Padotocen Mitongal ko Olah Iso

1. Misatapang kiso minanam to Fangcalay Cudad i, mananamay ko maanan soˈlinay a kimad?

MAHARATENGAYHO iso misatapang minanam to Fangcalay Cudad ko niyah samaanay ko nafalocoˈan han? Alatek mahapinang iso o iraay ko ngangan no Kawas, tada macekiday. Anca mananamay iso cowa ko papasemsemen no Kawas ko tamdaw i cikok, tada rihadayay ko falocoˈ. Alatek mananamay iso wa ira ko toki miliyaw maˈaraw ko mapatayay a salawina noikor, hanaca malacafay cangranan itini lakoing maˈorip, tada lipahakay ko falocoˈ.

2. Cowa ko pinanam aca to soˈlinay kimad no Fangcalay Cudad, macakatayho kiso i maanan a pakayraan hani? (Ifiso 5:1, 2)

² Padadotoc kiso minanam to Fangcalay Cudad, mamatongal ko olah ci Yihofaan, onini a olah papakalalok tisowanan misaka dademak to minanaman. Misaka dademak kiso to safalod no Fangcalay Cudad, citanengayto ko misaˈosian. Misalofanto iso ko waywayan no niyah, samanen makalimay kiso pakahemek ci Yihofaan. Padadotoc kiso mitodong to kakarayan a Wama, malecad o pitodong no wawa to maolahay cingranan a wama wina.—ˈOsien ko Ifiso 5:1, 2.

3. Ngaˈayay licayen ita ko niyah to maanan a salicay hani?

³ Ngaˈayay kita misaharaterateng: “Palalinien tiya malo Krisciyangho i, matongalay ko olah ako ci Yihofaan anini han? Ikor no micada to paputisem, o harateng ato waywayan ako matongalay ko kalecad ci Yihofaan han? Mangalef itini patalahkal to olah i salikaka, samaanay ko midemakan ako hani?” Ano mahapinang iso ‘mafasaway ko salakatay a olah no niyah,’ aka matoled. Itini saka 1 hahekalan a Krisciyang iraay ko malecaday a pakayraan, kawra cowa ka sawaden ni Yis cangra, cowa ko mamisawad cingra kitanan. (Paˈarawan 2:4, 7) Mafanaˈay cingra to ngangaˈay kita miliyaw a marengreng ko salakatay a olah tiya minanamho to soˈlinay kimad.

4. Onini a lalakaw mamilengo to maanan?

⁴ Onini a lalakaw mamilengo, sasamaan kita mitongal to olah no niyah ci Yihofaan ato tao, dotoc mamilengo kita mihaen to demak papaira to epoc no niyah ato tao.

TONGALEN KO KAOLAH CI YIHOFAAN

5-6. (1) Tarokos ci Pawlo itini pitosilan malifaay ko maanan a pasangaray? (2) O maanan ko pakalalokay ci Pawloan padadotoc matayal saki Yihofaan?

⁵ Matayal saki Yihofaan marenecan nanay ko tarokos ci Pawlo, kawra o mamiremo cingra to adihayay a pasangar. Pakayni sapitosilaw, marariday ci Pawlo maraay ko rarakaten, itira lintad ningra, tayra i maraayay cowa ko madoloay a demak. Na tahalifaay cingra to ‘sakanaopan no cedas’ ato ‘makariˈang no kokong,’ misetiˈanho no misafelitay tamdaw cingra. (2 Korinto 11:23-27) Roma i, soˈlin mikifalocoˈay ci Pawlo padama to salikaka, kawra cowa ka sahto sa ko salikaka miakoˈid cingranan.—2 Korinto 10:10; Filipi 4:15.

⁶ Hano ngaˈay ci Pawlo padadotoc matayal ci Yihofaan hani? Pakayniay cingra i Fangcalay Cudad ato nalifetan no niyah, micalep ko kafanaˈ to makapahay capeling ni Yihofa. (Loma 8:38, 39; Ifiso 2:4, 5) Pakasoˈlinay cingra tada maolahay ci Yihofa cingranan, ano cingrato maolahay ci Yihofaan, mansa misaˈicel cingra padadotoc ‘matayal saki fangcalay finawlan,’ pakayni ko pipatalahkal to olah ci Yihofaan.—Hipray 6:10.

