Kaemangay Tamdaw, Ikor no Micada to Paputisem ka Padadotoc a Macakat

1. ˈAlomanay kaemangay a tamdaw malahciayto midemak to maanan a demak?

TO mihecahecaan ˈalomanay ko micadaay to paputisem a kaemangay malo Krisciyang. Maharekayto kiso pahawang tonini han? Ano hatiraay i, patadoay ko salikaka tisowanan a mahemek, ano ci Yihofato malecaday a mahemek. (Taneng 27:11) Tikolen miharateng malahciayto iso midemak ko maanan a demak. Malalok kiso micekiw to Fangcalay Cudad, pinaayto miheca alatek. Pakayni pinanam, pakasoˈlinay kiso o sowal no Kawas ko Fangcalay Cudad. Kalimlaan i, mafanaˈayto kiso mikitiniay ci Yihofaan ko Fangcalay Cudad, hanaca palahaday to olah Cingranan. Matongalay ko kaolah iso ci Yihofaan, mansa misetek to falocoˈ patafang to tireng micada to paputisem, malo sikawdan Ningra. Tada ngaˈayay ko demak iso!

2. Onini a lalakaw mamilengo to maanan hani?

² ˈAyaw no micada to paputisem, o pakasoˈlin iso itini roma pakayraan madeng na micadaay to sapalifet, kawra pakayni palidlid saan lomahad, o tatahalifaho kiso to faelohay a sapalifet. Wa mihalaka ci Satan milowan to olah iso ci Yihofaan, ho ecato pidoko kiso ci Yihofaan. (Ifiso 4:14) Aka a palaˈosien ci Satan! Sasamaan kiso ngaˈ padadotoc madimadi ci Yihofaan, midofdof to miketonan no niyah patafang to tireng hani? O papadadotoc kiso macakat, ‘pasayra i matenesay a macakat.’ (Hipray 6:1) Mihaenay, o sasamaan ko pidemak hani? Onini lalakaw mamilengo tonini a salicay.

SASAMAAN KO PIDEMAK NGAˈ PADADOTOC MACAKAT?

3. O kahacecay a Krisciyang ikor no micada to paputisem o mamidemak to manan hani?

³ Ikor no micada to paputisem, kita o kahacecay tamdaw mamidofdof to sapalimoˈot no tarokos ci Pawlo to itiniay Ifiso a Krisciyang. Sowal ningra o Krisciyang o ‘papadadotoc a lomahad,’ sakoniya sowal wa padadotoc a macakat. (Ifiso 4:13) O kacakat no Krisciyang i pihakelongan palinian ni Pawlo to ka lomahad no wawa i notirengan. Hofoc hananayho a ˈengaenga palipahakay ato palikoay to wama wina ningra, kawra cowa ko ngangaˈay cingra tahadaˈoc kamayan o cowa ka lomahad a wawa. Mataˈlifto ko toki, o ‘fafalahen ningra ko pinangan no wawa.’ (1 Korinto 13:11) Malecaday ko Krisciyang. Ikor no micada to paputisem, papadadotoc kita a macakat. Dotoc, mamilengo kita to pina pakayraan padama kitaanan malaˈosi konini a patosokan.

4. Palahad kiso to maanan a capeling wa ngaˈay padadotoc a macakat itini pihakelongan? Tadtaden. (Filipi 1:9)

⁴ Tongalen ko olah ci Yihofaan. Na maolahayto kiso ci Yihofaan, kawra o papadadotocho kiso mitongal to olah Cingranan. O tarokos ci Pawlo itini Filipi 1:9 mihadakay to cecay pakayraan. (ˈOsien.) Patadoay ci Pawlo to Filipiay a Krisciyang mitolon, mitokel cangranan ‘matongal matongal ko ciolahay falocoˈ.’ Mihaenay, o olah ci Yihofaan ngaˈayay tongalen, o pakayraan i ‘ira ko matatodongay a sifanaˈ, masongilaˈ ko kacipinang to demak.’ Matongal ko kafanaˈ ita ci Yihofaan, mamatongal ko olah Cingranan, matongal ko kasemer to capeling Ningra ato pinangan a dademak. Mihaen, mamatongal ko kalim ita pakahemek ci Yihofaan, cowa ko caciharateng midemak to patoleday Cingranan a demak. O mamisaˈicel kita mihapinang to o manan ko araaw ni Yihofa, ato sasamaan mitoor to harateng Ningra a midemak.

