a niyaroˈ. Cowa ka halafin, mafanaˈayto cangra to soˈlinay kimad. Mikitiya a misatapang, midokoay to Kawas a demak paisalakatan no kaˈorip no niyah. Nano mimingho kako i, maceriday kako ato paro no lomaˈ, kalacafay a mitosil. Mansa nolatekay pakatawaay kako a pasowal: “Falo ko mihecaan ako, o padamaayto misakafahay kako!”

Soˈlin cowa ka cihafay ko wama wina ako, kawra kamayan cangra makahi matayal saki ci Yihofaan, tada o ngaˈayay taˈarawan niyam a sasepat malikaka! Tinakoen i 1963 miheca, sapisadayaw cangra to payci tayra i Padaka Kalefoniya a Pasatina mirienang to koksay taykay, paˈaca to adihayay a dafong no lomaˈ. 1972 miheca, malinahay kami tayra i Terie a niyaroˈ, midamaay to itiraay somowalay tono Itali a mitosilay a demak. Oniya kitiraan itiniay i Pritin Koronpiya no Kanata, maedeng 1,000 kongli ko karaay to lomaˈ niyam. Iraayho, misaˈosiay ko wama ako malo micingkiyatay ko tayal. Soˈliˈlin ngaˈay cingra mietan to adihayay a payci, kawra cowa ka makahi cingra, samanen sapisamacayaw cingra matayal saki ci Yihofaan.

Miakoˈiday kako to makapahay taˈarawan no wama wina, pakaynian ni Yihofa cangranan pafeli takowanan to ngaˈayay a sapahatatanam. Mikitiniay i wama wina ako a mananam: Ano paisalakaten ako a micangacang ko Kitakit no Kawas wa dimokosen no Kawas kako. (Matay 6:33) Onini a demak tada ciepocay i hakelong no ˈorip ako!

MISATAPANG MIEMIN TO TOKI A MATAYAL

Itiniay i 1980 miheca mararamod kako aci Taypi, makapahay tawlikay midoko to Kawas a fafahiyan salikaka cingra. Kami tatosa iraay ko mieminay to toki a matayal a patosokan. Ikor no mararamod tolo folad, misatapangayto ci Taypi mala misakafahay. Cecay miheca mararamod ikor, malinahay kami tayra i cowa ka ˈaloman ko tamdaw a kasakopang. Itira i, misatapangay kako mala misakafahay.

Ikor no cecay liyad, matoleday kami, sapiliyasawto. Kawra, mikilimay kami to kasakilac kantok milengo toniya demak, cisidaˈitay ko kasakilac kantok patodicek a pasowal tamiyanan: “Haharateng han namo ko pasangar no niyah, mangalef manglefay ko katatiih a demak. Soˈlin adihayay ko ngaˈayay tawlikay a demak, ano misaˈicel kamo mikilim, wa makilimto.” Onini ko misaalian a sapaini! (ˈOlic 141:5) Tangsolay kami a midofdof to sowal ningra a midemak, ikor mahapinangayto niyam tada adihayay ko tawlikay a demak. ˈAlomanay ko fanekfekay midoko ci Yihofaan i kasakopang, tinakoen o roma kaemangay makalimay a macakat, o roma fafahiyan salikaka, soˈlin cowa ka pihakelong ko faˈinay, kawra makalimay mitongal to tayal saki ci Yihofaan. Oniya milifetan, mananamay niyam: Ano malitemoh ko pasangar i, saˈicelen a minengneng ko tawlikay a demak, wa mihadidiho a mitala ci Yihofaan a misaysay to pasangar no mita. (Mika 7:7) Ikor, miliyaway kami a lipahak, ngaˈay ngaˈayayto ko lingad no demak.

Sakinacecay niyam mirienang to sapahatatanam to misakafahay i, matengil ko nalifetan no singsi itini roma kitakit. Paladaˈay cangra to adihayay a sasing, pasowalayho to masiˈayaway nangra a pasangar ato macadaay a sapalemed. Pakalalokay tamiyanan patireng to mikiriwiˈay manilnil a mitosilay a ptosokan.