7. Sapitongalaw to olah ci Yihofaan, sasamaan ko pidemak hani?

⁷ Misongilaˈ kita micekiw to Fangcalay Cudad, mamatongal ko kaolah ci Yihofaan. Miˈosi to Fangcalay Cudad i, songilaˈen miharateng ko sinael samaanay padama tisowanan matongal ko kafanaˈ ci Yihofaan. Ngaˈayay licayen ko niyah: “Oniya maˈoningay samaanay paihkal to maolahay ci Yihofa takowanan hani? Mikitini mahapinangay ako, hano mamaolah kako ci Yihofaan hani?”

8. O satolon hano papadama kitaanan matongal ko olah ci Yihofaan?

⁸ Micerid kita mitolon ci Yihofaan, pasowal Cingranan to kihcod a nafalocoˈan no niyah, mamatongal ko olah Cingranan. (ˈOlic 25:4, 5) Papacaˈofen ni Yihofa ko mikifalocoˈay a satolon ita. (1 Yohani 3:21, 22) Fafahiyan salikaka ci Akim itini Asiya sanay: “Satapang maolah kako ci Yihofaan, pakayniay aca i mananamay ako a sifanaˈ no Fangcalay Cudad. Kawra maˈaraw to samaanay Cingra pacaˈof to satolon ako ikor, matongalayto ko olah Cingranan. Oranto i, makalimay kako midemak to kaolahan Ningra a demak.”b

TONGALEN KO KAOLAH TO TAO

9. Hano mafanaˈ kita to padotocay ci Timoti macakat, malo ciolahay ko falocoˈ a tamdaw hani?

⁹ Malo Krisciyang ci Pawlo ikor, mafanaˈay ci Timotian. Ci Timoti o idahiyay a kapah, maolahay ci Yihofaan ato tao. Pasowalan ni Pawlo ko Filipiay a salikaka sanay: ‘Caay ka hela ako ko malecaday ci [Timotian] ko pinangan a tamdaw, edengan cingra ko mikifalocoˈay ciharateng to nano demak namo.’ (Filipi 2:20) Itini cowa ka somowal ci Pawlo to inaneng ni Timoti a milikakawa, cowaho ka somowal to mafanaˈay cingra mikimad. Ano nengnengen i, o maharatengay ni Pawlo tada maolahay ci Timoti to salikaka. Mafanaˈ ko salikaka i kasakopang to aira ci Timoti a milisoˈ, maedeng halamhamay a mitala.—1 Korinto 4:17.

10. Ci Anna ato faˈinay samaanay patalahkal to olah i salikaka?

¹⁰ Mamikilim kita to pakayraan padama to salikaka. (Hipray 13:16) Nengnengen ko fafekangay lalakaw somowalay to samaanay ko demak no salikaka ci Anna. Mifekad ko pakidemay a faliyos ikor, ci Anna ato faˈinay ningra milisoˈay to cecay paro no lomaˈ, mahapinangay to matefaday ko fadahong no lomaˈ nangra, awaayto ko makoracay a rikoˈ cacaˈedongen nangra. Sanay ci Anna: “Mialaan niyam ko rikoˈ nangra mifacaˈ, miaylong, mitepik ikor patikolan cangra. Soˈlin kaemingay a demak koni, pakayniay ko pipatireng niyam to kalawidang cangranan, tahanini kamayanho o ngaˈayay a widang.” Ci Anna ato faˈinay maolahay to salikaka, mansa makahi talaˈayaw a ciepoc ko pipadama cangranan.—1 Yohani 3:17, 18.

11. (1) Misaˈicel kita patalahkal to olah, sasamaan mifiyor to tao alatek? (2) Mikitini Taneng 19:17, patalahkal kita to olah i, sasamaan ko piharateng ni Yihofa hani?

