Macada ko Kaciharateng no Tao, Malifokay ko Epoc i Hakelong no ˈOrip

O ciwlo no Kiyokay ko wama ako, mansa to lipalipayan papacem miseraan ningra kami tayra i kiyokay picudadan no kaemangay, 11 ko toki i, malacafayay kami a milihay. Herek no lahok, malacafayay kami to wina tayra i Hongti Kitakit Kasaˈopoan. Ihkalay mahapinang niyam ko kasasiroma noniya tosa a pihakelongan.

Paladaˈan no wina ko halafinay miheca a ngaˈayay widang ningra, ci Pawpo Hacisen aci Malien Hacisen to mananamay a kimad, ikorto mala Misawacayay Tamdaw ni Yihofa cangra. Isaka 1958 miheca, miˈorongan no salikaka ci Pawpo aci Malien kako ato wawa nangra, tayra i Niwyok mirienang to faloay romiˈad a Araaw no Kawas a Koksay Taykay. Tikolen a miharateng i, to sapiˈorongaw takowanan, maedeng misaˈicelay cangra, kawra mirienang toniya taykay tada o kalipahakan a romiˈad.

O KACIHARATENG NO SALIKAKA MIKOWADAY TAKOWANAN MIFALIC TO LINGAD NO KAˈORIP

Moetep ira ko pina ko mihecaan ako i, itiniay i nociw ko kamaroˈan niyam. Maolahay kako midimokos to no lomaˈ a pinaˈorip, mansa ciharatengay malo ising no ˈaˈadopen. Pasowalan no wina ko malohemay malitengay to niharatengan ako, sidaˈitay patalipaˈelal takowanan konini malohemay malitengay nohatini o ‘salikorayto ˈawaled’ sanay. Papiharatengay takowanan, pi:na a mamihecaan micudad to taykak sasamaan mifiyor to kalalaˈed ako ci Yihofaan. (2 Timoti 3:1) Oranto, hawadanto ako ko picudad to taykak.

Micudiyap to kawcong i, cowaho ka fanaˈ to mamimaan kako. Soˈlin to lipalipay masadakay kako mitosil, kawra cowa ka olah kako mitosil, awaay ko harateng sapisakafahaw. O wama ato faki cowa ko Misawacayay Tamdaw ni Yihofa, pakalalokay cangra takowanan tayra i Toronto i cecay taˈangayay hoking a kosi miemin to toki matayal, samanen ˈakawangay ko saaroˈan no faki itira. Ikor, tayraayto kako tora kosi.

Itini i Toronto, marariday kako miciyapan, adihayayho ko mapalakay a toki malacafay to i papotalay no kasakopang a tamdaw, telocto marariday malawa ko midokoay a demak. Cowa ko Misawacayay Tamdaw ni Yihofa ko akong, na malacafayay kako to akong, mapatay cingra ikor sapikilimawho kako to pikilomaˈan.

Iˈayaw ya mialaay takowanan mitaykay a mararamoday ci Hacisen malecaday o wama wina ako, paitinian nangra kako i lomaˈ nangra maroˈ, hanaca padama takowanan padadotoc miingid ci Yihofaan. 1960 miheca, kako ato wawa nangra ci Yohani malacafayay mipaputisem. Misatapangay ci Yohani malo misakafahay, kako i, pakalalokan micerid to mitosilay a demak. Mahapinangto no salikaka ko nika cakat ako, ikor manilnilay kako malo sikawdan no Pahatatanamay a Saˈopo.a

MAHELAAYTO KO NGAˈAYAY A FAFAHI HALO MISATAPANG A MISAKAFAH

1966 miheca, mararamoday kako aci Lanti Poci salikaka, o fanekfekay misakafahay cingra, sakatayraaw i misaaliay to adihayay mitosilay a kilac matayal. Cecay milisoˈay to kasakopang niyam a kantok mikiriwiˈay ciharateng tamiyanan, pakalalokay tayra i Antali Awliliya a pala padama to itiraay a kasakopang. Oranto, maharek mitafo to rikoˈ malinahayto kami.