Sakalaˈosiaw noniya patosokan, itini i 1984 miheca malinahay kami tayra i Kwipik no Kanata. Isaˈayaw a kitiraan niyam o Pritin Koronpiya ato itiniay 4,000 kongli ko raay. Itiraay tamdaw sahtoay somowal to Frans a sowal. Sakora sowal i, wa minanam kami to cowa ka hecad a serangawan ato sasowalen. Malitemohay ko roma pasangar i, maceriday awa ko payci. Cecay a liyad, edengan o cakaymo ko mikaenan niyam. Oniya cakaymo iraay ko maomahay papisawlamay i omah ningra. Mafanaˈ mafanaˈay ci Taypi, tano cakaymo mitangtang to masasiromaay kaesoˈay a kakaenen. Soˈlin misiˈayaw to pasangar, kamayan kami misaˈicel padadotoc a mihadidi, awaay ko maamaan a demak mamicefis to sakalipahak niyam. Mahapinangay niyam padadotocay ci Yihofa midimokos tamiyanan.—ˈOlic 64:10.

O cecay romiˈad, fahal sanay macadaay niyam ko tingwa, matahidangay i Kanata a Pitil matayal. Isaˈayaw pangangan kami tayra i Kiliyat Picudadan, mihaenay pakayni to satahidang no Pitil, masasifoday ko harateng niyam, kawra micadaan niyam. Tayrato i Pitil ikor, licayen niyam ko Iing no fenpo, salikaka ci Kenis Liter: “Ano macadaay niyam ko satahidang no Kiliyat Picudadan, sasamaanto aki?” Sanay cingra: “Aka calemcem to cowaho ka mifekad a demak!”

Ikor no cecay lipay, soˈlinay macadaay niyam ko satahidang no Kiliyat Picudadan, oha mamipiliˈ kami. Salikaka Liter sanay a pasowal tamiyanan: “Ano icowato ko mipiliˈan namo a lalan, ikor alatek nanay o roma ko mipiliˈan sanay. Awaay ko sangaˈayay a lalan, ano icowato ko mipiliˈan i, wa palemeden ni Yihofa kamo.” Salikorto, micadaan niyam ko satahidang no Kiliyat Picudadan. Toniya pina miheca i, mangalef mangalefay ko matinakoay niyam to citanengay ko sowal ni Liter salikaka. Ano ira ko salikaka itira tora cowa ka hecahecad a katayalan a mipiliˈ, misakadademakan niyam ko sowal ni Liter a salikaka a pakalalok cangranan.

MISATAPANG KO MIKIRIWIˈAY MANILNIL A MITOSILAY NO KAˈORIP

1987 miheca 4 folad, mirienangay kami itini i Niwyok Prokelin saka 83 rayray no Kiliyat Picudadan, tada lipahakay kami. Oya pakafanaˈay tamiyanan a singsi ci Yolisaysi Kelas aci Cike Layte, 24 ko mitakciay. Limaay a folad kalikiay a malahci, 1987 miheca 9 folad 6 romiˈad micudiyapayto kami, kalacafay ci Yohani Kete ato fafahi ningra ci Mali manilnilay tayra i Hayti a matayal.

Nai 1962 miheca salikoray a mikiriwiˈay manilnil a mitosilay malaplapay no Hayti a sifo ikor, awaayto ko micudiyapay i Kiliyat maocor tayra i Hayti. Micudiyap kako aci Taypi to tolo lipay ikor i, tayraay kami i lotok no Hayti, itini 35 aca ko mitosilay a kasakopang matayal. Itiya kaemangayho kami awaay ko nalifetan, itiraay kami tatosa mikilomaˈ i mikiriwiˈay manilnil a mitosilay a lomaˈ. O itiraay a tamdaw tada manikawayto, cowa ka fanaˈ to tilid ko ˈalomanay tamdaw. Masasifoday ko itiraay a sifo, maceriday mifekad ko fodifod ato masasongtolay, maceridayho mifekad ko faliyos.