¹¹ Tocerid, ira ko olah ita micada to salikaka, mamahapinang nangra to misaˈicelay kita mitodong ci Yihofaan. Hakowaay ko piakoˈid nangra kitaanan, cowa ka songilaˈ ko kafanaˈ ita alatek. Masowalay i fafekang salikaka ci Akim padotocay miharateng toya na padamaay cingranan a salikaka. Sanay cingra: “Tada miakoˈiday kako to polong na mikeriday takowanan malingad mitosil a salikaka. Tayni cangra i lomaˈ micada takowanan, mitahidang takowanan malacafay mitiyamsim anca malahok, ikor rihaked a panokay takowanan. Anini fanaˈ sanayho kako to adihayay ko mihadakan nangra a ˈicel, hanaca mikitiniay i olah ko pihaen to demak.” Manaokaniw, padama kita to tao, cowa ko mamiakoˈid ko tao kitaanan alatek. Milengo ci Akim toya na padamaay cingranan a tamdaw sanay: “Ngaˈay ko picada nangra takowanan, makalimay kako sapatikoaw cangranan, kawra cowa ka fanaˈ kako to icowaay cangra nohatini. Nikawrira, mafanaˈay ci Yihofa to kihcod, mihaenay mitolonan ako Cingra patado takowanan patiko cangranan.” Matatodongay ko sowal ni Akim, o demak ita i tao soˈlin mimingay aca a demak, maˈaraway ni Yihofa maemin. O pinengneng Ningra to ngaˈayay demak ita malecaday o kalimlaan a sapatoˈaya, o papatikoen Ningra kita, malecad to citadahay kitaanan.—ˈOsien ko Taneng 19:17.

12. O faˈinayan salikaka sasamaan patalahkal to olah i kasakopang? (Nengnengen ko coka.)

¹² Ano o faˈinayan salikaka kiso, sasamaan patalahkal to olah i tao, misaˈicel padama cangranan hani? O cecay ci Ciyawtan kapah salikaka milicayay to malohemay malitengay sasamaan ko niyah mitongal to tayal i kasakopang. Pakahemekan no malohemay malitengay cingra, samanen macakatayto cingra. Ikor, pasowalan no malohemay malitengay cingra sasamaan mitongal to tayal i kopang. Tinakoen, ngaˈay maratar cingra tayra i Kasaˈopoan mihamham to tao, itini i saˈopo tawlik pacaˈof to salicay, micerid malacafay to kasakapot mitosil, hanaca talaˈayaw padama to tao. Mitoor ci Ciyawtan tonini a sapaini midemak ikor, cowa ko kafanaˈ aca midemak tonini a demak, matongalayho ko olah i salikaka. Mananamay ni Ciyawtan, o faˈinayan salikaka cowa ka itini malo dama sikawdan ngaˈ misatapang padama to tao, ˈayaw nonini mamihaento cingra to demak, hanaca malo dama sikawdan ikor, papadotocho mihaen to demak.—1 Timoti 3:8-10, 13.

13. Misetekay to falocoˈ ci Kelistian samaan ko pidemak, telocto miliyaway citatodong malo malohemay malitengay?

¹³ Nao dama sikawdan anca o malohemay malitengay kiso han? Cowa ko mamapawan ci Yihofa to nano demak iso isalakat ato ciolahay a falocoˈ. (1 Korinto 15:58) Nohatini padotoc kiso patalahkal to olah, maˈaraway Ningra. O nalifetan no cecay faˈinayan salikaka ci Kelistian. Mapalahdaway ko tatodong ningra malo malohemay malitengay tada matoleday, kawra sanay cingra: “Misetekay kako to falocoˈ, ano ira anca awa ko ˈinorong i kasakopang, papairaen ko ciolahay a falocoˈ, misarocod matayal saki Yihofaan.” Ikor, miliyawan nilnilen cingra malo malohemay malitengay. Sanay cingra: “Miliyaw manilnil kako, marawraway ko falocoˈ. Kawra ano siniˈadaay ci Yihofa takowanan, papiliyaw malo malohemay malitengay takowanan, misetekay kako to falocoˈ misaˈicel midemak, samanen maolahay kako Cingranan, maolahayho to salikaka.”