Tangasa i Awliliya i, misatapangto kako malo miceriday misakafahay, samanen madengaay no nika fanekfek ni Lanti ko falocoˈ ako. Misarocoday kako a misakafah, ikorto malifetay ko taˈangayay a hemek, samanen marariday kako sakadademak to Fangcalay Cudad ato padama to tao cipinang to kimad no Fangcalay Cudad. Itini i Awliliya mahemekay kako padama to cecay mararamoday mifalic to kaˈorip, salikor malo sikawdanto ni Yihofa cangra.

MINANAM TO FAELOHAY SOWAL MAFALICAY KO PIHARATENG

Tayra kami i Toronto i, malitemohay ko salikaka ci Anote Maykenamala, itini i Pitil o cecay mikayatay a salikaka cingra. Milicayay ciharatengay kami malo mikiriwiˈay misakafahay hokira, tangsolay kako pasowal: “Ciharatengay! Ano cowa ko tatayra i Kowipike, ano talacowato ngaˈayayto.” Itiya, o sano Fransay ko sowal a Kowipike tada masasifoday, itiraay a tamdaw milengatay to sapisatekedaw, sapiliyasaw to Kanata. ˈAlomanay sano Padakaay ko sowal a Kanata tamdaw mapiliˈay to itiraay pala, mafiyoray kako.

Sanay ko sowal no salikaka ci Anote: “Nohatini, edengan o mikiriwiˈay misakafahay ko miocoran no fenpo tayra i Kowipike.” Tangsolay kako mihayi tayra. Mafanaˈay kako to makalimay ci Lanti tayra a matayal. Ikor, mahapinangay ako to tada o citanengay a saˈosi konini.

Kako aci Lanti minanamay tono Frans a sowal to lima lipay, ikor malacafay to cecay mararamoday tayra i Mongtere maedeng 540 kongli ko karaay a Limoski. Itiya cowa ka tadangaˈay kono Frans a sowal ako, maharatengay ako kinacecayay itini i saˈopo mihadakay to cecay salasil, aira ko “taypiyaw no taciw” sanay a pasowal, ˈarawhan o sasomowal kako to “taypiyaw no Austria” wa saan.

Itini Limoski, ˈalomanayto ko cafacafay niyam, iraay ko sasepat caho ka ciraramod a fafahiyan salikaka, ato ca Haperto mararamod ato tatosa fafahiyan wawa nangra. Miesoyay to cecay pitoay ko kafotiˈan a taˈangayay lomaˈ, itiraay maroˈ ko polong a misakafahay, maˈaˈesal to sapiesoy a payci. O Kohecalay Lomaˈ hananay niyam, samanen o papotal ato hecek tano kohecalay a misadit. 12 tangasa 14 ko itiraay maroˈ a tamdaw. O mikiriwiˈay a misakafahay kako aci Lanti, nai dafak tangasa dadaya i papotalay kami mitosil, kawra mahemekay kami iraayto ko pacafayay tamiyanan mitosil, ano o kasienawanto a dadaya hatiraayto.

Kami ato madimadiay misakafahay makakedecay kami, malecaday o paro no lomaˈ. Nolatekay i papotalay kami a mingiro malaholol. Iraay ko “pisatolonan a romiˈad” niyam, paˈemodan to kodasing ko tolon. O cecay faˈinayan salikaka midatokay, mansa to Pieneman a dadaya marariday kami malacafay romadiw a makero.

Itini Limoski tada ngaˈayay ko minaroˈan no mitosilay demak! Mahemekay kami itini lalomaˈ no lima miheca iraay ko papina pacekiwan micadaay to paputisem. Macakatay ko mitosilay no kasakopang 35 ko kaˈaloman.

Itini Kowipike, micadaay kami to sapahatatanam to mitosilay a tayal. Maˈaraw niyam to samaanay ci Yihofa itini pitosilan padama tamiyanan, midimokos to sakaˈorip niyam. Roma i, maolahayto kami to somowalay tono Frans a tamdaw, o sowal ato serangawan nangra. Padamaay tamiyanan misakakahad to falocoˈ, maolah to romaroma serangawan.—2 Korinto 6:13.