Soˈliˈlin itiraay a salikaka pasangaran nanay ko kaˈorip, kawra maolahay cangra ci Yihofaan, fanekfekay a mirienang to mitosilay a demak. Maharatengay ako ko cecay malitengay a fafahiyan salikaka, cowa ka fanaˈ to tilid cingra, kawra pakaharatengayho to 150 a sinael. Kodaitay ko salikaka, kamayan a lipahak cangra, adihayay ko mananamay niyam cangranan. Maˈaraw ko i kilacay a tamdaw to romiˈamiˈad milifet to masakenakenaay a pasangar, matongalayto ko sapitosilaw, pasifanaˈ to tamdaw edengan ko Kitakit no Kawas ngaˈ masaysay ko pasangar no tamdamdaw. Isalakat makilimay niyam ko pina a pakingkiwan, ikor mala miceriday misakafahay, mikiriwiˈay misakafahay, malohemay malitengay, tada matemeray ko falocoˈ niyam.

Itiniho i Hayti i, malitemohay ako ko cecay kaemangay mitosilay no Mormon, ci Telefo ko ngangan ningra, kinapinaayto kami malalengo to Fangcalay Cudad. Ikorto no pina miheca i, fahal sanay kako macada ko tikami ningra, sanay ko tikami: “Anocila a taykay wa micadato kako to paputisem! Isaˈayaw itiraho kako i Hayti o no Mormon a mitosilay kako, nohatini sapatikolaw kako tayra malo mikiriwiˈay misakafahay ni Yihofa.” Ikor, soˈlinay cingra ato fafahi patikol tayra i Hayti, pinaayto miheca mala mikiriwiˈay misakafahay.

NAI IWROPA TAYRA I AFRIKA

I Iwropaay a roma a kilac na makecengay ko mitosilay a tayal no Misawacayay Tamdaw ni Yihofa, kawra ngaˈay ngaˈayayto ko pakayraan. 1992 miheca, maocoray kami tayra i Selofenia Lopoeyana a niyaroˈ. ˈAyaw no malinah tayra i Itali, o wama wina ako naitiraay a lomahad. Na malinah kami tayra i Selofenia i, oniya kitakit o faelohay a misieked nai isaˈayaway a Naslafo kitakit. Itiya, isaˈayaway a Naslafo maceriday a mafafolaw. O itiraay mitosilay a tayal isaˈayaw o Austria, Korotia ato Serpia a faˈinayan salikaka ko mikeriday. O roma a kitakit misiekeday nai isaˈayaway a Naslafo, oniya kahacecay a kitakit misaaliay to hapapatireng to niyah a Pitil.

Malinah tayra i Selofenia, pakayni tamiyanan, oha mamitanam mafanaˈ to cowa ka hecad a serangawan, mihatatanam to roma a sowal. Maceriday ko itiraay a tamdaw pasowal: “O sasowalen niyam cowa ko madoloay!” Matatodongay ko sowal nangra, tada pasangarayto! Soˈlin tahasiˈayaw to adihayay a pasangar, kawra mahecaday kami to isaˈayaway, misaˈicel pasayra i tawlikay a demak minengneng. ˈAlomanay salikaka makalimay micada to sasalof no likakawa no Kawas, masemeray kami to madimadiay nangra a makapahay taˈarawan. Maceriday kami minengneng to samaanan ni Yihofa palemed cangra. Miliyaway mahapinang niyam, maceriday i matatodongay a tatokian ci Yihofa, tano sidaˈitay a pakayraan misalof to pasangar. O mahatatanamay niyam isaˈayaw, padamaay tamiyanan itini i Naslafo malaˈosi miremo to masakenakenaay a pasangar, itiraay a malifetay, padamaay tamiyanan padadotoc a macakat.