5-6. Sasamaan kita mitongal to olah ci Yihofaan hani? Tadtaden.

⁵ Matongal ko kafanaˈ ita ci Yisan, mamatongal ko olah ci Yihofaan, samanen malefotay ci Yis paihkal to capeling no Wama ningra. (Hipray 1:3) Mafanaˈ ci Yisan sangaˈayay a pakayraan i micekiw to sepat Ratoh a Cudad. Ano cowaho ka palahad kiso to romiˈamiˈad miasip to Fangcalay Cudad a ngaˈayay nanaman, ngaˈay nohatini misatapang mihaen to demak han? Ano miasip kiso to pakayniay ci Yisan a maˈoningay i, kiriwiˈen a misinanot ko capeling ningra. Madoloay ingiden ci Yis, damsayay a miˈafofo to wawa. (Marko 10:13-16) Parihadayay cingra to nisawawaan, mansa o nisawawaan itini ˈaˈayaw ningra haratengay sanay mihadak to sowal. (Matay 16:22) Soˈlinay i, mihaen ko demak ni Yis o mitodongay to kakarayan a Wama. Tada madoloay a ingiden no tamdaw ci Yihofa, ngaˈay kita micerid mitolon Cingranan, mifanaˈ Cingranan to nafalocoˈan a demak. Wa ngaˈay rihaday ko falocoˈ ita, cowa ko mamalikaf Cingra kitaanan. Maolahay Cingra kitaanan, ciharatengayho kitaanan.—1 Pitiro 5:7.

⁶ Iraay ko siniˈadaay falocoˈ ni Yis to tamdaw. Tarokos ci Matay sanay: ‘Maˈaraw ningra ko ˈalomanay tamdaw, siniˈadaay cangranan, samanen masamsamay no tamdaw cangra, awaay ko pitadiˈecan, mahecaday awaay ko pakaenay tamdaw a lopayˈay siri.’ (Matay 9:36) Mahaenay ci Yihofa han? Sowal ni Yis: ‘O kakarayan a Wama ako caay kakahi matekop ko cecay no sasafaay a tamdaw.’ (Matay 18:14) Onini a sowal tada padihkoay to falocoˈ no tamdaw! Soˈlinayto, matongal ko kafanaˈ ita ci Yisan, mamatongal ko olah ci Yihofaan.

7. Malacafay to matenesay a salikaka micawmaˈ pakayni tisowanan iraay ko manan a epoc hani?

⁷ Roma i, adihay ko kafanaˈ iso to matenesay a salikaka, o mamatongal ko olah ci Yihofaan, mihaen o ngangaˈayto padadotoc macakat. Mahapinangay iso cangra tada lipahakay han? Misetek cangra to falocoˈ midoko ci Yihofaan, caay ka makesem. Ngaˈayay papisowalen iso cangra to kalimlaan a nalifetan no niyah matayal saki Yihofaan. Ano mamidemak kiso to cecay kalimlaan a sasaˈosien, ngaˈayay licayen cangra iraay ko maanan a sapaini. Haratengen: ‘Mihoped to ciepocay a harateng, wa malaˈosi ko demak.’—Taneng 11:14.

8. Ano cisasa kiso to sowal no Fangcalay Cudad o soˈlinay kimad hokira, sasamaan ko pidemak hani?

⁸ Falahen ko cisasaay harateng. Masowalay i saka 2 fatac, mihalakaay ci Satan miconged tisowanan macakat i pihakelongan. O cecay pakayraan ningra itini falocoˈ iso mikosam to cisasaay a sapaloma, ho ecato pakasoˈlin kiso to pina a kimad no Fangcalay Cudad. Tinakoen, mamalitemoh iso ko miowingay to sinkalon a tamdaw. Kaemangho kiso i caay pisongilaˈ miharateng tonini a demak alatek, kawra itini picudadan mananamay iso konini a pakangodoay to Kawas a sasowalen. O sowal no singsi hato matatodongay a tengilen, kawra na cowa pisongilaˈ cangra micekiw to wacay iraay materek ko Misangaˈay a Tatapangan. Haratengen ko safalod i Taneng 18:17, sanay ko sinael: ‘Salakatay somowal to demak a tamdaw, hato matatodongay nengnengen; ira sato ko roma tamdaw, mahapinangayto ko soˈlinay a demak.’ Itini picudadan matengil iso ko maanan, aka haemin han micada. O mamisongilaˈ kiso miharateng to Kimad no Fangcalay Cudad, mikilimho to mitepangan no likakawa a cudad. Wa ngaˈayho kiso masasowal to na pakasoˈlinay to sinkalon isalakat a salikaka, licayen cangra hano pakasoˈlin cangra to iraay materek ko ciharatengay to tamdaw a Misangaˈay a Tatapangan. Mihaen a masasowal o papadama tisowanan mihapinang to soˈlinay a demak.