Cowa ka harateng, talifahal sa ko fenpo palinah tamiyanan tayra i Sinpolon no Telakati a pala. Onini a kafalic tada pasangaran nanay kami, samanen satapang sanayho a miesoy to cecay lomaˈ, maharekayto kako makakiˈok to cecay picudadan, aitira kako mala singsi. Roma sa i, satapang sanayho ko papina pacekiwan mala mitosilay, hanaca mipatirengay kami to faelohay a Kasaˈopoan.

Pinaay romiˈad mitolon kami tonini a demak, tayraay kami i Telakati a minengneng, cowa ka hecad to i Limoskiay. Kawra misetekay to falocoˈ kami, ano o satahidang ni Yihofa i, o tatayra kami. Milifet ci Yihofaan, telocto padamaan ni Yihofa kami miwanik to sacona. (Malaki 3:10) Ci Lanti patalahkalay to pakasoˈlinay ci Yihofaan kinafalahay a falocoˈ ato mafanaˈay pakatawa, onini maˈesalayto ko cariraw no falocoˈ.

Ora kalinahan niyam a kasakopang, edengan ci Lopot Losi ko malohemay malitengay. Misakafahay cingra ato fafahi ci Linta, mahofoc cangra to saka cecay wawa i, padadotocay itini tonini kasakopang. Soˈliˈlin mamidimokos cangra to wawa, kawra dihkoay a militemoh tamiyanan. Maˈaraw ko nika fanekfek nangra, ˈifowa a mitosil i, makowaday ko falocoˈ niyam.

MAKAHIAY MICADA TO SACORCOR, MILIFOK TO ADIHAYAY SAPALEMED

Itira i Telakati misakafah kami to tosa miheca ikor, manilnilay a milisoˈ to kasakopang. Cowa ka harateng koni kafalic. Itini i sano Padakaay ko sowal a kasakilac matayal to pito a miheca, ikor maocoray tayra i Kowipike sano Fransay ko sowal a kasakilac. O itiniay i Kowipike a kasapala kantok ci Lians Kelipo maherek kako mikimad i, pakahemekay takowanan, kawra ikor milicayay: “Samaanen iso a misalof ko kimad, ho ngaˈay sakadademaken hani?”b Tada mikowaday takowanan pacakat to inaneng a pasifanaˈ, ho ihkal ko lalakaw no kimad, sakadademaken i kaˈorip.

1978 miheca, itini Mongtere iraay ko “Pakalowiday ko Pakasoˈlinay Falocoˈ” a Koksay Taykay, itira tora taykay cowa ka tawal ko ˈinorong ako itiya. Itiniay kako i Mitatangtangay to Kakaenen, maedeng faloay ˈofad ko mirienangay, sakadademakan niyam ko faelohay pakayraan mipalilam to kakaenen, o sapitangtang a lalosidan, dateng, ato pisaday, sahtoay o faelohay. 20 ko taˈangayay a pinsiyang, kawra marariday mapalak. ˈAyaw no taykay to cecay romiˈad, iraay ko masasiayay a miontoay, telocto i, lafii ngaˈ micomoday kami a misolimet tora pitaykayan, nikawrira, papacerem kami a misakalanam! Soˈlinto malotayay kami, kawra adihayay ko mananamay ako naitini i malalokay, matenesay ato mafanaˈay pakatawa a cafay. Tahanini malo ngaˈayayho a widang kami. Onini taykay i Kowipike tada ciepocay a likisi, samanen nai 1940 tangasa i 1960 mamihecaan, pakidemay ko sapalak to itiniay a salikaka. Tada makowaday ko falocoˈ ako mirienang tonini taykay!

Marariday misikay to kasapala a taykay i Mongtere, adihayay ko mananamay ako naitini i romaroma kantok. Cecay miheca, o salikaka ci Tafiti Splayen (Anini o Malohemay Malitengay i Congpo) ciˈinorongay mikayat to demak i kasapala a taykay. Ikor a cecay taykay, kakoto ko ciˈinorongay tonini a demak, misaˈicelay midama takowanan ci Tafiti.