Kawra, adihayayho ko kafalic mitalaay tamiyanan! 2000 miheca maocoray kami tayra i Ketetiwa no Kaetipan no Afrika. Ikor mafafolaway koniya kitakit, i 2002 miheca 11 folad malinahay kami tayra i Sayrariang, na herek sanayho koniya kitakit to 11 miheca no kafafolaw. Fahal sanay mapacieci a miliyas to Ketetiwa cowa ko madoloay, kawra o isaˈayaw a sapahatatanam padamaay tamiyanan padadotoc a lipahak.

Padadotocay kami tawlikay a miharateng. Itiniay a kilac ˈalomanay ko tamdaw to sapitanamaw to Fangcalay Cudad, tada pakalalokay tamiyanan koni. Paihkalay ko salikaka to soˈlinay a olah, tada mitemeray to falocoˈ niyam. Halafinay a noka fafolaw, tada panikaway to sakaˈorip nangra, kawra kamayan makalim cangra paladaˈ to niyah a dafong. O fafahiyan salikaka sapipafeliaw ci Taypian to rikoˈ. Isalakat cowa ko sapicadaaw ci Taypi, kawra kodaitay sapipafeliaw koniya salikaka, sanay a pasowal: “I kafafolawan a tatokian, o roma kitakit a salikaka maceriday padama tamiyanan, kamito nohatini!” Misetekay to falocoˈ kako aci Taypi mitodong to makapahay taˈarawan nangra.

Ikor, patatikolay kami tayni i Ketetiwa. Kawra, marawraway ko pakayraan no milikecay, miliyaway mifekad ko fodifod. I 2004 miheca 11 folad, mikalicay kami to hikoki a miliyas, itiya 10 kongcin aca ko hamamaˈorong a dafong. I fatad, milafinay kami i kaitiraan no sofitay no Frans, itiya i sera sanay kami a mafotiˈ. Saka tosa romiˈad, tayraayto kami i Reise. Tahira kami i fenpo no Reise i, o lafiito, kawra o itiraay a Iing no fenpo, o singsi no MTS, ato fafahi nangra mitalaay tamiyanan. Mahemekay cangra mitakec tamiyanan a militemoh, misadayay to faedetay a kakaenen ato adihayay a ciyawkeli no Reise. O olah nangra tada dihkoan nanay kami!

Ikorto i, manilnilay kami tayra i Kana to cecay a liyad. Ngaˈayto ko pakayraan no Ketetiwa, patatikolay aca kami tayra. Tora pina a miheca, itira kami matayal to cowa ka halafin malinahay aca tayra i roma a pala, itira tora tatokian malifetayho ko katalawan a macaloh miliyas, cowa ko madoloay. Samanen iraayko kasacefang no salikaka a olah, ho pakahadidi kami! Soˈlin o olah no salikaka nano tahapinangan no finawlan no Kawas, kawra kako aci Taypi misetekay to falocoˈ cowa ka tala sa to olah no salikaka. Tikolen a miharateng, itiya tora mafodifoday a tatokian pakayni tamiyanan tada o masakalimlaan a sapahatatanam.

MALINAH TAYRA I TALIYOK NO ISRAIL

2006 miheca, macadaay niyam naitiniay i congpo a tikami, maocoray no likakawa kami tayra i Taliyok no Israil a matayal. Miliyaw, to faelohay sasowalen, faelohay a serangawan ato mamatanam a faelohay demak mitalaay tamiyanan. O itiraay a tamdaw misakaretengay to no sifo ato no kiyokay a demak, itini to hatiniay a pakayraan a matayal, adihayayho ko nananamen niyam a faelohay a demak. Maolahay kami to i kasakopangay iraay ko masasiromaay kalomahadan a salikaka. Soˈlin cowa ka hecahecad ko sasowalen nangra, kawra kamayan midofdof to sakayat no likakawa a makakedec malacecay, tada o kalimlaanto! O roma i, o ˈalomanay a salikaka itira tahalifaay to sapalifet no paro no lomaˈ, fiyafiyaw, cafay matayal ato cafay micudad, kawra paihkalay cangra to timolo, tada masemeray kami cangranan!