14. Mikitini sowal no fafahiyan salikaka i Ciyociya mananamay iso ko maanan?

¹⁴ O finawlan ni Yihofa pasayraay i romaroma tamdaw patalahkal to olah. (Matay 22:37-39) Itiniay i Ciyociya a fafahiyan salikaka ci Yilina sanay: “Satapang, mitosil kako pakayniay aca kaolah ci Yihofaan. Kawra pakayni noka tongal a maolah ci Yihofaan, matongalay ko olah ako to tao. Misaˈicelay kako miharateng to malifaay nangra ko maanan a pasangaray, dotoc misaharaterateng manan ko hasowal ho matemer ko falocoˈ nangra. Mangalef ko pihaen ako patado cangranan miharateng, mangalefay ko kalim sapadamaaw cangranan.”—Loma 10:13-15.

PATALAHKAL TO CIOLAHAY FALOCOˈ, ADIHAY KO SAPALEMED

15-16. Nengnengen ko coka. Patalahkal to ciolahay falocoˈ papaira to maanan a sapalemed?

¹⁵ Ano patalahkal kita to ciolahay falocoˈ i salikaka, cowa ko cangra aca ko caciepoc. Mafekad ko lifong i 2019 miheca i, o cecay ci Pawlo a salikaka ato fafahi mipadangay to ˈalomanay matoˈasay fafahiyan salikaka misaka dademak to pingpan anca soci a mitosil. O cecay fafahiyan marawraway isalakat, ikor mafanaˈayto sakadademak to pingpan, telocto, tano soci cingra mitahidang to salawina mirienang to Piharatengan to Kinafalah ni Yis a Saˈopo i tilifi. 60 ko tayraay a mirienang! Misaˈicelay ci Pawlo ato fafahi, adihayay ko macadaay a epoc nonini fafahiyan salikaka ato salawina ningra. Ikor, pasowalan nonini fafahiyan salikaka ci Pawlo: “Tada akoˈidayto ko pipadama namo tamiyanan o matoˈasay. Tada ciharatengay ci Yihofa tamiyanan, ano kamoto i, marorayay a mipadama tamiyanan, cowa ko mamapawan ako konini.”

¹⁶ Mikitini tonini nalifetan mananamay ni Pawlo ko masakalimlaan a demak. O ciolahay falocoˈ mikikakaay to sifanaˈ ato inaneng ko nika masakalimlaan. Sanay cingra: “O nano kasakilac kantok kako. Nohatini mafanaˈayto kako, soˈlin mapawanayto no salikaka ko na mihadakan ako a kimad, kawra maharatengayho nangra to na samaanay kako padama cangranan.”

17. Patalahkal kita to ciolahay falocoˈ, o cimaho ko mamilifok to haepoc?

¹⁷ Ano patalahkal to ciolahay falocoˈ i tamdaw, o niyahto mamacada ko caay ka harateng a sapalemed. Iraay ko mahaenay a nalifetan ni Ciyawnasen i Niwsilan. To cecay kafaedetan a Pieneman romiˈad, maˈaraway ko misakafahay cecayay aca mitosil. Oranto i, pacafayan ni Ciyawnasen mitosil konini misakafahay to lipalipay no Pieneman, itiya i, cowa ka harateng ni Ciyawnasen to mamalifok no niyah ko adihayay sapalemed. Sanay cingra: “Itiya, cowa ka olah kako mitosil. Kawra mihapinangan ako to samaanay cingra mitosil, maˈaraw ko nika laˈosi no mitosilay demak ningra, palidlid sanayto kako maolah to mitosilay a demak. Mala sangaˈayayto a widang kami tatosa, itini pipadama ningra, macakatay kako, cowa ko nika olah aca to mitosilay, matongalayho ko piingid ci Yihofaan.”

18. Halamhamay ci Yihofa kitanan sasamaan ko pidemak?

¹⁸ Halamhamay ci Yihofa kitanan maemin matongal ko kaolah Cingranan ato salikaka. Mikitini tonini lalakaw mananamay ita, micekiw ato midotim to Fangcalay Cudad, halo micerid a mitolon, wa matongal ko kaolah ci Yihofaan. Sapitongalaw kita to olah i salikaka, mamakahi talaˈayaw a padama cangranan. Matongal matongal ko olah ita i, o kalalaˈed ci Yihofaan ato salikaka mamatongal ko kaaingid. Onini masakalimlaan a kalawidang tatahadaˈoc, awaay ko tolas!