Isaka 2011 miheca, 36 mihecaan kako to milisoˈay a tayal, ikor matahidangay kako malo singsi no Pahatatanamay to Malohemay Malitengay a Saˈopo. Ilalomaˈ no tosa miheca 75 ko nifotiˈan niyam a takal, kawra onini kihcod a pikinafalah o ciepocay. Pihererekan no lipalipay, matomesay ko miakoˈiday a falocoˈ no malohemay malitengay, samanen matinakoay nangra ko kaciharateng no Malohemay Malitengay i Congpo to nika lalaˈed nangra ato Kawas.

Ikor, malo singsiay no SKE kako. Adihayay ko mananamay, to romiˈamiˈad pitoay tatokian ko pitakci, to dadayadaya toloay tatokian misaday to lalakaw, to lipalipay sepat anca limaay ko hahatatanamen a kamok. Calemcemay ko sito caay pakadangar ko niyah, kawra kako ato roma singsi patalipaˈelalay cangranan, tatadiˈecen ko sapadama ni Yihofa. Tona mitadiˈecay ko sito ci Yihofaan madangarayto nangra ko pasangaray a demak, tada kafahkaˈan. Cowa ko mamapawan ako ko pisaˈicel nangra.

MACADA KO KACIHARATENG NO TAO, MIDAˈOCAY KO EPOC

O wina tada ciharatengay to tao, padamaay konini to mipacekiwan ningra padadotoc a macakat, ano o wamato mafalicay ko nika pinengneng to soˈlinay kimad. Mapatay ko wina ikor no tolo romiˈad, tayraay i Kasaˈopoan ko wama mitengil to pakapapotalay a kimad, macekokay kami. Ikor a 26 mihecaan, marariday ko wama mirienang to saˈopo. Soˈliˈlin cowa picada cingra to paputisem, kawra pasowalay ko malohemay malitengay takowanan, to lipalipay o wama ko saˈayaway tayra mirienang to saˈopo sanay.

O ngaˈayay taˈarawan no wina tangongolay ko pifiyor takowanan ato safa. O tatoloay fafahiyan safa ato faˈinay nangra madimadiay midoko ci Yihofaan, o tatosa fafahiyan a safa itiniay i fenpo a matayal, cecay itiniay i Putawya, cecay itiniay i Hayti.

Nohatini, kako aci Lanti itiniay i Hamilton no Antali malo mikiriwiˈay a misakafahay. Isalakat, malo milisoˈayho kako i, marariday mirienang kako to pilisoˈ ato pipacekiw no salikaka, kawra nohatini mahemekay kami maˈaraw ko pacekiwan niyam minanam a maolah ci Yihofaan. Roma sa i, matongalto ko kafanaˈ to salikaka i faelohay kasakopang i, maˈaraway ci Yihofa to samaanay midama cangranan itini kangaˈayan anca katatiihan nangra, tada pakowaday tamiyanan konini!

ˈAlomanay ko ciharatengay tamiyanan a salikaka, tada miakoˈiday kami cangranan. Mansa, padadotocay kami ‘mikifalocoˈ ciharateng’ to tao, pakalalok cangranan tano sangaˈayay no niyah patafang ci Yihofaan. (2 Korinto 7:6, 7) O fafahi no cecay salikaka, faˈinayan wawa ato fafahiyan wawa mirienangay to misakafahay, licayen ako koni salikaka miharatengay cingra mala misakafahay hokira, sowal sa cingra midamaay cingra tonini tatolo a misakafahay sanay. Oranto licay han ako cingra: “O pidama ni Yihofa coko mikikakaay to nika pidama iso han?” Pakalalokan ako cingra mitanam to malifokay no paro no lomaˈ ningra a hemek. Ikor no enem folad, misatapangayto cingra a misakafah.

Kako aci Lanti papadadotoc “palosiyang i teloteloc” to “tadamaanay a ˈicel” ni Yihofa, halamham cangranan malecad tamiyanan lipahak a matayal saki Yihofaan.—ˈOlic 71:17, 18.