2012 miheca mirienangay kami itini Israil mikiriwiˈay kasapala taykay no Telawifo. Mikitini Kongyen 33 miheca Kocinsic, o finawlan ni Yihofa sakinacecay ˈaloman ko masaˈopoay toniya kilac. Tada matemeray ko falocoˈ niyam itini toniya taykay!

I Taliyok no Israil toya mihecaan, na manilnilay kami tayra milisoˈ to makecengay ko mitosilay tayal a kitakit. Miˈorongan niyam ko pina mitepangan no likakawa a cudad tayra, mirienangayho to itiraay a mitosilay tayal ato mimingay a taykay. O itiraay a kitakit, o cikowangay a sofitay ato pikinsaan ano icowato iraayto, kawra malacafayay kami ato itiraay a mitosilay minaˈonay a misinanot a matayal, mansa cowato ka matalawen.

PATIKOL I AFRIKA

2013 miheca, miliyaway mafalic ko kaˈorip niyam a tayra i Kinsasa no Kangko, itiraay i fenpo matayal. Tada kakahaday no pala i Kangko, iraay ko makapahay a tataparen, kawra maceriday adihayay ko manikaway ato mafafolaway. Isalakat, o harateng niyam: “Mananamay kami to Afrika, ano tayra matayal madoloay sanay miharateng!” Kawra tahirato i Kangko ikor, mangalef tayra i awaay ko kayakay ato lalan a pala, mahapinang sanayho niyam ko adihayay ko hahatatanamen a demak. Kawra misarocoday kami to tawlikay a demak. Tinakoen, soˈlin manikaw ko salikaka, kawra paihkalay to kodaitay a lipahak a harateng. Maolahay cangra to mitosilay, sapirienangaw to saˈopo ato taykay, makalimay cangra a misaˈicel. Roma i, maˈaraway niyam ko wacay i sapalemed ni Yihofa, itiraay mitosilay tayal padadotocay a macakat. I Kangko toya pina a miheca, tada o kalimlaan a tatokian i hakelong no ˈorip niyam. Itira ˈalomanay ko kafanaˈan niyam mahecaday to paro no lomaˈ a ngaˈayay a widang.

Kahererekan no 2017 miheca, mafalicay aca ko katayalan niyam, tayra i fenpo no Nanfi. O sataˈangayay a fenpo a katayraan niyam, itiniay a tayal niyam, cowaho ka malifet niyam isaˈayaw. Kako aci Taypi wa miliyawho minanam to adihayay a demak, kawra o isaˈayaway a nalifetan tada padamaay tamiyanan. Adihayay ko salikaka madimadiay a matayal to pinaay poloˈ a miheca, tada maolahay kami cangranan. Soˈlin i Pitilay a salikaka naitiniay i cowa ka hecad a finacadan ato serangawan, ngaˈayay makakedec malacecay a matayal, tada o kasapaan koni! Misaˈicelay maemin paihkal to safalod no Fangcalay Cudad, micaˈedong to faelohay a capeling, mansa tahacada to sapalemed ni Yihofa ira ko dipayal a rihaday.

Toniya pina a miheca, kako aci Taypi adihayay ko macadaay niyam makapahay a katayalan. Mafanaˈayto kami mananam to cowa ka hecad ko serangawan, adihayayko mananamay niyam to cowa ka hecad a sasowalen. Isalakat tahanini, soˈlin iraayto ko karorayan, kawra macadaay niyam to pakaynian ni Yihofa i likakawa ato salikaka maemin. (ˈOlic 144:2) Pakasoˈlinay kami, itiya mieminay to toki a matayal a sapahatatanam tada o ciepocay, ho ngaˈay matayal saki ci Yihofaan.

Miakoˈiday kako to sapakafanaˈ no wama wina ato sadama ni Taypi, miakoˈidayho to cowa ka hecad a kitiraan a salikaka miterekan nangra a ngaˈayay taˈarawan. Mitapal to hanoikoran, misetekay to falocoˈ kami micada to sapahatatanam no tadamaanay a singsi ci Yihofa.