9. Mikitini nalifetan ni Milisa mananam iso ko maanan?

⁹ Cecay fafahiyan salikaka ci Milisa ikor no misongilaˈ micekiw to pakayniay misangaˈay a wacay i, adihayay ko malifokay a epoc.b Sanay cingra: “Ano pasifanaˈ ko picudadan to sinkalon i, pakasoˈlinay ko tamdaw to hatiniay a sasowalen. Satapang aca cowa ka timolo kako misiˈayaw to sasa no niyah, samanen calemcemay to cowa ko papakaremo to sapalifet ko pihakelongan no niyah. Kawra ikor miharateng kako, cowa ka olah ci Yihofa patelas saan kita midoko Cingranan. Orato, satimolo sanay kako misiˈayaw to kacisasa no niyah. Miasipay kako to Iraay ko Ciharatengay to Tamdaw a Misangaˈay a Tatapangan Han? sanay a cudad, iraho ko Namisangaˈan ko ˈOrip Han? ato Pipowaran no ˈOrip—Sasimsimen a Lima Salicay onini tosa a cudad. Onini a lakakaw padamaay takowanan mifalah to cisasaay a harateng. Ano kalikiay kako mihaen to demak tada o ngangaˈayto!”

10-11. O manan ko papadama tisowanan mitafo to makoracay i waywayan? (1 Tisalonika 4:3, 4)

¹⁰ Misetek to falocoˈ eca pidemak to malafoay a demak. Itini kaemangan a tatokian, ciˈicelay ko coos no tireng. Latekay miroeroay ko tao tisowanan, papidemak tisowanan to malafoay a demak. Maolahay ci Satan midoedo kiso to coos no niyah a midemak. Sasamaan kiso ngaˈ mitafo to makoracay a waywayan hani? (ˈOsien ko 1 Tisalonika 4:3, 4.) Ano mitolon kiso ci Yihofaan i, hadaken ko nafalocoˈan a harateng, hanaca micangacang Cingranan pafeli to ˈicel tisowanan midemak to matatodongay a demak. (Matay 6:13) Haratengen, makalimay ci Yihofa padama tisowanan, cowa ka sapilikafaw tisowanan. (ˈOlic 103:13, 14) Wa ngaˈay kiso mikitini Fangcalay Cudad milifok to sapadama. O masowalay i fafekang ci Milisa na misaˈicelay micoˈay to cowa ka korac a coos, sanay cingra: “Micekiw to Fangcalay Cudad to romiˈamiˈad padamaay takowanan ira ko ˈicel padotoc midemak to matatodongay a demak. Onini a nanaman padamaay takowanan miharateng, oni Yihofa kako, itini kaˈorip ako cowa kangaˈay awa Cingra.”—ˈOlic 119:9.

¹¹ Aka o niyah saan ko miremo tonini a pasangaray, masasowal to wama wina. Soˈlin pasowal cangranan tonini no tekedan a harateng cowa ko madoloay, kawra kalimlaan mihaen to demak. Sanay ci Milisa: “Mitolonay kako micangacang ci Yihofaan pafeli takowanan to timolo, dotoc pasowalanto ko wama to pasangaray no niyah. Ikorto rihadayayto kako. Mafanaˈay kako maedeng malikoan nanay ci Yihofa takowanan.”

12. Sasamaan kiso ngaˈ citaneng ko misaˈosian?

¹² Tooren ko safalod no Fangcalay Cudad a misaˈosi. Palidlid saan kiso a lomahad, wa matongal ko pasalat a misaˈosi ko niyah. Kawra, citolasayho ko nalifetan iso i nokaˈorip, sasamaan kiso ngaˈ eca ka raraw ko misaˈosian, mipalak to kalawidang no niyah aci Yihofaan hani? (Taneng 22:3) Cecay ci Kali a fafahiyan salikaka milengoay o maanan ko padamaay cingranan inaneng ko misaˈosian. Mahapinangay ningra ko matenesay a Krisciyang ano misiˈayaw to masakenaay a pakayraan i, cowa pisaali to rikec ngaˈ mafanaˈ a midemak. Sanay cingra: “O cacipinang kako to safalod no Fangcalay Cudad, cowa ko kafanaˈ aca to sarikec.” Ano miasip to Fangcalay Cudad i, ngaˈayay miharateng kiso: “Onini a sinael pasowalay takowanan, samaanay ko piharateng ni Yihofa hani? Itini sinael iraay ko maanan a safalod o ngangaˈay sakadademaken ako hani? Ano iraay i, sakadademaken ako wa milifok to maanan a epoc hani?” (ˈOlic 19:7; Isaya 48:17, 18) Miasip kiso to Fangcalay Cudad halo pidotim to safalod i lalomaˈ, wa madoloto inaneng ko misaˈosian, pakahemek ci Yihofaan. Ka padadotoc a macakat tonini a demak. Mihaen, ano malitemoh iso ko cowa ka lecad a pakayraan i, soˈlin awa ko rikec mamafanaˈ a midemak, samanen cipinangayto kiso to samanay ko pinengneng ni Yihofa to demak.

13. O ngaˈayay widang iraay ko maanan a pifiyor tisowanan? (Taneng 13:20)

¹³ Piliˈen ko maolahay ci Yihofaan a tamdaw malo widang iso. Masowalay i fafekang, o mipiliˈan iso a widang itini kalomahad iso i pihakelongan taˈangayay ko pifiyor. (ˈOsien ko Taneng 13:20.) Cecay ci Sara a fafahiyan salikaka na malahdaway ko lipahak to cecay liyad, kawra ikor tawlikayto, o maanan ko padamaay cingranan hani? Sanay ci Sara: “Itini pisaalian ako a tatokian i, masadakay ko ngaˈayay widang! Cecay fafahiyan salikaka kalacafayay takowanan to lipalipay minanam to Mikecolay. Iraayho ko roma widang padamaay takowanan, mansa misatapangay kako itini saˈopo pacaˈof to salicay. Itini pifiyor no ngaˈayay widang, matongalay ko pisaˈicel ako micekiw ato mitolon. Telocto, mangalefay ko kangaˈay no kalalaˈed ako ci Yihofaan, miliyawayto kako a lipahak.”

14. Samanay ci Colien pakahela to ngaˈayay a widang hani?

¹⁴ O roma tamdaw ngaˈayay ko pifiyor tisowanan, sasamaan kiso mahela ko mahaenay a widang hani? Ci Colien o malohemay malitengay nohatini, sanay cingra: “Kaemangho i, mirienang to mitosilay adihayay ko kafanaˈan ako ngaˈayay a widang. Fanekfekay konini a widang, padamaayho takowanan mihapinang to kalipahakan a demak ko mitosilay. Mihaenay, misatapangay kako patireng to patosokan, mirienang to mieminay to toki matayal saki Yihofaan. Mahapinangay ako itiya, isalakat o kalecadan no mihecaan ko micawmaˈan ako, telocto malawaay ko ngaˈayay a toki micawmaˈ to ngaˈayay a widang. Ikor, itini Pitil mafanaˈay to adihayay ngaˈayay a widang. Maˈaraw ko taˈarawan nangra, mananamay ako itini misalamaay a demak inaneng ko misaˈosian, padamaay konini takowanan matongal ko piingid ci Yihofaan.”

15. Pakayni sapicawmaˈaw to masamaanay a tamdaw, patalipaˈelalan ni Pawlo ci Timoti to maanan? (2 Timoti 2:20-22)

¹⁵ Ano mahapinang iso micawmaˈ to roma tamdaw i kasakopang mamipalak to kalalaˈed iso aci Yihofaan, sasamaanto hani? Mafanaˈay ko tarokos ci Pawlo to itiyaay a kasakopang, o waywayan no roma tamdaw cowa ka lecad to Krisciyang, mansa patalipaˈelalay ci Timotian miliyas to mahaenay a tamdaw. (ˈOsien ko 2 Timoti 2:20-22.) Tada kalimlaan ko kalalaˈed ita ci Yihofaan, saka lawidangaw ci Yihofaan, adihayayto ko misadakan ita a ˈicel, mihaenay cowa ko mamihayi kita papipalaken ko cima tamdaw tonini kalimlaan a kalawidang.—ˈOlic 26:4.

PATIRENG TO PATOSOKAN PAPADAMA TISOWANAN PADADOTOC A MACAKAT

16. O mamipiliˈ kiso to masamaanay a patosokan hani?

¹⁶ Patireng to ciepocay tisowanan a patosokan. O mipiliˈan iso a patosokan o papaˈicel to pakasoˈlin iso, padama tisowanan malo matenesay a Krisciyang. (Ifiso 3:16) Sapisalofaw kiso to nanaman micekiw ato miasip to Fangcalay Cudad alatek. (ˈOlic 1:2, 3) Sapiceridaw kiso a mitolon alatek, hanaca pacakat to kangaˈay no satolon. Itini pipiliˈ to salama ato misaka dademak to toki mahapinangay iso mamitongal to miˈimeray no niyah alatek. (Ifiso 5:15, 16) Maˈaraw ni Yihofa kiso misaˈicel a macakat, maedeng o mamahemek Cingra.

17. Padama to roma tamdaw mamilifok kiso to maanan a epoc?

¹⁷ Padama kiso to tao, o mamalo matenesay ko niyah. Sowal ni Yis: ‘O paladaˈay ikakaay ko lipahak to milayapay.’ (Dmak 20:35) Ano sakadademaken iso ko toki ato ˈicel padama to roma tamdaw, maedeng o tataˈangay ko lipahak. Ngaˈayay patireng kiso to patosokan, padama to matoˈasay malonayay ko tireng a tamdaw i kasakopang. Alatek wa ngaˈay kiso patado cangranan micakay to dafong, anca pasifanaˈ cangranan minanam misaka dademak to tingnaw. Ano o faˈinayan a salikaka kiso, ngaˈayay patireng kiso to patosokan malo dama sikawdan, mihaen wa ngaˈayto kiso adihay ko demak i salikaka. (Filipi 2:4) Wa ngaˈayho kiso pasayra i potalay no kasakopang a tamdaw paihkal to ciolahay falocoˈ, pasowal cangranan to ngaˈayay lihaf no Hongti Kitakit. (Matay 9:36, 37) Ano ngangaˈay i, sarocoden micangacang ko mieminay to toki matayal saki Kawas a patosokan.

18. Mirienang to mieminay to toki matayal saki Kawas sasamaan padama tisowanan macakat?

¹⁸ Miemin to toki matayal saki Kawas papaira to adihayay a toki iso padadotoc a macakat. Ano ngaˈay kiso misakafah, wa ira ko toki mirienang to SKE, itini Pitil matayal anca mirienang to patirengay a tayal no likakawa. Ci Kaylin o kaemangay a misakafahay fafahiyan salikaka, sanay cingra: “Ikor no micada kako to paputisem ngaˈay padadotoc a macakat kalimlaan a lalangian i, miceriday malacafay to matenesay a salikaka mitosil. O taˈarawan nangra pakalalokay takowanan micalep a micekiw to Fangcalay Cudad, hanaca misaˈicel pacakat to inaneng no niyah a pasifanaˈ.”

19. Padadotoc a misaˈicel macakat kiso, wa milifok to maanan a sapalemed?

¹⁹ Padadotoc kiso misaˈicel a macakat, mamilifok to adihayay sapalemed. Cowa ko cacoliyaˈ kiso to kaemangan ngaˈayay a toki micangacang to mamalahorac a patosokan. (1 Yohani 2:17) Cowa ko papakayni kiso i kararaw no misaˈosian micada to roray. Masafelitay, wa milifok kiso to soˈliˈlinay a kalaˈosi ato lipahak. (Taneng 16:3) O ngaˈayay a taˈarawan iso o papakalalok to cowa ka lecad ko mihecaan a salikaka. (1 Timoti 4:12) Kalimlaan i, o papakahemek kiso to falocoˈ ni Yihofa, wa iraho ko tangongolay a kalawidang Cingranan, telocto aira ko rihadayay a falocoˈ ato karenec.—Taneng 23:15, 16.